Bocaasa

Annuwanna amuuwa, dirinsa deerra heddinanni oosoꞌne gambooshshunniwa dawaro qolate qixxaabbanno gede kaaꞌlensa. Mito woyite gambooshshunniwa shota ikkitinokki haja daafira lawishshaho, adhantinori mereero kalaqamanno qarri daafiranna amanyootu daafira ronsanni; togoo woyite ooso dawaro qola dandiitannoti mitte woy lame gufo heedhara dandiitanno. Qoleno oosoꞌne anga kayissu kiiro xaꞌma hoongansara dandiinannihu mayiraatiro huwattanno gede kaaꞌlensa. Hatto assaꞌne insa agurre woloota xaꞌminanni woyite hexxo mudhitannokki gede kaaꞌlitannonsa. (1 Xim. 6:18) Ninke baalunku Yihowa ayirranno gede assitannotanna ammanate roduuwanke jawaachishshannota kiꞌanno dawaro qixxaawa dandiineemmo. (Law. 25:11) Mito woyite haransine uminke woꞌnaalsha kula dandiineemmoha ikkirono, ninkeneeti daafira lowore coyiꞌneemmokki gede qoropha hasiissannonke. (Law. 27:22; 2 Qor. 10:18) Dawaro qolleemmo woyite Yihowa, Qaalesinna mannasi illachishate sharrammeemmo.—Aju. 4:11. w23.04 24-25 guf. 17-18

Baxillu baqqi yinenna jilbunni heeꞌrate kaaꞌlannonke. (Mat. 22:37-39) Sabbaka qarru iillannonke gede assitannonkeha ikkiro nafa, Maganoho noonke baxilli agurrummokkinni sabbankeemmo gede kaaꞌlannonke. (2 Xim. 1:7, 8) Yihowa Farciꞌraasine ikkinokki mannano banxeemmo daafira sabbankeemmo; silke dowwollenna borrote sokka borreessine nafa farciꞌra diagurreemmo. Qoqqowinkera noo manni barrunni mitto barra soorrame gara ikkinore assa hanafanno yine hexxa diagurreemmo. (Hiz. 18:27, 28) Ammanate roduuwankeno banxeemmo. ‘Mimmito jawaachinshenna dhaambe’ insa banxeemmota leellinsheemmo. (1 Tes. 5:11) Mitte garo ikkite olantanno olamaano gede ninkeno mimmito jawaachinsheemmo. Anfanni heeꞌnenni ammanate roduuwanke horonta digawajjineemmo; woy dirabbisiꞌneemmo. (1 Tes. 5:13, 15) Qoleno songote giddo albisa ikkite soqqantanno roduuwa ayirrinse baxillenke leellinsheemmo.—1 Tes. 5:12. w23.06 10 guf. 6; 11 guf. 10-11

Ammananke kaajjishiꞌneemmoti umi doogo wodote daafira hiincate. Wodo Yihowa eino qaale wonshannota buuxissanno tajeeti. Wodo qixxeessinoonnihu mayiraatironna Yihowa wodo qixxeessate maa assinoro seekkine hendummoro, Maganu haaro alamera gawalo nookki heeshsho aankera eino qaale wonshannota albinni roore ammanneemmo. Hatto yineemmohu mayiraati? Yihowa wodo qixxeessate maa assino? Yihowa baxannoha mitto Beettosinna muli jaalasi iiminni uullara soye guuta mancho ikke ilamanno gede assino. Yesuusi uullate aana noo yannara baalanka qarra dandee saino. Hakkiinni isi buuto qarrame reyino. Addanko Yihowa lowo waaga baatino! Baxillaanchu Maganinke shiima yanna calla dancha heeshsho heeꞌnammora yee Beettisi qarramannonna reyanno gede horo diassanno. (Yoh. 3:16; 1 Phe. 1:18, 19) Yihowa muxxe Beettosi uyinonke daafira haaro alamera hegerera heeꞌneemmo gede assannonketa dihuluullammeemmo. w23.04 27 guf. 8-9

Yihowara reyitinore kayisate hasatto noosi? Ee noosi. Isi batinye Qullaawu Maxaafi borreessaano albillittete kao daafira borreessitanno gede assino. (Isa. 26:19; Aju. 20:11-13) Qoleno Yihowa qaale eiro woꞌmanka woyite eino qaale wonshanno. (Iya. 23:14) Isinni Yihowa reyitinore kayisate quqquxamanno. Hanni Iyyoobi coyiꞌrinore laꞌno. Isi reyiro nafa Yihowa iso reyotenni kayisate quqquxamannota ammanino. (Iyo. 14:14, 15) Yihowa iso magansidhannore baala reyotenni kayisate quqquxamanno. Isi insa reyotenni kaꞌe ordu fayyimmanna hagiirre afidhe heedhanno gede assate quqquxamanno. Yihowa daafira rosate faro afiꞌrikkinni reyinohu lowo biliyoone ikkanno manni hiikkannoyya? Baxillaanchu Maganinke insano reyotenni kayisa hasiꞌranno. (Soq. 24:15) Yihowa insa isi jaala ikkatenna uullate aana hegerera heeꞌrate faro afidhanno gede assa hasiꞌranno.—Yoh. 3:16. w23.04 9 guf. 5-6

