Wedella Cuuamate Qixxaabbinoonni?

1, 2. (a) Xaa yannara Maganu manna hagiidhanno gede assannonsari mayi no? (b) Kiristaana ikkino annuwinna amuuwi hattono songote cimeeyye wedellu cuuama afidhinore huwatanno gede kaaꞌla dandiitannohu hiittoonniiti?

MITTU songote cimeessi Kiristooferi yinanniha 12 diri qaaqqo togo yii: “Ilamitto warinni kayise afoommohe; qoleno cuuama hasiꞌrattota macciishshe lowo geeshsha hagiidhoommo. Kayinni mitte xaꞌmo xaꞌmeemmohe; ‘Cuuama hasiꞌroottohu mayiraati?’” Kuni cimeessi togo yee xaꞌmasi garankolla. Diru kiiro alamete deerrinni lowo kume ikkanno wedelli cuuamannota afanke lowo geeshsha hagiirsiissannonketi egennantinote. (Mek. 12:1) Qoleno Kiristaana ikkino annuwinna amuuwi hattono songote cimeeyye wedellu konne doorsha doodhinohu, hasiꞌrino daafira calla ikkikkinni seekke hede ikkinoronna teꞌee buuxa hasidhanno.

² Maganu Qaali meessaneeto sayise aanna cuuama Kiristaanu haaro heeshsho heeꞌra hanafanno yanna ikkitinota kulanno; tini yanna Yihowawiinni atoote afiꞌnanni gede assitannota calla ikkitukkinni Sheexaanuno fonqola hanafannote. (Law. 10:22; 1 Phe. 5:8) Konnira Kiristaana ikkino annuwinna amuuwi oosonsara Kiristoosi rosaancho ikkiniro maa assa hasiissannoro seekkite rosiisa hasiissannonsa. Ammaninokki annanna ama afidhino ooso qole, songote cimeeyye Kiristoosi rosaancho ikkate assa hasiissannore huwattanno gede baxillunni kaaꞌlitannonsa. (Luqaasi 14:27-30 nabbawi.^[1]) Mitte gimbe danchu garinni mine gudate balanxe soma fushshiꞌra hasiissannonte gede Yihowara “goofimarchu geeshsha” ammanamme soqqamateno qixxaawa hasiissanno. (Mat. 24:13) Ikkina wedellu konni kaꞌa heeshshonsa diro woꞌma Yihowara soqqamate maa assa dandaanno? Hanni laꞌno.

3. (a) Yesuusinna Pheexiroosi coyidhinori cuuama hasiissannota ikkitinota leellishshannohu hiittoonniiti? (Mat. 28:19, 20; 1 Phe. 3:21) (b) Aanchine hiikkuri xaꞌmuwa laꞌneemmo? Mayira?

³ Ati cuuamate heddanni nootto wedillichaati? Hatto ikkiro tini galantannihe gede assitannote! Cuuamme Yihowa Farciꞌraasincho ikka kaajja qoossooti. Qoleno Kiristaanu cuuama hasiissannonsa; hattono cuuama gato afiꞌrate lowo geeshsha hasiisanno coyeeti. (Mat. 28:19, 20; 1 Phe. 3:21) Yihowara eootto qaale agadha hasiꞌrattohura cuuamattora albaanni qixxaawa hasiissannohe. Cuuamate qixxaawoottoronna teꞌee afate kaaꞌlitannoheta aante noota sase xaꞌmuwa seekkite hedi. Insano: (1) Cuuamate gikki yoommo? (2) Togo assate kaoommohu umiꞌya hasiꞌreeti? (3) Meessaneeto Yihowara sayise aate yaa mayyaatero huwatoommo? Hanni kuri xaꞌmuwa laꞌno.

GIKKI YAA

4, 5. (a) Cuuamannohu jajjabba manna calla diꞌꞌikkino yineemmohu mayiraati? (b) Gikki yaate yaa mayyaate?

⁴ Qullaawu Maxaafi cuuama hasiissannonsari jajjabba manna calla ikkinotanna cuuamate iilla hasiissanno diri noota dikulanno. Lawishsha 20:11, “Qaaqqu nafa assannorinni akatisi xalalanna gara ikkinota afa dandiinanni” yitanno. Qaaqqoho yine hendannihu nafa gara ikkinore assanna Kalaqaanchisira isonooto sayise aate yaa mayyaatero huwatara dandaanno. Konnira mittu wedellichi mito geeshsha gikki yiironna isonooto Yihowara sayise uyiro cuuamasi hasiissannotenna garaho.—Law. 20:7.

