Yesuusi Moohinku 100 Dirooti—Gashshootisi Kageeshsha Ma Assino?

1, 2. Maganu Mangiste ma assitanno? Tini Mangiste daggannota huluullammeemmokkihu mayiraati?

YESUUSI KIRISTOOSI 31 M.D., Qifirinaahoomi mule ilaalu aana heeꞌre rosaanosi, “Mangistekki daggo” yite huuccidhanno gede rosiisino. (Mat. 6:10) Yannankera lowo manni tini Mangiste daggannota huluullamanno. Ninke kayinni Maganu Mangistesi abbara woꞌmu wodaninni huucciꞌneemmo huuccatto macciishshe qolannota dihuluullammeemmo.

² Yihowa Mangistesi horoonsiꞌre iimano uullano noo maatesi mitte assanno. Tini Maganu hedo woꞌmitanno. (Isa. 55:10, 11) Isinni Yihowa yannankera Nugusa ikke kaino! Saihu 100 diri giddo ikkitinoti hagiirsiissanno coyibba tenne buuxissanno. Maganu lowo miliyoone ikkitanno soqqamaanosira lowohanna dhaggete looso loosanni no. (Zek. 14:9; Aju. 15:3) Ikkirono, Yihowa Nugusa ikkasinna Yesuusi huucciꞌnammora kulinonketi Maganu Mangiste daa mitte diꞌꞌikkitino. Tini lamenti ikkito babbaxxitannohu hiittoonniiti? Qolteno ninkera kaaꞌlitannonkehu ma garinniiti?

YIHOWA SHOOMINO NUGUSI LOOSO JAMMARI

3. (a) Yesuusi Nugusa ikke shoomaminohu mamarooti? Nugusa ikkinohuna hiikkooti? (b) Maganu Mangiste 1914⁠nni gashsha jammartinota mayinni buuxa dandiinanni? (Lekkaalliidi qaagiishsha lai.)

³ Maganu soqqamaano 19⁠^ki sani jeefora, Daanieeli 2,500 diri albaanni borreessino masaalo huwattu; tini masaalo togo yitanno: “Hattee nugussa yannara, iimi Magani horonta baꞌannokki mangiste uurrisanno.” (Dan. 2:44) Qullaawu Maxaafi Rosaano, 1914 baxxino diro ikkannota lowo diri albaanni kultanni keeshshitino. Hakkawaro lowo manni albillittete yanna woyyitinota ikkitanno yee agadhe no. Mittu borreessaanchi togo yiino: “Mannu 1914⁠nni lowo coye hexxo assiꞌre agadhino, hattono halchonsa woꞌmitanno diro ikkino gede asse hedino.” Ikkollana, gedensaanni hakko diro umihu Alamete Oli jammari; konni garinni Qullaawu Maxaafi masaalo woꞌmitu. Hakkiinni aante eꞌino hude, uullate huxano, dhibbunna woꞌmitinoti wole Qullaawu Maxaafi masaalo, Yesuusi Kiristoosi 1914⁠nni iima Maganu Mangistera Nugusa ikke gashsha jammarinota buuxissannote.a Beettosi Buuramino Nugusa asse shoomi yannara, Yihowa baxxino garinni Nugusa ikkino!

4. Haarote moohino Nugusi umo ma assino? Hakkiinni aanche ma assiyya?

⁴ Maganu moohisino Nugusi shoomamanni heeꞌrenni, Annisira waanna Baarigaara ikkinohu Sheexaanu ledo olamino. Yesuusinna sokkaanosi Daawuloosinna agaanintesi iiminni uullara tuggino. Tini ikkito iima noorira lowo hagiirre abbitino; uulla noorira kayinni lowo qarranna shetto naqqino. (Ajuuja 12:7-9, 12 nabbawi.) Nugusu hakkiinni aanche, uullate aana noo harunsaanosi Maganu fajjo assitanno gede insa xalashsha, rosiisanna qineessa jammari. Insa Nugusu konne sasenka coye assi yannara hajajamansa ninkera dancha lawishsha ikkitannohu hiittoonniitiro hanni laꞌno.

