Maaja

Yesuusi coyiꞌrinorinninna assinorinni hattono loosino maalalenni Annisi akatta guutu garinni leellishinota qaagi. (Yoh. 14:9) Yesuusi loosino maalalenni maa ronseemmo? Yesuusinna Annisi lowo geeshsha baxxannonke. Yesuusi uullate aana noo yannara, maalale loosanno wolqa horoonsiꞌre qarrantinore kaaꞌle manna lowo geeshsha baxannota leellishino. Mitte yannara lamu illiweelooti kaaꞌlannonsa gede raartanni iso huuccidhino. (Mat. 20:30-34) Yesuusi insa, ‘mararinonsatanna’ hursinonsata wodanchi. Kowiicho ‘mararro’ yine tirroonnihu Giriikete afii qaali, Yesuusi qarrantinore kuri mannoota laiti lowo geeshsha xissiisiꞌrinota kulannoho. Togoo mararro Yesuusi mannaho baxille leellishanno gede, hudidhinore itisanno gedenna dhiigu dhibbi amadinonsare hursanno gede kakkayissinosi. (Mat. 15:32; Maq. 1:41) Ninkeno ‘mararannohunna’ shaqqadu Maganinke Yihowanna Beettisi lubbora baxxannonketa hattono qarru iillannonke woyite xissiisidhannota addaxxa dandiineemmo. (Luq. 1:78; 1 Phe. 5:7) Insa mannu ooso shetto baala hoolate quqquxantannoti dihuluullissannote! w23.04 3 guf. 4-5

Sheexaanu alamera batidhinote gara ikkitinokki hedonni daafammeemmokki gede qoropha hasiissannonke. Qullaawa Maxaafa nabbambe hattono xiinxalline surrenkera danchu coyi woꞌmanno gede assiꞌra dandiineemmo. Gambooshshe haꞌranna soqqansho fulano wodananke agadhate kaaꞌlitannonke. Yihowano wolqankera aleenni ikkino fonqoli iillankera wore laꞌꞌannokkita kule qaale einonke. (1 Qor. 10:12, 13) Ninke mittu mittunku tenne qarrissannote goofimarchu yanna giddo Yihowara ammanamme heeꞌrate albinni roore huucciꞌra hasiissannonke. Yihowa huuccattotenni ‘qarranke baala isira hasaaphinammora’ hasiꞌranno. (Far. 62:8) Assinoꞌne coyi baalaho Yihowa guwisse hattono galatte. Soqqanshote worbuulle ikkitinanni gede kaaꞌlaꞌnera iso huuccidhe. Iillannoꞌne qarranna fonqolo baala qeeltinanni gede kaaꞌlaꞌnera eeggifattine huuccidhe. Aye coyi woy aye manchino ganyitine Yihowa huuccidhinannikki gede assaꞌnera wodhitinoonte. w23.05 7 guf. 17-18

Songote gambooshshe haꞌneemmohu mayiraati? Qaru korkaati Yihowa guwisiꞌrateeti. (Far. 26:12; 111:1) Qoleno gambooshshe haꞌneemmohu tenne qarru yannara mimmito jawaachishateeti. (1 Tes. 5:11) Gambooshshe haꞌne anga kayinse dawaro qolleemmo woyite konne lamenka coye assinanni heeꞌnoommo. Kayinni dawaro qolleemmo woyite qarra ikkannori tuncu yaankera dandaanno. Dawaro qola waajjineemmoha woy duucha hinge qola hasiꞌne heeꞌneennanni xaꞌma hoongankera dandiinanni. Fonqolo ikkannoha konne coye qeela dandiineemmohu hiittoonniiti? Soqqamaasinchu Phaawuloosi ‘mimmito jawaachishate’ illachisha hasiissannonketa coyiꞌrino. Harancho dawaro nafa qolle ammana noonketa leellishanke woloota jawaachishshannota huwantummoro, anga kayinse dawaro qola hakkeeshshi geeshsha diwaajjishshannonke. Qoleno dawaro qolleemmo gede duucha hinge xaꞌma hoonginkero songote giddo noori wolootu dawaro qoltanno faro afidhinota anfoommo daafira hagiidha dandiineemmo.—1 Phe. 3:8. w23.04 20 guf. 1-3

Lallawa lallamboonni! Baabiloonete qafadame mito 70 diro keeshshinohu Ayihudete manni gobbansa Israeele higanno gede fajjinoonninsa. (Izi. 1:2-4) Tenne assa dandaannohu Yihowa callaati. Baabiloonootu qafaddino manni haꞌrara difajjitannoreeti. (Isa. 14:4, 17) Kayinni Baabiloone baꞌino; qoleno haarote moohino moote Ayihudete manni fule haꞌra dandaannota kulino. Mittu mittunku Ayihudichi hakko iso maatete umo ikkitinori Baabiloonetenni fula woy hakko heeꞌra doodha hasiissannonsa. Togoo doorsha doodha shota ikka hooggara dandiitanno. Insa giddo batinyu manni diru akkalle amaddinonsaha ikkino daafira tenne seeda doogo haꞌra qarra ikkitansara dandiitanno. Qoleno rooru Ayihudete manni ilaminohu Baabiloonete ikkino daafira wole bayicho horonta heeꞌre diegenninoho. Insa Israeelete gobba, insata ikkitukkinni sirchinsa heeꞌrino gobba gede assite calla heddara dandiitanno. Mitu Ayihudete manni Baabiloonete dancha heeshsho heeꞌrannoha ikkara dandaanno; hakko daafira insara injiitino qaensa woy daddalonsa agurte affinokki gobba haꞌra qarra ikkitansara dandiitanno. w23.05 14 guf. 1-2

