Halaale Afa Dandiinanni?

Lowo kume ikkanno diro tenne xaꞌmora dawaro anfikkinni keeshshinoonni. Hatte mereero lowo miliyoone ikkanno manni taraawanno dhibbinni goofino. Yannate gedensaanni kayinni, sayinsete egennaammi tenne daafira halaale affino. Insa, duucha woyite dhibbu taraawannohu baakteeriyunna vayiresete gedeete dhibba abbitannote shiimmaadda lubbuwanni ikkinota buuxxino. Taraawanno dhibbi daafira halaale afa, lowo dhibba gargarranninna xaginsanni gede kaaꞌlitino; konninni kainohunni lowo biliyoone ikkanno manni fayyimma afiꞌre seeda diro heeꞌra dandiino.

Lowo geeshsha huluullitannonkete wole xaꞌmuwara dawaro afiꞌra dandiinanniyya? Aante noo xaꞌmuwara dawaro afiꞌrakki ateno kaaꞌlitannohehu hiittoonniiti?

• Maganu ayeti?

• Yesuusi Kiristoosi ayeti?

• Maganu Mangiste maati?

• Albillitte heeshsho hiittoota ikkitanno?

Lowo miliyoone ikkanno manni kuri xaꞌmuwara dawaro afiꞌransa, hagiirru noo heeshsho heeꞌranno gede kaaꞌlitinonsa. Kuri xaꞌmuwara dawaro afiꞌrakki, ateno kaaꞌlitahera dandiitanno.

HALAALE AFA DANDIINANNI?

‘Mittu coyi daafira halaale afa dandiinannihu hiittoonniiti?’ yite hedattoha ikkara dandaanno. Qoleno, mittu mittunku coyi daafira halaale afa roore qarra ikkitara dandiitanno. Mayira?

Batinyu manni halaale dikultanno yee hedanno daafira gashshaasine, daddalaano woy tuqu xaadooshshe diammananno. Uminsa hedo, woy gama adda gama kapho, woy woꞌmunni woꞌma kapho coyiꞌranno manni batiꞌrino daafira, halaalu hiikkonneetiro afa qarra ikkitanni daggino. Tenne yawaawullenna kaphu batiꞌrino alamera halaale anfe gara ikkinore assa agurina, halaalu maatiro huwata nafa qarra ikkitino.

Ikkirono, huluullitannonke xaꞌmuwara halaalaancho dawaro afiꞌra dandiineemmo. Hiittoonni? Barru barrunkunni shiimmaadda coyibba daafira halaale afate horoonsiꞌneemmo hayyo horoonsiꞌra dandiineemmo.

HALAALE AFA DANDIINEEMMOHU HIITTOONNIITI?

Ajo batiꞌro barru baala halaale hasiꞌneemmo. Hanni Jesika lawishsha laꞌno. Ise togo yitino: “Qaaqqoꞌya ocholoone itturo baasa dhiwannose; shiima ocholoone karsantinore nafa itturo shaasera dandaanno.” Hakko daafira, Jesika qaaqqosera sagale hidhitanno woyite lowo geeshsha qorophitanno. Ise togo yitino: “Ashshagantino sagale hidheemma woyite, balaxe sagale mayinni qixxeessinoonnitero afate aanaho borreessinoonnire qorophe nabbaweemma. Hakkiinni hattee sagale daafira lede xiinxalleemma; isinni, hili ocholoone nafa karsinoonnikkita buuxate qixxeessitino dirijjite xaꞌmeemma. Qoleno hatti dirijjite sagale qixxeessitanno gari fayyimma gawajjannoronna teꞌee buuxate wole ammannanni mashalaqqe afiꞌrate woꞌnaaleemma.”

Barru baala halaale afiꞌrate sharrammeemmo coyi Jesikahu geeshsha qarrisannoha ikka hoogirono, xaꞌmonkera dawaro afate ise gede aane noore assa dandiineemmo:

• Mashalaqqe hasiꞌri.

• Ledde xiinxalli.

• Afiꞌrootto mashalaqqe adda ikkase buuxi.

Togo assa, heeshshonke giddo lowo geeshsha huluullitannonke xaꞌmuwarano halaalaancho dawaro afiꞌrate kaaꞌlitannonke. Hiittoonni?

HALAALE KULANNOHA BAXXINO MAXAAFA

Jesika Qullaawu Maxaafi halaale afa hasidhu yannarano, qaaqqose fayyimma gawajjitannokki sagale afate horoonsidhino doogga kaaꞌlitinose. Ise, “Qullaawa Maxaafa seekke nabbawaꞌyanna diinaggaawe xiinxallaꞌya halaale afeemma gede kaaꞌlitinoe” yitino. Jesikano ikko wolu lowo miliyoone ikkanno manni aante noo xaꞌmuwara Qullaawu Maxaafinni dawaro afiꞌrino:

• Kalaqammoommohu isi mayiraati?

• Reyineemmo woyite ma ikkineemmo?

• Qarru iillannonkehu mayiraati?

• Maganu qarra baala hunannohu hiittoonniiti?

• Maatenke hagiirru noota assiꞌra dandiineemmohu hiittoonniiti?

Kuri xaꞌmuwara halaalaancho dawaro afiꞌrate, Qullaawa Maxaafa nabbawanna www.jw.org/sid horoonsidhe ledde xiinxalla dandaatto.