BUURAMINO NUGUSI AMMANANTINO HARUNSAANOSI XALASHSHI

5. Nugusu 1914 kayisse 1919 jammari gedensaanni noote boode yanna giddo ma assino?

⁵ Shoomamino Nugusi Sheexaanunna agaanintesi bunshewiinni iima keereense kaita, uullate aana noo harunsaanosi ayyaanaamitte marammarannonna xalashshanno gede Yihowa hajajisi. Masaalaanchu Milkiyaasi tini ayyaanaamittetenni colloonsa ikkitinota xawisino. (Mil. 3:1-3) Kuni ikkinohu 1914⁠nni kayise 1919 jammari gedensaanni noote boode yanna geeshsha ikkinota xagge leellishshanno.b Yihowate kalqete alame maate miilla ikkate, xuru noonkekkire woy qullaawoota ikka hasiissannonke. (1 Phe. 1:15, 16) Kaphu ammaꞌno xuri woy alamete poletiki kisannonkekki gede qoropha hasiissannonke.

6. Ayyaanaame sagale shiqqanni noonkehu hiittoonniiti? Tini sagale maaho kaaꞌlitannonke?

⁶ Aantete Yesuusi nugusimmate silxaanesi horoonsiꞌre “ammanaminohanna wodanaamo borojjicho” shoomino. Kuni borojjichi Yesuusite “mitte hoshsha” giddo noorira baalaho ganye dancha ayyaanaame sagale shiqishanno. (Mat. 24:45-47; Yoh. 10:16) Buurantino roduuwa amaddinoti boode gaamo 1919⁠nni jammarte, Maganu “maatera” ayyaanaame sagale ammanante shiqishshanni keeshshitino. Ammanaminohunna wodanaamu borojjichi ayyaanaamittetenni lophineemmo gede falakkino sagale shiqishannonke. Tini sagale ayyaanaamittetenni, amanyootunni, hedotenni, hattono bisunni xuru nookkire ikkineemmo gede kaaꞌlitannonke. Tini ayyaanaame sagale, yannankera alame woꞌmate loosamanni nooha loosu baalunkunni rooranno looso guma abbanno garinni loosa dandiineemmo gedeno qajeelsitannonke. Tenne ayyaanaame sagale seekkite sagaꞌlitanni nootto?

NUGUSU HARUNSAANOSI ALAME WOꞌMATE SABBAKKANO GEDE ROSIISANNO

7. Yesuusi uulla noo waro jammarinohu lowonta hasiissanno loosi hiikkoyeti? Kuni loosi loosamannohu mamooti geeshshaati?

⁷ Yesuusi uullate aana soqqanshosi jammari yannara togo yiino: “Wole katammarano konne Maganu Mangisteha dancha duduwo duduwa hasiissannoe; korkaatuno sonkeennae dawoommohu iseraati.” (Luq. 4:43) Yesuusi sase dironna darate woꞌma loosinohu qaru loosi konneeti. Isi rosaanosi togo yee hajajino: “Hadhine, ‘iimi Mangiste gambisse daggino’ yitine sabbakke.” (Mat. 10:7) Yesuusi reyotenni kai gedensaanni, harunsaanosi tenne sokka “uullate qacce geeshsha” iillishshannota coyiꞌrino. (Looso 1:8) Isi umisi ninke yanna geeshsha konni hasiisanno loosira ledonke ikkannota coyiꞌrino.—Mat. 28:19, 20.

