Kiristaanu Heeshshonna Soqqanshote Xiinxallote Maxaafichora Qummi Assinoonni Borro
© 2025 Watch Tower Bible and Tract Society of Pennsylvania
ONKOLEESSA 5-11
MAGANU QAALI GIDDO NOOTA MUXXE JIRO LAWISHSHA 12
Jaate Loosa Kiissanno
Culkunni Roore Muxxe Ikkinoha Maganu Baxanno Akata
Mite Yihowa soqqamaanora heeshshonsara hasiisannonsare afidhannoha gari looso afiꞌra qarra ikkitansara dandiitanno. Ikkollana, ammanama bainore assite shotunni woxe afiꞌrate heda agurte jawaatte loosate sharrantanno. Hakko garinni ammanamansa wole Maganu akatta baalunku coyinni roorsite laꞌannota leellishshanno.—Law. 12:24; Efe. 4:28.
Loonseemmo Loosinni Hagiidha Dandiineemmo Gara
Roorenka tenne jeefote xaꞌmo seekkine heda hasiissannonke; korkaatuno looso loosa roore hagiirsiissannohu loosinke woloota kaaꞌlanno gara hendeemmoha ikkirooti. Yesuusi umisi togo yiino: “Adhantenni aa roore hagiirre abbitanno.” (Hawaariyaatete Looso 20:35) Loosinkenni xaaddote horo afiꞌranno manna lawishshaho dambanyootanna loosiisannonke manchono agurranna, diinaggaambe loosanke kaaꞌlitannohu wolu mannino no. Kuri giddo mininke mannanna qarramino manna kula dandiinanni.
Mininke manna. Qaete anni diinaggaawe loose maatesira hasiisannore shiqishannoha ikkiro, minisi manni ajayi ajeenna lamu gari horo afiꞌranno. Umihunni, maalaamittete hasiisannonsare sagale, uddanonna galannowa afiꞌranno gede kaaꞌlanno. Isi konne asse “umisire ikkitinore towaatanno” gede Maganu uyinosi halaafinate wonshanno. (1 Ximootewosi 5:8) Layinkihunni, diinaggaawe loosanno anni oososi looso baxxanno gede dancha lawishsha ikkanno. Sai birxichira kullihu Sheeni togo yiino: “Anniꞌya diinaggaawe loosate dancha lawishsha ikkannoho. Isi roore diro hanaaxicha ikke diinaggaawe loosinoho ammanamino manchooti. Mittu manchi ogimma heedheennasi mannaho kaaꞌlannore loosasi mageeshshi geeshsha hagiirsiissannoro isiwiinni rosoommo.”
Qarramino manna. Hawaariya Phaawuloosi Kiristaanu ‘qarraminohura aannori heeꞌrannonsa gede diinaggaawe loosanno’ gede amaalino. (Efesooni 4:28) Uminkeranna mininke mannira hasiisannore shiqishate diinaggaambe loonseemmoha ikkiro, qarrantinorirano uyineemmori heeꞌrannonke. (Lawishsha 3:27) Konni daafira, diinaggaawe loosa uyine afiꞌnanni hagiirre afiꞌrate kaaꞌlitannonke.
Maganu Qaalinni Ronseemmore
Wolootaho Aa Roore Hagiirraamma Ikkinanni Gede Assitanno
10 Coyiꞌneemmorino wolqa afiꞌrinota deꞌnoonke. Assitinore kulte galatittonsaro jawaante afidhara dandiitannori ayeooti? Shesho hasiissannosihu afoottohu no? Togoo manni nooha ikkiro insa daafira hedattota afanno gede assi. Marte xaꞌmite, silke dowwolte, kaarde woy iimeele sokke hattono sokka borreessite tenne assa dandaatto. Togoo woyite mayyaattoro quwa saꞌe yaada dihasiissannohe. Ammanate rodiikki hakko barra ammaname saꞌꞌanno gede woy qarrasi illachisha agure dancha danchare hedanno gede kaaꞌlannosihu baxillunni kaꞌe coyiꞌrattoha shiima qaale calla ikkara dandaanno.—Law. 12:25; Efe. 4:29.
Ammanakki Xawisse Kuli
ijwfq birxicho 3
Addu Ammaꞌno Ninke Callite Yitine Ammantinanni?
Ammaꞌno seekke cuꞌmirino manni ammaꞌnonsa Magano hagiirsiissannoteronna teꞌee buuxiꞌra hasiissannonsa. Hatto ikka hoogiro, ammaꞌno noonke yaansa maa kaaꞌlitannonsa?
Yesuusi Kiristoosi, gatote widira massitannoti batinye doogo woy ammaꞌno no yee dirosiisino. Hatteentenni isi togo yiino: “Heeshshote widira massanno waalchi ruukkashshoho; doogono gurchote [ruukkashshote]; ise afiꞌranno manni kiiro shiimaho.” (Maatewoosi 7:14) Yihowa Farciꞌraasine hattenne doogo aana noota ammantanno. Hatto ikka hoogoommero, wole doogo hasidhanno.
ONKOLEESSA 12-18
MAGANU QAALI GIDDO NOOTA MUXXE JIRO LAWISHSHA 13
“Bushuullu Caabbichi” Dogoonkeꞌne
it-2 196 guf. 2-3
Caabbicho
Lawishshunni Horoonsiꞌnoonni Gara. Mittu manchi massagasira wodhanno coye caabbichunni lawinsoonni. Lawishshu maxaafi keeraanotenna bushuullu caabbichi mereero noo badooshshe kulanni togo yaanno: “Keeraanote caabbichi warri yee xawanno; bushuullu caabbichi kayinni xoanno.” ( La 13:9) Keeraanote caabbichi roore warri yaanni haꞌranno, bushuulleho kayi yannate geya qiniinonsahanna caabbichinsa xawinoha lawirono, Maganu insa tunsichu giddo ubbanno gede asseenna hakkiicho gufidhe ubbanno. Annasinna amasi xonannohura gedensisi togooha ikkanno.—La 20:20.
‘Caabbichinsa xoanni’ noo mannira geedonsa diseekkanno. Lawishshu maxaafi togo yaanno: “Bushu geedo diafiꞌrino; caabbichisino xoanno.”—La 24:20.
“Foorretewiinni Xooqqe!”
13 Jaallanke huntankera woy seekkitankera dandiitanno. Maganu biddishsha harunsitannore jaallakki assiꞌrittoro, atino hatto assatto gede kaaꞌlitannohe. (Lawishsha 13:20; 1 Qorontoosi 15:33 nabbawi.) Diina xagge jaalla qorophine doodha hasiissannonketa leellishshanno. Ise Yaiqoobi beetto ikkitino daafira, lophitinohu Yihowa magansidhanno maate giddooti. Diina busha coye assitannota ikka hooggurono, Yihowa magansiꞌrannokkihu Kanaani seenni ledo muli jaalooma kalaqidhino. Kanaani manni siimu xaadooshshira noonsa lao Maganu manni laonni baxxitinote; Kanaani manni maaeela coye assatenni egennaminoho. (Leewaawoota 18:6-25) Diina jaallase ledo heedhe, Sekeemi yinannihu Kanaani wido ikkino beettinni xaaddino; Sekeemi ise baxino. Sekeemi annisi mine noori baalunkunni roore ayirradoho. Ikkollana isi Yihowa baxannoha diꞌꞌikkino.—Kalaqama 34:18, 19.
14 Sekeemi assinori isi garaho yee hedannoreeti. Isi Diina ‘wolqatenni amade’ seyatinose. (Kalaqama 34:1-4 nabbawi.) Tini jaddo Diinarano ikko maatese woꞌmate lowo qarra abbitino.—Kalaqama 34:7, 25-31; Galatiyu Sokka 6:7, 8.
w04 7/15 31 guf. 6
“Egennaamu Manchi Looso Hayyotenni Loosanno”
Egennotenni heeꞌrannohu wodancha noosihunna keeraanchu manchi maassamanno. Salamooni togo yiino: “Keeraanchu duuwa geeshsha itanno; bushu kayinni hudiꞌranni heeꞌranno.” (Lawishsha 13:25) Maatenke, wolootu ledo noonke aante, soqqanshonke lainohunni, seejjinanninke woyiteno ikko wole aye yannarano Yihowa ninkera woyyannore afino. Qoleno Qaalisi giddo noo amaale harunsinummoro taalle nookki heeshsho heeꞌneemmoti egennantinote.
