Yihowa “Hamiiꞌni” Yineemmota Naadanno
YIHOWA isira shiqinsheemmo magansiꞌra naadanno. Isi soqqamaasinesi seekke ‘macciishshanno’; hattono iso guwisiꞌrate assineemmori aye geeshsha shiima ikkirono naadanno. (Mil. 3:16) Lawishshaho, hanni duucha hinge horoonsiꞌnanniha mitto qaale laꞌno. Kuni “hamiiꞌni” yaanno qaaleeti. Yihowa “hamiiꞌni” yineemmota naadanno? Ee, naadanno! Hatto yineemmohu mayiraatiro afate hanni kuni qaali afiꞌrino tironna Qullaawu Maxaafi giddo konne qaale horoonsiꞌnoonni gara laꞌno.
“MANNU BAALUNKU HAMIIꞌNI YII”
“Hamiiꞌni” yaanno qaali “ikkona” woy “addinta” yitanno tiro afiꞌrino. Kuni qaali “ammanama,” woy “halaale” yitanno tiro afiꞌrinohu Ibiraawootu Afii qaalinni dayinoho. Konne qaale mito woyite higgete ledo xaadooshshe afiꞌrinorira horoonsiꞌnanni. Mittu manchi xaari gedensaanni coyiꞌrinori gara ikkinotanna coyiꞌrinorinni daanno qarra baala duqqannota buuxisate “hamiiꞌni” yaanno. (Kir. 5:22) Kuni manchi mannu albaanni “hamiiꞌni” yaasi, eino qaale agadhanno gede assannoho ledote korkaataati.—Neh. 5:13.
Marro fooliishsho 27te, “hamiiꞌni” yaanno qaale dhagge ikkanno garinni horoonsiꞌnoonni. Israeele Hexxote Gobba eꞌu gedensaanni, Seera macciishshate Gebaalinna Geriizaani yinanni ilaali mereero gamba yitino. Insa hakkira martinohu Seera macciishshate calla ikkikkinni konne Seera adhitinota buuxisateeti. Insa Seera diiga abbitanno qarra nabbambi yannara sumuu yitinota leellishate “Hamiiꞌni!” yitino. (Mar. 27:15-26, NW) Hanni lowo kume ikkanno labballi, meentinna qaaqquulli huuronsa naggi asse “Hamiiꞌni” yii yannara macciishshantino huuro hedi. (Iya. 8:30-35) Insa hakko barra coyidhinore horo habbannokkiti egennantinote. Qoleno kuni Israeelete manni eino qaale agadhino; korkaatuno Qullaawu Maxaafi togo yaanno: “Iyyaasu lubbotenni noo yanna baalantera, Israeelete manni Kaaliiqi magansiꞌrino. Isi reyihu gedensaanni Kaaliiqi Israeelete assino maalale baala illensanni laꞌino albisooti noo yanna geeshsha iso calla magansidhanni heedhino.”—Iya. 24:31.
Yesuusino coyiꞌrinori halaale ikkinota buuxisate “hamiiꞌni” yiino; ikkollana isi hatto assinohu baxxino garinniiti. Isi “hamiiꞌni” (Sidaamu Afiinni “halaale” yine tirroonni) yiinohu wolu manni coyiꞌri gedensaanni ikkikkinni isi mitto coye coyira hanafara albaanniiti. Isi “hamiiꞌni hamiiꞌni” yee lame hige coyiꞌrino yannano no. (Mat. 5:18; Yoh. 1:51) Konni garinni isi coyiꞌrinori woꞌmunni woꞌma halaale ikkinota macciishshaanosira buuxisino. Maganu hedinore wonshannohu Yesuusa ikkino daafira, isi huluullamikkinni coyiꞌrasi garankolla.—2 Qor. 1:20; Aju. 3:14.