8. Nugusu uulla noo harunsaanosi sabbakkanno gede kakkayisinohu hiittoonniiti?

⁸ “Mangistennihu danchu duduwi” 1919⁠nni jammare, wole tirono afiꞌrinoha ikki. (Mat. 24:14) Hakkawote Nugusu iima moohe no; qoleno, uullate aana collaabbino harunsaanosi amaddinota boode gaamo gamba asse no. Tini gaamo, Maganu Mangiste iima gashshitanni noota uulla woꞌmate aana dudubbanno gede uyinonsa hajajo diinaggaabbe wonshitino! (Looso 10:42) Lawishshaho, Wocawaaro 1922⁠nni Seedaari Poyint Ohayo Yu. Essi. Eera 20,000 meddi yitannori Maganu Mangiste hale, daga dagiyyote gambooshshira xaaddino. Kuri roduuwi Roduu Raazerfordi “Maganu Mangiste” yaanno birxicho afidhino nigiggire shiqishanna macciishshitu wote mageeshsha hagiidhitinoro hanni hedi. Isi hakkawote togo yiino: “Kuneeti, Nugusu moohino! Kiꞌne isi farciꞌraasineeti. Hakko daafira, Nugusanna mangistesi mannaho egensiisse, egensiisse, egensiisse.” Layinki barra baxxinoha “Soqqanshote Barra” yineenna 2000 ikkitanno roduuwi gambooshshu basenni 72 kiilomeetire xeertidhe noo minna geeshsha hadhe sabbakkino. Mittu rodii togo yiino: “[Maganu] Mangiste egensiisse yine woshshinoonninke woshshattonna gamba yitino roduuwi diinaggaabbino gara horo dihaweemmo!” Wolu roduuwirano tini macciishshantinonsa.

9, 10. (a) Soqqanshote kaaꞌlitankera qixxeessinoonniti rosu minna hiikkuriiti? (b) Kuni qajeelshi atera gilletenni kaaꞌlinohehu hiittoonniiti?

⁹ Tonaa honsu lemiina lamu balla, alamete aana 58 gobbara 17,000 ikkitannori Maganu Mangistere dudubbanno halashshaano no. Ikkollana insara qajeelshu hasiisinonsa. Umi xibbi diro, hakkawote albillitte Nugusa ikkara noohu Yesuusi, rosaanosi mayite, hiikkonna hiittoonni sabbakkannoro xawise biddishsha uyinonsa. (Mat. 10:5-7; Luq. 9:1-6; 10:1-11) Yannankerano isi, Mangistenniha sabbakate looso loossannori baalunku konne looso dancha gede loosate kaaꞌlannonsa biddishshanna uduunne afidhanno gede assanni no. (2 Xim. 3:17) Isi Kiristaanu songo widoonni, harunsaanosi soqqanshote qajeelsanni no. Isi qajeelsannonke doogga giddo mitte, Tiokiraasenniho Soqqanshote Rosi Mineeti; kuni rosu mini, alamete doyichora 111,000 saꞌanno songuwa giddo horo aanni no. Lamala miliyoone ikkitanno sawaakooti konni rosu mininni qajeelsha afidhe, “duuchunku gari manna” baxisanno garinni sabbakanna rosiisa dandiitino.—1 Qorontoosi 9:20-23 nabbawi.

¹⁰ Tiokiraasenniha Soqqanshote Rosi Mineno agurranna, songote cimeeyye, suwisaano, seenne adhitinokki roduuwa, Kiristaana minaannanna minaama, Sinu Biiro Komite miillanna galtensa, woradunna awuraajju aliidi laꞌꞌaanonna galtensa, hattono misiyoone qajeelsinanniti Qullaawu Maxaafi rosi minna qixxaabbino.c Adhamino Kiristaanira Qixxaawinohu Qullaawu Maxaafi Rosi Mine qajeeltino rosaano togo yitino: “Uyinoonninkehu baxxino qajeelshi, Yihowa albinni roore lubbora banxeemmo gedenna manna kaaꞌlate bashshonni roore ikkadda ikkineemmo gede assinonke.”