Maganu Qaalinni Ronseemmore
“Labballo Baalaho Kiristoosi Umoho”
13 Ninke maa ronseemmo? Maatete umo ikkino manchi baalankare baxillunni assa hasiissannosi. Hatto assa lowo geya hasiissannohu mayiraati? Soqqamaasinchu Yohaannisi togo yee borreessino: “Laꞌꞌanni nooha rodoosi [woy maatesi] baxinokkihu illetenni afinokkiha Magano hiitto asse baxa dandaanno?” (1 Yoh. 4:11, 20) Roorenkanni maatesi baxannohunna Yihowanna Yesuusi lawishsha harunsa hasiꞌranno manchi maatesira ayyaanaamittetenna maalaamittete hasiisannonsare wonshanno; hattono baxannonsata affanno gede assanno. (1 Xim. 5:8) Isi oososi qajeelsanno hattono seejjanno. Yihowa ayirranno gede assannorenna maatesira kaaꞌlannore assano diaguranno. Hanni maatete umo ikkino manchi kuri coyibba assa dandaanno garanna Yihowanna Yesuusi lawishsha harunsa dandaannohu hiittoonniitiro laꞌno.
Lallawo
lmd guwuursha A naxiwe 9
Annansanna amansa ayirrissannonna hajajantanno oosora qinaannonsa.—Law. 1:8, 9; Efe. 6:1-3.
ONKOLEESSA 19-25
MAGANU QAALI GIDDO NOOTA MUXXE JIRO LAWISHSHA 14
Dano Kalaqantanno Woyite Layidhinanni Qaaffe
Maganu Uyinoꞌne Heeshsho Lowori Gede Assitine Laꞌe
10 Mito woyite gawajjannonke coye hooꞌla didandiineemmo. Lawishshaho kalaqamu dano, taraabbanno fayyanna dagate gaance kaꞌannota hoola didandiineemmo. Togoori kalaqamanno woyite gashshaano qooxeessa agurre fulleemmo gede woy wolere assineemmo gede kultannonke woyite hajajamme, iillitannonke gawajjo ajisha woy danotenni gata dandiineemmo. (Rom. 13:1, 5-7) Mite kalaqamu dano balanxe afa dandiinannite; togoo woyite qooxeessu gashshaano balanxe qixxaambeemmo gede kultannonke biddishsha baala harunsa hasiissannonke. Lawishshaho waa, rakke baꞌannokki sagalenna xagisiꞌrate kaaꞌlannore shiimaaddare qixxeessiꞌra dandiineemmo.
11 Heeꞌneemmo qooxeessira taraabbanno fayya ubbanno woyite ma assa hasiissannonke? Togoo woyite gashshaano ganyine anga hayishshiꞌneemmo gede, mannunniwa gamba yineemmokki gede, maaske wodhineemmo gedenna mannunni xaandeemmokki gede kultannonke woyite hajajama hasiissaanke. Kuri coyibba diinaggaambe assanke Maganu uyinonke heeshsho lowo geeshsha naandeemmota leellishshanno.
12 Dano kalaqantanno woyite jaallanke, qachinke manninna tuqu xaadooshshi widoonni gara ikkitinokki mashalaqqe macciishshinammora dandiineemmo. “Yinire baala” adda assiꞌratenni tenne hajo daafira gashshootu woy hakimootu kultannota addaxxinanni taje macciishsha hasiissannonke. (Lawishsha 14:15 nabbawi.) Togoo woyite Aliidi Bisinna sinu biiro, songote gambooshshinna sabbakate daafira biddishsha uyitara albaanni gara ikkitino mashalaqqe afiꞌrate sharrantanno. (Ibi. 13:17) Konne biddishsha harunsine ninkeneetono ikko woloota gawajjannorinni agara dandiineemmo. Qoleno mannu Yihowa Farciꞌraasine daafira danchare hedanno gede assa dandiineemmo.—1 Phe. 2:12.
Saadooqi Gede Worbuulle Ikke
11 Qarru yannara ammanate roduuwanke kaaꞌlineemmo gede kullinkero, Saadooqi gede worbuulle ikkinoommota leellisha dandiineemmohu hiittoonniiti? (1) Biddishsha harunse. Togoo woyite mittooꞌmine heeꞌra lowo geeshsha hasiissannote. Sinu biiro uyitanno biddishshira hajajamme. (Ibi. 13:17) Songote cimeeyye dano kalaqantanno woyitira qixxaawate daafira kulanno biddishsha ganyite laꞌꞌanna dano kalaqantanno woyite maa assitannoro heda hasiissannonsa. (1 Qor. 14:33, 40) (2) Worbuulle kayinni qorophitinannire ikke. (Law. 22:3) Mitto coye assitinara albaanni balaxxine hedde. Dandaami deerrinni gawajjanno coye qorophe. (3) Yihowa addaxxe. Yihowa kiꞌnerano ikko ammanate roduuwiꞌne fayyimma daafira lowo geeshsha hedannota qaagge. Isi gawajjanno coye iilliꞌnekkinni ammanate roduuwaꞌne kaaꞌlitinanni gede kaaꞌlannoꞌne.
Maganu Qaalinni Ronseemmore
Gara Ikkinore Doodhate Kaaꞌlannonkeri Maati?
2. Mitto coye doodhattora albaanni maa heda hasiissannohe?
Qullaawu Maxaafi, “Egennaamu . . . layiꞌranni qaafanno” yaanno. (Lawishsha 14:15) Hatto yaa, mitto coye doodhinammora albaanni, maa assa dandiineemmoro woy noonke doorsha wodanaaꞌmine heda hasiissannonke yaate. Mitto mittonka doorsha hedatto woyite, ateneeto togo yite xaꞌmi: ‘Tenne hajo ledo xaadooshshe afiꞌrinohu Qullaawu Maxaafihu xintu seeri hiikkoyeti? Assa hasiissannoeri maati? Doodheemmori wole manna kaaꞌlara woy gawajjara dandaannohu hiittoonniiti? Roorenkanni, doodheemmo coyi Yihowa hagiirsiisanno?’—Marro 32:29.
Dano Kalaqantanno Woyitira Qixxaabbe
od 176 guf. 15-17
Yihowa Dirijjitewa Gamba Yite Heeꞌri
15 Olunni, finqilletenni, woy dartunni kainohunni hattono gashshootu loosonke agawino daafira faajjetenni magansiꞌra qarra ikkitahera dandiitanno. Mitteenni xaadde songote gambooshshe assiꞌra qarra ikkitahera dandiitanno. Sinu biiro ledono xaada hoogattora dandaatto. Woradu aliidi laꞌꞌaanchi towaanyono qinaa hooggahera dandiitanno. Borro afiꞌrano qarra ikkitahera dandiitanno. Togoori ikkiro maa assa hasiissannohe?
16 Togoo woyite wolqakki assiture baalare assi. Hojju xiinxallo assiꞌra dandaatto. Mannu afiꞌnekkinni boode boode gaamo ikkitine xiinxalla dandiitinanni. Gambooshsheho alba xiinxallinoommo borronna Qullaawa Maxaafa umosi horoonsiꞌra dandiitinanni. Togoori kalaqamanno woyite yaada woy masa dihasiissannohe. Duucha woyite Aliidi Bisi harancho yanna giddo albisa ikkite soqqantanno roduuwi ledo xaada dandiinanni doogga qineessara dandaanno.
17 Ammanate roduuwikkiwiinni baxxittorono, Yihowanna Beettisi Yesuusi Kiristoosi kayi ledokki noota deꞌooti. Hexxokki xabbe leeltannohe gede assiꞌra dandaatto. Yihowa huuccattokki macciishshanno hattono ayyaanisinni jawaachishannohe. Biddishsha aannohe gede alba isiwa higi. Yihowa soqqamaanchonna Yesuusi Kiristoosi rosaancho ikkoottota deꞌooti. Konnira, afiꞌritto faro baala horoonsidhe farciꞌrate sharrami. Yihowa assoottore maassiꞌreenna wolootuno halaalu minira daggara dandiitanno.—Soq. 4:13-31; 5:27-42; Fil. 1:27-30; 4:6, 7; 2 Xim. 4:16-18.
g17.5 4
Dano Kalaqantanno Woyite Heeshsho Gatisate Assa Dandaattore
BALAXXE QIXXAAWI!
DANO kalaqantannokki gede assiꞌra dandaannohu dino. Togoo woyite gatate qaru coyi balanxe qixxaawate. Ikkina qixxaawate ma assa dandiinanni?
• Dano kalaqantara dandiitannota hende agara. Dano kalaqantara hattono atenna maatekki woy jaallakki gawajjitara dandiitannota afi. Dano kalaqantu gedensaanni qixxaawa beebbate daafurooti.
• Ate qooxeessira kalaqantara dandiitanno dano hedi. Xoonqe maaxama dandiinannihu hiikkootiro afi. Mine miꞌnootto garinna miꞌnootto qooxeessi dancha ikkasinna teꞌee buuxi. Giira kaꞌanno gede assara dandaannore hooli. Mini giddo mitiri giirame wiliiliro afate kaaꞌlanno uduunnicho wodhi; hattono kuni uduunnichi loosanno gede assanno kincho ajayi ajeenna diruyi mitte higgine soorri.
