Maganu Mangistera Yesuusi Togo Diinaggaawinohu Mayiraati?

Sai birxichira laꞌnummonte gede, Yesuusi heeshshosi giddo loosinohu qaru loosi ‘Mangistenniha dancha duduwo sabbakatenna duduwate.’ (Luqaasi 8:1) Isi mannaho Maganu Mangistere rosiisate wolqasi gudise horoonsiꞌrino; Isiraeelete gobbara lowo xibbe kiilomeetire ikkitanno doogo lekkatenni haꞌranni rosiisino. Yesuusi soqqansho shoolunku Wongeelira borreessantino; tenne maxaaffa giddo Maganu Mangistere 100 saꞌanno basera qummi assinoonni. Kuri giddo rooru Yesuusi coyiꞌrino qaaleeti; kayinni isi Maganu Mangiste daafira coyiꞌrino qaali giddo kuni boodeholla!—Yohaannisi 21:25.

Yesuusi uullate aana noo waro Maganu Mangistera togo diinaggaawinohu mayiraati? Umihunni, Maganu tenne Mangistera Gashshaancho asse doorinosita afinohuraati. (Isayyaasi 9:6; Luqaasi 22:28-30) Ikkollana, Yesuusiti qara hasatto umisira silxaane woy ayirrinye afiꞌra diꞌꞌikkitino. (Maatewoosi 11:29; Marqoosi 10:17, 18) Isi Maganu Mangistere duduwinohu umisi xiqimera yee diꞌꞌikkino. Yesuusi biꞌreno xaano Maganu Mangistera diinaggaawannohu qaru korkaati, tini Mangiste isi baxannorira yaano iimi Annisiranna ammanantino harunsaanosira assitannori noo daafiraati.a

MAGANU MANGISTE YESUUSI ANNIRA ASSITANNORE

Yesuusi iimi Annasi lubbora baxanno. (Lawishsha 8:30; Yohaannisi 14:31) Isi annisita muxxe akatta lawishshaho baxillesi, shaqqillesinna taashshosi lowonta naadanno. (Marro 32:4; Isayyaasi 49:15; 1 Yohaannisi 4:8) Hakko daafira mannu basete baalira Annisi daafira kaphanno kapho macciishsha Yesuusa dadillissannosi; lawishshaho, ‘Maganoho mannu qarri didhiwannosi’ hattono ‘Maganu qarru iillankera hasiꞌranno’ yine kaphinanni kapho giwanno. Yesuusi “Mangistenniha dancha duduwo” duduwate quqquxamanno gede assinosihu mittu korkaati konneeti; isi tini Mangiste Annisi suꞌmi qullaawanno gede assitannota afino. (Maatewoosi 4:23; 6:9, 10) Maganu Mangiste konne assitannohu hiittoonniiti?

Yihowa mannu ooso kaaꞌlate Mangistesi widoonni lowo coye soorranno. “Hindiiddo baalanta [ammanamino manni ille] aaninni feyanno.” Yihowa ‘reyo, wiꞌla, woy raare woy xisso higgeno heedhannokki’ gede asse hindiiddiꞌnanni gede assannore hunanno. (Ajuuja 21:3, 4) Maganu Mangistesi horoonsiꞌre mannu ooso qarra baalanka hoolanno.b

Yesuusi mannaho Maganu Mangistere kulate quqquxamasi garankolla! Tini Mangiste Annisi mageeshshi geeshsha wolqaataamonna shaqqado ikkinoro buuxissanno. (Yaaqoobi 5:11) Hakkiinni saeno, Yesuusi tini Mangiste isi baxannorira yaano ammanamino mannira lowore assitannota afino.

MAGANU MANGISTE AMMANAMINO MANNIRA ASSITANNORE

Yesuusi uullara daara lowo diri albaanni, iima Annisi ledo heeꞌrino. Annu wole baalankare, kiirre tunqannikki beeddahenna gaalaksuwa amadinoha dhagge ikkanno gordonna biifado uullanke hattono aanase noo saada kalaqinohu Beettisi widoonniiti. (Qolasiyaasi 1:15, 16) Kayinni Yesuusi kuri baalunkunni ‘roorse baxannori’ mannu oosooti.—Lawishsha 8:31.

