Yihowa Kaajjine Uurrineemmo Gede Kaaꞌlannonke Gara

1. Kaajjine uurra hasiissannonkehu mayiraati? Kaajjine uurrineemmo gede kaaꞌlannonkehu ayeti? (1 Pheexiroosi 5:10)

TENNE qarrissannote goofimarchu barruwara, Yihowa manni kaajje uurra hasiissannonsa. Mitoota bayicho assiꞌrino dhibbi waadannonsa. Wolootu shiidhe xissiisidhanno. Woloota kayinni mininsa manni woy gashshaano gibbannonsa. (Mat. 10:18, 36, 37) Atino iillanni noohe qarri ikkihano ikkiro, Yihowa kaajjite uurratto gede kaaꞌlannoheta addaxxa dandaatto.—1 Pheexiroosi 5:10 nabbawi.

2. Kaajjine uurrineemmo gede kaaꞌlannonkeri maati?

² Kaajje uurrate yaa, guficho ikkannori, dartu, qarru woy fonqolu heeꞌrirono ammanamme hexxo mudhinikkinni heeꞌrate yaate. Ninke Kiristaanu kaajjine uurrineemmohu uminke wolqanni diꞌꞌikkino; hatteentenni kaajjine uurrineemmohu Yihowa “mannu wolqara aleenni ikkitino wolqa” aannonke daafiraati. (2 Qo. 4:7) Konni birxichira, Yihowa kaajjine uurrineemmo gede kaaꞌlate qixxeessinota shoole qixxaawo laꞌneemmo. Tenne qixxaawo dancha gede horoonsiꞌra dandiineemmo garano ronseemmo.

HUUCCATTO

3. Huuccatto maalalete yineemmohu mayiraati?

³ Yihowa kaajjine uurrineemmo gede kaaꞌlitannonketa mitte dhagge ikkitanno qixxaawo qixxeessinonke. Cubbaataamma ikkinummorono, Yihowa isi ledo hasaambeemmo faro faninonke. (Ibi. 4:16) Hanni tenne hedi: Hasiꞌnummo yannara hasiꞌnoommo hajo daafira, Yihowa huucciꞌra dandiineemmo. Hasiꞌnoommo qaalinni aye bayichono heeꞌne wole agurina xeertowa woy usuru mine heeꞌne nafa huucciꞌnummoro isi macciishshannonke. (Yon. 2:1, 2; Soq. 16:25, 26) Baasa yaandoommo daafira, giddonketa fushshine hasaapha qarra ikkitunkero nafa Yihowa mayinammora hasiꞌnoommo afanno. (Rom. 8:26, 27) Addanko, huuccatto maalalete!

4. Kaajjine uurrate huucciꞌneemmo huuccatto Yihowa fajjo ledo sumuu yitannote yineemmohu mayiraati?

⁴ Yihowa Qaalisi giddo, ‘aye coyeno fajjosi garinni huucciꞌnummoro isi macciishshannonketa’ buuxisinonke. (1 Yo. 5:14) Kaajjine uurrineemmo gede kaaꞌlankera Yihowa huucciꞌra dandiineemmo? Ee! Hatto assa fajjosi ledo sumuu yitannote. Hatto yineemmohu mayiraati? Qarra dandiine saꞌneemmo woyite, Yihowa xonannosihura Sheexaanu Daawuloosira dawaro qola dandaanno. (Law. 27:11) Hatteeno agurranna, Qullaawu Maxaafi Yihowa “isira gudisante aamantinore jawaachishate” quqquxamannota kulanno. (2 Du. 16:9) Hakko daafira kaajjine uurrineemmo gede ninke kaaꞌlate, Yihowara wolqano hasattono noosita addaxxa dandiineemmo.—Isa. 30:18; 41:10; Luq. 11:13.