Hexxokki kaajjishiꞌra dandaattohu hiittoonniiti? Lawishshaho hexxokki hegerera uullate aana heeꞌra ikkituro, Qullaawu maxaafi Gannatete daafira kulannore nabbawi hattono hiinci. (Isa. 25:8; 32:16-18) Haaro alamera heeshsho hiittoota ikkitannoro hedi. Hakko noottohu gede assite hedi. Haaro alamera heeꞌneemmo heeshsho woꞌmanka woyite hendeemmoha ikkiro, xa iillannonke qarri ‘shiimanna saꞌꞌannoha’ ikkinota qaangeemmo. (2 Qor. 4:17) Yihowa uyinohe hexxo widoonni jawaachishannohe. Isi jawaante afiꞌrate hasiisannohere wonanni balaxe qixxeessinohe. Hakko daafira uyinoonnihe looso umo fushshate, iillannohe qarra dandiite saꞌꞌate woy hagiirrikki baꞌꞌannokki gede assiꞌrate kaaꞌlahera giddokkita Yihowara kulte huucciꞌri; hattono hojju xiinxallo assidhe isi biddishsha hasiꞌri. Ammanate roduuwikki kaaꞌlitannohe woyite maahoyye yii. Hexxokki xabbe leeltannohe gede assiꞌri. Hatto assittoro, ‘cincatenni baalanka coye dandiite qixxaawoottoha ikkatto gede Mootichu jawa wolqasinni jawaante baala aannohe.’—Qol. 1:11. w23.10 17 guf. 19-20

Huuccattotenni Yihowa galanteemmo gede assannonkehu batinyu korkaati no. Uyinonkehu danchu coyi baalaho iso galata dandiineemmo; korkaatuno dancha elto baalate buicho isooti. (Yai. 1:17) Lawishshaho biifado baattonna dhagge ikkanno kalaqami baalaho iso galata dandiineemmo. Qoleno heeshsho uyinonke daafira, maatenke daafira, jaallanke daafira hattono hexxonke daafira iso galata dandiineemmo. Hattono isi ledo muxxe jaalooma kalaqiꞌneemmo gede assinonke daafira Yihowa galata dandiineemmo. Ninke mittu mittunku Yihowa galanteemmo gede assannonke korkaata hedate sharrama hasiissannonkeha ikkara dandaanno. Korkaatuno heeꞌnoommohu galata afiꞌrinokki manni batiꞌrino alameraati. Mannu duucha woyite noonsarira galatantenni afiꞌra hasiꞌranno coye calla illachishanno. Ninkerano togoo akati heeꞌrinkero Yihowa mito coye aankera calla huucciꞌnammora dandiineemmo. Togoori kalaqamannokki gede Yihowa assinonke coyi baalaho woꞌmanka woyite galanteemmota leellisha hasiissannonke.—Luq. 6:45. w23.05 4 guf. 8-9

Yihowa baxillaancho Annanke ikkino daafira ninke xissiisiꞌnanna laꞌꞌa dihasiꞌranno. (Isa. 63:9) Ikkirono isi wayinni woy giiratenni lawinsoonni qarri baalu iillannonkekki gede diassanno. (Isa. 43:2) Ikkollana togoo qarri ‘giddoonni hinge saꞌneemmo’ gede kaaꞌlannonketa kule qaale eino. Qoleno Yihowa iillannonke qarri hegerera gawajjankera wore dilaꞌꞌanno. Hattono iillannonke qarra dandiine saꞌneemmo gede kaaꞌlannonkeha wolqaataamo qullaawa ayyaanasi aannonke. (Luq. 11:13; Fil. 4:13) Hakko daafira Yihowa woꞌmanka woyite iillannonke qarra dandiine saꞌneemmo gedenna isira ammanamme heeꞌneemmo gede kaaꞌlannonkeha hasiise noonke coye aannonketa addaxxa dandiineemmo. Yihowa iso addaxxinammora hasiꞌranno. (Ibi. 11:6) Mito woyite iillannonke qarri wolqankera aleenni ikkinoha lawankera dandaanno. Yihowa kaaꞌlannonketa huluullama nafa hananfammora dandiineemmo. Kayinni Qullaawu Maxaafi, ‘Maganu wolqanni qiisho tayinse saꞌꞌa’ dandiineemmota kulannonke. (Far. 18:29) Hakko daafira huluullama agurre Yihowa huuccattonkera dawaro qolannota addaxxine ammanantenni huucciꞌra hasiissannonke.—Yai. 1:6, 7. w23.11 22 guf. 8-9