⁵ Ikkina gikki yaate yaa mayyaate? Gikki yaate yaa aana lopha calla diꞌꞌikkitino. Qullaawu Maxaafi, gikki yiino manni “garanna gara ikkinokkire bada dandaanno gede wodanchate dandoonsa horoonsiꞌranni [qajeelsiꞌrinota]” kulannonke. (Ibi. 5:14) Hakko daafira gikki yiino manni Yihowa albaanni gara ikkino coye bade afinohonna konne coye assate murciꞌre kainoho. Konnira togoo manni gara ikkinokki coye assate shotunni didoogamanno; hattono gara ikkinore assate wolu manni xixxiiwansara diagadhanno. Ee, cuuamino wedelli annuwinsanna amuuwinsa woy wolu jajjabbu manni nookki yannarano Maganu seerubba harunsanno yine heda garaho.—Filiphisiyusi 2:12 ledo heewisiisi.

6, 7. (a) Daanieelira Baabiloonete noo waro tuncu yiinosi fonqolo kuli. (b) Daanieeli gikki yiinota leellishinohu hiittoonniiti?

⁶ Wedellu gikki yiinota leellisha dandaanno? Hanni Qullaawu Maxaafi giddo Daanieeli lawishsha laꞌno. Isi annisiwiinninna amasiwiinni hasiꞌrikkinni Baabiloone qafande haaꞌne haꞌnisi yannara aja beetto ikkara dandaanno. Shiima yanna gedensaanni, isi garanna gara ikkinokkiri daafira isiwiinni lowo geeshsha baxxitino lao noonsa manni ledo heeꞌra hanafino. Qoleno Daanieelira woluno fonqolanno coyi tuncu yiinosi: Baabiloonete mannu iso baxxino garinni ayirrisannosi. Isinni Daanieeli nugusaho soqqantara qorophine doorroonnihu boodu wedelli giddo mitto ikkino! (Dan. 1:3-5, 13) Daanieeli Isiraeelete heeꞌroommero afiꞌrara dandaannokkire Baabiloonete afiꞌranno faro faꞌnantinosiha lawanno.

⁷ Daanieelira konni baalu coyi daafira mayi macciishshaminosi? Isi Baabiloonete biinfillinninna ayirrinyinni doogaminoni? Ledosi heeꞌranno manni ayimmasi soorrasiranna ammanasi shoshshoggitanno gede assasira wodhinoni? Diwodhino! Qullaawu Maxaafi Daanieeli Baabiloonete noo waro, kaphu magansiꞌra ledo xaado afiꞌrino coyi ‘batteessannosikki gede wodanisinni murciꞌrinota’ kulannonke. (Dan. 1:8) Tini Daanieeli gikki yiinoha ikkinota leellishshannote.

8. Daanieeli lawishshinni maa rosatto?

⁸ Daanieeli lawishshinni maa rosatto? Gikki yiino wedellichi ammananno coyi ledo sumuu yee heeꞌranno. Isi, qooxeessisera noore lawate danase soorritanno hamasaama gede diꞌꞌikkanno. Isi Mangistete Addaraashe maranno wote Maganu jaala lawe rosu minira maranno wote kayinni alamete jaala dilawanno. Ammanasi fonqolanno coyi tuncu yaannosi wote nafa milli miliqqi diyaanno.—Efesooni 4:14 nabbawi;^[2] Efe. 4:15.

9, 10. (a) Wedellu muli yanna giddo ammanansa fonqolanno coyi tuncu yeennansa assinore hedansa kaaꞌlitannonsahu hiittoonniiti? (b) Cuuamate yaa mayyaate?

⁹ Baalunkura guuntete xeꞌne noonketi egennantinote; hakko daafira wedelluno jajjabbuno soꞌro loosanno woti heeꞌranno. (Mek. 7:20) Ikkollana, cuuamate heddanni noottoha ikkiro, Yihowa seerubba ledo quraanyamate wodanikkinni mageeshshi geeshsha murciꞌroottoro layiꞌrakki hayyote. Tenne afa dandaattohu hiittoonniiti? ‘Konni albaanni Maganu seerubba harunseemmota leellishannori assoommori no?’ yite ateneeto xaꞌmi. Muli yanna giddo ammanakki fonqolanno coyi tuncu yiihe wote maa assoottoro hedi. Gara ikkinore gara ikkinokkiriwiinni badate hasiissanno wodancha nooheta leellishootto? Daanieeli gede Sheexaanu alame giddo mannu baxxino garinni ayirrisihero maa assatto? Tuncu yiinoheri Yihowa fajjo ledo xaadannokkiha ikkiro ‘isi fajjo maatiro huwatatto?’—Efe. 5:17.

