Hegeri Nugusa Yihowa Magansidhe

1, 2. (a) “Hegeri Nugusi” ayeti? Kuni suꞌmi isira malinoho yineemmohu mayiraati? (Umi misile lai.) (b) Yihowa nugusimma hendeemmo wote isiwa shinqeemmo gede assannonkehu maati?

SIWAZILAANDETE nugusi Sobuze Layinkihu mito 61 diro moohino. Yannankera mookkinote wole nugussa ledo heewisiinsiro isi geeshsha moohinohu dino. Nugusu Sobuze moohe keeshshino yanna dhagge ikkitannote. Ikkollana, gashshootisira gawalo nookkihu wolu nugusi no. Isinni Qullaawu Maxaafi iso “hegeri Nugusa” yaanno. (1 Xim. 1:17) Faarsaanchu kuni Aliidi Gashshaanchi ayetiro togo yee bade kulino: “Yihowa hegerenni hegere geeshsha Nugusaho.”—Far. 10:16.

² Maganu Nugusa ikke heeꞌranno yanna horo taalle nookkite. Ikkollana Yihowawa shinqeemmo gede assannonkehu gashshanno garaati. Biꞌre Isiraeele 40 diro gashshinohu mittu nugusi Magano togo yee galatino: “Yihowa maarannohonna mararannoho, rahe hanqannokkihonna ammanamino baxilli woꞌminosiho. Yihowa zuufaanesi iima kaajjadu xinti aana xintiꞌrino; hattono nugusa ikke baalanka gashshanno.” (Far. 103:8, 19) Yihowa Nugusanke calla diꞌꞌikkino; isi baxillaancho iimi Annankeeti. Tini lame xaꞌmo xaꞌminanni gede assitanno: Yihowa Anna ikkinota leellishinohu hiittoonniiti? Edenete finqille jammartunku kayise Yihowa Nugusa ikkinota leellishinohu ma garinniiti? Tenne xaꞌmuwa dawaro, Yihowawa albinni roore shinqeemmo gedenna woꞌmu wodaninkenni magansiꞌneemmosi gede assitannonke.

HEGERI NUGUSI KALQETE ALAME MAATE KALAQI

3. Yihowate kalqete alame maate miila ikkinohu umihu ayeti? Maganu “ooso” yaamantinoti wole kalaqo ayeooti?

³ Yihowa mitto Beettosi kalaqe kai wote lowo geeshsha hagiidhino! Maganu bayira Beettosi woffi asse dilaino. Isi Beettosi ikkino daafira lubbora baxinosi, hattono wole guuta kalaqo kalaqate looso ledosi loose hagiidhanno gede assino. (Qol. 1:15-17) Tenne kalaqo giddo gamu, lowo miliyoone ikkitanno sokkaanooti. Sokkaano, hagiirrunni Maganu “fajjo assitanno soqqamaanosi” ikkitinota kulloonni; isi insa ‘oosoꞌya’ yee ayirrisinonsa. Insa Yihowate kalqete alame maate widira gaamantanno.—Far. 103:20-22; Iyo. 38:7.

4. Mannu ooso Maganunnite kalqete alame maate aana lexxitinohu hiittoonniiti?

⁴ Yihowa iimanna uulla kalaqi gedensaanni, kalqete alame maatesi halashshanni haꞌri. Isi uulla biifadonna ise iseneeto haaroonsitanno gede asse kalaqi gedensaanni, umi mancho Addaami umisi daninni kalaqe uullate aana jammarinoha kalaqate looso dhagge ikkanno garinni gumuli. (Kal. 1:26-28) Yihowa Kalaqaancho ikkino daafira, Addaami hajajamie yaasi garankolla. Isi Anna ikkino daafira, seerasi baalanka baxillunninna shaqillunni kulino. Kuni seerinna biddishshi manna millo-miliqqo hoolannoha diꞌꞌikkino.—Kalaqo 2:15-17 nabbawi.