Tini addu baxille dancha gede assite xawissanno hedooti! Tini hedo minaannanna minaama lowo geeshsha jawaachishshanno: Mimmitoho nooꞌne baxilli geedonniha ikkara dandaanno. Minaanniranna minaamara heeshshonsa diro baala geedanno baxilli heeꞌransara dandaannohu insa assa hasiissannonsare assituro callaati. Lawishshaho giira buwa agurtannokki gede haqqe wora hasiissanno; haqqe wora agurriro kayinni sunu sununni xoꞌe baꞌanno. Hatteente gede minaanninna minaama mereero noo baxilli kaajje heeꞌrannohu insa mereeronsa noo jaalooma kaajjishidhuro callaati. Minaanniranna minaamara roorenkanni angate anje amaddannonsa woyite, dhibbu waadannonsa woyite woy ooso lossiꞌra qarra ikkitannonsa woyite baxillinsa qiidara dandaanno. Konni daafira ‘Kaaliiqi buwani’ xoannokki gede assiꞌrate minaanninna minaama Yihowa ledo noonsa jaalooma kaajjishiꞌrate sharrama hasiissannonsa. w23.05 20-21 guf. 1-3

Worbuulle ikkate maa assa hasiissannonke? Annuwinkenna amuuwinke worbuulle ikkineemmo gede jawaachishshankera dandiitanno; kayinni kuni akati raggetenni afiꞌnanniha diꞌꞌikkino. Worba ikka haaro dandoo rosate gedeeti. Mitte dandoo rosa dandiinanniti mitte doogo rosiisaanchu assannore seekkine laꞌꞌatenna isi lawishsha harunsate. Ninkeno worbuulle ikkate wolootu konne akata leellishshanno gara seekkine laꞌꞌanna insa lawishsha harunsa dandiineemmo. Ninkeno Daanieeli gede Maganu Qaale seekkine xiinxalla hasiissannonke. Woꞌmanka woyite giddonketa Yihowara fanne hasaaphine isi ledo muli jaalooma kalaqiꞌra hasiissannonke. Isi woꞌmanka woyite kaaꞌlanni noonketa ammanne iso addaxxa hasiissannonke. Hatto assinummoro, ammananke fonqolannori tuncu yaannonke woyite worbuulle ikkineemmo. Worba ikka wolootu ayirrissannonke gede assitanno. Qoleno suwashshu wodani noonsa manni Yihowawa daanno gede assitara dandiitanno. Addanko, worbuulle ikka hasiꞌneemmo gede assannonkehu ikkadu korkaati no. w23.08 2 guf. 2; 4 guf. 8-9

“Fonqole laꞌꞌa” yine tirroonniti Giriikete afii yaatto mittu siwiili addunnihoronna teꞌee fonqolle laꞌꞌate horoonsiꞌnannite. Hatteente gede ninkeno macciishshineemmo woy nabbambeemmo coyi garahoronna teꞌee buuxate fonqolle laꞌꞌa hasiissannonke. Quuxxote qarri gambise dayi kiiro albinni roore hatto assa hasiissannonke. Wolootu yitannore sammi yine ammanantenni hedate dandoonke horoonsiꞌne macciishshinoommorenna nabbamboommore Qullaawu Maxaafinna Yihowa dirijjite yitannori ledo heewisiinse laꞌꞌa hasiissannonke. Hatto assineemmoha ikkiro agaanintete totainni didogammeemmo. (Law. 14:15; 1 Xim. 4:1) Maganu soqqamaano gaamote deerrinni bayira qarra gatte saꞌanno. Ikkirono annu annu deerrinni gaꞌa mayi iillannonkero dianfoommo. (Yai. 4:14) Kayinni lubbotenni heeꞌne bayira qarra gante saꞌnummoro woy bayiru qarri daara albaanni reyinummorono ammanamme heeꞌnummoro hegere heeshsho baꞌraaꞌra afiꞌneemmo. Ninke baalunku dhagge ikkitanno hexxonke illachinsho hattono Yihowa barrira qixxaambe heeꞌno! w23.06 13 guf. 15-16

Mite Qullaawu Maxaafi masaalo woꞌmitannohu hiittoonniitiro dianfoommo. (Dan. 12:8, 9) Kayinni mitte masaalo woꞌmitanno gara dianfoommo yaa hatti masaalo diwoꞌmitanno yaa diꞌꞌikkino. Yihowa konni albaanni assinonte gede, afa hasiissannonke coye hasiissanno yannara anfeemmo gede assannota mittoreno dihuluullammeemmo. Muli yannara, “Keereho, qarru dino” yaanno lallawa lallambanni. (1 Tes. 5:3) Hakkiinni alamennihu poletiku gashshooti kaphu ammaꞌno sianno hattono hunanno. (Aju. 17:16, 17) Hakkunni gedensaanni Maganu manna sianno. (Hiz. 38:18, 19) Tini ikkito jeefote oli yaano Armagedooni oli hanafanno gede assitanno. (Aju. 16:14, 16) Kuni siꞌꞌi keeshshannohu shiima yanna calla ikkinota addaxxa dandiineemmo. Hakka geeshsha kayinni, Qullaawu Maxaafi masaalo illachinshenna wolootuno hatto assitanno gede kaaꞌline baxillaancho iimi Annanke galanteemmota leellinsho. w23.08 13 guf. 19-20