5. Huuccatto giddoyidi keere uyitannonkehu hiittoonniiti? (Isayaasi 26:3)

⁵ Qullaawu Maxaafi yaachishinonkere kulle eeggifante huucciꞌneemmo woyite, ‘wodancha baalanta roorannohu Maganu keeri wodanankenna surrenke agarannota’ kulanno. (Fil. 4:7) Hanni hatto yaa mayyaatero hedi. Yihowara soqqamannokki manni qarru amadannonsa woyite giddoyidi keere afiꞌrate addi addi coye assara dandaanno. Lawishshaho, mitootu keere afiꞌrate yite mittoreno heda hoogate woy surrensa fano assate woꞌnaaltanno. Kayinni hatto assa ayyaanaamitte gawajjitanno. (Maatewoosi 12:43-45 ledo heewisiisi.) Hatteeno agurranna Yihowa iso huucciꞌnummoro aannonke keeri, mittu manchi mittoreno heda hoogatenni afiꞌrara dandaanno keere lowo geeshsha rooranno. Yihowa huucciꞌneemmoha ikkiro, iso woꞌmunni woꞌma addaxxineemmota leellinsheemmo; isi “woꞌma keere” aannonke. (Isayaasi 26:3 nabbawi.) Isi keeresi aannonketi mitte doogo Qaalisinni ronsoommoha sheshifachishanno halaale qaangeemmo gede assate. Yihowa ninke daafira hedannotanna qinaankera hasiꞌrannota anfoommohura kuni halaali surrenkenna wodananke fooliishshiishanno.—Fa. 62:1, 2.

6. Huuccattote qixxaawo dancha gede horoonsiꞌra dandaattohu hiittoonniiti? (Misileno lai.)

⁶ Assa dandaattore. Ammanakki fonqolannori iillinoheha ikkiro, “yaaddokki Maganu aana tugi” hattono keere afiꞌrate iso huucciꞌri. (Fa. 55:22) Qarra dandiite saꞌꞌate hasiissannohe hayyo afiꞌrateno huucciꞌri. (Law. 2:10, 11) Qarra dandiite saꞌꞌate eeggifatte huucciꞌratto woyiteno Yihowa galata deꞌooti. (Fil. 4:6) Yihowa qarru yannara kaaꞌlanni nooheta leellishannore hedi; hattono kaaꞌlinohetera iso galaxxi. Iillinohe qarri afiꞌrootto atoote hedattokki gede assahera wodhitooti.—Fa. 16:5, 6.

MAGANU QAALE

7. Qullaawa Maxaafa xiinxalla kaajjine uurrineemmo gede kaaꞌlitannonkehu hiittoonniiti?

⁷ Yihowa kaajjine uurrineemmo gede kaaꞌlate Qaalesi uyinonke. Qullaawu Maxaafi giddo Yihowa kaaꞌlannonketa buuxissannoti batinye xagge no. Hanni mitto lawishsha laꞌno. Maatewoosi 6:8, “Anniꞌne huuccidhinara albaanni nafa mayi hasiisannoꞌnero afino” yitanno. Tenne hedo coyiꞌirinohu Yesuusaati; isi qole Yihowa aye manchinni roore afino. Hakko daafira qarru amadannonke woyite, Yihowa hasiisannonkere wonshannonketa huluullammeemmo gede assannonkeri dino. Qullaawu Maxaafi giddo albinni roore kaajjine uurrate murciꞌneemmo gede kaaꞌlitannonketi woleno togooti duucha hedo no.—Fa. 94:19.

8. (a) Kaajjine uurrineemmo gede kaaꞌlannonkeha mitto Qullaawu Maxaafiha xintu seera kuli. (b) Hasiisannonke woyite Qullaawu Maxaafiha xintu seera qaangeemmo gede kaaꞌlannonkeri maati?

⁸ Qullaawu Maxaafihu xintu seeri kaajjine uurrineemmo gede kaaꞌlannonke. Korkaatuno, xintu seeri dancha doorsha doodhineemmo gede kaaꞌlitannonke hayyo amadino. (Law. 2:6, 7) Lawishshaho, Qullaawu Maxaafi gaꞌa ikkara woy ikka hoogara dandaanno coyi daafira yaada agurre techo daafira calla hendeemmo gede jawaachishannonke. (Mat. 6:34) Qullaawa Maxaafa nabbawatenna hiincate rosichi heeꞌrinkero, hasiisannonke yannara Qullaawu Maxaafiha xintu seera qaaga qarra diꞌꞌikkitannonke.

9. Qullaawu Maxaafi giddo noo xagge Yihowa kaaꞌlannonketa albinni roore addaxxineemmo gede assitannonkehu hiittoonniiti?

⁹ Qoleno Qullaawu Maxaafi giddo Yihowa addaxxino daafira isi kaaꞌlinonsata kultannoti batinyu manni xagge no. (Ibi. 11:32-34; Yaq. 5:17) Tenne xagge hiincineemmoha ikkiro, Yihowa ‘golonkenna wolqanke, qarru iillannonke yanna baalate kaaꞌlate qixxaawa’ ikkinota albinni roore addaxxineemmo. (Fa. 46:1) Hunda heedhinori Yihowa soqqamaano ammanante heedhino gara hendeemmo woyite, ninkeno ammanatenna cincatenni insa lawishsha haꞌrunsate kaꞌneemmo.—Yaq. 5:10, 11.

