Xaꞌmote Saaxine
◼ Minee higanna makko lainohunni Kiristaanaho mayi lao heedhansara hasiisanno?
Minee higa biꞌree waro Muse Higgera woroo ikke heeꞌrannohura Maganu ledo qaalu gondooro eino mannira “malaateho”; ikkollana, Kiristaanaho “hasiisanno coye” ikkinori widira gaamantannota diꞌꞌikkitino. (Kal. 17:11; Soq. Los 15:1, 2, 28, 29, NW; Gal. 5:6) Konnira, yannankera Maganu albaanni barciminohuno ikko barciminokkihu taaloho. (1 Qor. 7:18-20) Labbaa beettonsa barcinshiishiꞌrate hedino ayiddi nafa, tenne assate hasiꞌrinohu mayiraatiro assaawa hasiissannonsa. Alamete noohu batinyu manni tenne assannohu woga wonshate, beettonsa jawoonsate, beetto cimeessa assate, woyi ayirrinye afiꞌrate yeeti. Ikkollana, Yesuusi addu Kiristaani “tenne alame” gaamo ikkinokkita coyiꞌrino. (Yoh. 17:14) Qoleno ayirrinye aanna kaffi kaffi assa hasiissannonkehu Yihowa ikkino daafira ninkeneeto kaffi assanna wolootu ayirrinye uyitankera dihasiꞌneemmo. (Yoh. 5:44) Labballo barcinshiisha fayyimmate kaaꞌlo afidhinota xiinxallo leellishshanno daafira, mite gobbara labballo barcinshiisha rosamino coyeeti. Togoo xiqime afiꞌrate hasiꞌrannohu, coyi hakkeeshsha kabbaade ikkannokki yannara, yaano qaaqqu ilamihunni boodu barri gedensaanni barcinshiinshannita kulannoha Qullaawa Borro lawishsha harunsiꞌro lowonta woyyate.—Zel. 12:3.
Ikkollana, Qullaawu Maxaafi giddo meyaata ofoshshiinshoonnita kulanno bayichi dino; qoleno ammanantinori Maganu soqqamaano togoo bude harunsitino yine eerranni gede assannori nafa dino. Meyaata ofoshshiinshanni gari yannankera bayichu bayichu garinni babbaxxinoha ikkirono, ofoshshiishshannori baalunku meyaate biso murte hooltanno. Ofoshshiishe woxe adhanno meenti kuni assooti dancha ikkinota ammansiisate duuchare coyiꞌrara dandaanno. Noore coyiꞌniro kayinni kuni assooti fayyimmate kaaꞌlannori dino. Isinni duucha wote ordu aana kabbaade qarra abbanno; lawishshaho, kalaqamunni biso xissiisannokki assooti lowonta xissiisanno gede assanno; qoleno ila baꞌꞌa, lowo mundee duꞌnama, hattono bisu harfaawa lawinori iillanno; mito wote bisu harfi shaara nafa dandaanno. Ofoltuhunni shiimu diri gedensaanni mitte beetto, “Hattee qaageemma wote reeshsha ikkoommahu gede ikke macciishshamannoe” yitino; mitootu reyo gatte saꞌuro nafa togoori macciishshamansara dandaanno.
Kuni assooti hasiisannokkiha ikkinohuranna togoo shetto naqannohura, gane goddaasate woyi qarrisate gedeeti yaa dandiinanni. Qoleno Filiphphisiyusi 2:4; 4:5 nna Qolasiyaasi 3:12 noohu Qullaawu Maxaafihu xintu seeri ledo ciranka sumuu yaannokkiho. Konninni buuxa dandiinanninte gede, meyaata ofoshshiisha Kiristaanu bude diꞌꞌikkitino. Ingilizete afiiti Ella 22, 1985 nna Dotteessa 8, 1993 Baqqi Yiiyye! yinanni metseete tenne hajore lowo coye tittirte kultanno.
Wole kayinni mitu manni ilate ledo, reyote ledo, lakkuwu ledo, meyaatera godowu daa ledonna woleno konne lawinori ledo xaado afiꞌrino coye makkiranno. Qoleno togoore dikinsanni, diꞌꞌintanni, woyi dianganni, togoore dilaꞌnanni, togoore diuddiꞌnanni, togoo doogo disaꞌnanni woyi konne barra togoore diassinanni yaanno manni no. Kiristaanu togoore makkiranno gede Maganu Qaali diamaalanno; konni daafira, togoo makko ‘annuwaꞌnewiinni ragidhinoonniha mullicho coye’ woyi ‘ammaninokki manni egenno aana xintamino bude’ yini coyi widira gaama dandiineemmo. (1 Phe. 1:18; Qol. 2:8) Yannanke Kiristaani tenne hajo lainohunni Galatiya 4:9-11 noo amaale seekke harunsanno. Konnira mittu mittunku addu Kiristaanchi, ‘Ani makkireemmori isi guutu Yihowa seeri ledo sumuu yaannoreetinsoo hiittooti?’ yee isonooto xaꞌma hasiissannosi.