Maganu Qaali cinca, mararronna baxillu heeꞌrannonke gede assiꞌnammora jawaachishannonke. Luqaasi 21:19 “Cincitiniro, lubboꞌne gatisidhinanni” yitanno. Qolasiyaasi Sokka 3:12 “Mararro . . . uddidhe” yitanno. Qoleno 1 Teselonqe 4:9, 10 togo yitanno: “Mimmitu ledo baxama kiꞌnenni Maganuwiinni rossinoonni. . . . Ikkollana xaano hakkiinni roorsitine baxxinanni gede huucciꞌneemmoꞌne.” Kuri qummeeshshuwara noo hedo baala borreessinoonnihu wonanni cinca, mararronna baxille leellishshanni noo rosaanoraati. Ikkirono insa woꞌmanka woyite kuri akatta lossiꞌra hasiissinonsa. Ninkeno hatto assa hasiissannonke. Tennera kaaꞌlitannohe gede, hunda heeꞌrino Kiristaani kuri akatta leellishinohu hiittoonniitiro xiinxalli. Hakkiinni insa lawishsha harunsatto garanna tini bayiru qarrira qixxaawatto gede kaaꞌlitannohehu hiittoonniitiro wodanchi. Hakkiinni bayiru qarri hanafanno woyite cinca dandiinanni gara rosatto; hattono albillitte cincite heeꞌrate murciꞌratto. w23.07 3 guf. 4, 8

Buurammoommore woy “wolu geꞌreewi” widono ikkinummoro, ‘Qullaawa Doogonni’ fullummokkinni heeꞌra hasiissannonke; tini xaa yannara Yihowa magansiꞌnanni heeꞌneemmo gedenna albillitte Maganu Gashshooti abbanno atoote afiꞌneemmo gede assitannonke. (Yoh. 10:16) Lowo miliyoone ikkanno labballi, meentinna qaaqquulli 1919 M.D. hanafe Bayira Baabiloone yaano alamete doyichote kaphu ammaꞌno giddonni fule tenne lawishshu doogora haꞌra hanafino. Ayihudootu Baabiloonetenni fultu woyite Yihowa guficho ikkannonsare doogonsanni hoolino. (Isa. 57:14) Yannankera noote ‘Qullaawa Doogora’ haꞌranno mannirana? Yihowa 1919 albaanni noohu lowo diri giddo iso waajjanno manna horoonsiꞌre batinyu manni Bayira Baabiloone giddonni fulanno gede doogo qixxeessino. (Isayaasi 40:3 ledo heewisiisi.) Insa loossinohu lowo geeshsha hasiisanno loosi gedensoonni suwashshu wodani noonsa manni Bayira Baabiloone giddonni fule halaalu magansiꞌra wirro xintinoonniwa ayyaanaamittete gannate eanno gede assino. w23.05 15-16 guf. 8-9

Yihowa isira hagiirrunninna uminke fajjonni soqqammammosira hasiꞌranno. (2 Qor. 9:7) Ikkina mixonke wonshiꞌrate hasatto hooggunkero sharrama hasiissannonke? Hanni soqqamaasinchu Phaawuloosi lawishsha laꞌno. Isi, “Manninateꞌya gadadisanni miirannoe gede asseemmo” yiino. (1 Qor. 9:25-27) Phaawuloosi hasatto hooggusiro nafa gara ikkinore assate isonooto giddeessino woyiti no. Yihowa Phaawuloosi assinorinni hagiidhino? Ee hagiidhino! Phaawuloosi assinorira Yihowa maassiꞌrinosi. (2 Xim. 4:7, 8) Hatteente gede ninkeno hasatto noonkekkiha ikkiro nafa mixonke wonshiꞌrate sharrammanna laꞌꞌanno woyite Yihowa hagiidhanno. Yihowa mitto coye assineemmohu woꞌmanka woyite hakko coye banxeemmo daafira ikkikkinni iso banxeemmohura ikkinota afino daafira hagiidhanno. Yihowa Phaawuloosi maassiꞌrinte gede ninkeno assineemmorira maassiꞌrannonke. (Far. 126:5) Yihowa atoote afiꞌranke, hasatto heedhannonke gede nafa assitara dandiitanno. w23.05 29 guf. 9-10

Soqqamaasinchu Phaawuloosi Yihowa barra gatte saꞌannokkire goxino manni ledo heewisiisino. Goxino manni qooxeessinsara ikkannorenna yanna gooffannota diafanno. Hakko daafira insa ikkanni nooha lowo geeshsha hasiisanno coye diaffanno; hattono assite affannori dino. Xaa yannara noohu rooru manni ayyaanaamittetenni goxe no. (Rom. 11:8) Kuni manni heeꞌnoommohu “goofimarchu yannara” ikkinotanna bayiru qarri mulenni hanafannota leellishshanno malaatta diammananno. (2 Phe. 3:3, 4) Ikkirono ninke, baqqi yine heeꞌneemmo gede kulloonninke amaale hashshe soodi kiiro roore hasiissannota ikkitinota wodanchineemmo. (1 Tes. 5:6) Konni daafira wodanaaꞌmanna manseemmokkire ikka hasiissannonke. Mayira? Xaa yannara noohu poletikunna dagoomittete coyira anga wodhineemmokki gedeeti. Yihowa barri gambise dayi kiiro kuri coyibbara anga wodhineemmo gede xixxiiwannonkeri lexxanni haꞌranno. Ikkirono, togoo coyi tuncu yiinkero ma assineemmo yine yaada dihasiissannonke. Maganu ayyaani wodanaaꞌmineemmonna manseemmokki gede hattono gara ikkinore doodhineemmo gede kaaꞌlannonke.—Luq. 12:11, 12. w23.06 10 guf. 6-7