5. Maganu uullate aana noo oososi uulla woꞌmitanno gede assate ma assino?

⁵ Yihowa batinye uullate nugussa gede ikkikkinni, soqqamaanosi maatesi miilla gede asse ammanannonsa daafira insara looso woy halaafinate aa baxanno. Lawishshaho, Addaamira uullate noo kalaqama towaatanno gede silxaane uyinosi; isinni saadate suꞌma fushshanno gede kule hagiirsiisannohanna hedanno gede assannosi looso uyinosi. (Kal. 1:26; 2:19, 20) Maganu mannu ooso uulla woꞌmitanno gede assate lowo miliyoone ikkannoha guuta manna dikalaqino. Isi hatto assa agure, Addaamira guuta aggaare ikkitannota Heewani kalaqino. (Kal. 2:21, 22) Hakkiinnino, kuri minaanninna minaamara ooso ile uulla wonshanno gede faro faninonsa. Konni garinni, mannu ooso qarrisannori nookkiha, galte hossanni Gannate halaꞌlite uulla woꞌma amaddanno gede assa dandiitanno. Iima noo sokkaano ledo mittimmatenni Yihowate kalqete alame maate miilla ikkite, hegerenni hegere geeshsha iso magansiꞌra dandiitanno. Iso hiitto baxissanno faro faꞌnantinonsa! Qolteno tini Yihowa baxillaancho anna ikkinota leellishshannote!

FINQILA OOSO MAGANU NUGUSIMMA ADHA GIBBU

6. (a) Maganu maate mereero finqille jammartinohu ma garinniiti? (b) Finqille kaꞌu yaa Yihowa silxaanesi agurino yaa diꞌꞌikkitino yineemmohu mayiraati?

⁶ Addaaminna Heewani Yihowa Aliidi Gashshaanchonsa assidhe heeꞌra dihasidhino; tini dadillissannote. Insa finqila ayyaanu kalaqo ikkinoha Sheexaane harunsa doodhitino. (Kal. 3:1-6) Maganuwiinni baxxite heeꞌransa, insarano oosonsarano qarra, shetto, hattono reyo abbitino. (Kal. 3:16-19; Rom. 5:12) Xaate uullate aana Maganoho maahoyye yee galannohu dino yaate. Hatto yaa kayinni isi silxaanesi agurino yaate? Woy uullatenna aanase noo manni aana noosi aliidimma facci asse agurino yaate? Deeꞌni, horonta hatto yaa diꞌꞌikkino! Isi silxaanesi horoonsiꞌre finqila minaannanna minaama Edenete kaashshu basenni fushshino; qoleno wirri yite higgannokki gede, xullote agartanno kirubeele worino. (Kal. 3:23, 24) Ikkirono Maganu, iso baxxannore ayyaanu kalaqonna mannu ooso amaddinota kalqete alame maate qixxeessate noosi alaami woꞌmannota kule, baxillaancho anna ikkinota leellishino. Isi, Sheexaane hunannohanna Addaami cubbi daafino coyibba dhaawanno “sircho” abbeemmo yee qaale eino.—Kalaqo 3:15 nabbawi.

7, 8. (a) Nohi waro bunshe mageeshshi geeshsha batidhino? (b) Yihowa uulla keereensatenna mannu ooso gatisate ma assino?

⁷ Hakkuyi kawa noote duucha dirrara, mitu manni Yihowara ammaname heeꞌra doodhino. Abeelinna Heenooki konni manni widooti. Ikkollana, roore mannu ooso Yihowa Annansanna Nugusansa ikkara dihasidhino. Nohi waro, uullate aana “finqille woꞌmitino.” (Kal. 6:11) Hatto yaa, Yihowa xaate uulla agurino yaateni? Tennera xagge maa kultanno?

