Maganu Mangiste-Mussinnu Nookki Gashshoote

Dagoomu mussinna loosannoha ikkiro, hakko dagoominni fulanno gashshooti baalunkuno mussinnu nooha ikkanno yiniro gara dilawannohe? Hatto ikkiro, mussinnu nookki gashshooti heeꞌrannohu hakku gashshooti mannu dagoomi giddonni fulinokkiha ikkiro callaati. Qullaawu Maxaafi togoo gashshooti noota kulanno; kuni gashshooti Yesuusi rosaanosi daggo yite huuccidhara rosiisinote Maganu Mangisteeti.—Maatewoosi 6:9, 10.

Maganu Mangiste iima heeꞌre gashshannoho umosi dandiino gashshooteeti. Tini Mangiste mannu gashshoote baalanka hunte bayicho amaddanno. (Faarso 2:8, 9; Ajuuja 16:14; 19:19-21) Maganu Mangiste abbitanno atooti giddo mittu gashshootu mussinna hunate. Tini ikkase gattannokkita leellishannoha hanni lee coye laꞌno.

1. SILXAANE

QARRA IKKINORE: Mannu mangistubba loosinsara woxe afidhannohu qansichootinsa anganniiti; roore wote konnira qaraxonna giwire gamba assidhanno. Konni garinni woxe gamba assa, mite gashshaano woxe moorate kaꞌanno gede assitanno; qoleno qaraxo woy mangistete kaffallanniha wole woxe xeise kaffala hasiꞌranno manni gubbo aannonsa. Konni garinni qarru qarra qalanni haꞌrara dandaanno; korkaatuno mangiste mooramino woxe riqiwate qaraxo leddanno; tini qolte mussinnu lexxanno gede assitanno. Togoori ikkanno wote, roore gawajjamannohu beebbaataamo mannaati.

MALA: Maganu Mangistera silxaane uyinohu duuchanka dandaanno Magano Yihowaati.a (Ajuuja 11:15) Tini Mangiste loosisera qaraxo gamba assiꞌra dihasiissannose. Maganu “bayira wolqa” noohanna shaqqillunni danchare aannoha ikkino daafira Mangistesi qansichootisera hasiisannore baalankare wonsha dandiitanno.—Isayyaasi 40:26; Faarso 145:16.

2. GASHSHAANCHO

QARRA IKKINORE: Sai birxichira kulliti Suuzaani Roozi Akermaani, mussinna hunate “aliidinni jammara hasiissanno” yitino. Mangistubba polisetenna giwire gamba assitannori mereerinni mussinna hunate sharrantanni, jajjabba gashshaano kayinni sammi yitannoha ikkiro dagansa insa addaxxa agurtanno. Qoleno, danchu amanyooti noosi gashshaanchi nafa guuntete xeꞌne ragiꞌrinoho. Qullaawu Maxaafi, “Ayewoteno danchare assannohu keeraanchu manchi uullate aana dino” yaanno.—Mekibibi 7:20.

MALA: Maganu Mangistesira shoominohu Yesuusi Kiristoosi guuntete xeꞌne noonsa manni gede diꞌꞌikkino; isi gariweelo coye horonta diassanno. Yesuusi horo taalle nookki gubbo yaano “alamete mangistubba baalantanna ayirrinyensa” adha giwasi tenne buuxissanno. Alamete gashshaancho ikkinohu Daawuloosi, mitte hige magansiꞌrasira yee Yesuusira tenne gubbo shiqishino. (Maatewoosi 4:8-10; Yohaannisi 14:30) Yesuusi reya geeshsha gannisi yannara nafa ammanaminoha ikkate murciꞌre kaino daafira, xissannosita hooltara dandiitannoha ikkirono jingilli assitannosi agatto adhate maahoyye diyiino. (Maatewoosi 27:34) Xaa yannara reyotenni kae iimi heeshsho afiꞌrino daafira, Maganu Mangistera moohate woꞌmunni woꞌma guuta ikkino.—Filiphisiyusi 2:8-11.

3. GEEDO

QARRA IKKINORE: Duucha gobbara mannu yannate kiiro gashshaano doodhanno; kuni doorshi (mirci) mussinna loossanno gashshaano dirrisate kaaꞌlanno yine hendanni. Noore coyiꞌniro kayinni, lophitino yinanni gobbuwara nafa doorshunna togoo doorshi yannara heeꞌranno zamachi umisi mussinnaho faro fanannoho. Dureeyye togoo zamachira fushshitanno woxinna wole coyibba, mookke nooreno ikko albillitte mookkanno gashshaano gariweelu coyi widira xixxiibbanno.

Yunayitidi Isteetete Xaphoomu Yoo Mine loosannohu Jooni Pooli Istiivensi, tini ikkito “higgenna Gashshootu isilanchimma huntannota calla ikkitukkinni mannu gashshoote addaxxannota” hooltannote yee borreessino. Konni daafira, alamete aana batinyu manni, poletiku paartuwa wole baalante dirijjitenni roore mussinna loossannoreeti yee hedansa dhagge diꞌꞌikkitanno.

MALA: Maganu Mangiste horonta baꞌannokkita geeddanno mangiste ikkitino daafira, dagate doorshinna zamachu dihasiisannose. (Daanieeli 7:13, 14) Tenne Mangiste Gashshaancho doorinohu Magano ikkino daafira, kuni gashshooti dagate doorshinni kaajjannoha woy uwannoha diꞌꞌikkino. Tini Mangiste geeddannota ikkitino daafira, loossanno loosino ayewoteno mannisera geeddanno horo aanno.