• Dano kalaqantanno woyitira hasiisannore qixxeessiꞌri. Dano kalaqantanno woyite korreente, wayi, silkenna hodhishshu hoogara dandaanno. Makeenu nooheha ikkiro nadaaje lowo geya xeꞌannokki gede assiꞌri; hattono woꞌmanka woyite togoo woyitira ikkitanno sagale, waanna hasiisannoha wole coye qixxeessite wodhi.—“Dano Kalaqantanno Woyitira Hasiisannore Qixxeessiꞌrootto?” yitanno saaxine lai.
• Mulekkino ikko xeertote heedhanno jaallakkiti silkensa kiiro heedhannohe gede assiꞌri.
• Dano kalaqantanno woyite xoonqe fula dandiinanni gara rosiisiꞌri. Heeꞌratto mini giddo rahe fulate kaaꞌlitanno furcho noohu hiikkaanniitiro afi; hattono oosokki rosu mine heedheenna dano kalaqanturo maa assitannoro hasaabbe. Dano kalaqantanno woyite maatekki ledo mama xaaddinanniro hasaabbe. Xaaddinanni bayichi mittu mule nooha wolu kayinni xeertiꞌre nooha ikkara dandaanno; lawishshaho rosu mine, woy maxaaffate mine xaaddinanni gede hasaawa dandiitinanni. Egennaammu, maateꞌne ledo xaadate heddinoonni bayicho lekkatenni hadhinanni rosiisiꞌra dancha ikkitinota coyidhanno.
• Woloota kaaꞌlate qixxaawi, lawishshaho geerranna dhuku anje noonsare kaaꞌla dandaatto.
ONKOLEESSA 26–ELLA 1
MAGANU QAALI GIDDO NOOTA MUXXE JIRO LAWISHSHA 15
Wolootu Hagiirraamma Ikkitanno Gede Kaaꞌlensa
Kiristaanu Hagiirrunni Wosina Adha Hasiissannonsa!
17 Babbaxxinohu tiokiraasete rosi mine rossanno roduuwa wosinsitannoti mitte suwisaancho rodoo togo yitino: “Miniꞌya shiima ikkino daafiranna horoonsiꞌreemma uduunnichi akkala ikkino daafira umi qara wosina adha waajjoomma. Mitte [tiokiraasete rosi mini rosiisaanchi] galte kayinni yaadeemmakki gede kaaꞌlitinoe. Isenna minaannise songuwa towaatanno wote, roore hagiirsiissanno yanna sayisinohu heeshshonsa bikkunnita assiꞌre Yihowara soqqamate illachishanno roduuwi ledo ikkinota kultinoe; kuri roduuwira garihu maalaamittete coyi noonsakkiha ikkara dandaanno. Hatte yannara alba amaꞌya ‘Baxillu noowa raafo ita woyyitanno’ yitannoti qulli yitinoe.” (Law. 15:17) Wosina adhitinanni gede kakkayisannoꞌnehu baxilleho; konni daafira yaada dihasiissannoꞌne.
Mimmitonke “Albinni Roorsine” Jawaachinsho
16 ‘Waajjishannoe daafira woloota jawaachisha didandeemmo’ yine heda soꞌrote. Woloota jawaachisha hakkeeshshi geeshsha qarrissannota diꞌꞌikkitino; mitto mancho keere haaꞌneemmo woyite faasiinqe hasaawisa calla jawaachishshasira dandiitanno. Mittu manchi ninke faasinqe hasaawinseemmosi woyite isi qole hatto assannokkiha ikkiro, tini qarru iillinosita leellishshara dandiitanno; tenne yannara hasaaphanno woyite seekke macciishsha jawaachishshasira dandiitanno.—Yai. 1:19.
17 Enirii yinannihu wedellichu rodii cimeessa ikkino annisinna wolu muli fiixisi halaalu mininni fuli yannara lowo geeshsha dadillino. Mittu woradu aliidi laꞌꞌaanchi Enirii shaete minira haaꞌre haꞌre Enirii giddosita kuꞌlanna seekke macciishshino; hatte yannara Enirii lowo geeshsha jawaatino. Qoleno fiixisi halaalu minira higanno gede kaaꞌlate, isi Yihowara ammaname heeꞌra hasiissannosita huwatino. Enirii Faarso 46; Soffooniyaasi 3:17 nna Maarqoosi 10:29, 30 nabbawasi lowo geeshsha jawaachishshinosi.
18 Maartinna Enirii lawishshi, jawaante hasiissinonsa roduuwinkera jawaantete buicho ikka dandiineemmota leellishanno. Moote Selemooni togo yee borreessino: “Yannasira coyiꞌnoonni coyi hiittoo danchaati! Hisataamo alba laꞌꞌa wodana hagiirsiissanno; dancha duduwo macciishsha jawaachishshanno.” (Law. 15:23, 30) Agarooshshu Shaenni woy webisayitenke aaninni mite hedo nabbawano hexxo mudhinoha jawaachishshara dandiitanno. Phaawuloosi coyiꞌrinori, mitteenni Maganu Mangiste faarso faarsano jawaachishshannota leellishanno. Isi togo yee borreessino: ‘Egenno baaletenni mimmitoꞌne rosiissenna seejje. Faarsotenninna guwishshunni Magano wodaniꞌnenni galattinanni faarse.’—Qol. 3:16; Soq. 16:25.
Maganu Qaalinni Ronseemmore
ijwbq birxicho 39 guf. 3
Kiristaanu Xagisiꞌranno?
2. Wole akimootano amaaꞌla hasiissaekka? Hakko iso baasa xiwanni nooheha ikkiro, woloota amaaꞌla kaaꞌlitahera dandiitanno.—Lawishsha 15:22.
ELLA 2-8
MAGANU QAALI GIDDO NOOTA MUXXE JIRO LAWISHSHA 16
Danchare Doodhineemmo Gede Kaaꞌlitannonketa Sase Xaꞌmuwa
Wedellimmate Yannara Woyyinore Doodha
11 Wolu baalunkurinni roore hagiirsiissannonketi Yihowara soqqamate. (Law. 16:20) Ermiyaasi borreessaanchi Baarooki tenne deino yanna nooha lawanno. Mitte yannara isi heeshshosi giddo hagiirre hoogi. Yihowa iso togo yiino: “Umikkira bayira coye hasidhanni nootto. Daga baalate bao abbammoraatina, togoo coye hasiꞌra aguri . . . haꞌrattowa baalankawa lubbokki gattanno gede asseemmo.” (Erm. 45:3, 5) Baarooki hagiidhanno gede assannosihu maa lawannohe? Isi hasiꞌrinore afiꞌre baꞌꞌatenso, Yihowa hasiꞌrannore asse Yerusaalame baꞌanno wote gatate?—Yaq. 1:12.
12 Wolootaho soqqame hagiirre afiꞌrinohu mittu rodii Ramirooti. Isi togo yiino: “Ilamoommohu Andisi Ilaallara noo qachira heedhannote mitte buxicho maate giddooti. Hakko daafira bayiru rodiiꞌya yuniversite eꞌꞌe roseemmo gede woxe kaffaleemmohe yaasi, lowo coyeeti. Ani kayinni hakkawote mulella cuuame Yihowa Farciꞌraasincho ikke kaoommo; qoleno mittu suwisaanchi mittu shiimu katamira ledosi soqqamammora koyise nooe. Hakka haꞌre umo haxa rosummo, hakkiinnino umoꞌya dandee heeꞌrate umo hanxanni mine faꞌnummo. Qullaawa Borro xiinxallinseemmota kulleemmo wote, lowo manni maahoyye yaanno. Ganaanni hige, haarote kalaqantinota ani afoo dadhoommo afiinni marraꞌnanni songo haꞌrummo. Xa woꞌma yanna soqqansho jammarummonku tonne diro ikkinoe. Mannu uminsa afiinni dancha duduwo macciishshanno gede kaaꞌle afiꞌroommo hagiirri wole aye loosono loose diafiꞌreemmoho.”
w13 9/15 17 guf. 1-3
Soorramootto?
BAALANKA lophinoommo garinna qooxeessinke quxinonke. Uddiꞌneemmo gari, banxeemmo sagalenna akatinke, mito geyano ikkiro qooxeessinkera noo manninna heeshshonke gari quxinonketa leellishanno.
2 Ikkirono, uddiꞌneemmno garinninna doodhineemmo sagalenni roore heda hasiissannonke coyi no. Lawishshaho, mitu coyi danchaho mitu qole bushaho yine kullannanke lophinoommo. Kuri giddo batinyu meessa doodhannoreetinna annu annu garinni baxxannoreeti. Doodhineemmohu tiiꞌꞌinke kulannonkereeti. Qullaawu Maxaafi, “Seeru noonsakki daga [duucha woyite] kalaqamunni Seeru giddo noore” assitannota kulanno. (Rom. 2:14) Hatto yaa kayi mittu coyi daafira Maganu Qaali giddo xawise kulanno seeri hoogiro, lophinoommowa woy qooxeessinkera rosaminore assa dandiineemmo yaateni?