Samisoni yinanni suꞌma gannanna macciishshatto woyite mayi qulli yaannohe? Isi mageeshshi geeshsha worba ikkinoro qaagattoha ikkara dandaanno. Tini garankolla. Ikkirono Samisoni lowo geeshsha qarramanno gede assannosiha busha doorshano doodhino. Yihowa kayinni Samisoni ammaname assinore illachishino; lawishshaho xaggesi Qullaawu Maxaafi giddo borreessinanni gede assino. Yihowa doodhino mannasi Israeele kaaꞌlate Samisoni horoonsiꞌre dhagge ikkanno coye assino. Samisoni reyihunni lowo xibbi diri gedensaanni, Yihowa soqqamaasinchu Phaawuloosi dhagge ikkitanno ammana noonsa labballi suꞌma borreessanno gede assi woyite, Samisoni suꞌmano borreessanno gede assino. (Ibi. 11:32-34) Samisoni lawishshi jawaachishankera dandaanno. Isi qarru amadisi yannara nafa Yihowa addaxxino. Samisoni xaggenni jawaachishannoha kaajja roso ronseemmo. w23.09 2 guf. 1-2

Ganyine Yihowa huucciꞌnenna giddonketa baala isira hasaaphine albinni roore cincineemmore ikka dandiineemmo. (1 Tes. 5:17) Xaa yannara buutote qarri iillinohekkiha ikkara dandaanno. Ikkirono hanqisannorinna gurchaawatto gede assannori tuncu yaannohe woyite woy kadde amadattori baꞌꞌannohe woyite Yihowa huucciꞌratto? Barru barrunkunni iillannohe coyira Yihowa huucciꞌrattoha ikkiro, albillitte lowo qarri iillannohe woyiteno hatto assa qarra diꞌꞌikkitannohe. Hatto ikkiro, isi ate mamootenna hiittoonni kaaꞌlannohero afinota addaxxa dandaatto. (Far. 27:1, 3) Xaa yannara iillannonke qarra cincine saꞌneemmoha ikkiro, albillitte bayiru qarri yannara cincine saꞌꞌa qarra diꞌꞌikkitannonke. (Rom. 5:3) Hatto yineemmohu mayiraati? Batinyu ammanate roduuwinke ammanansanni kainohunni iillannonsaha mitto mittonka qarra dandiite saꞌꞌansa, hakkiinni aane iillannonsa qarrira kaaꞌlitinonsata huwattino. Iillannonsa qarra cincite saꞌꞌansa Yihowa insa kaaꞌla hasiꞌrannota albinni roore ammantanno gede kaaꞌlitinonsa. Ammana qolte hakkiinni aane iillannonsa fonqolo dandiite saꞌanno gede kaaꞌlitinonsa.—Yai. 1:2-4. w23.07 3 guf. 7-8

Yihowa umosi heeshshi assannohanna mararannoha ikkasi quwa saꞌꞌannokkiha ikkanno gede assitannosi. Lawishshaho, isi Soddoomaho heeꞌrannoha busha manna hunara kai yannara umosi heeshshi assannoha ikkinota leellishino. Yihowa sokkaasinesi widoonni keeraanchu manchi Looxi ilaalaamo qooxeessa hige xooqanno gede hajajinosi. Looxi kayinni hakkiira haꞌra waajjino. Hakko daafira Looxi isinna maatesi Yihowa hunara murinoha Zooaari yinanniha shiima katama hadhe maaxantanno gede fajjansara xaꞌmiꞌrino. Yihowa hasiꞌroommero Looxi uyinoonnisi biddishshira hajajamanno gede giddeessa dandaanno. Kayinni isi Zooaari katama hunara hedinoha ikkirono, Looxi xaꞌmiꞌrino xaꞌmora maahoyye yiino. (Kal. 19:18-22) Qoleno lowo diri gedensaanni Nennewete katamira heeꞌranno manna mararannota leellishino. Isi Nennewete katamanna hakkiicho heeꞌrannoha busha manna hunannota kule qorowisiisanno gede masaalaancho Yoonaasi soyino. Kayinni Nennewete manni aagintaawe higita Yihowa maarinonsa; hattono konne katama dihunino.—Yon. 3:1, 10; 4:10, 11. w23.07 21 guf. 5

Iyoaasi lawishshinni maa ronseemmo? Iyoaasi gari rumushsho afidhinokkite wole haqqicho irkidhe uurritino haqqicho gedeeti. Iyoaasi irkiꞌrino haqqicho yaano Yoodahe reyitanna kaadaasinete bubbe bubbissuta uwino. Konni lawishshinni, Maganoho hajajammeemmohu maatenke miilla woy songote giddo noo roduuwi isira hajajantino daafira calla ikka hasiissannokkita ronseemmo. Ayyaanaamittetenni kaajjine heeꞌrate, ninke uminkenni ganyine xiinxalla, hiinca, huuccatto assiꞌra hattono albinni roore Yihowa baxanna ayirrisa hasiissannonke. (Erm. 17:7, 8; Qol. 2:6, 7) Yihowa assa dandiineemmokkire asse diyaannonke. Isi assinammora hasiꞌrannore Rosiisaancho 12:13 xaphi assine kulloonni; qummeeshshu, “Kuni mannu woꞌmunkura hasiisinohona, Magano ayirrisi; hajajosino agadhi” yaanno. Magano waajjineemmoha ikkiro, albillitte iillannonke fonqolo dandiine saꞌꞌanna ammanammoommore ikkine heeꞌra dandiineemmo. Aye coyino Yihowa ledo noonke jaalooma hunara didandaanno. w23.06 19 guf. 17-19

