“Duuchunku Gari Mannira” Sabbakke
1. Worbuulle sawaakootanna qajeela hanaaxicha mitto assannonsari maati?
1 Qajeelu hanaaxichira batinyu uduunni heeꞌrannosi; isi mitto mittonka uduunne horoonsiꞌranno yannanna gara seekke afino. Hatteente gede, ninkerano sabbakate loosonke loosate kaaꞌlannohu babbaxxino uduunni noonke. Lawishshaho, “duuchunku gari mannira” sabbakate kaaꞌlitannonketi addi addi hajore kultanno birosherubba qixxaabbino. (1 Qor. 9:22, NW) Tenne Maganu Mangiste Soqqanshonkera ledote qoolira mite mite biroshere qummi assinoonni, hattono hiittoo mannira qixxaabbinoronna hiittoonni ela dandiinanniro xawinsoonni.
2. Soqqanshonkera birosherubba hiikka wote horoonsiꞌra dandiineemmo?
2 Biroshere Ellanni Yanna: Mittu hanaaxichi mitto uduunnicho hasiisanno yanna baalantera horoonsiꞌranno. Hatteente gede, aganu giddo ellanniti biroshere ikka hoogguro nafa mittu manchira kaaꞌlitannoha lawe leellannonke yanna baalantera biroshere ela dandiineemmo. Lawishshaho ellanni borro Qullaawu Maxaafi Roso ikkiteenna, hasaawinsoommo manchi kayinni Kiristinnu ammaꞌno harunsannokkihanna Qullaawu Maxaafira gari hasatto noosikkiha ikkiro, isira injiitanno biroshere ellammora dandiineemmo; ganaanni hasattosi lexxituro Qullaawu Maxaafi Roso egensiinsammora dandiineemmo.
3. Soqqanshote uduunnenke horoonsiꞌrate fullankoommore ikka hasiissannonkehu mayiraati?
3 Qullaawu Maxaafi loosonsa ogimmatenni loossannore naadanno. (Law. 22:29) Yannankera, “dancha duduwo” duduwate geeshsha hasiisannohu wolu “qullaawu loosi” nookkiti dihuluullissannote. (Ro. 15:16, NW) ‘Saalfatannori nookki loosaasincho’ ikka dandiineemmo gede, soqqanshote uduunnenke seekke horoonsiꞌrate fullankoommore ikkate sharrammeemmo.—2 Xim. 2:15.