3 Kiristaanu hatto assa hasiissannonsakkihu mayiraatiro leellishannohu ajayi ajeenna lamu qaru korkaati no. Umihunni, Qullaawu Maxaafi togo yee amaalannonke: “Mannaho dancha labbannoti mitte doggo no; goofimarchoho kayinni reyote tugganno.” (Law. 16:25) Guuntete xeꞌne noonkere ikkinoommo daafira, qaafonke seekkanno gede assiꞌrate kaaꞌlannonkere woꞌmunni woꞌma afate dandoo dinonke. (Law. 28:26; Erm. 10:23) Layinkihunni, Qullaawu Maxaafi alamete wodhoranna biddishshira annu “tenne alame magani” Sheexaane ikkinota kulanno. (2 Qor. 4:4; 1 Yoh. 5:19) Konnira Yihowa hagiirsiisanna atootesi afiꞌra hasiꞌnummoro Rooma 12:2te noo amaale harunsa hasiisannonke.—Qummeeshsha nabbawi.
Maganu Qaalinni Ronseemmore
Tenne Alame Hayyo Doggoonkeꞌne
13 Qullaawu Maxaafi, ‘Kaaliiqi booꞌnaleessa wodana tiyyire giwanno’ yaanno. (Law. 16:5) Yihowa booꞌnaleeyye woy naaxxitannore giwannohu mayiraati? Umonsa calla baxannonna insaneeto bokkeessanno manni Sheexaanu akata leellishanno daafiraati. Hanni hedi: Maganu woꞌmankare kalaqate horoonsiꞌrinoha Yesuusa, Sheexaanu kumbuulte magansiꞌrie yaasi isi mageeshshi geeshsha booꞌnaaleessa ikkinoro leellishshanno! (Mat. 4:8, 9; Qol. 1:15, 16) Umonsa bokkeessanno manni, tenne alame hayyo Maganu albaanni gowwimma ikkitinota leellishanno.
Lallawo
ijwbv birxicho 40
XAWINSOONNI QUMMEESHSHUWA
Lawishsha 16:3—“Assattore Baala Kaaliiqira Eeggo Uyiꞌri”
Lawishsha 16:3te Tiro
Kuni qummeeshshi halaalaancho Magano magansidhannori biddishshasi hasidhenna harunsite iso addaxxitannota leellishshuro qinaannonsata buuxisanno.
“Assattore baala Kaaliiqira eeggo uyiꞌri.” Yihowa magansidhannori mitto coye assitara albaanni umonsa heeshshi assite biddishsha aannonsa gede alba isiwa higganno. (Yaiqoobi 1:5) Mayira? Umihunni, insa heeshshonsa giddo tuncu yaannonsare woꞌmunni woꞌma hooꞌla didandiitanno. (Rosiisaancho 9:11; Yaiqoobi 4:13-15) Qoleno heddinore assate kaaꞌlitanno hayyo noonsakkiha ikkara dandaanno. Konnira batinyu hajonsa Maganoho eeggo uyite hayyoota ikkansa leellishshanno. Insa biddishsha afiꞌrate iso huuccidhanno hattono Qaalisi Qullaawu Maxaafi giddo noo fajjosi ledo sumuu yaannore assitanno.—Lawishsha 3:5, 6; 2 Ximootewoosi 3:16, 17.
“Assattore baala Kaaliiqira eeggo uyiꞌri” yitanno yaatto noo gedeenni tirriro “loosokki Kaaliiqira sayisi” yitanno tiro afidhino. Mitte borro yitannonte gede tini yaatto, “badhete duqqino duha mitto jawaatahonna isinni roore duha dandaanno manchira sayisanno mancho leellishshanno.” Umonsa heeshshi assite Magano addaxxitannori, isi kaaꞌlannonsatanna fooliishshiishannonsata dihuluullantanno.—Faarso 37:5; 55:22.
“Assattore baala” yitanno hedo mannu assara hedinori baalu Maganu fajjooti yaa woy assara hedinore baala isi maassiꞌranno yaa diꞌꞌikkino. Mannu Yihowa maasso afiꞌra hasiꞌriro, assara hedinori biddishshisinna fajjosi ledo sumuu yaannoha ikka hasiissannosi. (Faarso 127:1; 1 Yohaannisi 5:14) Maganu hajajantannokkire dimaassiꞌranno. Isinni “bushuullu hedo shuffitanno gede assanno.” (Faarso 146:9, NW) Qullaawu Maxaafi giddo borreessiisino biddishsha ayirrisse isira hajajantannota leellishshannore kayinni kaaꞌlannonsa.—Faarso 37:23.
“Hedokki qiniitannohe.” Mite tirora tenne hedo “hedokki kaajjitanno” yine tirroonni. Mannu Akkala Gondooro yaannote Ibiraawootunnite Qullaawa Borro giddo “kaajjitanno” yine tirroonni qaali safo safa leellishanno; duucha woyite konne qaale Maganu kalaqinori kaajjinoha ikkinota kulate horoonsiꞌnanni. (Lawishsha 3:19; Ermiyaasi 10:12) Hatteente gede Maganu isi albaanni danchare assitannori hedo kaajjishanno; hattono hagiirraamenna harshammi assitanno heeshsho heedhanno gede kaaꞌlannonsa.—Faarso 20:4; Lawishsha 12:3.
ELLA 9-15
MAGANU QAALI GIDDO NOOTA MUXXE JIRO LAWISHSHA 17
Adhamaꞌne Giddo Noo Keerinni Hagiidhe
g 9/14 11 guf. 2
Koma Agura Dandiinannihu Hiittoonniiti?
Dogittokkinni ateneeto layiꞌri. Qullaawu Maxaafi mitu manni ‘hanqannotanna aaramannota’ kulanno. (Lawishsha 29:22) Atino hattooho? Ateneeto togo yite xaꞌmi: ‘Caaccaawa rakkannoe? Shiimurira koffi yeemmo? Shiimmaaddu coyira heewisameemmo?’ Qullaawu Maxaafi, “marro marro hige coyiꞌrannohu kayinni fiixooma xeertisanno” yaanno. (Lawishsha 17:9; Rosiisaancho 7:9) Adhamate giddono togoori kalaqamara dandaanno. Konnira koma amada rakkannoheha ikkiro, ateneeto, ‘Galteꞌya albinni roore cinca dandeemmo?’ yite xaꞌmi.—Qullaawu Maxaafi biddishsha: 1 Pheexiroosi 4:8.
w08 5/1 10 guf. 6–11 guf. 1
Qarra Tira
1. Kalaqamino qarri daafira hasaawate yanna gaaꞌme. “Baalunku yanna afiꞌrino. . . . Sammi yaate yanna no; hasaawate yanna no.” (Rosiisaancho 3:1, 7) Aleenni laꞌnummonte gede mitu qarri hanqo woy gibbo kalaqara dandaanno. Togoori kalaqamiro, hasaawiꞌne gibbote widira hige soorramannokki gede yannate geeshsha hasaawa uurrisa yaano “sammi yaa” hasiissannohe. “Coye kayisa, way gammala kurkure xullo fushshate ledo mittete; kunnira gibbo kaꞌukkinni coyiꞌransho aguri” yitannota Qullaawu Maxaafi amaale harunsattoha ikkiro, adhamaꞌne giddo lowo qarri kalaqamannokki gede assattora dandaatto.—Lawishsha 17:14.
Ikkirono “hasaawate yanna no.” Kalaqamino qarra tirate sharrama agurre lawashshi assinanniha ikkiro, manqisete gede halaꞌlara dandaanno. Konnira kalaqamino qarri baꞌꞌasi digattanno yitine lawashshi assitine agurtinoonte. Hasaawa uurrisate hedittoro, kalaqamino qarri daafira muli yanna giddo minaamakki ledo hasaawatto yaanna gaaꞌmite ise ayirrisattota leellishi. Kalaqamino qarri daafira hasaawate dinye amadaꞌne Qullaawu Maxaafi, “hanqitine heedhineenna arrishsho eꞌoonke” yee amaalanno amaale harunsitinanni gede kaaꞌlitannoꞌne. (Efessooni 4:26) Qaalekki agadha hasiissannoheti egennantinote.