11. Yesuusi harunsaano baarigaaru Sheexaanu heeꞌreenna sabbaka dandiitinohu hiittoonniiti?

¹¹ Baarigaaru Sheexaanu dancha duduwo halashshine duduwate sharrammeemmo sharro laꞌꞌasi digattino. Isi sabbakate loosi uurranno gede assa hasiꞌranno; qoleno, Maganu Mangiste sokkanna tenne sokka dudubbannore gawajjate assannokkiri dino. Ikkollana halchosi diwoꞌmitanno. Yihowa Beettosi “mangiste, silxaane, wolqanna mootumma baalate aliidiha” ikkanno gede assino. (Efe. 1:20-22) Yesuusi Nugusa ikkino daafira, Annisi fajjo woꞌmitanno gede assate, silxaanesi horoonsiꞌre rosaanosi agaranno hattono marraꞌꞌannonsa.d Danchu duduwi duduwamanni no, hattono suwashsho wodana afiꞌrinohu lowo miliyoone ikkanno manni Yihowa doogo rosanni no. Konne bayira looso loosanke ninkera lowo ayirrinyeeti!

NUGUSU HARUNSAANOSI ROORU LOOSIRA QINEESSI

12. Yesuusi moohinku Maganu soqqamaano daraajjaꞌino gari woyyaawanni dayinohu hiittoonniiti?

¹² Nugusu Yesuusi 1914⁠nni moohinku jammare Maganu soqqamaano fajjosi wonshate daraajjaꞌino gara woyyeessa diagurino. (Isayyaasi 60:17 nabbawi.) Sabbakate loosira albisa ikkanno gede, 1919⁠nni mitte mittente songora soqqanshote sooreessi shoomamino. Sambatu barra ganyine minunni mine haꞌne sabbankanni gede 1927⁠nni jammarre qixxaawo assinoonni. Yesuusi harunsaano 1931⁠nni Yihowa Farciꞌraasine yinanni suꞌminni woshshama jammartuti rooru loosira diinaggaabbino. (Isa. 43:10-12) Songote giddo soqqantanno roduuwa dimokiraasete garinni shooma gatteenna, 1938⁠nni jammarre tiokiraasete garinni shooma jammari. Songote giddo mittu rodii aliidi laꞌꞌaancho ikkannoti gatteenna, 1972⁠nni jammarre songo cimeeyyete bisi towaatanno gede assini. Cimeeyyenna songote soqqamaano ikkate ikkadda ikkitinori baalunku “Maganu hoshsha” towaata kaaꞌlitanno gede jawaachinshoonni. (1 Phe. 5:2) Alamete doyichora Maganu Mangiste looso qineessate, Aliidi Bisi 1976⁠nni lee komitera gaamamanno gede assinoonni. Yesuusi hakkuyinku harunsaanosi Maganu hasiꞌranno garinni daraajjaꞌinore ikkitanno gede qineessa diagurino.

13. Buuramino Nugusi saihu 100 diri giddo assinori atera gilletenni kaaꞌlinohehu hiittoonniiti?

¹³ Hanni Buuramino Nugusi gashshooti saihu 100 diri giddo mageeshshi looso loosinoro hedi. Isi Yihowa suꞌminni woshshamanno manna xalashshe colloonsino. Maganu Mangistehu sabbakate loosi 239 gobbara loosamanno gede biddishsha uyino, hattono lowo miliyoone ikkanno mannira Yihowa doogo rosiisino. Lamala miliyoone saꞌannota ammanantino harunsaanosi gamba assino; kuri mittu mittunku Annisi fajjo assate insaneeto uminsanni sayisse uyitinoreeti. (Far. 110:3) Addaho, Yihowa Buuramino Beettisi gashshooti widoonni loosino loosi lowohonna dhaggete. Albillitteno wole dhaggete coyibba ikkitanno!

