“Cinca Loosose Umo Fushshito”

1, 2. (a) Geediooninna ledosi noohu 300 manni cincansanni maa ronseemmo? (b) Luqaasi 21:19 aana noo hedo garinni cinca lowo geeshsha hasiissanota ikkitinohu mayiraati?

OLAMAASINE ola huunfite olantanni no. Daanyu Geediooni massagannohu Isiraeelete wottaaddari diinnansa yaano Miidiyaami olantonna insara haꞌlitinore hashsha woꞌma mite 32 km ikkitanno doogo shorranni galino! Qullaawu Maxaafi aanne ikkinore kulanni togo yaanno: “Hakkiinni Geediooni Yordaanoosi tayise sai. Isinna ledosi noohu 300 manni daafurino.” Ikkollana, Geediooninna ledosi noo manni ola diqeelino; korkaatuno diinnansa wido ikkinohu mitu 15,000 wottaaddari gate no. Isiraeele lowo diro Miidiyaami manni kade gashshanni keeshshinonsahura tini daafurroommo yite olama agurtanno yanna ikkitinokkita affino. Konnira diinnansa fiite gudate Miidiyaami manna “shorra diagurtino.”—Mes. 7:22; 8:4, 10, 28.

² Ninkeno daafursanno ola olamanni heeꞌnoommo. Olammeemmohu diinnanke yaano Sheexaanu, alamesinna guuntete xeꞌnenke ledooti. Konne ola lowo diro olammanni keeshshinoommo; qoleno Yihowa kaaꞌlonni qeelle afiꞌnoommo. Ikkollana, diinnanke ledo olammeemmonna tini alame baꞌanno yanna agadhinanni heeꞌneemmo wote hexxo mudhineemmo yanna heedhara dandiitanno. Qoleno ninke ola woꞌmunni woꞌma diqeelloommo. Yesuusi goofimarchu dirira heeꞌneemmorira buutote qarri iillankeranna miincankera dandiinannita kulinonke; qoleno isi qeelle afiꞌneemmohu cincinummoro woy kaajjine uurrinummoro ikkinota coyiꞌrino. (Luqaasi 21:19 nabbawi.^[1]) Cincate yaa mayyaate? Cincineemmo gede mayi kaaꞌlannonke? Cincino manni lawishshinni maa ronseemmo? ‘Cinca loosose umo fushshitanno’ gede assa dandiineemmohu hiittoonniiti?—Yaq. 1:4.

CINCATE YAA MAYYAATE?

3. Cincate yaa mayyaate?

³ Qullaawu Maxaafi giddo cincate yaanno qaali fonqolo dandee saꞌꞌa xawisannoha calla diꞌꞌikkino. Cinca tuncu yaannonke fonqolo laꞌneemmo garaati. Cincanno manchi diwaajjanno, hattono kaajje uurranno. Mittu maxaafi cinca jawaata hexxo heedhannonkenna fonqolu iillannonke yannara hexxo mudhineemmokki gede assanno akata ikkinota kulino. Hakku maxaafi lede kuni akati buutote qarri iillinkerono kaajjinenna milli miliqqi yinummokki heeꞌneemmo gede kaaꞌlannonketa xawisino. Qoleno cinca xissiisiꞌneemmo gede assinonkeri aana agurre mixonke aana illachinshe iillinonke fonqolo qeelleenniwa qolle soorrineemmo gede kaaꞌlitannonketa coyiꞌrino.

4. Cincinanni gede assannohu baxilleho yineemmohu mayiraati?

⁴ Kiristaana cincanno gede assannonsahu baxilleho. (1 Qorontoosi 13:4, 7 nabbawi.^[2]) Yihowara noonke baxilli isi fajjinoha aye coyeno cincine saꞌneemmo gede assannonke. (Luq. 22:41, 42) Roduuwinkera noonke baxilli guuntete xeꞌnensa dandiine heeꞌneemmo gede kaaꞌlannonke. (1 Phe. 4:8) Minaanninkera woy minaamankera noonke baxilli hagiirraame maatera nafa tuncu yaanno “qarra” cincine saꞌneemmonna galtenke ledo noonke jaalooma kaajjishiꞌneemmo gede kaaꞌlannonke.—1 Qor. 7:28.