Maganu Qaalinni Ronseemmore
Magano Waajja Woꞌmanka Woyite Kaaꞌlitannonke
3 Wodananke agadha hasiissannonkehu qaru korkaati Yihowa wodananke laꞌꞌanno daafiraati. Hatto yaa, isi mannu gede iima ikkikkinni giddonke lae ayemmanke afanno yaate. (Lawishsha 17:3 nabbawi.) Heeshsho uyitannoti isi aanno amaale surrenke giddo woꞌmitanno gede assiꞌneemmoha ikkiro isi baxannonke. (Yoh. 4:14) Hatto ikkiro, amanyootenna ayyaanaamittenke daafannohu Sheexaanunna isi alamewiinni daanno coyi digawajjannonke. (1 Yoh. 5:18, 19) Yihowawa albinni roore shinqummo kiiro isira noonke ayirrinyinna baxilli lexxanno. Iimi Annanke dadillisa hasiꞌneemmokki daafira cubbu widira massitanno hedo nafa gimbeemmo. Gara ikkinokkire assate fonqolammeemmo woyite ninkeneeto togo yine xaꞌma hasiissannonke: ‘Lowo geeshsha baxannoeta leellishinoe Magano afanni heeꞌrenni hiitto ikke dadilliseemmo?’—1 Yoh. 4:9, 10.
Lallawo
Qarru Yannara Yihowa Kaaꞌlannohe
10 Qarra ikkannonke coye. Buutote qarri iillinkehu gedensaanni wolqa baꞌneemmonna yaandeemmo woyiti heeꞌrara dandaanno. Konni albaanni lowo geeshsha dodannohu xa kayinni madiꞌrino daafira dinanni haꞌranno qolchamaanchi gede ikkinammora dandiineemmo. Bashshora qarrammummokki loonseemmo looso loosa qarra ikkitankera woy hagiidhinanni loonseemmo looso loosate hasattonke ajjara dandiitanno. Ninkerano Eeliyaasi gede kae uurra qarra ikkitankera dandiitanno. Hattono goxa calla hasiꞌneemmoha ikkara dandaanno. (1 Mot. 19:5-7) Wolqa baꞌneemmo woyite Yihowa ma assannonketa kule qaale eino?
11 Yihowa kaaꞌlannonke gara. Isi irkisannonketa kule qaale eino. (Faarso 94:18 nabbawi.) Madiꞌrino qolchamaanchi kae milli yaanno gede kaaꞌlo hasiissannosinte gede ninkeno Yihowara agurrummokki soqqammeemmo gede kaaꞌlo hasiissannonkeha ikkara dandaanno. Togoo yannara isi kaaꞌlannonketa buuxisanni togo yiino: “Qiniiticho angakki irkiseemmohe; ‘Kaaꞌleemmohena waajjitooti’ yeemmohehu, Maganikki ani Kaaliiqaati.” (Isa. 41:13) Yihowa Moote Daawiti konni garinni kaaꞌlinosi. Qarru amadisi yannaranna diinnasi waaddusi woyite Daawiti Yihowa, “angakkino irkisse amaddannoe” yiino. (Far. 18:35) Ikkina Yihowa ninke kaaꞌlannonkehu hiittoonniiti?
12 Yihowa duucha woyite wolootu kaaꞌlitannonke gede asse irkisannonke. Lawishshaho mitte yannara Daawiti wolqiweelita jaalisi Yoonaataani mare xaꞌminosi; hattono jawaachishannore coyiꞌre sheshifachishinosi. (1 Sam. 23:16, 17) Qoleno Yihowa Eeliyaasira mitore asse kaaꞌlannosi gede Elsai doorino. (1 Mot. 19:16, 21; 2 Mot. 2:2) Xaa yannarano Yihowa mininke manna, jaallanke woy songote cimeeyye horoonsiꞌre kaaꞌlankera dandaanno. Ikkirono lowo geeshsha xissiisiꞌneemmo woyite mannunniwa gambo gimbeemmoha ikkara dandaanno. Togoo woyite calluwinke heeꞌra hasiꞌneemmo. Tini nooreentilla. Ikkollana Yihowa kaaꞌlannonke gede maa assa dandiineemmo?
13 Assa hasiissannonkere. Wolootunniwa gamba yaate sharrami. Wolootunniwa gambo gimbummoro halashshine heda hoongammora, uminke daafira calla hendammoranna iillanni noonke qarra calla illachinshammora dandiineemmo. Hatto ikkiro, dancha doorsha doodha qarra ikkitankera dandiitanno. (Law. 18:1) Hige roorenkanni buutote qarri amadannonke woyite mito woyite calluwinke heeꞌra hasiꞌneemmoha ikkara dandaanno. Ikkirono seeda yanna callootinke heeꞌneemmoha ikkiro, Yihowa ninke kaaꞌlate horoonsiꞌranno faro gatte baꞌannonke. Hakko daafira shota ikka hoogirono qarru yannara miniꞌne manni, jaallakki woy songote cimeeyye kaaꞌlitannohe woyite maahoyye yii. Yihowa ate kaaꞌlate insa horoonsiꞌranni noohu gede assite hedi.—Law. 17:17; Isa. 32:1, 2.
ELLA 16-22
MAGANU QAALI GIDDO NOOTA MUXXE JIRO LAWISHSHA 18
Dhibbu Waadanni Noonsare Jawaachishshe
Addu Hayyo Qoonqose Naggi Assite Woshshitanni No
17 Coyiꞌrattora albaanni balaxxe hedi. Qoropha hoongummoro coyiꞌneemmo coyi lowore gawajjara dandaanno. Qullaawu Maxaafi, “Dayi gede coyiꞌnanni coyi manna urdete gede qasanno; egennaamu arrawi kayinni hursanno” yaanno. (Law. 12:18) Wolootu soꞌro kulle heꞌma qorophineemmoha ikkiro keeru heeꞌranno gede assineemmo. (Law. 20:19) Coyiꞌneemmo coyi gawajjannoha ikkikkinni hursannoha ikkara hasiꞌnummoro, wodaninkera Maganu Qaali giddo noo halaali woꞌmanno gede assiꞌra hasiissannonke. (Luq. 6:45) Qullaawu Maxaafinni nabbamboommore hiincineemmoha ikkiro, coyiꞌneemmo coyi woloota dhaawannoha “egennote buicho” ikkanno.—Law. 18:4.
mrt birxicho 19 saaxine
Hedeweelcho Xiwammeemmo Woyite
Seekkite macciishshi. Jaalakki kaaꞌla dandaattote qara doogga giddo mitte, hasaaphanno woyite seekke macciishshate. Isi coyiꞌrannorira baalaho dawaro qola hasiissannoe yite heddooti. Roore woyite macciishsha calla ikkitanno. Gara ikkinokkire coyiꞌriro nafa iso bushiisha agurte cincite macciishshi. Jaalikkira mayi macciishshamannosiro afoottohu gede assite heddooti. Hakko iso jaalikki dhibbi aanaanni leellannoha ikka hoogiro afa hoogattora dandaatto.—Lawishsha 11:2.
Shaqqillunni hasaawisi. Mayite hasaawisattosiro leella hoogihero nafa, sammi yaantenni jaalikki qarra huwatoottota leellishannore shiimare nafa coyiꞌra jawaachishshasira dandiitanno. Mayyaattoro leella hoogihero, shiimareno ikkiro godowinta coyiꞌrate woꞌnaali; lawishshaho togo yaa dandaatto: “Anekkina, yeemmorilla leella giwiyoena, ate daafira lowo geya yaadeemmo.” Kayinni “Isi dhibbu kawii saꞌꞌa hoogiheti dibushshiyo” woy “Isi hawallella wole dhibba ikka hoogi!” yaa qorophi.
Jaalakki amadino dhibbi hiittoohoro afate woꞌnaalte jaalikki daafira hedattota leellisha dandaatto. Isi hiittoo qarri giddo nooro huwatate woꞌnaalleemmota afiro galatasi digattanno; qoleno dhiwanisi gara huwatate woꞌnaallummoro, roore kaaꞌlannosire coyiꞌra dandiineemmo. (Lawishsha 18:13) Ikkollana, amaale xaꞌmiꞌrihekki amaalattokki gede qorophi.
Maa assite kaaꞌla dandaattoro xaꞌmi. Kaaꞌleemmo gara afoommo yaantenni, maa assite kaaꞌla dandaattoro iso xaꞌmi. Ikkollana, jaalikki mannaho duha ikka hasiꞌrannokki daafira kaaꞌlo hasiissannoe yee heda hoogara dandaannota qaagi. Hatto ikkiro, maa assite kaaꞌlate hedoottoro lawishshaho, dikko fulte mitore hirattosira dandaattota, minesi feya dandaattota, woy wolere assa dandaattota kulisi.—Galatiyu Sokka 6:2.
Hexxo mudhitooti. Xiwamino jaalikki xaaddinara heddinoonni barra didandeemmo yaara, woy mito woyite hasaawa baxa hoogara dandaanno. Hatto ikkiro, cinci; hattono qarrasi huwatate woꞌnaali. Woꞌmanka woyite kaaꞌlattosira dandaattota kulisi.—Lawishsha 18:24.