Maganu uyino taje kultanni kiiro 5 “Ayirradu barcimira ofollinohu” yite hanaffanno. (Aju. 21:5a) Ajuujate maxaafira Yihowa xaaddote coyiꞌrinohu sasu bayichi giddo mittu konneeti. Hakko daafira konne addaxxinanni qaale coyiꞌrinohu Yihowa umosiiti ikkinnina wolqaataamo sokkaasincho woy reyotenni kainoha Yesuusa nafa diꞌꞌikkino! Tini, isi hakkiinni aane yiinore woꞌmunni woꞌma addaxxineemmo gede assitannonke. Hatto yineemmohu mayiraati? Korkaatuno Yihowa ‘kapha’ dandaannokki daafiraati. (Tit. 1:2) Hakko daafira Yohaannisi Ajuuja 21:5, 6 kulloonni qaali woꞌmunni woꞌma addaxxinanniho. “Kune” yaanno qaaleno hedi. “Kune” yine tirroonniha Giriikete Afii qaale Ajuujate maxaafi giddo duucha hinge horoonsiꞌnoonni. “Kune” yaanno qaalinni aane Maganu mayino? Isi, “Ani baalanka coye haaro asseemmo” yiino. Addaho, Yihowa albillitte biddi assanno coyi daafira kulanni no; isi uyino hexxo woꞌmitannota afino daafira hundihu Giriikete qaalinni tenne yaatto xawinsoonnihu woꞌmitanni noohu gede assineeti.—Isa. 46:10. w23.11 3-4 guf. 7-8

Soqqamaasinchu Pheexiroosi laanfesi qeeꞌlate sharrama diagurino. Hanni mito lawishsha laꞌno. Yesuusi Qullaawu Maxaafi masaalo woꞌmitanno gede qarramannonna reyanno gara kulita, Pheexiroosi iso seejjate woꞌnaalino. (Maq. 8:31-33) Pheexiroosinna wole rosaano duucha higge, ‘Ninke giddo roorannohu ayeti?’ yitanni heewisantino. (Maq. 9:33, 34) Yesuusi reyara albaanni noohu jeefote hashsha Pheexiroosi muddame mittu manchira macca mure tayisino. (Yoh. 18:10) Hakko hashshanni Pheexiroosi waajjino daafira jaalasi Yesuusa sase hige kaadino. (Maq. 14:66-72) Hakkiinni Pheexiroosi hururame wiꞌlino. Yesuusi konne hexxo mudhino rosaanchosi tuge diagurino. Isi reyotenni kaihu gedensaanni, baxillesi leellishanno gede Pheexiroosira faro faninosi. Yesuusi, Pheexiroosi umosi heeshshi asse geꞌreewosi towaatanno gede koyisinosi. (Yoh. 21:15-17) Pheexiroosino tennera maahoyye yiino. Yerusaalamete Phenxeqosxete ayyaani barra umo qullaawu ayyaaninni buuranturi giddo mittu Pheexiroosiiti. w23.09 22 guf. 6-7

Soqqamaasinchu Pheexiroosi songote cimeeyye “Maganu hoshsha allaalle” yee jawaachishinonsa. (1 Phe. 5:1-4) Ati songote cimeessaatiro ammanate roduuwakki baxattotanna insa towaata hasiꞌrattota anfoommo. Ikkirono mito woyite konne looso loosate yanna hoogoottohu woy lowo geeshsha daafuroottohu gede assite hedattora dandaatto. Togoo woyite maa assa dandaatto? Yaachishinohere Yihowara hasaaphi. Pheexiroosi, “Soqqamannohuno Maganu aannosi wolqa garinni soqqamo” yee borreessino. (1 Phe. 4:11) Ammanate roduuwakki xaa yannara woꞌmunni woꞌma baꞌꞌa dandaannokki qarri amadinonsaha ikkara dandaanno. Kayinni “qaru allaalaanchi” Yesuusi Kiristoosi ati assattorinni roore kaaꞌlansara dandaannota qaagi. Isi xaa yannarano ikko haaro alamera tenne assa dandaanno. Maganu songote cimeeyye ammanate roduuwansa baxxara, insa towaattaranna “hoshshate dancha lawishsha” ikkitaralla hasiꞌranno. w23.09 29-30 guf. 13-14