Soqqamaasinchu Phaawuloosi, ammanate, hexxotenna baxillu daafira coyiꞌri woyite “Kuri sasunku giddo rooru baxilleho” yiino. (1 Qor. 13:13) Isi hatto yiinohu mayiraati? Albillitte Maganu haaro alame abbannota kulino qaali woꞌmanno daafira, hakkuyi gedensaanni kuni qaali woꞌmannota ammana woy hexxa dihasiissannonke. Kayinni woꞌmanka woyite Yihowanna manna baxa hasiissannonke. Isinni, Yihowaranna mannaho noonke baxilli hegerera lexxanni haꞌranno. Ammanate roduuwa baxanke addu Kiristaana ikkinoommota bande anfanni gedeno assitanno. Yesuusi rosaanosira togo yee kulinonsa: “Kiꞌne kiꞌneneewa baxantiniro, ane rosaano ikkitinoonnita mannu baalu tennenni egennannoꞌne.” (Yoh. 13:35) Qoleno mimmito baxanke mittooꞌmineemmo gede assitanno. Phaawuloosi baxillu “woꞌma mittimma aannoha” ikkinota kulino. (Qol. 3:14) Soqqamaasinchu Yohaannisi ammanate roduuwisira, “Magano baxannohu rodoosi [baxa]” hasiissannosi yee borreessino. (1 Yoh. 4:21) Mimmito banxeemmoha ikkiro, Magano banxeemmota leellinshanni heeꞌnoommo. w23.11 8 guf. 1, 3

Qullaawu Maxaafi ninke Kiristaanu heeshsho qolchanshote ledo heewisiisanno. Jeefote geeshsha doddannori hegere heeshsho baꞌraaꞌra afidhanno. (2 Xim. 4:7, 8) Qolchanshonke jeefinseemmo yanna albinni roore gambisse daggino daafira, woꞌmanka woyite jawaante dodate dandiinummore baala assa hasiissannonke. Soqqamaasinchu Phaawuloosi qolchanshonke jeefisate maa assa hasiissannonkero xawise kulino. Isi, “duha ikkannonkere baala . . . hunne, albankeenni noo qolchanshora cincatenni jawaante” dondeemmo gede kulinonke. Phaawuloosi mittu Kiristaanchi duqqa hasiissannosi duhi dino yaateni? Deeꞌni. Isi hatto yiinohu hasiisannokki duha baala hooꞌla hasiissannonketa kulateeti. Togoo duhi gufiꞌneemmonna wolqa baꞌneemmo gede assankera dandaanno. Jawaante dodate, wolqa baꞌneemmo gede assannoha hasiisannokki duha baala bande afanna hooꞌla hasiissannonke. Ikkirono kayinni duqqa hasiissannonke duha huna dihasiissannonke. Hatto ikka hoogiro qolchanshote giddonni fullammora dandiineemmo.—2 Xim. 2:5. w23.08 26 guf. 1-2

Quwa saꞌneemmokkire ikkanke wolootu hedo ayirrinseemmo gede kaaꞌlitannonke. Lawishshaho mitu meya roduuwinke addi addire buudhe seesa baxanno; wolootu kayinni dibaxanno. Mitu Kiristaani ago quwa saikkinni aga baxanno; wolootu kayinni horo diagganno. Baalunku Kiristaani dancha ordu fayyimma heedhansara hasiꞌranno; kayinni fayyimmansa towaaxxanno gari babbaxxanno. Ninke xagisiꞌneemmo gari woyyanno yine wolootuno tenne assitanno gede ammansiisate woꞌnaalleemmoha ikkiro, gufidhanno gedenna babbadooshshu kalaqamanno gede assinammora dandiineemmo. (1 Qor. 8:9; 10:23, 24) Lawishshaho, Yihowa konni garinni uddidhe konni garinni uddidhinoonte diyiinonke; hatteentenni harunsineemmoha xintu seera uyinonke. Uddiꞌneemmo gari, Magano hagiirsiisannoha, quwa saꞌneemmokkire ikkinoommota leellishannoha hattono ‘kawajjaamma’ ikkinoommota leellishannoha ikka hasiissannosi. (1 Xim. 2:9, 10) Hakko daafira mannu ninke calla illachishanno gede assanno garinni uddiꞌra dihasiꞌneemmo. Qullaawu Maxaafihu xintu seeri songote cimeeyye uddiꞌratenna seesate daafira uminsa seera fushshitannokki gedeno kaaꞌlannonsa. w23.07 23-24 guf. 13-14