¹⁰ Kuri xaꞌmuwa xaꞌma lowo geeshsha hasiissannote yineemmohu mayiraati? Kuri xaꞌmuwa cuuamate daafira gara ikkitino lao heedhannohe gede kaaꞌlitannohe. Aleenni laꞌnummonte gede, cuuama Yihowara eoottoha kaajja qaale leellishshannote. Iso woꞌmu wodanikkinni baxatenna isira hegere geeshsha soqqamate qaale eootto. (Marq. 12:30) Cuuamannohu mittu mittunku manchi eino qaali ledo sumuu yee heeꞌrate murciꞌra hasiissannosi.—Mekibibi 5:4, 5 nabbawi.^[3]

CUUAMATE KAOOTTOHU ATI UMIKKI HASIDHEETI?

11, 12. (a) Mittu cuuamate hedanni noo manchi maa buuxa hasiissannosi? (b) Yihowa qixxeessinote cuuamate qixxaawora gara ikkitino lao heedhannohe gede mayi kaaꞌlannohe?

¹¹ Qullaawu Maxaafi Yihowa manni baalu isira soqqamate, ‘insaneeto fajjotenni shiqishshannota’ kulannonke. (Far. 110:3) Konnira mittu cuuamate kaino manchi, togo assate kainohu isi umisi hasiꞌre ikkinotanna teꞌee buuxa hasiissannosi. Konnira ateneeto seekkite layiꞌra hasiissannohe. Mayira? Korkaatuno wedellu lophanno gari babbaxinoha ikkara dandaanno. Lawishshaho, ati lophoottohu halaalu mine ikkara dandaanno.

¹² Lowo diro, batinyu manni lawishshaho darawokkinna roduuwikki cuuamanna laoottoha ikkara dandaanno. Hatto ikkiro qoropha hasiissannohe coyi maati? Cuuamate iilla hasiissanno diri noohanna gale hose baalunku wedelli cuuamansa gattannokkita ikkitinokkihu gede assite hedattokki gede qorophi. Yihowa qixxeessinote cuuamate qixxaawora gara ikkitino lao noohetanna teꞌee buuxa dandaattohu hiittoonniiti? Cuuama lowo geeshsha hasiissannota ikkitinohu mayiraatiro ganyite hedi. Konniranna aane noo birxichira cuuama hasiissannota ikkitinohu mayiraatiro laꞌneemmo.

13. Cuuamate kaoottohu umikki hasidhe ikkinotanna teꞌee afa dandaattohu hiittoonniiti?

¹³ Cuuamate doodhoottohu wodanikkinni ikkinotanna teꞌee afate kaaꞌlitannoheti duucha doogga no. Lawishshaho Yihowara soqqama hasiꞌrattohu wodanikkinni ikkinota huucciꞌratto huuccattonni afa dandiinanni. Ganyite Yihowa huucciꞌrakkinna huucciꞌratto yannara hasiꞌrootto coye badde kulakki isi ledo noohe jaaloomi mageeshshi geeshsha muliha ikkinoro leellishshara dandiitanno. (Far. 25:4) Yihowa huuccattonkera dawaro qolannoti qara doogo Qullaawu Maxaafi widoonniiti. Konni daafira, Qullaawa Maxaafa xiinxallate sharramanke, addinta Yihowawa shiqa hasiꞌneemmotanna isira woꞌmu wodaninkenni soqqammeemmota leellinsheemmote wole doogooti. (Iya. 1:8) Konnira ateneeto togo yite xaꞌmi: ‘Huucciꞌreemmo yannara mito coye bade kuleemmo? Qullaawa Maxaafa ganye xiinxalleemmo?’ Maatete magansiꞌraꞌne lainohunni, ‘Tenne maatenke fushshidhino pirogiraame maahoyye yee harunseemmo?’ yite ateneeto xaꞌmi. Kuri xaꞌmuwara qolatto dawaro, cuuamate kaoottohu umikki hasidhe ikkinoronna teꞌee afate kaaꞌlitannohe.

MEESSANEETO SAYISE AATE YAA MAYYAATE?

14. Meessaneeto sayise aatenna cuuamate mereero noo badooshshi maatiro xawisi.

¹⁴ Mitu mannira meessaneeto sayise aatenna cuuamate mereero noo badooshshi leella hoogansara dandaanno. Lawishshaho mitu wedelli, insaneeto Yihowara sayise uyinotanna cuuamate kayinni qixxaawinokkita coyiꞌranno. Togo yee heda garaho? Meessaneeto sayise aate yaa Yihowara hegere geeshsha soqqamate hasiꞌrattota isira kulate. Cuuamatto yannara ateneeto sayisse oottota mannaho leellishatto. Konnira, cuuama huuccattotenni Yihowara ateneeto sayisse oottota mannu albaanni leellishatto doogooti. Cuuamattora albaanni meessaneeto sayise aate yaa mayyaatero huwatoottoronna teꞌee buuxa hasiissannohe.