Mannu hedo huntannonkekki gede qoropha hasiissannonke. Yihowara hajajamannokki manni hedanno garinni hendeemmoha ikkiro, Yihowanna seerasi lashshi assinammora dandiineemmo. (1 Qor. 3:19) Duucha woyite, “tenne gobba egenno” maalu hasatto wonshiꞌnanni gede kakkayissanno. Phergamooninna Tiyaxiroosi heeꞌrannohu boodu Kiristaani hakko katamira heeꞌranno manni gede kaphu maganna magansiꞌranna foora hanafino. Insa foorre lashshi assite saꞌino daafira Yesuusi lamenta songo kaajjishe amaalino. (Aju. 2:14, 20) Xaa yannarano mannu gara ikkinokkire assineemmo gede xixxiiwannonke. Maatenke miillanna egenninoommo manni quwa saꞌnoommohu gede asse coyiꞌraranna Yihowa seera diingeemmo gede assate woꞌnaalara dandaanno. Lawishshaho insa amanyootunni xuru nookkire ikkine heeꞌra waaga afidhinokkihu gedenna Qullaawu Maxaafihu amanyootu seeri yannankera kaaꞌlannori nookkihu gede assite coyidhara dandiitanno. Mito woyite Yihowa aanno biddishshi xawe leellannokkiha lawankera dandaanno. ‘Borreessine worroonnihunni saꞌne haꞌrate’ fonqolammeemmoha nafa ikkara dandaanno.—1 Qor. 4:6. w23.07 16 guf. 10-11

Yesuusi amara Maariyaamira jawaante hasiissinose yanna no. Ise mine assidhinokkiha ikkirono godobbanno. Ise hakkuyira albaanni qaaqquulle lossidhe diegentino; ikkirono xa albillitte Buuramino Moote ikkanno qaaqqo towaattaraati. Ise seemo ikkitino daafira adhasera huucciꞌrinohu Yooseefira konne coye baala mayite kultanno? (Luq. 1:26-33) Maariyaami jawaante afidhinohu hiittoonniiti? Ise woloota kaaꞌlo xaꞌmidhino. Lawishshaho Gabirieeli uyinoonnise loosi daafira mitore lede kulannose gede xaꞌmidhino. (Luq. 1:34) Hakkiinni ise fiixase Elsaabeexi laꞌara “ilaalaame Yihudu gobbara” noo katama hadhino. Elsaabeexi Maariyaami galattinose; hattono ise Yihowa ayyaani kakkayiseennase Maariyaami iltanno qaaqqi daafira jawaachishshanno masaalo coyidhino. (Luqaasi 1:39-45) Maariyaami Yihowa “Wolqasinni jawaata looso loosino” yitino. (Luq. 1:46-51) Sokkaasinchu Gabirieelinna Elsaabeexi widoonni Yihowa Maariyaami jawaachishinose. w23.10 14-15 guf. 10-12

Kiristoosi rosaano giddonni boodu manni qullaawu ayyaaninni buuramanno; insara Yihowa ledo baxxino jaaloomi heeꞌrannonsa. Kuni 144,000 manni iima Yesuusi ledo kakkalaano ikke soqqamanno. (Aju. 14:1) Xaadooshshu dukkanihu Qullaawu Bayichi insa Maganu ooso ikkite uullate aana heedhino gara riqiwanno. (Rom. 8:15-17) Xaadooshshu dukkanihu Qullaawu Holgi Yihowa heeꞌrannoha iima riqiwanno. Xaadooshshu dukkanira nooha Qullaawa Darganna Qullaawa Holge badannohu ‘dakkanu hocci’ Yesuusi uullate aana maalunni heeꞌrino heeshsho riqiwanno; Yesuusi konni maalinni heeꞌre qara Kakkalaanote Biilo ikke ayyaanaamittennihu qullaawu minira ea yaano iimira haꞌra didandaanno. Yesuusi manna ikke heeꞌrino heeshshosi mannu oosora kakkalo asse, buuramino Kiristaani baalu iimira haꞌranno faro fanino. Insa iimi baꞌraaꞌra adhate maalunni heedhanno heeshshonsa agura hasiissannonsa.—Ibi. 10:19, 20; 1 Qor. 15:50. w23.10 28 guf. 13

Gedewooni Efireemi manni bushiishisi woyite awu afiinni qolino. (Eje. 8:1-3) Isi hanqe dicoyiꞌrino. Isi Efireemi manni hanqisinonsare kuli woyite seekke macciishshe umosi heeshshi assannoha ikkinota leellishino; konni garinni isi hanqinsa qiidanno gede assino. Hayyootu cimeeyye seekkite macciishshite hattono minshanninsa woyite awu afiinni qolte Gedewooni lawishsha harunsa dandiitanno. (Yai. 3:13) Konni garinni insa songote giddo keeru heeꞌranno gede assitanno. Gedewooni Midiyaamoota qeeleenna wolootu galattusita ayirrinye Yihowara uyino. (Eje. 8:22, 23) Shoomantino labballi Gedewooni lawishsha harunsa dandiitannohu hiittoonniiti? Insa loossino loosira Yihowa galantanni gede assa hasiissannonsa. (1 Qor. 4:6, 7) Lawishshaho mittu cimeessi dancha rosiisate dandoo noosi daafira galantannisi woyite, biddishsha afiꞌneemmohu Maganu Qaalinni ikkinota woy ninke baalanka dancha gede qajeelsitannonketi Yihowa dirijjite ikkitinota kulara dandaanno. Songote cimeeyye mito woyite mannu insa illachishanno gede assitanni nooronna teꞌee layiꞌra hasiissannonsa. w23.06 4 guf. 7-8