Yihowa albillitte afiꞌneemmo atootira kaima ikkannore kulinonke. ‘Hawanya’ mancho koyishsha macciishshite adhitannori foorre afiꞌnanni hagiirre afiꞌrate woꞌnaaltanno. Assootinsa insa ‘reyote’ widira massannonsa. (Law. 9:13, 17, 18) Manchote gede assine kulloonni ‘egenno [addu hayyo]’ koyishsha adhitannori afidhanno coyi kayinni baxxinoho! (Law. 9:1) Ninke Yihowa baxannore baxanna isi giwannore giwa ronsanni heeꞌnoommo. (Far. 97:10) Qoleno wolootu addu hayyonni hagiirre afidhanno gede koyinseemmo daafira hagiirraammaho. Katamu tullichira uurrine, “Egenno xeꞌinohu baalu anewa amo!” yine woshshinanni heeꞌnoommohu gedeeti. Ninkeno ikko koyishsha macciishshite adhitannori afidhanno horo xaata calla diꞌꞌikkitino; afiꞌneemmo atooti hegereho. Kuni atooti ‘wodanchate doogora haꞌnanni’ hegerera heeꞌneemmo gede assannonkeho.—Law. 9:3, 4, 6. w23.06 24 guf. 17-18

Ledokki loossannori woy rossannori ammanakki daafira xaꞌmitannohe woyite mayi macciishshamannohe? Waajjatto? Ninke giddo rooru waajjineemmo. Ikkollana togoo xaꞌmuwa wolootu maa heddannoro woy mayite ammantannoro huwanteemmo gede kaaꞌlitannonke daafira dancha duduwo kulleemmo faro fantannonke. Ikkirono mitu manni xaꞌmo xaꞌmannohu ninke ledo sumuu yaannokki daafira woy heewisamate yee ikkara dandaanno. Tini dhagge diꞌꞌikkitannonke. Insa ammaꞌnonke daafira gara ikkinokkire macciishshitinoha ikkara dandaanno. (Soq. 28:22) Hakkiino sae heeꞌnoommohu, batinyu manni ‘araara giwannohanna mararro afiꞌrinokkiha ikkinote goofimarchu barruwa’ giddooti. (2 Xim. 3:1, 3) ‘Mittu manchi ammanaꞌya daafira ane ledo heewisamanno woyite shaqqillunninna hayyotenni hasaawisa dandeemmohu ma garinniiti?’ yite hedattoha ikkara dandaanno. Tennera kaaꞌlannoheri maati? Joongilleho. Joogu manchi shiimurinni dihanqanno; hatteentenni hanqisannori woy caacceessannori tuncu yaannosi woyite isonooto eemadhanno. w23.09 14 guf. 1-2

Mito woyite, maalaamittete jiro shorrineemmokki gedenna Yihowa seera diingeemmokki kaaꞌlitanno amaale uyinanninke. Togoo woyiteno Yihowa biddishsha harunsineemmoha ikkiro atoote afiꞌneemmo. (Isa. 48:17, 18; 1 Xim. 6:9, 10) Yihowa quuxxote qarri yannaranna Kumu Diri Gashshooti yannarano biddishsha aate mannu ooso horoonsiꞌrannoti dihuluullissannote. Woꞌmanka woyite konne biddishsha harunsineemmo? Xaa yannara Yihowa aannonke biddishsha harunsineemmoha ikkiro hatte yannarano hajajama qarra diꞌꞌikkitannonke. Hakko daafira woꞌmanka woyite Yihowaranna isi shoomino labballi uyitannonke biddishshira hajajammo. (Isa. 32:1, 2; Ibi. 13:17) Hatto assineemmoha ikkiro, ayyaanaamittenke gawajjannoriwiinni agarannonkehanna haaro alamera hegere heeshsho afiꞌneemmo gede assannonkeha Massagaanchonke Yihowa addaxxineemmo gede assannonkehu ikkadu korkaati heeꞌrannonke. w24.02 25 guf. 17-18

Soqqamaasinchu Phaawuloosi Yihowara hagiirrunni soqqamino; ikkirono isi lowo qarra dandee saino. Isi duucha hige seeda doogo haꞌrino; hatte yannara togoo doogo haꞌra qole shota diꞌꞌikkitino. Isi tenne doogo haꞌri woyite “wayinna lolahu hattono mulqidhannori” qarrissinosi. Qoleno gibbannosiri gantinosi woyiti no. (2 Qor. 11:23-27) Hakkiinni saeno ammanate roduuwisi Phaawuloosi insa kaaꞌlate sharraminotera woꞌmanka woyite digalattinosi. (2 Qor. 10:10; Fil. 4:15) Phaawuloosi Yihowara soqqama agurannokki gede kaaꞌlinosiri maati? Isi Qullaawa Borro giddonni hattono iillinosi coyinni Yihowa akatta daafira lowore rosino. Phaawuloosi Maganu Yihowa baxannosita huwatino. (Rom. 8:38, 39; Efe. 2:4, 5) Qoleno isi Yihowa lowo geeshsha baxanno. Phaawuloosi ‘qullaawa manna kaaꞌle’ Yihowa baxannota leellishino.—Ibi. 6:10. w23.07 9 guf. 5-6