10. Maganu Qaale dancha gede horoonsiꞌra dandaattohu hiittoonniiti?

¹⁰ Assa dandaattore. Qullaawa Maxaafa barru baala nabbawi; hattono roore kaaꞌlitannoe yite hedootto qummeeshshuwa borreessite amaxxi. Batinyu roduuwi, Qullaawu Maxaafi giddonni barru baala jawaachishshanno hedo afiꞌrate barru qummeeshsha nabbawa kaaꞌlitannota wodanchitino. Maaria yinanni rodoo annasenna amase kaanserete dhibbi amadinota kulli yannara hatto assa kaaꞌlitannota huwattino. Ise annasenna amase towaaxxitu yannara kaajjite uurritanno gede kaaꞌlinoseri maati? Ise togo yitino: “Barru baala Qullaawu Maxaafire Barru Barrunku Hasaawa yinanni buukileetera noota qummeeshshu hedo nabbawe hiinceemma. Tini iillinoe qarra calla hedantenni, barru baala Yihowanna isi rosiisannonkeha dhagge ikkanno coye hedeemma gede kaaꞌlitinoe.”—Fa. 61:2.

AMMANATE RODUUWANKE

11. Qarru iillanni noonkeri ninke calla ikkinoommokkita afanke jawaachishshannonkehu hiittoonniiti?

¹¹ Yihowa ammanate roduuwinke widoonni qarra dandiine saꞌneemmo gede kaaꞌlannonke. ‘Alamete doyichora noohu roduuwu maamari woꞌmu giddo noo roduuwinkera togoo qarri iillanni noota’ afanke calla nafa callootanke ikkinoommokkita buuxissannonke. (1 Ph. 5:9) Iillanni noonke qarri ikkihano ikkiro, wolootuno togoo qarri iilleennansa dandiite saꞌinota addaxxa dandiineemmo. Ninkeno qarru iillinkero kaajjine uurra dandiineemmo!—Soq. 14:22.

12. Ammanate roduuwinke kaaꞌlitannonkehu hiittoonniiti? Ninke insara maa assa dandiineemmo? (2 Qorontoosi 1:3, 4)

¹² Ammanate roduuwinke qarra dandiine saꞌneemmo gede jawaachishshannonke. Soqqamaasincho Phaawuloosino ammanate roduuwisi jawaachishshinosi. Isi duucha hige usuru mine heeꞌreenna kaaꞌlitinosi roduuwa suꞌmansa qummi asse galatino. Insa Phaawuloosi sheshifachishshinosi, jawaachishshinosi hattono mitore assite kaaꞌlitinosi. (Fil. 2:25, 29, 30; Qol. 4:10, 11) Xaa yannara ninkeno ammanate roduuwinke jawaachishshannonke. Kaajjine uurrate kaaꞌlo hasiissannonke woyite, ammanate roduuwinke kaaꞌlitannonke; kaaꞌlo hasiissannonsa woyite insano kaaꞌlineemmonsa.—2 Qorontoosi 1:3, 4 nabbawi.

13. Maya yinanni rodoo kaajjite uurritanno gede kaaꞌlinoseri maati?

¹³ Ruusiyaho heedhannota Maya yinanni rodoo ammanate roduuwinke lowo geya jawaachishshinose. Polise 2020 minese qonqolchitino; hattono gedensoonni ammanase daafira wolootaho kultinohura yoote minira massinoonnise. Ise togo yitino: “Lowo geya dadille noomma yannara ammanate roduuwiꞌya silke dowwoltenna sokka borreessite baxxannoeta buuxissinoe. Lubbora baxxannoeti halaꞌlado maate nooeta afoomma. Kayinni 2020 kawa tenne roore huwatoomma.”

14. Ammanate roduuwinke kaaꞌlitannonke gede ma assa dandiineemmo? (Misileno lai.)

¹⁴ Assa dandaattore. Qarru iillanni nooheha ikkiro, ammanate roduuwikkiwa gamba yii. Songote cimeeyye kaaꞌlo xaꞌmiꞌrate hobbi ruxxi yitooti. Insa, ‘bubbetenna wishotenni goꞌlinanniwa’ ikkitahera dandiitanno. (Isa. 32:2) Ammanate roduuwikkino qarra dandiite saꞌanni noota qaagi. Kaaꞌlo hasiissannosi mancho kaaꞌla dancha danchare hedatto gedenna iillanni noohe qarra dandiite saꞌꞌatto gede kaaꞌlitannohe.—Soq. 20:35.