MESIHICHU GASHSHOOTI ALBILLITTE ABBANNO ATOOTE

14. (a) “Mangistekki daggo” yine huucciꞌneemmohu Maganu ma assaraati? (b) 2014⁠nniti diru xiqisenke hiitteeti? Tenne xiqise doora garaho yineemmohu mayiraati?

¹⁴ Yihowa Beettosi Yesuusi Kiristoosi 1914⁠nni Nugusa asse moohisinoha ikkirono, tini, “Mangistekki daggo” yine huucciꞌneemmo huuccattora woꞌma dawaro diꞌꞌikkitino. (Mat. 6:10) Qullaawu Maxaafi giddo, Yesuusi ‘diinnasi mereero gashshannota’ masaalloonni. (Far. 110:2) Sheexaanu anga nooti uullate mangistubba xaano Maganu Mangiste taqaawwantanni no. Maganu Mangiste daggara huucciꞌneemmohu, Maganu Buuramino Nugusinna ledosi mookkannori mannu gashshootenna iimi Mangiste taqaawwantannore baala huntanno gede assaraati. Insa konne assitanno wote, Maganu Mangiste “kuri mangistubba baala daakkanno hattono huntanno” yitannoti Daanieeli 2:44 noo masaalo woꞌmitanno. Tini Mangiste diinnase ikkitino mangistubba huntanno. (Aju. 6:1, 2; 13:1-18; 19:11-21) Kuni muli yanna giddo ikkannohura, 2014⁠nniti diru xiqisenke, “Mangistekki daggo” yitannota Maatewoosi 6:10 ikkitanno gede doora garaho. Yesuusi iima moohinku xa 100 diro ikkino!

15, 16. (a) Kumu Diri Gashshooti yannara woꞌmitannoti dhagge ikkitanno coyibba hiikkuriiti? (b) Buuramino Nugusi Yesuusi jeefote ma assanno? Tini Yihowara kalaqosi baalate noosi hedo ledo mayi xaado afidhino?

¹⁵ Buuramino Nugusi Maganu diinna gudi gedensaanni, Sheexaanenna agaanintesi kume diro qilete usuranno. (Aju. 20:1-3) Bunshete widira xixxiibbannori kuri nookkiha, Maganu Mangiste Yesuusiti wodote kakkalo horo uyitanno gedenna Addaami cubbi abbino daafi hoꞌlanno gede assitanno. Nugusu waammate giddo reyotenni goxe nooha kiirre gundannikki manna kayisanno, hattono konni mannira Yihowa doogo rosiinsanni gede rosu pirogiraame qixxeessanno. (Aju. 20:12, 13) Uulla gudisidhe biꞌre Edenete kaashshu base gedee gannate ikkitanno. Ammanamino manni baalunku gale hosanni guuta ikkanno.

¹⁶ Kiristoosihu Kumu Diri Gashshooti jeefora, Yihowa uullate hedino hedo woꞌmitanno. Hakkiinnino, Yesuusi Mangiste Annisira qolanno. (1 Qorontoosi 15:24-28 nabbawi.) Hakkuyi gedensaanni, Yihowanna uullate aana noo oososi mereero buusa ikke xaadisannohu dihasiisanno. Iimitino uullatino Maganu ooso baalanti kalqete alame maatesi miilla ikkite iimi Anninsa ledo mittimmatenni heedhanno.

17. Ati Maganu Mangistera maa assate murcidhe kaootto?

¹⁷ Saihu 100 diri giddo Yesuusi gashshooti assinoti dhagge ikkitanno coyibba Yihowa gashshanni nootanna uullate noosi hedo woꞌmitannota buunxeemmo gede assitannonke. Maganoho ammanamme soqqama, hattono Nugusanna Mangistesi egensiisa agurroonke. Yihowa, “Mangistekki daggo” yine huucciꞌneemmo huuccattora muli yanna giddo dawaro qolannota horonta dihuluullammeemmo!