CINCATE MAYI KAAꞌLANNOHE?

5. Cincineemmo gede assate Yihowara baxxitino dandoo noosi yineemmohu mayiraati?

⁵ Yihowa jawaante aannohe gede huucciꞌri. Yihowa ‘cincanna shesho aanno Maganooti.’ (Rom. 15:5) Iillannonke qarra calla ikkikkinni heeꞌnoommo gara, macciishshamannonkere, wole agurina kalaqammoommo gara woꞌmunni woꞌma huwatara dandaannohu iso callaati. Hakko daafira cincineemmo gede assate isira baxxitino dandoo noosi. Qullaawu Maxaafi “Isi waajjitannosirira hasattonsa wonshanno; qoleno kaaꞌlo afiꞌrate raartanno raare macciishshanno; hattono gatisannonsa” yaanno. (Far. 145:19) Ikkina Maganu cincate kaaꞌlitanno jawaante afiꞌrate huucciꞌneemmo huuccattora dawaro qolannohu hiittoonniiti?

6. Qullaawu Maxaafi yaannonte gede fonqolu iillannonke yannara Yihowa ‘fulleemmo furcho’ qixxeessannonkehu hiittoonniiti?

⁶ Umi Qorontoosi 10:13 nabbawi.^[3] Yihowa fonqolo dandiine saꞌneemmo gede kaaꞌlankera huucciꞌneemmoha ikkiro isi ‘fulleemmo furcho qixxeessannonke.’ Togo yaa Yihowa mereero eꞌꞌe iillinonke fonqolo hoolanno yaateni? Hatto assanno woti heeꞌrara dandaanno. Duucha wote kayinni fulleemmo furcho qixxeessannonkehu fonqolo ‘cincine saꞌneemmo gede asseeti.’ Ee, Yihowa ‘cincatenninna hagiirrunni baalanka coye woꞌmunni woꞌma cincine saꞌneemmo gede’ jawaachishannonke. (Qol. 1:11) Qoleno isi bisinke, surrenkenna hedonke dhuki mageeshshihoro seekke afinohura ammanamme heeꞌneemmokki gede assanno fonqoli iillannankera difajjanno.

7. Cincate ayyaanaamittete sagale sagaꞌla hasiissannota leellishanno lawishsha kuli.

⁷ Ayyaanaamittete sagale sagaꞌlite ammanakki jawaachishiꞌri. Alamete aana gottinyunni umiha ikkinoha Everesti yinanni ilaala fulanno manchi wole wote ikkoommero sase woy shoole barra itanno sagale mittu barrinni calla ita hasiissannosi. Ilaala fulanno manni cince hedinowa iillanno gede gari sagale ita hasiissannonsa. Hatteente gede cincineemmore ikkatenna mixonkewa iillate ayyaanaamittete sagale ganyine sagaꞌla hasiisannonke. Ayyaanaamittete coye nabbawate, xiinxallatenna songote gambooshshe haꞌrate yanna gaaꞌmate sharrama hasiissannonke. Kuri coyibba assanke, ‘hegere heeshsho afiꞌnanni gede assitannote geeddanno sagalenni’ ammananke jawaachiꞌneemmo gede kaaꞌlitannonke.—Yoh. 6:27.

8, 9. (a) Fonqolu iillannonke yannara Iyyoobi 2:4, 5 aana kulloonnire maa qaaga hasiissannonke? (b) Fonqolu iillannohe wote illete leellannokkire maa heda dandaatto?

