Ayyaantonna Kiilaano Albillittete Yanna Daafira Afa Dandiitanno?
AYYAANTO
Ayyaanto beeddahe, aganunna pilaaneetta uullate aana noo manna kaaꞌlitara woy gawajjitara dandiitanno yite ammantannoreeti. Ayyaanto mittu manchi ilamanno woyite kuri gordu bissa ofoltino gari, hakko manchira akattasinna albillittete heeshshosi seekkanno woy bushshanno gede assitara dandiitanno yite heddanno. Ayyaanto amaaꞌla hunda Baabiloonete hanaffinoha ikkirono, xaano mannu baxanno coye ikkitino. Ameerikaho 2012nni xiinxallinoonni xiinxallo leellishshanno garinni, sasu manchi giddo mittu ayyaanto “sayinse labbanno” yee hedanno; tonne anga ikkannohu qole ayyaanto “woꞌmunni woꞌma sayinsete” yee ammananno. Addanka ayyaanto sayinseteni? Deeꞌni. Hanni togo yineemmohu mayiraatiro laꞌno.
Ayyaanto yitanno garinni, pilaaneettanna beeddahe mannu ooso akattanna albillittete heeshshonsa seekkanno woy bushshanno gede assa didandiitanno.
Duucha woyite ayyaantote masaalo aye manchi aanano woꞌmitara dandiitanno yine hendannite.
Xaa yannara noo ayyaanto harunsitannohu, biꞌre pilaaneetta baattote qooxeessira doyitanno yine ammannanni hedooti. Kayinni pilaaneetta doyitannohu arrishshote qooxeessiraati ikkinninna baattote qooxeessira diꞌꞌikkino.
Addi addi ayyaanto mittu manchi daafira kultannori babbaxxinoreeti.
Mitto barra ilamino mannira mittu gari akatta diheedhannonsa; mittu manchi ilamino barra laꞌne ayimmasi daafira afa didandiinanni. Ayyaanto mitto mancho umosi dandiinohu gede assite laꞌꞌa agurte, uminsa hedonni kaꞌe hakkonni manchi ayimma daafira coyidhanno. Ikkina tini manna mulla kaꞌne giwate ledo mitte diꞌꞌikkitino?
KIILAANO
Hundinni kayise, mannu kiilaano amaaꞌlanni keeshshino. Mite kiilaano mitu coyi daafira afate saadatenna mannu hellee woy lukkichu guma xinqiꞌranno gara laꞌanno. Wole kiilaano qolte shae gafiꞌnanni darora noo masimarra woy bunu atala laꞌe kiiltanno. Xaa yannara kiilaano kiilu kaarde, kiristaalete kaasenna wolere togoore horoonsidhe mittu manchira albillitte iillannosire masaaltanno. Kiilaano albillittete daafira kultannori garahoni? Digaraho. Hanni togo yineemmohu mayiraatiro laꞌno.
Kiilaano babbaxxitino hayyo horoonsidhe kiiltanno kiili duucha woyite isi isiniiwa sumuu diyaanno. Insa mittu gari hayyo horoonsidhe nafa kiilturo, yitannori babbaxxara dandaanno. Lawishshaho, mittu manchi lame kiilaano mittu garita kiilu kaarde horoonsidhe albillittete daafira kultasira xaꞌmiro, mittu gari hedo coyiꞌra hasiissannonsa. Ikkollana duucha woyite insa coyidhannori babbaxxinoreeti.
Kiilaanote hayyono ikko hedonsa huluullammanni gede assitannote. Mitu manni kiilaano horoonsidhanno kaardeno ikko wolu uduunnichi asse afannori dino yaanno. Kiilaano kiilate horoonsidhannohu kaarde woy wole uduunnicho ikkikkinni kiiꞌlara marino manchi ikkitooti. Lawishshaho, fullakkino kiilaano kiiꞌlara marino mancho xaꞌmo xaꞌmitanno, hattono hakku manchi coyiꞌranno garanna ikkitosi seekkite wodanchite isi ayimma daafira afate woꞌnaaltanno. Kiilaano, kiiꞌlara marino manchi hedikkinni coyiꞌrinorenna assinore laꞌe, insa kiilte affinohu gede assite heddanno. Mite kiilaano konni garinni insawa kiiꞌlanno manniwiinni lowo woxe gamba assidhanno.
QULLAAWU MAXAAFI MAYYAANNO?
Ayyaantonna kiilaano, mittu manchira albillitte iillannosire balanxe murroonni yitanno. Kayinni hatto yee heda garahoni? Digaraho. Korkaatuno Qullaawu Maxaafi, hasiꞌnoommore uminke doodha dandiineemmotanna xaa doodhineemmo doorshi albillittete heeshshonke seekkanno woy bushshanno gede assara dandaannota kulanno.—Iyyaasu 24:15.
Magano magansiꞌranno manni ayyaana layiꞌratenna kiiluwiinni xeertiꞌra hasiissannonsahu wolu korkaati, Isi baalunku gariha agaanintete looso giwanno daafiraati. Qullaawu Maxaafi togo yaanno: “Kiilaanchu, bitaamu, moora laꞌꞌannohu, qaallichu, woy gojaamu, golfa woshshannohunna ekera hasaawisannohu giddoꞌne horontanni heeꞌroonke. Konne coye assannoha baalanka Kaaliiqi dibaxanno.”—Marro 18:10-12.