Surrete Xisso Waaddannonsare Kaaꞌla Dandiinanni Gara
“Waajjaleeyye [“yaaddinore,” Haaro Alame Tiro] jawaachishshe.”—1 TESELONQE 5:14.
Jaalikki yaadara woy ditidhoommoho yee hedara dandaanno. Mayite coyiꞌrattoro afa hoogittoro nafa, isi daafira hedattota kulittosiro sheshifataranna jawaatara dandaanno.
“Jaalu woꞌmanka woyite jaalaholla; roduuno qarru barra iillanno.”—LAWISHSHA 17:17.
Mitore assite kaaꞌlisi. Kaaꞌleemmosi gara afoommo yite hedantenni, maa assine kaaꞌlinasira hasiꞌrannoro iso umosi xaꞌmi. Jaalikki mayi hasiisannosiro kuꞌla qarra ikkitusiro, mitteenni mitore assa lawishshaho fultine lekkatenni milli yaa dandiitinannita kulisi. Woy mitore hirte abba, mine feya, woy wole looso loosse kaaꞌla dandaattota kulisi.—Galatiyu Sokka 6:2.
“Manna baala dandee.”—1 TESELONQE 5:14.
Jaalikki hasaawa hasiꞌrannokki yanna heedhara dandiitanno. Hakko daafira isi coyiꞌra hasiꞌranno woyite hasaaphannore macciishshate qixxaawoottoha ikkoottota kulisi. Jaalikki dhiwannosi daafira xissiisannohere coyiꞌrara woy assara dandaanno. Isi dinyeꞌne barra sayisara woy hifatamara dandaanno. Iso kaaꞌlannore assatto woyite cinci, hattono qarrasi huwatate woꞌnaali.—Lawishsha 18:24.
Maganu Qaalinni Ronseemmore
Qarru Yannara Yihowa Kaaꞌlannohe
13 Assa hasiissannonkere. Wolootunniwa gamba yaate sharrami. Wolootunniwa gambo gimbummoro halashshine heda hoongammora, uminke daafira calla hendammoranna iillanni noonke qarra calla illachinshammora dandiineemmo. Hatto ikkiro, dancha doorsha doodha qarra ikkitankera dandiitanno. (Law. 18:1) Hige roorenkanni buutote qarri amadannonke woyite mito woyite calluwinke heeꞌra hasiꞌneemmoha ikkara dandaanno. Ikkirono seeda yanna callootinke heeꞌneemmoha ikkiro, Yihowa ninke kaaꞌlate horoonsiꞌranno faro gatte baꞌannonke. Hakko daafira shota ikka hoogirono qarru yannara miniꞌne manni, jaallakki woy songote cimeeyye kaaꞌlitannohe woyite maahoyye yii. Yihowa ate kaaꞌlate insa horoonsiꞌranni noohu gede assite hedi.—Law. 17:17; Isa. 32:1, 2.
Ammanakki Xawisse Kuli
ijwbq birxicho 123
Maganu Woꞌmanka Bayicho Heeꞌranno?
Qullaawu Maxaafi mayyaanno?
Maganu hasiꞌrino darga baala laꞌꞌanna baxinore assa dandaanno. (Lawishsha 15:3; Ibiraawoota 4:13) Ikkollana Qullaawu Maxaafi Maganu woꞌmanka bayicho woy woꞌmunku coyi giddo heeꞌranno diyaanno. Hatteentenni isira bisunna heeꞌrannohu bayichu noosita kulanno.
• Maganu ayimma: Maganu ayyaanu biso uddiꞌrinoho. (Yohaannisi 4:24) Isi mannaho dileellanno. (Yohaannisi 1:18) Qullaawu Maxaafi giddo Maganu daafira kultanno ajuuja baalanti isi mitto bayicho heeꞌrannota xawissanno. Isi woꞌmanka bayicho heeꞌranno yine kulloonni dargi dino.—Isayaasi 6:1, 2; Yohaannisi Ajuuja 4:2, 3, 8.
• Maganu heeꞌranno bayicho: Qullaawu Maxaafi Maganoho ‘gordoho heeꞌranno’ bayichi noosita kulanno. (1 Mootoolla 8:30) Hatto yaa Maganu gordoho ikkinnina baattote aana woy kalqete giddo diheeꞌranno yaate. Qullaawu Maxaafi sokkaasine ‘Kaaliiqi [“Yihowa,” NW] albira shiqqino yanna’ noota kulanno; tini Maganu base baalate ikkikkinni mitto bayicho heeꞌrannota leellishshanno.—Iyyoobi 1:6.
Maganu woꞌmanka bayicho heeꞌrannokkiha ikkiro, ane qarra afa dandaanno?
Ee, dandaanno. Maganu mittu mittunku manchi qarra seekke afa dandaanno. Isi ayyaanaame alamera heeꞌrannoha ikkirono, uullate aana iso hagiirsiisate sharrantannore laꞌꞌanno, hattono insa kaaꞌlate qaafo adhanno. (1 Mootoolla 8:39; 2 Duduwo 16:9) Hanni Yihowa woꞌmu wodaninsanni magansidhannosiri daafira hedanno gara laꞌno:
• Huuccatto assiꞌratto woyite: Yihowa huuccatto assiꞌratto woyite macciishshanni noohe.—2 Duduwo 18:31.
• Yaaddo amaddannohe woyite: “Kaaliiqi dadillunni hiiqqantinorira mule noonsa; hexxo hoogginore gatisannonsa.”—Faarso 34:18.
• Biddishshu woy amaale hasiissannohe woyite: Yihowa Qaalisi Qullaawu Maxaafi widoonni ‘rosiisannohe; haꞌratto doogono kulannohe; amaalannohe.’—Faarso 32:8.
Woꞌmanka bayicho heeꞌrate daafira mannu hedannota soꞌrote hedo
Soꞌrote hedo: Maganu kalaqino kalaqami baalunku giddo no.
Halaale: Maganu baattote aanano ikko kalqete giddo diheeꞌranno. (1 Mootoolla 8:27) Beeddahenna wolu kalaqami “Maganu ayirrinye [kulannoti]” egennantinote. (Faarso 19:1) Ikkollana, ogimma noosihu mittu manchi kayisino misile giddo heeꞌrannokkinte gede Maganuno kalaqino kalaqami giddo diheeꞌranno. Hige mitte misile hattenne misile kayisino manchi daafira kultannonkeri no. Hatteente gede, illete leellanno kalaqamino ‘leellannokkiha Maganu dana’ woy akata lawishshaho wolqasi, hayyosinna baxillesi kulannonke.—Roomu Sokka 1:20.
Soꞌrote hedo: Maganu baalankare afinohanna woꞌmanka dandaannoha ikkino daafira baalankawa heeꞌranno.
Halaale: Maganunnihu qullaawu ayyaani Maganu loososi loosanno wolqasiiti. Maganu dargu geeshsha marikkinni qullaawu ayyaanisi widoonni aye bayichono laꞌꞌanna hasiꞌrinore baala assa dandaanno.—Faarso 139:7.
Soꞌrote hedo: Faarso 139:8, “Gordu iimira fulummoro hakkiicho ati nootto; jeennaate dirrummorono hakkiicho ati nootto” yitanno daafira, Maganu woꞌmanka bayicho heeꞌranno.
Halaale: Kuni qummeeshshi Maganu heeꞌranno bayichire kulannoha diꞌꞌikkino. Hatteentenni, aye bayichono heeꞌnummoro Maganu kaaꞌlankera dandaannota kulate murginse coyiꞌnoonni hedooti.
ELLA 23-29
MAGANU QAALI GIDDO NOOTA MUXXE JIRO LAWISHSHA 19
Roduuwiꞌnera Addu Jaalla Ikke
Mimmitoho Noonke Baxilli Kaajje Heeꞌranno Gede Assiꞌra Dandiineemmo Gara
16 Roduuwiꞌneha gara ikkinokkiha ikkikki dancha akatansa illachishshe. Hanni ammanate roduuwikki ledo gamba yite godoꞌlitanni noottohu gede assite hedi. Insa ledo dancha yanna sayisittohu gedensaanni jeefote foto kaꞌini. Isinni umi foto dancha ikka hooggara dandiitanno yite hedootto daafira ledde lame foto kayisitto. Mitteenni sase foto kayisootto yaate. Kayinni mitte foto giddo mittu rodii muushshi yiinokkita laitto. Hatte foto hiissatto? Baalunku roduuwinna hakku rodiino muushshi yee kainoti wole foto noohe daafira hatte foto hunatto.