⁸ Maganoho ammanamate daafira kaꞌino xaꞌmo qaagi. Yihowa soqqamaasine fonqolu iillannonsa yannara hakko fonqolinni roorsite heda hasiissannonsari no. Fonqolu iillannonke yannara assineemmori, Yihowa Kalqete Alame Giddo Aliidiha ikkinota ammanneemmoronna teꞌee leellishanno. Yihowa aliidimmara diina ikkinohu Sheexaanu iso togo yee hettisino: “Manchu heeshshosira yee noosiha baala sayise aanno. Hanni angakki diriirsite [Iyyoobira] miqichosinna maalasi gawajji, albakkiinni xonannohekkita laꞌꞌattona. (Iyo. 2:4, 5) Sheexaanu hedo garinni, umisi horo agure Yihowara soqqamanno manchi dino yaate. Sheexaanu hatto yee hettisi kawa soorraminoni? Disoorramino! Hatto yee hettisihunni lowo diri gedensaanni yaano iiminni uullara tugami yannara Sheexaanu Maganu manna yekkeera diagurino. (Aju. 12:10) Sheexaanu Maganoho ammanamate daafira kayisino haja dihawino. Isi ninke iillinonke fonqolira qeelamme Maganu aliidimma irkisa agurranna laꞌꞌa lowo geeshsha hasiꞌranno.

⁹ Qarru iillannohe yannara ati afittokkinni ikkannori noota hedi. Sheexaanunna agaanintesi mitto wido higge tuqqite fonqolu iillannohe yannara assattore laꞌanni ati hexxo mudhatto gede assate woꞌnaaltanno. Wole widoonni kayinni Yihowa, gashshanni noo Beettisi, reyotenni kaꞌe iimira hadhino buuramaasinenna kiirre gundannikki sokkaano no. Insa barru baala cincite saꞌannanna Yihowa aliidimma irkissanna laꞌanno wote jawaachishshannohe hattono lowo geeshsha hagiidhitanno. Hatte yannara aane nooha Yihowa ayyaaninni borreesamino qaale isi atera coyiꞌrinohu gede assite hedi: “Xonannoehura dawaro qoꞌla dandeemmo gede, beettoꞌya hayyicha ikki, wodanaꞌyano tashshi assie.”—Law. 27:11.

10. Cinciniro afiꞌnanni baraarshi aana illachishate Yesuusi faale haꞌra dandaattohu hiittoonniiti?

¹⁰ Cinciniro afiꞌnanni baraarshi aanna illachishi. Hanni seeda doogo hadhanni heedhe mitte seedu godi giddoonni fushshinoonni doogora mereeroho uurroottohu gede assite hedi. Hakkiicho laitto ragi baalu tunsote. Ikkollana, albillitte hadhe godu qacce iillittoro xawaabba laꞌꞌattota afootto. Hatteente gede, qarru iillannohe yannara konne qarra tayisse saꞌꞌattoha lawa hoogannohe woti heeꞌrara dandaanno. Yesuusira nafa togoori macciishshaminosi woti no. Isira ‘cubbaataammu busha qaale coyidhinosi,’ shollinshoonnisi hattono “qarru haqqi” aana sunte shinoonnisi; tini Yesuusi uullate aana noo waro tunsitinosi yannaati. Ikkollana Yesuusi ‘albasiinni agadhe noosi hagiirre hedino’ daafira cincino. (Ibi. 12:2, 3) Isi cinciro afiꞌranno baraarshi aana illachishino; tini Maganu suꞌmi qullaawannonna Yihowa aliidimma xabbe leeltanno gede assitino. Yesuusira iillinosihu tunsichu gedee qarri yannate geeshshiholla; iima afiꞌrannohu kaajju baraarshi kayinni hegereho. Xaa yannara, iillannohe qarri dadillissannohanna hexxo mudhatto gede assannoheha ikkara dandaanno. Ikkirono hegere heeshshowa massitanno doogo aana heedheenna iillannohe qarri yannate geeshshiha calla ikkinota deꞌooti.

“CINCITINORE”

11. ‘Cincitinori’ lawishsha heda hasiissannonkehu mayiraati?