⁸ Hanni Nohi xagge laꞌno. Yihowa isira, isinna maatesi baotenni gattanno gede lowo markaawe seekkara addi addi biddishsha uyinosi. Qoleno, Maganu Nohi “keeraanchimmate sawaakicha” ikkanno gede hajaje mannu ooso lowo geeshsha baxannota leellishino. (2 Phe. 2:5) Nohi sabbaki wote, mannu maaro eanno gedenna bao dagganno daafira qorophanno gede kulinoti dihuluullissannote; kayinni, tenne macca wore macciishshinohu dino. Nohinna maatesi lowo diro finqilanna amanyoote baꞌino alamera heedhino. Shaqqadu Anni Yihowa, tenne sette ammanantino lubbo agarino, hattono maassiꞌrino. Yihowa uulla woꞌmate aana Baote Waa abbe finqila mannu oosonna busha sokkaano aana silxaane noosita leellishino. Ee, Yihowa baalankare illaallisa diagurino.—Kal. 7:17-24.

YIHOWA NUGUSIMMA BAOTE WAYI GEDENSAANNI

9. Yihowa mannu oosora Baote Wayi gedensaanni mayi faro fanino?

⁹ Nohinna maatesi markaawetenni fulte keeraabbino uulla kaxxitunna dancha ayyare fooltu wote, Yihowa towaatinonsanna agarinonsa daafira isira galatu woꞌminonsati horo dihuluullissannote. Nohi bayichonko kakkalote base seekke Yihowa magansiꞌrate kakkalo shiqishino. Maganu Nohinna maatesi maassiꞌrino, hattono insa ‘ilte ilante uulla woꞌmitanno’ gede kulinonsa. (Kal. 8:20–9:1) Konni garinni mannu ooso, Magano maatesi ledo mitteenni magansidhannonna uulla woꞌmitanno faro afidhu.

10. (a) Baote Wayi gedensaanni Yihowa aana finqille kaꞌinohu hiikkooti? Hiittoonni? (b) Yihowa fajjosi woꞌmitanno gede assate ma assino?

¹⁰ Ikkirono, Baote Wayi mannu oosota guuntete xeꞌne hayishshe dihoolino; qoleno, illete leeltannokkiri Sheexaanunna finqila sokkaano manna bunshete widira xixxiiwa diagurtino. Gari geeshshano keeshshikki, mannootu Yihowahu danchu gashshooti aana finqila jammartu. Lawishshaho Nohi awura ikkannohu Naamiruudi, Yihowa aana kaꞌino finqille lowo deerra martanno gede assino. Naamiruudi ‘Yihowa taqaawwamanno ugaaxaancho’ ikkinota kulloonni. Isi jajjabba katamma, lawishshaho Baabeeli katama katamino, hattono isonooto “Senaoori gobba” nugusa asse shoomino. (Kal. 10:8-12) Hegeri Nugusi, kuni finqilu nugusi mannu ‘uulla woꞌmara’ Maganu hedino hedora guficho ikkate assannore agawate ma assakka? Maganu mannu coyiꞌranno qaale burduuqe hune, Naamiruudi harunsitannori irraabbe “uulla woꞌmate aana billaallitanno” gede assino. Kuni manni kaphu ammaꞌnonsanna mannu gashshoote adhe billaallino.—Kal. 11:1-9.

11. Yihowa jaalisira Abirahaamira ammanaminoha ikkinota leellishinohu ma garinniiti?

¹¹ Baote Wayi gedensaanni lowo manni kaphu maganna magansiꞌrirono, boodu ammanamino manni Yihowara ayirrinye aa diagurino. Kuri giddo mittu Abirahaamiiti; isi Maganoho hajajame, Uuri katamira noota qawaaxxote heeshsho agure haammata diro dunkaanaho heeꞌrino. (Kal. 11:31; Ibi. 11:8, 9) Abirahaami, uullate nugussa woy qooxeessisira noota gimbetenni huxxantino katamma diaddaxxino. Yihowa Abirahaaminna minisi manna agarino. Faarsaanchu shaqqadu anni Yihowa agarooshshire coyiꞌranni togo yiino: “[Maganu] ayino coqqonansara wore dilaino; isi insara yee nugussa seejjino.” (Far. 105:13, 14) Yihowa jaalisira Abirahaamira ammanaminoha ikkino daafira, “Atewiinni nugussa fultanno” yee hexxo uyinosi.—Kal. 17:6; Yaq. 2:23.