Huuccattonkera dawaro afiꞌnoommokkiha ikkiro, ninkeneeto ‘Huucciꞌranni noommori garaho?’ yine xaꞌma dandiineemmo. Duucha woyite ninkera woyyannonkere anfoommohu gede assine hendeemmo. Kayinni huucciꞌnanni heeꞌnoommo coyi kaaꞌlannonkekkiha ikkara dandaanno. Iillinonke qarri daafira huucciꞌnanni heeꞌnoommoha ikkiro, hakkonni huucciꞌnanni heeꞌnoommo qarrira woyyinohu wolu mali heeꞌrara dandaanno. Qoleno huucciꞌneemmohu mitu coyi Yihowa fajjo ledo sumuu yaannokkiha ikkara dandaanno. (1 Yoh. 5:14) Hanni qaaqqinsa halaalu mine heeꞌranno gede Yihowa huucciꞌrino anninna ama lawishsha laꞌno. Tini hasiissanno huuccatto labbara dandiitanno. Ikkirono Yihowa isira soqqamanno gede aye manchono digiddeessanno. Isi ninke baalunku hattono qaaqquullinkeno iso banxe magansiꞌnammosira hasiꞌranno. (Mar. 10:12, 13; 30:19, 20) Hakko daafira annuwunna amuuwu qaaqqinsa Yihowa baxanno gedenna isi jaala ikkanno gede assate, rosu wodanisira coanno garinni rosiissanno gede kaaꞌlansara Yihowa huucciꞌra dandiitanno.—Law. 22:6; Efe. 6:4. w23.11 21 guf. 5; 23 guf. 12

Woloota sheshifachisha insa banxeemmota leellishshanno yineemmohu mayiraati? Mitte Qullaawu Maxaafi daafira xawissanno borro yitanno garinni, Phaawuloosi horoonsiꞌrinohu “sheshifachisha” yaanno qaali ‘mitto buutote qarri amadinosi mancho sheshifachishate mulesi uurra’ yitanno tiro afiꞌrinoho. Ninkeno qarru iillinosiha ammanate rodoonke sheshifachinshe, kae uurranno gedenna heeshshote doogora haꞌra agurannokki gede kaaꞌla dandiineemmo. Ammanate rodoonke woꞌmanka woyite sheshifachinshe iso banxeemmota leellinsheemmo. (2 Qor. 7:6, 7, 13) Mararanna sheshifachisha xaadooshshe afiꞌrino akataati. Ma garinni? Mararanno manchi woloota sheshifachishanno hattono iillinonsa qarrinni beedho afidhanno gede assanno. Hakko daafira umihunni mararreemmo, hakkiinni sheshifachinsheemmo. Hanni Phaawuloosi, Yihowa manna mararasi sheshifachishannonsa gede assitannosihu hiittoonniitiro xawisino gara laꞌno. Phaawuloosi Yihowa ‘maarote Annanna, jawaante baalate Magano’ ikkinota xawisino.—2 Qor. 1:3. w23.11 9-10 guf. 8-10

Baalante Kiristoosi harunsaanora qarru iillannonsata anfoommo. Hanni soqqamaasinchu Phaawuloosi lawishsha laꞌno. Isi Teselonqe heeꞌranno Kiristaanira togo yiino: “Kiꞌne ledo heeꞌnoommo woyiteno qarru iillannonketa balanxe kulloommoꞌne. Yinoommo coyino ikkino.” (1 Tes. 3:4) Qoleno isi Qorontoosi heeꞌranno Kiristaanira togo yee borreessino: “Roduuwaꞌya . . . amadinonke qarri hiittoohoro affinara hasiꞌneemmo. . . . Lubbotenni heeꞌrate hexxo nafa baꞌinonke.” (2 Qor. 1:8; 11:23-27) Xaa yannara heeꞌranno Kiristaanirano mitu qarri iillannonsa. (2 Xim. 3:12) Atino Yesuusa ammanoottohuranna iso harunsatto daafira jaallakkinna fiixikki giwahera dandaanno. Baalunku coyira ammanamate murciꞌrootto daafira loosu bayicho qarru iillinohe? (Ibi. 13:18) Hexxokki wolootaho kulootto daafira gashshaano gibbinohe? Iillannonke qarri ikkihano ikkiro Phaawuloosi hagiidha hasiissannonketa kulino. w23.12 10-11 guf. 9-10

Yaiqoobi lowo qarra dandee saino. Yaiqoobi ooso giddo lamu yaano Simiooninna Leewi maatesi shollishannorenna Yihowa suꞌma mishiishannore assitino. Qoleno baxanno minaamasi Raaheeli layinki qaaqqose iltanni heedhe reyitino. Hatte gobbara lowo hude ubbino daafira, Yaiqoobi geedhimmate dirisinni Gibitse haꞌra hasiissinosi. (Kal. 35:16-19; 37:28; 45:9-11, 28) Kuni baalu qarri iillisirono Yaiqoobira ammanasi horo dibaꞌino; hattono Yihowa eino qaale addaxxa diagurino. Yihowano Yaiqoobi maassiꞌrinosi. Lawishshaho, Yihowa Yaiqoobi maalaamittetenni maassiꞌrinosi. Qoleno Yaiqoobi lowo yanna reyino yee hedanni keeshshino beettisi Yooseefinni galagale xaaditi Yihowa mageeshshi geeshsha galaxxinoro hanni hedi! Yihowa ledo noosihu muli jaaloomi Yaiqoobi iillinosi qarra baala qeele saꞌꞌanno gede kaaꞌlinosi. (Kal. 30:43; 32:9, 10; 46:28-30) Ninkeno Yihowa ledo noonkehu muli jaaloomi baꞌꞌannonkekki gede assiꞌnummoro hedeweelcho iillannonke qarra baala qeelle saꞌꞌa dandiineemmo. w23.04 15 guf. 6-7