¹¹ Cincineemmori ninke calla diꞌꞌikkinoommo. Hawaariya Pheexiroosi Kiristaanu Sheexaanu abbanno qarra dandee heeꞌranno gede jawaachishanni togo yee borreessino: “Alamete doyichora noohu roduuwu maamari giddo noo roduuwiꞌne baalunkura togoo qarri iillanni noota affine, ammanatenni kaajjitine uurritine [Sheexaane] gibbe.” (1 Phe. 5:9) “Cincitinori” woꞌnaalshi kaajjine uurrineemmo gara rosiisannonke; tennera qole qinaannonketa buuxisannonke, hattono ammanamme heeꞌranke kiissannota ikkitinota qaagiissannonke. (Yaq. 5:11) Hanni kuri giddo mitu lawishsha laꞌno.^[4]

12. Maganu Edenete Kaashshu Base agartara worino kirubeele lawishshinni maa ronseemmo?

¹² Kirubeele. Mite yite mannaho leeltinori ayyaanu kalaqo lawishshi shota ikkinokki looso uyinanninke yannara cincine loonseemmo gede kaaꞌlannonke. Yihowa “heeshshote haqqichowa massitanno doogo agarsiisate kirubeelenna agurtukki kawa kaꞌa galchantannota bubbanno bise Edenete soojjaatoonni worino.”^[5] (Kal. 3:24) Maganu kirubeele kalaqinohu konne looso loossara ikkinokkiti egennantinote. Qoleno, cubbunna finqille Maganu mannu oosora hedinore diꞌꞌikkitino. Qullaawu Maxaafi mittowano tini ayyaanu kalaqo ikkitino kirubeele ninke togoo looso loonseemmore diꞌꞌikkinoommo yite xiixatinota dikulanno. Qoleno insa konne looso loosa diceeꞌmitino hattono hexxo dimudhitino. Hatteentenni, uyinoonninsa looso ammanante loossino; miteekkite Baote Wayi geeshsha yaano 1,600 saꞌꞌanno diro insa cincite loosonsa umo fushshitino.

13. Iyyoobi fonqolo cince sainohu hiittoonniiti?

¹³ Ammanamino manchi Iyyoobi. Jaalikki woy minikki manni gawajjannore coyiꞌrinoheha, buutote dhibbi waadinoheha woy shiidhe xissiisidhanni noottoha ikkiro, Iyyoobi lawishshi sheshifachishahera dandaanno. (Iyo. 1:18, 19; 2:7, 9; 19:1-3) Iyyoobi qarru iillannosi gede assinohu ayetiro afinokkiha ikkirono hexxo dimudhino. Mayira? “Isi Magano waajjanno.” (Iyo. 1:1) Iyyoobi faffoteno qarru yannarano Magano hagiirsiisate murciꞌrino. Iyyoobi Maganu kaaꞌlonni Yihowa alba qullaawu ayyaanisinni assinoha dhaggete coye hiincino. Isi Yihowa iillinosi qarra baala hunanno yanna daggannota dihuluullamino. (Iyo. 42:1, 2) Qoleno Maganu tenne assinosi. Iyyoobi 42:10, 17 togo yitanno: “Yihowa Iyyoobira qarra baala hooli, hattono albi jiro galagale afiꞌranno gede assi. Yihowa isira alba noosirira aanaho ero asse uyisi.” Qoleno Iyyoobi “lowo dironna dancha heeshsho” heeꞌrino.

14. Layinki Qorontoosi 1:6 garinni Phaawuloosi cincasi wole manna kaaꞌlitannohu hiittoonniiti?

¹⁴ Hawaariya Phaawuloosi. Addu magansiꞌrara diina ikkino manni giwanni woy darte iillishanni noohe? Woy ati songote cimeessaatiro woy woradu aliidi laꞌꞌaanchootiro loosu batiꞌrinohehu gede ikke macciishshamannohe? Hatto ikkiro Phaawuloosi lawishsha hiinci. Isira “gobbayidinni” gibbannosiri lowo qarra iillishshinosi; hattono songote hajo yaachishshinosi. (2 Qor. 11:23-29) Ikkollana isi hexxo dimudhino; isinni isi lawishshi wole mannano jawaachishino. (2 Qorontoosi 1:6 nabbawi.^[6]) Atino qarra ikkannore cincite saꞌꞌattoha ikkiro ate lawishshi wolu mannino cincanno gede assara dandaannota deꞌooti.

‘CINCA LOOSOSE UMO FUSHSHITANNO’ GEDE ASSIDHANNI NOOTTO?

