Maganu Mangistere Afa Hasiꞌneemmohu Mayiraati?

Alamete aana lowo miliyoone ikkanno manni Maganu Mangiste hexxanno. Kuni manni Yesuusi faale harunsanno; isi harunsaanosi togo yite huuccidhanno gede rosiisino: “Mangistekki daggo. Fajjokki iima ikkitanni noonte gede, uullano ikkito.”—Maatewoosi 6:10.

Batinyu manni Maganu Mangistere afa lowo geeshsha hasiꞌrannoha ikkirono, roore ammaꞌno tenne Mangistera hakkeeshshi geeshsha didiinaggaabbanno. Xaggete fullahaanchi Herberti Joorji Welsi togo yiino: “Yesuusi Iimi Mangiste . . . daafira lowo geeshsha hixamanye rosiisinoha ikkirono, roore beetekiristaanna kayinni tenne hajo daafira hakkeeshshi geeshsha . . . rosiisa hoogansa dhagge ikkitannote.”

Yihowa Farciꞌraasine kayinni tenne beetekiristaanna gede ikka agurte, Maganu Mangiste kaffi assite laꞌanno. Hanni konne coye hedi: Xa nabbabbanni noottoti tini qara metseetenke 220 afiinni qixxaabbanno. Mitte mittenta ittime 46 miliyoone meddi yitannota attammanni; konni daafira alamete aana tenne metseete geeshsha mannaho iillitinoti wole metseete dino. Tenne metseeteti qara sokka maati? Woꞌmu suꞌmise Yihowa Mangiste Egensiissannota Agarooshshu Shae yaamamannota wodanchi.a

Ikkina Yihowa Farciꞌraasine Maganu Mangiste egensiisate togo daafurtannohu mayiraati? Umihunni, alamete aana maxaaffa baalanta rooranno maxaafiti yaano Qullaawu Maxaafiti qara sokka Maganu Mangiste ikkitinota ammanneemmo daafiraati. Qoleno, xaa yannara mannu oosora iillanno qarra baalanka huntannoti Maganu Mangiste calla ikkitinota ammanneemmo daafiraati.

Yihowa Farciꞌraasine Yesuusi lawishsha harunsite, mannu Maganu Mangiste hexxanno gede kaaꞌlate sharrantanni no. Yesuusi uullate aana noo waro, heeshshosi giddo qaru coyi Maganu Mangisteeti; qoleno soqqanshositi qara sokka iseeti. (Luqaasi 4:43) Yesuusi Maganu Mangistera togo diinaggaawinohu mayiraati? Tini Mangiste atera kaaꞌlitannohehu hiittoonniiti? Aante noo birxichuwa nabbabbe, Qullaawu Maxaafi tenne xaꞌmuwara qolanno dawaro laꞌꞌattora koyinsoommohe.