Batinyu manni, gashshaano hasiissannonketanna ‘gashshootu aana noori’ fushshitannohu mitu seerira hajajama hasiissannonketa ammananno. Kayinni kuni manni baxannokkihu woy gara diꞌꞌikkino yee hedanno seerira dihajajamanno. Qullaawu Maxaafi Sheexaanu alame giddo noohu mannu gashshooti mannaho qarra abbannoha ikkinotanna muli yanna giddo baꞌꞌannota kulanno. (Far. 110:5, 6; Ros. 8:9; Luq. 4:5, 6) Qoleno ‘gashshaanote haxawarrannohu baalu Maganu yiinore qoxxisannoha’ ikkinota kulanno. Gashshooteho hajajamanke Maganu yannate geeshshi keeri heeꞌranno gede assino qixxaawora hajajammeemmota leellishshanno. Hakko daafira “baalunkura aate hasiisannore” aa lawishshaho ‘giwire baata, ayirrisa hasiissannoha ayirrisanna hajajama hasiissannohura hajajama’ hasiissannonke. (Rom. 13:1-7) Gashshaano fushshitanno seeri injaannokkiha, gara ikkinokkiha woy hajajamate qarrisannoha lawankera dandaanno. Kayinni Yihowa hajajo diingeemmo gede kula hooggunke geeshsha isi hajajammeemmo gede kulinonke gashshaanora hajajammeemmo.—Soq. 5:29. w23.10 8 guf. 9-10

Samisoni ilami yannara Filisxeemootu Israeele daga gashshite no; hattono beebba assidhanni noonsa. (Eje. 13:1) Insa beebba assidhinonsa daafira Israeelete manni lowo geeshsha qarramino. Yihowa ‘Israeele Filisxeemete anganni gatisanno gede’ Samisoni doorino. (Eje. 13:5) Konne shota ikkinokki looso umo fushshate Samisoni Yihowa addaxxa hasiissinosi. Mitte yannara Filisxeemete olanto Samisoni amadate Leehi yinanni katama daggino; kuni katami Yihudu gobba giddo nooha ikkikki digatino. Yihudu manni waajjino daafira Samisoni amade diinnasira sayise aate murciꞌrino. Yihudu manni Samisoni, lame haaro siiwonni milli yaannokki gede asse usure Filisxeemootunniwa massino. (Eje. 15:9-13) Ikkirono ‘Kaaliiqi ayyaani dirre Samisonira wolqa wonsheennasi’ usurroonnisi siiwonni tidhe fulino. Hakkiinni “mule reyino harrichi baqqaalla haaꞌre” hakko baqqaallinni 1,000 Filisxeemoota shiino!—Eje. 15:14-16. w23.09 2 guf. 3-4

Yihowa “hegere hedosi” Qullaawu Maxaafi widoonni sunu sununni xawisinonke daafira galanteemmosi. Yihowa baalanka coye “hajasira yee assino” daafira isi hedinori horonta woꞌmikki digatanno. (Law. 16:4) Hakko daafira Yihowa assannori hegerera kaajje heeꞌranno. Ikkina Yihowa hedinorinna isi hedinore wonshate biddi assinori maati? Maganu umi minaanniranna minaamara insara hedinori maatiro kulinonsa. Yihowa insa “Ille ilamme, sirchiꞌne baatto woꞌmo; baattono kiꞌne gashshitinannita ikkito; . . . baattote aana milli yaanno kalaqami lubbo afiꞌrinohu baalu aana roorre afidhe” yiinonsa. (Kal. 1:28) Addaaminna Heewani finqile mannu baalu cubbo ragiꞌranno gede assinoha ikkirono, Yihowa assara hedinore disoorrino. Hedinore wonshanno doogo kayinni soorrino. Isi umo mannu oosoranna uullate hedinore wonshate iima Gashshoote xintate bayichonkonni murciꞌrino.—Mat. 25:34. w23.10 20 guf. 6-7

Yihowa hexxo mudhineemmokki gede kaaꞌlannonke. Roorenkanni mite laanfenke qeeꞌlate lowo diro sharrammanni keeshshinoommoha ikkiro, hexxo mudhinammora dandiineemmo. Mito woyite, ninke laanfe soqqamaasinchu Pheexiroositenni roortinohu gede assine hendammora dandiineemmo. Ikkirono Yihowa hexxo mudhineemmokki gede jawaante aankera dandaanno. (Far. 94:18, 19) Lawishshaho, mittu rodii halaale macciishshara albaanni lowo diro labballu ledo foorannoho. Hakkiinni isi heeshshosi woꞌmunni woꞌma biddi assiꞌre Qullaawu Maxaafi yaanno garinni heeꞌra hanafi. Ikkirono xaa geeshsha mito woyite busha yorto waaddannosi. Isi hexxo mudhannokki gede kaaꞌlinosiri maati? Togo yiino: “Yihowa jawaachishinoe. Yihowa ayyaani kaaꞌlonni rosoommo halaali garinni heeꞌra dandeemmota huwatoommo. Yihowa horoonsiꞌranni nooe; qoleno guuntete xeꞌne nooeha ikkummorono woꞌmanka woyite jawaachishannoe.” w23.09 23 guf. 12