15. Meessaneeto sayise aate yaa mayyaate?

¹⁵ Haranchunni, heeshshokki Yihowara sayisse aatto yannara xaate heeꞌrattohu ateneetira ikkinokkita isira kulatto. Qoleno heeshshokki giddo assatto coyi baalunkunni roorsite Yihowa fajjo balaxisiisate isira qaale eatto. (Maatewoosi 16:24 nabbawi.^[4]) Eootto qaale baalanka agadha hasiissannohe; ikkina Maganu Yihowara eootto qaale hakkiinni roorsite agadha dihasiissannohe? (Mat. 5:33) Umokki kaadoottotanna xaate Yihowaha ikkoottota leellisha dandaattohu hiittoonniiti?—Rom. 14:8.

16, 17. (a) Meessaneeto kaadate yaa mayyaatero lawishshunni kuli. (b) Isonooto Yihowara sayise aanno manchi mayyaanni noohu gedeeti?

¹⁶ Hanni mitto lawishsha laꞌno; jaalikki makeena uyinohe yino. Isi makeenu ateha ikkinota leellishshanno sanade oyehe kae, “kuni makeenu ateho” yiihe. Ikkollana jaalikki togo yiinohehu gede assite hedi: “Makeenu qulfe heedhannohu anewaati; qoleno konne makeena kadattohu ate ikkittokki aneeti.” Konne elinohere ma garinni laꞌꞌatto? Makeena uyihe mancho hiittooho yite hedatto?

¹⁷ Hanni Yihowa heeshshosi isira sayise uyino manchiwiinni maa hasiꞌrannoro hedi. Kuni manchi Yihowara togo yee qaale eino: “Ani heeshshoꞌya atera oommo. Ani xaate ateho.” Lawishshaho kuni manchi maaxame ammaninokkihu ledo adhamate hede mitteenni yanna sayisa hanafe lamu gari heeshsho heeꞌrannohalla ikki? Yihowara woꞌma lubbosinni soqqamannokkinna Kiristaanu gambooshshe haꞌrannokki gede assanno looso loosalla hanafi? Tini makeena ee kae qulfe hoꞌlate gede diꞌꞌikkitino? Isonooto Yihowara sayise aanno manchi togo yiinohu gedeeti: “Xaate ani ateho ikkinninna aneha diꞌꞌikkoommo. Ate hasattonna aneti xaada hooganno yannara ayewoteno ati hasiꞌrattore asseemmo.” Tini Yesuusi hedo ledo sumuu yitannote; isi uullate aana noo waro togo yiino: “Ani iiminni dawoommohu umiꞌya fajjo assammora ikkikkinni soyinoehu fajjo assammoraati.”—Yoh. 6:38.

18, 19. (a) Roozinna Kiristooferi coyiꞌrinori cuuama atoote afiꞌnanni gede assitanno qoosso ikkitinota leellishannohu hiittoonniiti? (b) Cuuamate qoosso daafira mayi macciishshamannohe?

¹⁸ Ee, cuuama atino ikko wolu manni ajishe laꞌꞌa hasiissannokki coyeeti. Qoleno, meessaneeto sayinse uyine cuuama kaajja qoossooti. Yihowa baxannonna meessaneeto sayise aate yaa mayyaatero huwatino wedelli cuuamatenni badhera dihiganno; hattono doodhino doorshinni horonta digaabbanno. Roozi yinanniti mitte cuuantino beetto togo yitino: “Yihowa baxeemma; hattono isira soqqama wolu baalunku coyinni roore hagiirsiissannoe. Heeshshoꞌya giddo doodhoomma doorshi baalunku giddo cuuamate doodhaꞌya gede woyyino doorshi nooha dilawannoe.”

¹⁹ Konni birxichi hanafora kullihu Kiristooferi maa assiyya? Isi 12 dirisinni cuuamate murciꞌrinohu seekke hedeeti? Kiristooferi isonooto sayise ee cuuaminota qaaganno wote lowo geeshsha hagiidhanno. Isi 17 dirisinni woꞌma yanna suwisaancho ikke soqqama hanafino, hattono 18 dirisinni songote soqqamaancho ikke shoomamino. Xa Kiristooferi Beeteelete soqqamanni no. Kiristooferi togo yiino: “cuuamate murciꞌraꞌya gara ikkino doorshaati. Heeshshoꞌya Yihowaranna dirijjitesira loonse afiꞌnanni hagiirrinni woꞌmitinote.” Cuuamate heddanni noottoha ikkiro tennera qixxaawa dandaattohu hiittoonniiti? Aane noo birxichira tenne xaꞌmo dawaro laꞌneemmo.