Faarso 23 Yihowa baxillenna towaanyo addaxxinannita leellishshanno faarsooti. Tenne faarso borreessinohu Daawiti isinna Allaalaanchisi Yihowa mereero nooha kaajja jaalooma xawisino. Daawiti Yihowa massagannosi gede assiꞌrino daafira beꞌe diyiino; hattono woꞌmunni woꞌma iso addaxxino. Daawiti Yihowa heeshshosi diro woꞌma baxannosita afino. Isi Yihowa addaxxanno gede assinosiri maati? Daawiti Yihowa woꞌmanka woyite hasiisannosire aannosita afino daafira isi dancha gede towaatannosita addaxxino. Qoleno Daawiti Yihowa hagiirsiisinotanna isi jaalasi ikkinota afino. Albillitte aye coyino iillisiro Yihowa hasiisannosire baala asse towaata agurannosikkita addaxxinohu iseraati. Daawiti Yihowa baxannositanna towaatannosita addaxxino; tini isi dadillanno gede ikkikkinni hagiirrenna harshammo afiꞌranno gede kaaꞌlitinosi.—Far. 16:11. w24.01 29 guf. 12-13

Layinkihu Alamete Oli yannanni kayise Yihowa manni batinye gobbuwara sabbakate looso loosi woyite mito geeshshi keerenna wolapho afiꞌrino. Isinni kuni loosi dancha guma abbino. Xaa yannarano Aliidi Bisi miilla Kiristoosi aanno biddishsha harunsitanno. Insa roduuwaho uyitanno biddishshi Yihowa hasiꞌrannohu gedeeha ikkara hasidhanno. Woradu aliidi laꞌꞌaanonna songote cimeeyye qolte konne biddishsha songuwate kultanno. Buurantino cimeeyye Kiristoosite “qiniiticho angara” noohu gedeeti. (Aju. 2:1) Hige kuri cimeeyye guuntete xeꞌne noonsareetinna soꞌro loossannoreeti. Soqqamaasine soꞌro loossinonte gede Musenna Iyyaasuno soꞌro loossino woyiti no. (Kir. 20:12; Iya. 9:14, 15; Rom. 3:23) Ikkirono, Kiristoosi ammanaminohanna wodanaamo borojjicho hattono shoomantino cimeeyye dancha gede massaganni no; albillitteno insa massaga diaguranno. Konnira Yihowa albisa ikkite soqqantannori shoomantino roduuwi widoonni aannonke biddishsha addaxxineemmo gede assannonkehu ikkadu korkaati no. w24.02 23-24 guf. 13-14

Xaa yannara Yihowa lowo geeshsha galanteemmotanna banxeemmota woꞌma giddonkenni wolootaho kulle iso hagiirsiisa dandiineemmo. Soqqammeemmo woyite qara mixonke, mannu Yihowawa daanno gedenna ninkente gede baxillaancho Annanke afanno gede kaaꞌla ikkitinota qaaga hasiissannonke. (Yai. 4:8) Qullaawu Maxaafi Yihowa, baxillesi, taashshosi, hayyosi, wolqasinna wole baxissanno akkattasi xawisanno gara mannaho kula hagiirsiissannonke. Qoleno Yihowa lawishsha harunsate sharramme iso guwisanna hagiirsiisa dandiineemmo. Hatto assineemmoha ikkiro mannu tenne busha alame giddo ninke wolootuwiinni baxxinoommore ikkinoommota huwataranna baxxinoommore ikkinoommohu mayiraatiro xaꞌmara dandaanno. (Mat. 5:14-16) Barru baala mannu ledo xaande hasaambeemmo woyite baxxinoommore ikkinoommohu mayiraatiro xawinse kullammonsara dandiineemmo. Tini suwashshu wodani noonsa manni Maganinkewa daanno gede assitanno. Kuri doogganni Yihowa guwinseemmoha ikkiro isi wodana tashshi assineemmo.—1 Xim. 2:3, 4. w24.02 10 guf. 7

Ayyaanaamittetenni gikki yaate kaaꞌlitannohe dandoo rosa hasiissannohe. Tini songote giddo uyinannihe looso loosatto gede, umikkira woy maatekkira hasiisannore wonshate kaaꞌlannohe looso afiꞌratto gede hattono wolootu ledo dancha aante hedhannohe gede kaaꞌlitannohe. Lawishshaho, dancha gede nabbawanna borreessa rosi. Qullaawu Maxaafi barru baala Maganu qaale nabbawannonna hiincanno manchi hagiirraamo ikkannotanna assannori qinaannosita kulanno. (Far. 1:1-3) Togoo manchi Qullaawa Maxaafa barru baala nabbawasi Yihowa hedo afanno gede kaaꞌlitannosi; tini qolte Qullaawa Borronni rosinore loosu aana hosiisanno gede assitannosi. (Law. 1:3, 4) Ammanate roduuwinkera Qullaawu Maxaafi aana xintamino roso rosiisatenna dancha amaale amaalate dandoo noonsari labballu roduuwi hasiissanno. Dancha gede nabbawanna borreessa rosakki, woloota jawaachishshanno lallawo qixxaawatto gedenna gambooshshunniwa dancha dawaro qolatto gede kaaꞌlitannohe. Qoleno, ammanakki kaajjishiꞌratto gedenna woloota jawaachishatto gede kaaꞌlitannoheta jawaachishshanno hedo borreessite amaxxa dandaatto. w23.12 26-27 guf. 9-11