Wedella roduuwa, ayyaanaamittetenni gikki yitinoonnire ikkate sharrama hasiissannoꞌne. Dancha lawishsha ikkannoꞌne manna doodha, wodanchate dandoo heedhannoꞌne gede assiꞌra, addaxxinannire ikka, kaaꞌlitannoꞌne dandoo rosanna albillitte afidhinanni qeechira qixxaawa hasiissannoꞌne. Albillitte loossinanni loosi daafira heddinanni woyite mito woyite yaaddinanniha ikkara dandaanno. Ikkirono qinaannoꞌne. Yihowa kaaꞌlaꞌnera quqquxamannota qaagge. (Isa. 41:10, 13) Songote noori ammanate roduuwiꞌneno kaaꞌlitannoꞌneti egennantinote. Ayyaanaamittetenni gikki yitinoonnire ikkate fushshidhinoonni mixo wonshidhinanniha ikkiro, heeshshoꞌne hagiirrunna harshammo noota ikkitanno. Wedella roduuwa, lowo geeshsha banxeemmoꞌne! Ayyaanaamittetenni gikki yitinoonnire ikkate assitinannire Yihowa maassiꞌroꞌne! w23.12 29 guf. 19-20

Hanni ammanate roduuwikki ledo gamba yite godoꞌlitanni noottohu gede assite hedi. Insa ledo dancha yanna sayisittohu gedensaanni foto kaꞌini. Isinni umi foto dancha ikka hooggara dandiitanno yite hedootto daafira ledde lame foto kayisitto. Mitteenni sase foto kayisootto yaate. Kayinni mitte foto giddo mittu rodii muushshi yiinokkita laitto. Baalunku roduuwinna hakku rodiino muushshi yee kainoti wole foto noohe daafira hatte foto hunatto. Duucha woyite, ammanate roduuwinke ledo sayinsoommota dancha yanna dihambeemmo. Kayinni mitte yannara mittu ammanate rodiinke woy rodoonke gara ikkinokkire assinoha woy coyiꞌrinoha ikkara dandaanno. Tenne qaangeemmo woyite ma assa hasiissannonke? Gara ikkitinokki foto hunneemmonte gede togoo coyeno hawate sharrama hasiisannonke. (Efe. 4:32) Ammanate rodiinke ledo sayinsoommoti batinye dancha yanna noonketa qaangeemmo daafira tenne assineemmo. Ammanate rodiinke ledo sayinsoommota dancha yanna kayinni hawa dihasiꞌneemmo. w23.11 12-13 guf. 16-17

Kowiicho horoonsiꞌnoonnihu Giriikete afii qaali mitte Kiristaancho uddidhanno gari Magano hagiirsiisannohanna wolootaho heddannota leellishannoha ikka hasiissannota kulannoho. Kiristaanu meya roduuwi kawajjotenni seesanno daafira lowo geeshsha galanteemmonsa! Ayyaanaamittetenni gikki yiinohu baalunku meya roduuwira hasiisannohu wolu akati wodanchate. Wodanchate yaa mayyaate? Garanna gara ikkinokkire bade afatenna gara ikkinore doodhate dandooti. Hanni Abigiya lawishsha laꞌno. Minaannise minisi manna baala baasa gawajjannoha gara ikkinokki coye assino. Abigiya bayichonko qaafo adhitino. Ise assitinori mannu lubbo gatisino. (1 Sam. 25:14-23, 32-35) Qoleno wodancha coyiꞌra hasiissannonkehunna sammi yaa hasiissannonkehu mamooteetiro anfeemmo gede kaaꞌlitannonke. Hattono wolootaho hendeemmota leellinsheemmo woyite quwa saꞌneemmokkire ikkineemmo gede kaaꞌlitannonke.—1 Tes. 4:11. w23.12 20 guf. 8-9

Soqqamaasinchu Phaawuloosi tenne hedo borreessinohu Roomaho heedhanno songoraati. Hakko heedhanno roduuwi Yihowanna Yesuusi daafira rossino, ammana noonsata leellishshino hattono Kiristaana ikkitino. Ammana noonsa daafira Maganu insa keeraanote gede asse lainonsa hattono qullaawu ayyaaninni buurinonsa. (Rom. 5:1) Addanko insa huluullissannokkita dhagge ikkitanno hexxo afidhino. Phaawuloosi gedensoonni Efessooni heeꞌrannohu buuramino Kiristaanira Maganu uyinonsa hexxo daafira borreessino. Tenne hexxo giddo mitte ‘qullaawu manni ragiꞌranno iqqaati.’ (Efe. 1:18) Qoleno Phaawuloosi Qolasiyaasi heeꞌranno Kiristaanira hexxonsa woꞌmitannota ikkitinota xawisino. Isi tenne hexxo, “gordoho qixxaabbe [nooꞌnete]” yiino. (Qol. 1:4, 5) Buuramino Kiristaanira noonsa hexxo reyotenni kae iima hegerera heeꞌrate; insa hakko Kiristoosi ledo gashshitanno.—1 Tes. 4:13-17; Aju. 20:6. w23.12 9 guf. 4-5