12. Yihowa Gibitsete dagara aliidimmasi leellishinohu hiittoonniiti? Tini mannasi kaaꞌlitinohu ma garinniiti?

¹² Maganu Abirahaami beetto Yisaaqinna beettisi beetto Yaaqoobino maassiꞌreemmoꞌne yiinonsa; tenne maasso garinni, insa sirchi giddonni nugussa fultanno. (Kal. 26:3-5; 35:11) Ikkollana, insawiinni nugussa fultara albaanni Yaaqoobi sirchi Gibitsete borojje ikki. Hatto yaa kayinni Yihowa yiinore wonshikki aguranno yaate? Woy uullate aana noosi aliidimma facci asse agurino yaate? Deeꞌni, hatto yaa diꞌꞌikkino! Yihowa yannasira, maganimmate wolqasinna mukkurra ikkinohura Feerioonira aliidiha ikkinota leellishino. Borojje ikkitino Isiraeele Yihowa addaxxitu; isi qole Duumo Baara tayisse saꞌanno gede asse dhagge ikkanno garinni gatisinonsa. Ee Yihowa hakkawoteno Aliidi Gashshaanchooti; qoleno baxillaancho Anna ikkino daafira, bayira wolqasinni mannasi gatisino.—Wolapho 14:13, 14 nabbawi.

YIHOWA ISIRAEELETE NUGUSA IKKI

13, 14. (a) Isiraeele faarsotenni Yihowa nugusimmare mayitino? (b) Yihowa Daawitira mayi hexxo uyinosi?

¹³ Isiraeele Gibitsete gobbanni maalaletenni fultanni heedhenni, Yihowa qeelle uyinonsa daafira galatu faarso faarsitino. Wolapho fooliishsho 15 nooti tini faarso, kiiro 18 aana togo yitanno: “Yihowa hegerenni hegere geeshsha nugusa ikke gashshanno.” Ee, Yihowa tenne haaro dagara Nugusa ikkino. (Marro 33:5) Ikkollana, tini daga illete leellannokki Gashshaanchonsa Yihowano agurranna wolere hasidhino. Gibitsetenni fultuhunni 400 diri gedensaanni, Maganu qooxeessinsara noote wole daga gede illete leellanno nugusa moohisansara xaꞌmidhino. (1 Sam. 8:5) Ikkirono, Yihowa hakkawoteno Nugusaho; layinkihu Isiraeelete nugusi Daawiti gashshino waro ikkinori tenne leellishanno.

¹⁴ Mitte hige, Daawiti qullaawa gondooru taawoota Yerusaalame abbi. Tenne hagiirru yannara Leewi gaꞌre galatu faarso faarsitino; tini faarso 1 Zeena 16:31 aana togo yitanno: “Dagate mereero, ‘Yihowa Nugusa ikkino!’ yitine dudubbe.” Mittu manchi, ‘Yihowa hegeri Nugusa ikke heeꞌreenna, hakkawote Nugusa ikkino yinoonnihu mayiraati?’ yaara dandaanno. Yihowa silxaanesi leellishanno wote woy iso riqibbannore shoomanno wote Nugusa ikkanno. Isi Nugusa ikkanno gara huwata lowo geeshsha hasiissannote. Yihowa Daawiti reyara albaanni, nugusimmasi hegerera heedhannota kulanni togo yee hexxo uyinosi: “Ate gedensaanni atewiinni fulanno sirchokki kayiseemmo; qoleno mangistesi kaajjite uurritanno gede asseemmo.” (2 Sam. 7:12, 13) Mito 1,000 diro saꞌanno yanna gedensaanni, kuni Daawiti “sirchi” woy beetti baxxe leelli yannara tini hexxo woꞌmitino. Kuni “sirchi” ayeti? Isi Nugusa ikkinohuna mamooteeti?