17 Hanni kayinse wodhinoommo foto, qaangeemmo coyi ledo heewisiinso. Duucha woyite, ammanate roduuwinke ledo sayinsoommota dancha yanna dihambeemmo. Kayinni mitte yannara mittu ammanate rodiinke woy rodoonke gara ikkinokkire assinoha woy coyiꞌrinoha ikkara dandaanno. Tenne qaangeemmo woyite ma assa hasiissannonke? Gara ikkitinokki foto hunneemmonte gede togoo coyeno hawate sharrama hasiisannonke. (Law. 19:11; Efe. 4:32) Ammanate rodiinke ledo sayinsoommoti batinye dancha yanna noonketa qaangeemmo daafira, isi assinoha woy coyiꞌrinoha hakkeya xiwinokki coye hawa dandiineemmo. Ammanate rodiinke ledo sayinsoommota dancha yanna kayinni hawa dihasiꞌneemmo.
Woꞌmanka Woyite Baxilliꞌne Lexxanno Gede Assidhe
10 Ninkeno ammanate roduuwanke kaaꞌlineemmo doogga hasiꞌneemmo. (Ibi. 13:16) Hanni sai birxichira kulliteha Aana woꞌnaalsha laꞌno. Lowo hombobolatte kaꞌuhu gedensaanni, isenna minaannise Yihowa Farciꞌraasine ikkitinota mitte maate laꞌꞌara haꞌrino; hakkiinni insa bubbe minensa iimiido diigginota afi. Hakko daafira hatti maate uddidhannohu uduunninsa baalu xure goofino. Aana togo yitino: “Uduunnensa haaꞌne hayishshinenna tokkonse biddi assine uyinoommonsa. Hatto assa ninkera shiima coyeeti; ikkirono tini techo geeshsha insa ledo jaalla ikkine heeꞌneemmo gede assitinonke.” Baxillu, Aananna minaannise ammanate roduuwinsara mitore asse kaaꞌlanno gede kakkayisinonsa.—1 Yoh. 3:17, 18.
11 Wolootu baxillenna shaqqille leellinsheemmonsa woyite hendeemmorinninna assineemmorinni Yihowa lawishsha harunsate sharrammanni heeꞌnoommota wodanchitanno. Qoleno insa assinoommonsa danchumma ninke hendoommohunni roorsite naaddara dandiitanno. Aleenni qummi assiniti Keeni kaaꞌlitinose roduuwa qaaggannota coyidhino. Ise togo yitino: “Ledonsa soqqansho fuleemma gede kaaꞌlitinoere muxxe roduuwa baalanka galateemmansa. Insa dagge miniꞌyanni haadhe hadhannoe, sagale koyissannoe hattono minira keere iilloommatanna teꞌee buuxxanno. Insa tenne assate lowo geeshsha sharrantinota xa huwatoomma. Insa tenne assitinohu lowo geeshsha baxxannoe daafiraati.” Hige assinoommonsarira galatannonkehu baalanka manna diꞌꞌikkino. Keeni kaaꞌlitinose roduuwi daafira togo yitino: “Insa assitinoehu danchu coyi baalaho galata qoꞌloommaro tashshi yaannoe; kayinni xa insa baalunku mama heedhannoro diafoomma. Ikkirono Yihowa afino; anera assitinoerira isi baꞌraasannonsa gede huucceemma.” Keeni yitinori garaho. Yihowa woloota kaaꞌlate shaqqillunni assineemmoha shiima coye nafa laꞌꞌanno. Isi togoo coye isira shiqishiꞌnoommote waaga afidhino kakkalo gedenna isira liqiissinoommo coyi gede asse laꞌꞌanno.—Lawishsha 19:17 nabbawi.
Mimmitoho Bagamannokki Baxille Leellisha Agurtinoonte
6 Mannaho assinanni danchumma leellishannohu mittu lawishshi, soqqamaasinchu Phaawuloosinna ledosi noo manni markaawetenni hadhanni heedheenna markaawe hiiqqaqqanteenna iillitinonsa dano kultanno xaggeeti. Dambalu markaawe xiiwanni insa Maalta yinanni giddichowa massi. Maalta giddichora heeꞌranno manni konne dano iillitinonsa manna kaaꞌlate eino qaali nookkiha ikkirono woy konni albaanni insa egenninokkiha ikkirono, insa wosinsiꞌrino hattono danchumma leellishinonsa. (Soq. 28:2, 7) Ikkina Maalta giddichora heeꞌranno manni konni mannira bagamannokki baxille leellishino yaa dandiineemmo? Didandiineemmo. Mayira yiniro, insa tenne assitinohu hedeweelchooti hattono konne qarramino manna kaaꞌla hasidhino daafira callaati.
7 Gufo 6te laꞌnummonte gede danchummanna bagamannokki baxilli mitto diꞌꞌikkino. Badooshshinsa maatiro afate hanni Maganu manni leellishinoha bagamannokki baxille laꞌno. Hanni Daawiti lawishsha laꞌno. Daawiti, Yoonaataani anni iso shaara hasanni nooha ikkirono Daawiti muxxe jaalisi Yoonaataanira bagamannokki baxille leellishate murciꞌrino. Yoonaataani reyihunni lowo diri gedensaannino, Daawiti Yoonaataani beetti Memfebostera bagamannokki baxille leellisha diagurino. Daawiti tenne assinohu mayiraati? Korkaatuno Yoonaataani lubbora baxanno daafiraati. Danchummanna bagamannokki baxilli mitto diꞌꞌikkino yineemmohu iseraati.—1 Sam. 20:9, 14, 15; 2 Sam. 4:4; 8:15; 9:1, 6, 7.
Maganu Qaalinni Ronseemmore
w87 5/15 29
Yihowa Waajjittoro Hagiirraamo Ikkatto
◆ 19:17—Buxane kaaꞌla Yihowara liqiissate gedeeti yineemmohu mayiraati?
Buxane Maganunnireeti; insara assineemmore isira assinoommohu gede asse kiiranno. (Lawishsha 14:31) Anga qoltannonke yine hendummokkinni baxillunninna shaqqillunni kaꞌne buxanete mitore assinummoro, Yihowa tenne isira liqiissinoommohu gede asse kiire maassiꞌrannonke.—Luqaasi 14:12-14.
Lallawo
lmd guwuursha A naxiwe 10
Maganoho suꞌmu noosi.—Far. 83:18; Erm. 10:10.
ELLA 30–MAAJA 6
MAGANU QAALI GIDDO NOOTA MUXXE JIRO LAWISHSHA 20
Baxillu Jaalooma Qiniinoha Assiꞌrate Kaaꞌlannore
Baxillu Jaalooma Qiniinoha Assiꞌra Dandiinanni Gara
3 Baxillu jaalooma amada hagiirsiissannota ikkiturono, togoo jaalooma amadino beettinna beetto adhamara dandaanno daafira tenne hajo hawa gede asse laꞌꞌa dihasiissannonsa. Insa sargensa barra, lubbotenni noo geeshsha mimmito baxatenna ayirrisate Yihowa albaanni qaale eanno. Aye qaaleno eꞌnammora albaanni seekkine heda hasiissannonke. (Lawishsha 20:25 nabbawi.) Adhamate qaale eꞌnammora albaannino tenne hajo seekkine heda hasiissannonke. Mittu beettinna beetto baxillu jaalooma amade sayisanno yanna mimmito egennanno gedenna dancha doorsha doodhanno gede kaaꞌlitannonsa. Insa adhantara woy baxillu jaaloomansa agurtara dandiitanno. Mittu beettinna beetto baxillu jaalooma agurino yaa jaaloominsa diqiniinonsa yaa diꞌꞌikkitino. Hatteentenni baxillu jaaloominsa woyyannore doodhanno gede kaaꞌlinonsa.
4 Baxillu jaalooma amadate daafira gara ikkitino lao heedhannonke gede assiꞌra hasiissannonkehu mayiraati? Adhantinokkirira baxillu jaalooma amadate daafira gara ikkitino lao heedhunsaro adhamate heddinokki manchi ledo togoo jaalooma diamaddanno. Ikkollana gara ikkitino lao heedhannonsa gede assiꞌra hasiissannonsari adhantinokkire calla diꞌꞌikkitino. Ninke baalunku gara ikkitino lao heedhannonke gede assiꞌra hasiissannonke. Lawishshaho mitu manni, mittu beettinna beetto baxillu jaalooma amadiro adhama hasiissannonsa yee hedanno. Tini adhaminokki Kiristaana gawajjitannohu hiittoonniiti? Yunayitidi Isteetisete heedhannoti mine assidhinokkiti Meliisa yinanni rodoo togo yitino: “Mittu rodiinna rodoo baxillu jaalooma amadiro batinyu roduuwi insa adhama hasiissannonsahu gede assite heddanno. Hakko daafira baxillu jaalooma amaddinori jaaloomansa agurtanno gede assannori noota affinoha ikkirono jaaloomansa diagurtanno. Mitootu qolte horonta baxillu jaalooma amada gibbanno. Korkaatuno tini lowo duha ikkitannonsa.”