‘Agara’ yaannohu hundi afii qaali katama siꞌnannikki gede agartanno agaraasine kulate horoonsiꞌnoonni. Hakko katamira heeꞌranno manni agaraasine katamu waalcho agarte noota afino daafira beꞌe yiikkinni goxe galanno. Hatteente gede ninkeno Maganu keeri wodanankenna hedonke agarannota anfoommo daafira, beꞌe diyineemmo. (Far. 4:8) Amadinonke qarri bayichonko baꞌꞌa hoogiro nafa ninkeno Haanna gede giddoyidi keere afiꞌra dandiineemmo. (1 Sam. 1:16-18) Qoleno wodanaaꞌmineemmo woyite duucha woyite garunni hedanna dancha doorsha doodha qarra diꞌꞌikkitannonke. Tennera maa assa dandiineemmo? Qarru amadannonke woyite lawishshu yaattonni agaraancho wonshiꞌra hasiissannonke. Hiittoonni? Maganu aanno keere afidhina geeshsha Yihowa huuccidhe. (Luq. 11:9; 1 Tes. 5:17) Kiꞌneno lowo qarri amadannoꞌne woyite jaattine huuccidhinanniha ikkiro, Yihowa keeri wodanaꞌnenna hedoꞌne agaranno.—Rom. 12:12. w24.01 21 guf. 5-6

Yesuusi Annisi suꞌmi qullaawa ikkanno gede assate shetinsoonnisita, xonnoonnisitanna kaphunni kassansoonnisita baala dandee saino. Isi Annisira baalunku coyinni hajajaminota afino daafira saalanno gede assannosiri mitturino dino. (Ibi. 12:2) Qoleno isi hattee qarru yannara Sheexaanu xaaddotenni sianni noosita afino. (Luq. 22:2-4; 23:33, 34) Sheexaanu Yesuusi ammanamannokki gede asseemmo yee hexxinoti dihuluullissannote; ikkirono irraawe gatino! Yesuusi jeefote Sheexaanu waajjo kapho kaphannoha ikkinotanna buutote qarri iillinsarono Yihowara ammanante soqqantanno soqqamaano noosita buuxisino! Gashshe noo Mootekki hagiirsiisa hasiꞌratto? Wolootu Maganinke ayimma affanno gede assite woꞌmanka woyite Yihowa suꞌma guwisi. Hatto assatto woyite Yesuusi faale hadhanni nootto. (1 Phe. 2:21) Yesuusi gede Yihowa hagiirsiisanna diinasi ikkinohu Sheexaanu waajjo kapho kaphannoha ikkinoti leeltanno gede assatto! w24.02 11-12 guf. 11-13

Saihu ontu diri giddo mitte miliyoone saꞌꞌanno manni cuuame Yihowa Farciꞌraasine ikkino. Heeshshokki Yihowara sayisse aatto woyite, Yesuusi Kiristoosi rosaancho ikkanna Maganu fajjo balaxisiisa hasiꞌrattota leellishatto. Heeshshokki Yihowara sayisse aate maa assa hasiissannohe? Yesuusi, “Hoodeꞌya haꞌra hasiꞌrannohu aye manchino umosi kaado” yiino. (Mat. 16:24) “Umosi kaado” yine tirroonniha Giriikete afii qaale, “xaate umisira heeꞌroonke” yineno tira dandiinanni. Atino heeshshokki Yihowara sayisse ootto soqqamaancho ikkootto daafira, Yihowa fajjo ledo sumuu yaannokki coye baala giwa hasiissannohe. (2 Qor. 5:14, 15) Tenne assate ‘maalu looso’ lawishshaho foorre giwa hasiissannohe. (Gal. 5:19-21; 1 Qor. 6:18) Tini hajajo furro fuuqqo hooltannoni? Yihowa baxattohanna seerisi ate umokki kaaꞌlannoheta ammanattoha ikkiro, tini hajajo qarra diꞌꞌikkitannohe.—Far. 119:97; Isa. 48:17, 18. w24.03 2 guf. 1; 3 guf. 4

Yihowa iso hagiirsiissannorira qullaawa ayyaanasi aannonsa. (Mat. 12:18) Ninkeneeto togo yine xaꞌma dandiineemmo: ‘Maganunnihu qullaawu ayyaani wido ikkitino akatta leellishanni noommo?’ Yihowa afattora albaanni noo yannanni roore xa cincattoha ikkootto? Maganunnihu qullaawu ayyaani wido ikkitino akatta leellinshanni gara rositto kiiro, Yihowa atenni hagiidhanni nooti albinni roore xabbe leeltannohe! Yihowa iso hagiirsiissannori wodotenni horo afidhanno gede assanno. (1 Xim. 2:5, 6) Wodo ammanne cuuammoommoha ikkirono, Yihowa ninkenni dihagiidhanno yine hendeemmohalla ikki? Woꞌmanka woyite, uminke hedo ikkikkinni Yihowa addaxxa dandiineemmota qaango. Isi wodo ammantannore keeraanote gede asse laꞌꞌanno hattono maassiꞌrannonsata kule qaale eino.—Far. 5:12; Rom. 3:26. w24.03 30 guf. 15; 31 guf. 17