YIHOWA HAARO NUGUSA MOOHISI

15, 16. Yesuusi albillitte Nugusa ikkanno gede buuraminohu mamooteeti? Isi uulla noo waro, Mangistesi qixxeessate ma assino?

¹⁵ Cuuaanchu Yohaannisi 29 M.D., “iimi Mangiste gambisse daggino” yee sabbaka jammari. (Mat. 3:2) Yesuusi Yohaannisi anga cuuami wote, Yihowa iso Mesihichanna albillitte Maganu Mangiste Nugusa ikkanno gede buurino. Yihowa Yesuusira baxillaancho Anna ikkinota togo yee coyiꞌre leellishino: “Hagiirsiisannoehunna baxeemmo Beettiꞌya konneeti.”—Mat. 3:17.

¹⁶ Yesuusi soqqanshosi yannara, Annisi ayirranno gede assino. (Yoh. 17:4) Isi tenne assinohu Maganu Mangistere duduweeti. (Luq. 4:43) Isinni rosaanosi tini Mangiste daggara huuccidhanno gede rosiisino. (Mat. 6:10) Hakkawote albillitte Nugusa ikkara noohu Yesuusi gibbannosi mannootira coyiꞌranni, “Maganu Mangiste mereeroꞌne no” yiino. (Luq. 17:21) Gedensaanni Yesuusi gaꞌa gede reyara heeꞌre, rosaanosi ledo ‘mangistete gondooro’ eino. Konni garinni, ammanantino rosaanosi giddo gamu isi ledo Maganu Mangistera mookkanno faro afidhanno gede assino.—Luqaasi 22:28-30 nabbawi.

17. Yesuusi umi xibbi diro gashsha jammarinohu hiittoonniiti? Kayinni maa agadha hasiissinosi?

¹⁷ Ikkina Yesuusi Maganu Mangiste Nugusa ikke gashsha jammarannohu mamarooti? Isi hakkawontenni dijammarino. Layinki barranni iso shinoonni, rosaanosino billaallitino. (Yoh. 16:32) Ikkollana, Yihowa bashshonte gede silxaanesi horoonsiꞌra diagurino. Isi sayikki barra Beettosi reyotenni kayisino; qoleno Yesuusi 33 M.D. Phenxeqosxete barra, buurantino roduuwasi amaddinota Kiristaanu songo gashsha jammarino. (Qol. 1:13) Hakkoyeno ikkiro, Yesuusi daanno yinoonni “sircho” ikke uulla woꞌma gashshanno yanna agadha hasiissinosi. Yihowa Beettosi togo yiino: “Diinnakki lekkakkira woroo qolammo geeshsha qiniiteꞌyaanni ofolli.”—Far. 110:1.

HEGERI NUGUSA MAGANSIDHE

18, 19. Yihowa nugusimma hendeemmo wote ma assate kakkaꞌneemmo? Aananno birxichira maa ronseemmo?

¹⁸ Lowo kume diro, sokkaanono mannuno Yihowa nugusimma aana finqilanni keeshshino. Yihowa aliidimmate silxaanesi horonta agure diegennino; isi silxaanesi horoonsiꞌranni heeꞌrino. Baxillaancho Anna ikkinohura, ammanantino soqqamaanosi lawishshaho Nohi, Abirahaaminna Daawiti agarino, hattono towaatino. Tini Nugusinkera maahoyye yine galleemmo gedenna isiwa albinni roore shinqeemmo gede diassitannonke?

¹⁹ Ikkina, Yihowa yannankera Nugusa ikkinohu ma garinniiti? Yihowa Mangistera ammanammoommore ikkinoommota leellisha dandiineemmohu hiittoonniiti? Kalqete alame maate giddo guuta oososi ikkineemmohu hiittoonniiti? Maganu Mangiste daggara huucciꞌneemmo huuccatto mayi tiro afidhino? Aane noo birxichira tenne xaꞌmuwara dawaro afiꞌneemmo.