Kiristaanu Heeshshonna Soqqanshote Xiinxallote Maxaafichora Qummeessinoonni Borro
© 2025 Watch Tower Bible and Tract Society of Pennsylvania
MAAJA 7-13
MAGANU QAALI GIDDO NOOTA MUXXE JIRO LAWISHSHA 21
Adhama Hagiirraame Assiꞌrate Kaaꞌlannoha Xintu Seera
Baxillu Jaalooma Qiniinoha Assiꞌra Dandiinanni Gara
13 Baxillu jaalooma amaddine mageeshshi yanna keeshsha hasiissannoꞌne? Duucha woyite mitto coye muddamme assa qarra abbitanno. (Law. 21:5) Hakko daafira baxillu jaalooma amaddinanni woyite mimmito seekkitine egennate ikkitanno geeshshi yanna hasiissannoꞌne. Ikkirono baxillu jaalooma amaddine hasiisikkinni seeda yanna keeshsha dihasiissannoꞌne. Qullaawu Maxaafino, “Woꞌmitukkinni keeshshitanno hexxo wodana daafursitanno” yaanno. (Law. 13:12) Qoleno mitteenni yanna sayissinanni keeshshitini kiiro siimu xaadooshshi hasatto gargadha roore qarra ikkitaꞌnera dandiitanno. (1 Qor. 7:9) Baxillu jaalooma amaddine mageeshshi yanna keeshshitinanniro illachishantenni, kiꞌneneeto togo yitine xaꞌme: ‘Gara ikkinore doodha dandiineemmo gede mimmitu daafira wolere maa afa hasiissannonke?’
Hasiisannohura Aleenni Umiꞌne Daafira Heddinoonte
3 Yihowa minaanninna minaama hagiirraamma ikke heeꞌrara hasiꞌranno. Ikkollana, guutu manchi nookki daafira, mereeronsa coyi kawa kaꞌaa higara dandaanno. Isinni, Phaawuloosi adhantannore qarru amadannonsata borreessino. (1 Qor. 7:28) Mitootu galtensa ledo hashsha barra kanca yitanno daafira, ate adhummohu barri bao, woy atera assiꞌrummahu barri bao yitanno. Togoo minaanninna minaama alame ikkitaata ikkituro, muddante adhamanke diingummoro woyyanno yite heddara dandiitanno. Insa uminsa injo calla hasidhanno daafira, hagiirraamma ikkineemmohu adhamanke diingummoro callaati yite heddanno.
4 Adhamanke diseekkino yine hexxo mudha dihasiissannonke. Qullaawu Maxaafi kulanno garinni, galte diiga dandiinannihu minaanni woy minaama fooriro callaati. (Mat. 5:32) Konnira, Phaawuloosi coyiꞌrino garinni, adhamate giddo qarru kalaqamanno woyite minaanni woy minaama booꞌnatenni togo yee heda dihasiissannonsa: ‘Isi galteꞌya hasiꞌreemmore assitinoe? Ise ane baxa hasiissannoseta diaffino ikka? Wole adhummoro salaame afiꞌrammo ikka?’ Hatto yine hendeemmoha ikkiro, uminkera calla roorsiꞌnanni heeꞌnoommo. Alame, ninkeralla gara lawinkero umonke hagiirsiisate galtenke nafa diingeemmo gede jawaachishshannonke. Maganu Qaali “Mittu mittunku woleho woyyannore hedo ikkinnina, umisira woyyannore calla laoonke” yaanno. (Fil. 2:4) Yihowa galtenke diigantukki heedhara hasiꞌranno. (Mat. 19:6) Yihowa ateneetira roorsiꞌra agurte, iso balaxisiisattora hasiꞌranno.