4. HIGGE

QARRA IKKINORE: Haaro higge fushsha coye woyyeessitanno yite hedattoha ikkara dandaanno. Ikkollana, fullahaano higgete kiiro leda duucha wote mussinnaho wole faro fantannota buuxxino. Qoleno, mussinna hunate hende fushshinanni higguwa loosu aana hosiisate roore wote lowo woce hasiissannoha ikkirono kaaꞌlite yitannori dino.

MALA: Maganu Mangiste higguwa mannu gashshooti higgenni lowo geeshsha roortannote. Lawishshaho, Yesuusi kiirre tunqannikki higguwa dira agure, Amanyootu Higge yinannita uyino. Isi togo yiino: “Mannu assaꞌnera hasidhinannire baalankare kiꞌneno insara hattonni assensa.” (Maatewoosi 7:12) Qaru coyi kayinni, Maganu Mangiste higguwa assoote calla ikkikkinni giddiidi hedo illaallissannota ikkaseeti. Yesuusi togo yiino: “Olliichokki umikki gede assite baxi.” (Maatewoosi 22:39) Ee, mannu wodanita afa dandaanno Magani togoo higguwa ayirrinsanni gede assa dandaanno.—1 Saamueeli 16:7.

5. GIDDIIDI HEDO

QARRA IKKINORE: Mussinnaho kora ikkinori hafuurretenna meessi xiqime hasiꞌrate. Dagate gashshaanonna qansichootinsa roore wote togooti busha akatta noonsareeti. Sai birxichira qummi assinihu Sewuli katamira toꞌu addaraashe minturi, gashshaanote gubbo itissino; kuri mannooti dancha gimbaatu uduunne hirre garunni mina fushshitanno woxinni gubbote fulanno woxi ajannota affino.

Konnira mussinna hunate, mannu giddiidi hedo lawishshaho hafuurrenna meessira roorsiꞌra labbino akatta qeeꞌla dandaanno gara rosiisa hasiissanno. Ikkollana, mannu gashshooti togoota rosu pirogiraame qixxeessate hasattono wolqano diafiꞌrino.

MALA: Maganu Mangiste mannise gara ikkitinokki hedo qeeꞌlanno gede rosiisse mussinna rumushshunku huntanno.b Togoo rosi mannise ‘surrensa loosiissanno wolqanni haarooꞌmanno’ gede kaaꞌlanno. (Efesooni 4:23) Insa hafuurretenna meessira roorsiꞌrate bayicho noonsa coyinni kassi yaanna wolu mannira assaawa rosanno.—Filiphisiyusi 2:4; 1 Ximootewosi 6:6.

6. QANSICHOOTA

QARRA IKKINORE: Mitu manni danchu qooxeessira kaajja amanyootu roso rosiinseenna lophinoha ikkiro nafa, yawaawulanna mussinna loosannoha ikkara dandaanno. Xiinxallaano, mannu gashshooti mussinna huna dandaannokkihu konnira ikkinota ammantanno. Mangistubba wolere hoongummoro mussinnanna abbanno gawajjo ajisha dandiineemmo yite hexxitanno.

MALA: Buusantino Mangistubba mussinna hunate sumuu yitu wote coyidhino garinni, mangistubba “xalalle, ammanamanna mayinae yaa” halaꞌlitanno gede assa hasiissannonsa. Tini dancha mixo ikkiturono, Maganu Mangiste togoo akatta halaꞌlitanno gede assitannoha calla ikkikkinni qansichootisera togoo akatta heedhansara hasidhanno. Qullaawu Maxaafi “hafuuraammu,” hattono “kaphaano” tenne Mangiste ragidhannokkita kulanno.—1 Qorontoosi 6:9-11; Ajuuja 21:8.

Hundi Kiristaaninte gede, xaano mannu konni amanyootu seeri garinni heeꞌra rosa dandaanno. Lawishshaho, Simooni yinanni rosaanchi qullaawa ayyaana hawaariyaatetewiinni woxunni hidhate woꞌnaali yannara insa gubbo ita gibbe, “Tenne bunshekkira maaro ei” yitinosi. Simooni busha hasatto qarru giddora eessitanni noosita huwatiti, tenne yortosi qeeꞌla dandaanno gede hawaariyaate huuccatto assitasira xaꞌmiꞌrino.—Hawaariyaatete Looso 8:18-24.

MAGANU MANGISTE QANSICHA IKKA DANDIINANNI GARA

Heeꞌratto gobba baxxutano ikkituro, Maganu Mangiste qansicha ikka dandaatto. (Hawaariyaatete Looso 10:34, 35) Tini Mangiste yannankera alamete deerrinni qixxeessitinoti rosu pirogiraame qansichase ikka dandaatto gara kultannohe. Yihowa Farciꞌraasine lamalate giddo tonnu daqiiqi geeshsha horoonsidhe Qullaawa Maxaafa woxe kaffaꞌlinikki xiinxallissanno gara leellishshannohe. Tenne xiinxallonni rosatto coyi giddo mittu ‘Maganu Mangisteho dancha duduwooti’; qolteno tini Mangiste gashshootu mussinna huntanno gara rosatto. (Luqaasi 4:43) Qooxeessikkira noore Yihowa Farciꞌraasine shiqqe coyishiishattora woy jw.org/sid yinanni webisayitenke daaꞌꞌatattora koyinsoommohe.