HEXXONKE

15. Hexxo Yesuusanna wole ammanantinota Yihowa soqqamaano kaaꞌlitinohu hiittoonniiti? (Ibiraawoota 12:2)

¹⁵ Yihowa kaajjine uurrineemmo gede kaaꞌlitannonketa kaajjado hexxo uyinonke. (Rom. 15:13) Yesuusi uullate aana heeꞌrinote lowo geya qarrissanno yanna giddo hexxo kaaꞌlitinosi gara qaagi. (Ibiraawoota 12:2 nabbawi.) Yesuusi ammanamasi Yihowa suꞌmi mishamannokki gede assitannota afino. Qoleno galagale Annisiwa haꞌratenna roduuwisi ledo iima moohate quqquxamino. Hatteente gede Maganu abbannote haaro alamera hegerera heeꞌrate hexxonke, tenne Sheexaanu alamera iillannonke qarra baala dandiine saꞌneemmo gede kaaꞌlitannonke.

16. Hexxo mitte rodoo kaajjite uurritanno gede kaaꞌlitinosehu hiittoonniiti? Ise coyidhinorinni maa rosootto?

¹⁶ Hanni hexxo Ruusiyaho heedhannota Aala yinanni rodoo kaaꞌlitinose gara laꞌno; minaannase amande usuru minira massinoonni. Hatte yannara Aala togo yitino: “Albillittete hexxonke daafira huucciꞌraꞌyanna hiincaꞌya quwa sae hexxo mudheemmakki gede kaaꞌlitinoe. Kuni qarri hoꞌlanno yanna noota afoomma. Yihowa qeelle adhanno; ninkeno qeelleemmo.”

17. Qullaawu Maxaafi aana xintantino hexxonke naandeemmota leellisha dandiineemmohu hiittoonniiti? (Misileno lai.)

¹⁷ Assa dandaattore. Yihowa albillitte aankera qaale einoha dhagge ikkanno coye hedate yanna gaaꞌmi. Maganu abbannote haaro alamera noottohu gede assite hedi; afiꞌneemmo atooteno hiinci. Hatto assattoha ikkiro, xaa yannara iillannonkehu aye qarrino “shiima yanna keeshshannohanna shota” ikkinota huwatatto. (2 Qo. 4:17) Qoleno ammanakki daafira wolootaho kulate dandiittore baala assi. Insa Maganu hedinore affukkinni tenne Sheexaanu alamera iillannonsa qarra dandee saꞌꞌa mageeshshi geeshsha qarra ikkitannonsaro hedi. Insara shiimare nafa kulte albillittete hexxonke daafira ledde afa hasidhanno gede assa dandaatto.

18. Yihowa uyinonke hexxo addaxxineemmohu mayiraati?

¹⁸ Iyyoobi iillinosiha lowo qarra dandee saihu gedensaanni Yihowara togo yiino: “Baalankare assa dandaattoha ikkoottotanna, hedoottore hoola dandaannohu nookkita afummo.” (Iyo. 42:2) Iyyoobi huwatinonte gede Yihowa hedinore wonshannota hoolara dandaannori mitturino dino. Kuni halaali ninkeno kaajjine uurrineemmo gede kaaꞌlannonke. Hanni lowo akimewa hadhurono dhibbisenni hura dandiitinokki daafira hexxo mudhitinota mitte mancho hedi. Woꞌnaalshu noosihunna addaxxinannihu mittu akimichi kayinni dhibbase afinotanna magarinni xagisannosero kulisero, hurate yanna hasiissannoha ikkirono tini mancho fooliishsho afidhanno. Ise xa hexxo nooseta yaano woyyimma afidhannota affino daafira jawaante afiꞌra dandiitanno. Hatteente gede ninkeno, Maganu uyino hexxo woꞌmitannota addaxxanke kaajjine uurrineemmo gede kaaꞌlitannonke.

19. Kaajjine uurrate maa assa hasiissannonke?

¹⁹ Xaa geeshsha ronsummonte gede Yihowa huuccattote, Qaalisi, ammanate roduuwinkenna hexxonke widoonni qarra dandiine saꞌneemmo gede kaaꞌlannonke. Tenne qixxaawo seekkine horoonsiꞌneemmoha ikkiro, Yihowa tenne Sheexaanu alamera noo qarri baꞌꞌa geeshsha iillannonke qarra baala dandiine saꞌneemmo gede kaaꞌlannonke.—Fil. 4:13.