“MANNU BAALUNKU ‘HAMIIꞌNI’ YEE KAALIIQA GALATI”
Israeelete daga Yihowa guwisidhannonna huuccidhanno woyiteno “hamiiꞌni” yitanno. (Neh. 8:6; Far. 41:13) Macciishshanni noo manni huuccattote gedensaanni hatto yaansa, yinoonnire sumuu yitinota leellishshanno. Gamba yiino manni baalu konni garinni beeqqa dandaanno; tini qolte Yihowa hagiirrunni magansiꞌranno gede assitannonsa. Moote Daawiti Yihowa Taawoota Yerusaalame abbi yannara mannu “hamiiꞌni” yiino. Isi ayyaana ayirrinsi gedensaanni wodanisinni kae huuccatto assino; tenne huuccatto 1 Duduwo 16:8-36te aana faarsote garinni borreessinoonni. Daawiti coyiꞌrinori wodanansa kakkayisino daafira, “mannu baalunku ‘Hamiiꞌni’ yee Kaaliiqa galati.” Addaho, insa mitteenni Yihowa magansiꞌransanni tashshi yiinonsa.
Umi xibbi diri Kiristaanino, Yihowa guwisiꞌranno yannara “hamiiꞌni” yitanno yaatto horoonsiꞌrino. Qullaawu Maxaafi borreessaano sokkansa giddo duucha higge “hamiiꞌni” yaanno qaale horoonsidhino. (Rom. 1:25; 16:27; 1 Phe. 4:11) Ajuujate maxaafi iima nooti ayyaanu kalaqo nafa, Yihowa guwissanni “Hamiiꞌni! Halleeluya!” yitinota kulanno. (Aju. 19:1, 4) Umi xibbi diri Kiristaani gambooshshu yannara huuccatto assini gedensaanni “hamiiꞌni” yaanno. (1 Qor. 14:16) Ikkollana insa hatto yaannohu rosichu geeshshira calla diꞌꞌikkino.
“HAMIIꞌNI” YAA HASIISSANNONKEHU MAYIRAATI?
Yihowa soqqamaano konni albaanni “hamiiꞌni” yitino gara xiinxalline, huuccattote gumulora hatto yaa afidhino tiro huwantoommo. Ninke uminke huuccatto assiꞌneemmo woyite hatto yaanke, coyiꞌnoommore lowori gede assine laꞌneemmota leellishshanno. Batinyu manni noowa huuccatto assinanni woyite wodaninkenni woy huuronke fushshine “hamiiꞌni” yaanke, coyiꞌnoonnire sumuu yinoommota leellishshanno. Hanni “hamiiꞌni” yaa hasiissannonkeha wole korkaata laꞌno.
“Hamiiꞌni” yaa magansiꞌranke kifileeti. Huuccattote yannara Yihowa magansiꞌneemmohu coyiꞌneemmorinni calla ikkikkinni amanyootinkenniiti. “Hamiiꞌni” yaa hasiꞌneemmohu giddonkenni ikkino daafira, huuccattote gara ikkitino lao heedhannonke, hattono huuccattote aana illachisha dandiineemmo.
Yihowa magansiꞌneemmore ikkinoommo daafira mereeronke mittimma heedhanno. Songote giddo huuccatto assinanni woyite baalunku mittu gari sokka macciishshineemmo. (Soq. 1:14; 12:5) Roduuwinke ledo mitteenni “hamiiꞌni” yineemmoha ikkiro mittimmanke roore kaajjitanno. “Hamiiꞌni” yineemmohu wodaninkennino ikko huuronke fushshine ikkiro, mitteenni hatto assanke Yihowa huuccattonkera dawaro qolanno gede assitasira dandiitanno.
“Hamiiꞌni” yineemmo woyite Yihowa guwisiꞌnanni heeꞌnoommo
Yihowa guwisiꞌneemmo faro fantannonke. Yihowa iso magansiꞌrate assineemmoha shiima coye nafa laꞌꞌanno. (Luq. 21:2, 3) Isi hedonkenna wodananke laꞌꞌanno. Gambooshshe haꞌrate injaa hooginonke daafira silketenni macciishshineemmoha ikkirono nafa, “hamiiꞌni” yineemmo woyite Yihowa laꞌꞌanno. “Hamiiꞌni” yineemmoha ikkiro, gambooshshe hadhinori ledo Yihowa guwisiꞌnanni heeꞌnoommo.
“Hamiiꞌni” yaanke tirtannori nookkiha lawankera dandaanno; ikkirono hatto yaanke lowo waaga afidhino. Qullaawa Borro Seekke Huwata yaanno maxaafi Maganu soqqamaano “konni qaali widoonni, wodaninsara noo ammana, sumuummenna kaajjado hexxo” xawissanno yaanno. Konni daafira, “hamiiꞌni” yineemmo yanna baalantera Yihowa ayirranno gede assino.—Far. 19:14.