15, 16. (a) Cinca umo fushsha hasiissannose ‘loosi’ hiikkonneeti? (b) ‘Cinca loosose umo fushshitanno’ gede assiꞌra dandaattohu hiittoonniiti?

¹⁵ Yaaqoobi ayyaanunni togo yee borreessino: “Cinca loosose umo fushshito.” “Cinca” umo fushshitanno loosi maati? Cinca ‘guuta, duuchante doogonni mitturino xeinonkekkirenna danchuulle ikkineemmo’ gede kaaꞌlitannonke. (Yaq. 1:4) Duucha wote fonqolu mite akattanke woyyeesiꞌrate kaaꞌlannonke. Konne fonqolo cincine saꞌnummoro Kiristaanu akattanke guuta ikkitanno. Lawishshaho, cincineemmore, naandeemmorenna mararreemmore ikkinammora dandiineemmo.

¹⁶ Cinca loosose umo fushshite qajeelloommo Kiristaana ikkineemmo gede assitannonkehura iillannonke fonqolo miliqate yine Qullaawa Borrota xintu seerubba didiingeemmo. Lawishshaho, gara ikkitinokki hedo ledo sharrantanni noottohalla ikki? Tini hedo fonqolu giddora eatto gede assitahera wodha agurte huuccatto assidhe tenne hedo wodanikki giddonni fushshite hunate woꞌnaali. Hatto assakki ateneeto qeeꞌlate akata lossiꞌrate kaaꞌlitannohe. Yihowa Farciꞌraasincho ikkinokkihu maatekki miili darte illishanni noohe? Hatto ikkiro hexxo mudha agurte Yihowara woꞌmu wodanikkinni soqqamate murciꞌri. Tini albinni roore Yihowa addaxxatto gede assitannohe. Qoleno Yihowa hagiirsiisate cinca hasiissannonketa deꞌooti.—Rom. 5:3-5; Yaq. 1:12.

17, 18. (a) Goofimarchu geeshsha cinca hasiissannota leellishanno lawishsha kuli. (b) Goofimarchu roore gambise daanno wote Yihowa maa assannonketa dihuluullameemmo?

¹⁷ Cinca hasiissannonkehu yannate geeshsha calla ikkikkinni goofimarchu geeshshaati. Hanni mitto lawishsha laꞌno; mitte yowolo galchantinohu gede assite hedi. Yowolote giddo noo manni heeshshonsa gatisiꞌrate daahanni qaccera hige fula hasiissannonsa. Qaccera iilla rahe heeꞌre daaha aguranno manchino, shiima yanna calla daahe agurannohu lamunku itamansa digattanno. Hatteente gede ninkeno, haaro alame eꞌnammo geeshsha cincate murciꞌnoommo. Tenne heeshsho afiꞌneemmohu cincinummoro callaati. Ninkerano hawaariya Phaawuloosite gedee lao noonke; isi lame hige togo yee coyiꞌrino: “Hexxo dimudhineemmo.”—2 Qor. 4:1, 16.

¹⁸ Yihowa goofimarchu geeshsha cincineemmo gede kaaꞌlannonketa horonta dihuluullammeemmo. Ninkeno Phaawuloosi Roomu Sokka 8:37-39 aana coyiꞌrinori ledo sumuu yineemmo; isi togo yiino: “Ninke baxinonkehu isi widoonni woꞌmunni woꞌma qeelle saꞌneemmo. Korkaatuno reyono ikkituro, heeshshono ikkituro, sokkaanono ikkituro, gashshooteno ikkiro, xa noo coyibbano ikkituro, albillitte dagganno coyibbano ikkituro, wolquwano ikkituro, gottinyeno ikkiro, xeichono ikkiro, woy wole aye kalaqono ikkituro Mootichinke Kiristoosi Yesuusi widoonni leellinohu Maganu baxilliwiinni baddankera dandiitannokkita seekke afoommo.” Daafurreemmo woti heeꞌrara dandaanno. Ikkirono ninkeno Gediooninna mannasi yinita yinanninke gede goofimarchu geeshsha cincino; insa, “diinnansa shorra diagurtino” yinoonninsa.—Mes. 8:4.