Yesuusi uullate aana soqqamino soqqansho manna baxannota leellishshannote. Isi uullara dayinohu buxanete “dancha duduwo duduwara” ikkinota umonni xawise coyiꞌrino. (Luqaasi 4:18) Kayinni Yesuusi manna kaaꞌlate daafira coyiꞌre calla diagurino. Isi manna baxannota duucha hige loosunni leellishino. Lawishshaho, lowo manni Yesuusi coyiꞌrannore macciishshara gamba yii yannara isi ‘insa mararino, hattono xiwamino mannansa baalanka hursino.’ (Maatewoosi 14:14) Buutote xiwani amadinohu mittu manchi Yesuusi hursasira dandaannota ammanannota coyiꞌri yannara, Yesuusi iso kaaꞌlate kaꞌꞌanno gede assinosihu baxilleho. Isi konne mancho marare, “Baxoommona huri!” yee hursinosi. (Luqaasi 5:12, 13) Yesuusi jaalasi Maariyaami rodiise Alaazaari reyenna wiꞌlitanna lai yannara “xissiisiꞌrino,” “masillaawino,” hattono “wiꞌlino.” (Yohaannisi 11:32-36) Hakkiinnino maalale ikkannore assino; reye shoole barra keeshshinoha Alaazaari reyotenni kayisino!—Yohaannisi 11:38-44.

Hige Yesuusi hakkawaro manna kaaꞌlino kaaꞌlo hegereta ikkitinokkita afino. Isi hakkawote hursino manni keeshshe woy mulenni galagale xiwamara dandaannota, reyotenni kayisino mannino wirro reyannota huwatino. Ikkirono, Yesuusi Maganu Mangiste togoo qarra hige higannokki gede assite huntannota afino. Isi maalale loose calla agurinokkihu iseraati; ‘Mangistenniha dancha duduwono’ diinaggaawe duduwino. (Maatewoosi 9:35) Isi loosinoti addi addi maalale, Maganu Mangiste muli yannara uulla woꞌmate aana assitannore shiima geeshsha leellishshannote. Hanni Qullaawu Maxaafi albillitte afiꞌneemmo atootire mayyaannoro laꞌno.

• 

  Fayyimmate xeꞌne diheedhanno.

  “Hatte yannara ballootu ille faꞌnantanno; danqootu maccano macciishshitanno. Hatte yannara naafichu bullichi gede kubbanno; danqichu arrawino hagiidhe faarsanno.” Qoleno, “hakko heeꞌrannohu, ‘Xiwamoommo’ diyaanno.”—Isayyaasi 33:24; 35:5, 6.

• 

  Reyo baꞌanno.

  “Keeraano uulla ragidhanno; ise aanano hegerera heedhanno.”—Faarso 37:29.

  “Isi reyo hegerera egemmanno; Aliidi Mootichi Yihowa mannu baalunku albinni hindiiddo feyanno.”—Isayyaasi 25:8.

• Reyino manni galagale heeshsho afiꞌranno.

  ‘Qaagooshshu waamma giddo noori baalunku huurosi macciishshite fultanno.’—Yohaannisi 5:28, 29.

  ‘Reyino manni kaꞌꞌanno.’—Hawaariyaatete Looso 24:15.

• 

  Mannu mine woy looso hooge dishetanno.

  “Mannu mine miꞌnanno, hatte minnarano heeꞌranno; qoleno woyinete haqqe kaasiꞌre gumansa itanno. Insa wolu heeꞌrara dimintanno, hattono wolu itara dikaassanno. . . . Ani doodhoommo manni angansa loosinni baasa hagiidhanno.”—Isayyaasi 65:21, 22.

• 

  Olu higeno diheeꞌranno.

  “[Maganu] uulla woꞌmate aaninni ola hunanni no.”—Faarso 46:9.

  “Daga dagate aana bise dikayissanno; qoleno ola dirossanno.”—Isayyaasi 2:4.

• 

  Sagalete anje diheedhanno.

  “Uulla guma uyitanno; Maganuno yaano Maganinke maassiꞌrannonke.”—Faarso 67:6.

  “Uullate aana gidu woꞌmanno; ilaallate sammorano dayyaꞌꞌanno.”—Faarso 72:16.

• Buxima diheedhanno.

  “Buxichu hegerera dihawamanno.” —Faarso 9:18.

  “Isi kaaꞌlo hasiꞌre raaranno buxicho, qohaminoha, hattono kaaꞌlannosihu nookkiha baala gatisanno. Isi mishantinorenna buxane mararanno; hattono buxanete lubbo gatisanno.”—Faarso 72:12, 13.

Maganu Mangiste abbitannoha konne baalanka atoote hedittota Yesuusi tenne Mangistera baasa diinaggaawinohu mayiraatiro leellihe? Isi xaa yannara manna qarrisanno coye baalanka Maganu Mangiste huntannota afino daafira, uullate aana noo waro macciishsha hasiꞌranno manni baalunkura tenne Mangistere kulate quqquxamino.

Qullaawu Maxaafi kulannohu Maganu Mangiste abbitanno atooti halchishannohe? Hatto ikkiro, tenne Mangistere ledde rosa dandaattohu hiittoonniiti? Qoleno, tini Mangiste abbitanno atooti gate baꞌꞌannohekki gede maa assa dandaatto? Aane noo birxichi tenne xaꞌmuwara dawaro qolanno.