Dancha Galte Afiꞌra Dandiinanni Gara
8 Mitte beetto hayyotenni layiꞌra dandaattohu hiittoonniiti? Songote gambooshshiwa woy roduuwu gamba yite yanna sayissannowa tenne beetto amanyoote, ayyaanaamittesenna akattase afattora dandaatto. Jaallase ayeooti? Hasaawa baxxannohu mayi daafiraati? (Luq. 6:45) Mixose atete ledo mittete? Ise seekkite affinore songote cimeeyye woy ayyaanaamittetenni gikki yiinoha wole Kiristaancho amaaꞌla dandaatto. (Law. 20:18) Isera hiittoo suꞌmi noosero hattono akattase daafira xaꞌma dandaatto. (Rut. 2:11) Mitte beetto egennate woꞌnaalatto woyite ise saalfattanno gede assannore assattokki gede qorophi. Ise higguwa baala illaallissooti; hattono ise daafira mitto mittonka coye afate woꞌnaaltooti.
Baxillu Jaalooma Qiniinoha Assiꞌra Dandiinanni Gara
7 Mittu manchita giddoyidi ayimma afa dandaattohu hiittoonniiti? Tennera kaaꞌlitannote kaajja doogga giddo mitte giddonketa fanne hasaawate, xaꞌmo xaꞌmatenna seekkine macciishshate. (Law. 20:5; Yai. 1:19) Tenne assate lawishshaho mitteenni sagaꞌla, mannu noo qooxeessira mitteenni lekkatenni milli yaanna mitteenni sabbaka kaaꞌlitaꞌnera dandiitanno. Jaallaꞌnenna maateꞌne ledo mitteenni yanna sayissinanni woyiteno mimmito egentinanni faro afidhinanni. Qoleno adhamate heddinoonni manchi addi addi yannara addi addi manni ledo heeꞌranno woyite hiittoo akata leellishannoro afate kaaꞌlitannoꞌne faro hasidhe. Hanni Neezerilaandete heeꞌrannohu Ashiwiini yinanni rodii maa assate woꞌnaalinoro wodanche. Isi Aliisha ledo baxillu jaalooma amadino yanna daafira coyiꞌranni togo yiino: “Mimmito egennate kaaꞌlitannonke faro hasiꞌneemmo. Duucha woyite shiimmaaddare assineemmo; lawishshaho sagale mitteenni qinsheemmo woy wole mini looso loonseemmo. Togoo looso loonseemmo yannara mimmitu jawaantenna laanfe afa dandiinoommo.”
8 Ayyaanaamitte coye mitteenni xiinxallitineno mimmito egenna dandiitinanni. Adhantiniro maatete magansiꞌrara yanna gaaꞌma hasiissannoꞌne; hatto assaꞌne Maganu ledoꞌne ikkanno gede assitanno. (Ros. 4:12) Hakko daafira baxillu jaalooma amaddine sayissinanni yannara mitteenni xiinxallate pirogiraame fushshiꞌra dandiitinanni. Hige baxillu jaalooma amaddinori xaara maate diꞌꞌikkitino; qoleno isi isera umo diꞌꞌikkino. Ikkirono insa ganyite mitteenni xiinxallite mimmitu ayyaanaamitte daafira afa dandiitanno. Yunayitidi Isteetisete heedhannori Maaksinna Leeysa mitteenni xiinxallansa wole horo afidhanno gede kaaꞌlitinonsa. Isi togo yiino: “Baxillu jaalooma amada hananfanni heeꞌnenni, baxillu jaalooma amadate daafira, adhamatenna maatete heeshsho daafira kultanno borro mitteenni xiinxalla hananfoommo. Tini borro wonaatiro kayinse hasaambeemmokkita lowo geeshsha hasiissanno hajo kayinse hasaambeemmo gede kaaꞌlitinonke.”
Maganu Qaalinni Ronseemmore
Duuchchunku Coyinni Ammanamoottoha Ikki
15 Kiristaanu ammanaminoha ikkannohu songote giddo calla diꞌꞌikkino. Phaawuloosi, “Duuchchunku coyinni ammanammoommore ikkine heeꞌrate halchineemmo” yiino. (Ibiraawuyaani 13:18, NW) Kalaqaanchinke, daddalu ledo xaado afidhino hajora ammanammoommore ikkinammora lowonta hasiꞌranno. Lawishshu maxaafira calla gara ikkino miizaani hasiisannota kultannoti shoole xiqise no. (Lawishsha 11:1; 16:11; 20:10, 23) Biꞌree waro, mannu hirannonna hidhanno wote hiranno uduunnenna woxe mazzanate miizaananna miizaanu kincho horoonsiꞌrannoti rosantinote. Ammanama baꞌino daddalaano hidhanno mannira kiilo itatenna tirfe afiꞌrate, lamu gariha miizaanu kinchonna gariweelo miizaana horoonsidhanno. Yihowa togoo assoote effire giwanno! Baxillisinni fullummokki heeꞌrate, ammanama bainohu daddalu assooti baalunkunni xeertiꞌra hasiissannonke.
Ammanakki Xawisse Kuli
ijwfq birxicho 34
Yihowa Farciꞌraasinera Qullaawu Maxaafi Uminsahu Noonsa?
Yihowa Farciꞌraasine Qullaawa Maxaafa xiinxallate addi addita Qullaawu Maxaafi tiro horoonsidhanni keeshshitino. Ikkollana, Qullaawa Borroti Haaro Alame Tiro ninke afiinni heedhunkero ise horoonsiꞌra doodhineemmo; mayira yiniro tini tiro Maganu suꞌma amaddino, taalo sokka kultanno, hattono xabbe leeltannote.
• Maganu suꞌma kula. Qullaawa Maxaafa qixxeessinohu mitu manni, Qullaawu Maxaafi Annira hasiisannosi ayirrinye uyikkinni gatino. Lawishshaho, mitte Qullaawu Maxaafi tiro qixxeessini woyite mitore asse looso kaaꞌlinoha 70 saꞌꞌanno manni suꞌma kulloonni. Ikkollana, tenne tirora Qullaawu Maxaafi Anna ikkinohu Maganu Yihowa suꞌma mitto bayichono diworroonni!
Haaro Alame Tirora kayinni Maganu suꞌma hunda Qullaawa Maxaafa borreessini woyite noo basera qolloonni; hundi borrora Maganu suꞌmi lowo kume ikkitanno basera no; kayinni tenne tiro qixxeessi manni suꞌma dikulloonni.
• Taalo sokka. Hundite Qullaawa Borro giddo noo hedo garunni sayissannoti baalanta tiro diꞌꞌikkitino. Lawishshu gedera, mitte tiro Yesuusi Maatewoosi 16:24 coyiꞌrinore togo yite tirtino: “Ane hoode haꞌra hasiꞌrannohu umosi kaado; masiqalasino duqqe hoodeꞌya dayo!” Kiristoosira albaanni lowo xibbe diro, Magano affinokki daga masqala ammaꞌnonsa malaate assidhe horoonsidhanno. Sayikki sani mereero Maarote Diro, beetekiristaanna konne malaate adhite Kiristoosi masqalaati yite horoonsiꞌra hanaffino. Qullaawa Maxaafa tirturi Maganu Qaali giddo “masqala” yaanno qaale horoonsidhinohu, Yesuusa suntoonnihu masqalu aanaati yite ammantanno daafira ikkara dandaanno. Kayinni Qullaawa Maxaafa umo borreessinoonni afiinni “masqala” yaanno qaale ikkikkinni “haqqa” yaanno qaale horoonsiꞌnoonni. Hakko daafira, Haaro Alame Tirora konne qummeeshsha togo yine taashshine tirroonni: “Hoodeꞌya haꞌra hasiꞌrannohu heeꞌriro umosi kaado; qarru haqqasino duqqe agurikkinni hoodeꞌya dayo.”
• Xabbe leeltanno tiro. Dancha tirooti yinanniti taalo sokka amaddinota calla ikkitukkinni xabbe leeltannotano ikka hasiissannose. Hanni mitto lawishsha laꞌno. Yesuusi Maatewoosi 5:3 coyiꞌrino qaale noo gedeenni tirriro “Ayyaanunni buxxinori baꞌraadhinoreeti” yitanno tiro afiꞌrino. Hatto yaa yannankera xabbe leeltannota diꞌꞌikkitino; hakko daafira, Haaro Alame Tirora huwatate qarrisannokki garinni togo yine tirroonni: “Ayyaanaamittete coye goodhinori hagiirraammaho.”
Haaro Alame Tiro Maganu suꞌma amaddinota, taalo sokka kultannotanna xabbe leeltannota ikkitinotano agurranna, baxxitinota assannoseri wolurino no: Konne Maxaafa mannu woxe baaxxikkinni afiꞌra dandaanno. Hakko daafira, lowo miliyoone ikkanno manni wole agurina Qullaawa Maxaafa hidhate woxu noonsakki manni nafa konne Maxaafa afoo dadhino qaalinni nabbawa dandiino.