Waajjatto gede assannoheri tuncu yaannohe woyite, Yihowa albillitte Sheexaanu baꞌꞌanno woyite assannore hiinci. Lawishshaho 2014hu qoqqowu gambooshshiwa shiqqinoti mitte loonse leellinshanni ikkito, mittu anni maatesi ledo 2 Ximootewoosi 3:1-5 noo hedo haaro alamera ikkoommero mayine nabbambanniro hasaawanna leellishshanno. Togo yine nabbambanni: “Haaro alamera yanna baxissannota ikkitanno. Mannu wole manna baxannoha, ayyaanaamittete coye baxannoha, naaxxannokkiha, umosi heeshshi assannoha, xonamannokkiha, iltinonsarira hajajamannoha, galatannoha, ammanaminoha, maatesi baxannoha, araara baxannoha, wolootu daafira danchare hasaawannoha, umosi qeeꞌlannoha, mararannoha, danchumma baxannoha, yiinowa hosannoha, muddamannokkiha, booꞌnannokkiha, umisi qiniitinni roore Magano baxannohanna Maganoho galinoha ikkanno; togoo manniwa aani.” Maatekki woy ammanate roduuwikki ledo haaro alamera heeshsho hiittoota ikkitannoro hasaawatto? w24.01 6 guf. 13-14

Yihowa manni gaamote deerrinni iso hagiirsiisannota afanke lowo geeshsha sheshifachishshannote! Qullaawu Maxaafi, “Kaaliiqi mannisinni hagiidhanno” yaanno. (Far. 149:4) Mito woyite kayinni mitootu, ‘Yihowa anenni hagiidhanno?’ yite yaaddanno daafira, hexxo mudhitara dandiitanno. Hundi yannara heedhinoti batinye ammanantinoti Yihowa soqqamaanono hatto yite huluullantino woyiti no. (1 Sam. 1:6-10; Iyo. 29:2, 4; Far. 51:11) Qullaawu Maxaafi guuntete xeꞌne noonsa manni Yihowa hagiirsiisa dandaannota xawise kulanno. Hiittoonni? Yesuusi Kiristoosi ammanneemmota leellishanna cuuama hasiissannonke. (Yoh. 3:16) Konni garinni cubbinkera maaro eꞌnoommotanna Maganu fajjo assate qaale eꞌnoommota mannu albaanni leellinsheemmo. (Soq. 2:38; 3:19) Yihowa isi ledo noonke jaalooma kaajjishiꞌrate hatto assineemmo woyite hagiidhanno. Heeshshonke isira sayinse uyinummo woyite eꞌnoommo qaali garinni heeꞌrate dandiinummore baala assineemmoha ikkiro, Yihowa hagiirsiinseemmo; hattono isi muli jaallasi gede asse laꞌꞌannonke.—Far. 25:14. w24.03 26 guf. 1-2

Gashshaano sabbaka agurreemmo gede hajajjunkero nafa agurrummokki sabbanke Yesuusi rosaano lawishsha harunsa dandiineemmo. Yihowa soqqanshonke umo fushshineemmo gede kaaꞌlannonketa addaxxa dandiineemmo. Konnira worbimmanna hayyo aannohe gede, hattono iillannohe qarra dandiite saꞌꞌatto gede kaaꞌlahera Yihowa huucciꞌri. Ninke giddo batinye dhiwanni waadannonke, xissiisiꞌneemmo gede assannori tuncu yaannonke, banxeemmo manna shiiꞌneemmo, maatenkera qarru iillanno, hattono dartu woy wolu qarri iillannonke. Olunna fayya qolte, iillannonke qarra dandee saꞌꞌa roore qarra ikkitannonke gede assitanno. Togoo woyite giddokkita fushshite Yihowara hasaaphi. Muli jaalikkira hasaaphattonte gede qarrakki Yihowara kuꞌli. Yihowa ‘towaatannoheta’ huluullantooti. (Far. 37:3, 5) Jaante huucciꞌra ‘qarru yannara cincineemmo’ gede kaaꞌlitannonke. (Rom. 12:12) Yihowa soqqamaanosira hiittoo qarri iillanni noonsaro afino; ‘raarensano macciishshanno.’—Far. 145:18, 19. w23.05 5-6 guf. 12-15

Lowo geeshsha hasiisanno doorsha doodhineemmo woyite, ‘Yihowa hedo maatiro wodanchanna’ isi hedo ledo sumuu yaannore assa hasiissannonke. (Efe. 5:17) Loosu aana hosiisa hasiissannonkeha Qullaawu Maxaafiha xintu seera bade afanke Maganu hedo maatiro afate kaaꞌlitannonke. Hakkiinni isi fajjo ledo sumuu yaannore assinummoro dancha doorsha doodha dandiineemmo. ‘Bushu’ yaano diininke Sheexaanu tenne alame coye shorrinanni Maganoho soqqamate yanna hoongeemmo gede assa hasiꞌranno. (1 Yoh. 5:19) Mittu Kiristaanchira Yihowara soqqamanno faro hasiꞌrantenni maalaamittete jiro, roso woy looso balaxisiisa rakkasira dandiitanno. Isi hatto assannoha ikkiro, tini Yihowara soqqamannokki manni hedanno garinni heda hanafinota leellishshannote. Hige tini coyibba bunshe diafidhino; kayinni heeshshonke giddo horo balaxisiisa hasiissannonketa diꞌꞌikkitino. w24.03 24 guf. 16-17