5 Minaanninna minaama mimmito baxanna ayirrisa hasiissannonsa. (Efesooni Sokka 5:33 nabbawi.) Qullaawu Maxaafi adhantenni roore aa hasiissannonketa rosiisannonke. (Soq. 20:35) Minaanninna minaama mimmito baxannohunna ayirrisannohu hiittoore ikkirooti? Umonsa heeshshi assannore ikkirooti. Minaanninna minaama umonsa heeshshi assannoha ikkiro, uminsa qiniite agure ‘wolu qiniite hasiꞌranno.’—1 Qor. 10:24.
w06 9/15 28 guf. 13
“Qeedhichimmakki Galte Ledo Hagiidhi”
13 Mimmitoho baxillenna shaqqille leellishshinoonnikki daafira adhamaꞌne giddo qarrulla kalaqami? Mala hasate sharrama hasiissanno. Lawishshaho, mimmitoho kaajjishe coyiꞌra rosicho assidhinoonniha ikkara dandaanno. (Lawishsha 12:18) Sai birxichira ronsummonte gede tini baasa gawajjitara dandiitanno. Qullaawu Maxaafi, “Afoo bushanna hanqaaleette galte ledo heeꞌrantenni, molo baattora heeꞌra woyyate” yaanno. (Lawishsha 21:19) Ate adhamano togoota ikkituro, ateneeto, ‘Akatiꞌya, minaanniꞌya anewa gambo giwanno gede assannoho?’ yite xaꞌmi. Qullaawu Maxaafi minaannuwa togo yee amaalanno: “Kiꞌne minaannuwu, minaamuwaꞌne baxa agurtinoonte; aaraabbineno hanqitinoontensa.” (Qolaasiyaasi 3:19) Ati minaannahoro ateneeto, ‘Akatiꞌya, minaamaꞌya alba wolunniwa higganno gede assannoho?’ yite xaꞌmi. Hige foorate kaꞌnanni gede assannohu mittu korkaatino nookkiti egennantinote. Kayi togoori ikkara dandaanno daafira, kalaqamino qarra fanne hasaawa lowo geya hasiissannote.
Maganu Qaalinni Ronseemmore
Soqqammeemmohu “Maarote Dureessa” Ikkino Maganiraati
16 Baalunku Kiristaani Yihowa gede maaro leellishate sharrama hasiissannonsa. Mayira? Tennera korkaata ikkannori giddo mittu: Yihowa maaro leellisha gibbannori huuccatto dimacciishshanno. Qullaawu Maxaafi togo yaanno: “Qarramino manchi raare macciishsha giwe maccasi cuꞌmiꞌrannohu, isi umisi raaranno; macciishshannosihuno diheeꞌranno.” (Lawishsha 21:13, NW) Ninke giddo Yihowa huuccattosi macciishsha giwara hasiꞌranno manchi dino; hakko daafira godowa kaajjadda ikkineemmokki gede qorophineemmo. Mittu ammanate rodiinke xissosi hasaaphanno woyite macca cuꞌmiꞌne giwantenni, ayewoteno “qarramino manchi raare” macciishshate qixxaamboommore ikka hasiissannonke. Qoleno, tenne qullaawu ayyaaninni amaalloonni amaaleno macciishsha hasiissannonke: “Maganu yoo, sao agurannokkihura saosi diagurtanno.” (Yai. 2:13) Umonke heeshshi assine maaro mageeshshi geeshsha hasiissannonkero qaangeemmoha ikkiro, albinni roore maaro leellinsheemmo. Roorenkanni, mittu manchi maaro eꞌꞌe songo higanno woyite maaro leellisha hasiissannonke.
Ammanakki Xawisse Kuli
5. Galte hayyotenni doodhi
Galte doodha shaaꞌꞌa coye diꞌꞌikkitino. Maatewoosi 19:4-6, 9 nabbabbe; hakkiinni tenne xaꞌmo hasaabbe:
• Mittu Kiristaanchi adhate muddama hasiissannosikkihu mayiraati?
Qullaawu Maxaafi dancha galteeti yinanniti hiittoo akati noosetero afate kaaꞌlannohe. Roorenkanni, Yihowa baxxanno galte doodhi. Umi Qorontoosi 7:39 nna 2 Qorontoosi 6:14 nabbabbe. Hakkiinni, aante noo xaꞌmuwa hasaabbe:
• Mittu Kiristaanchi ammanate roduuwisi mereerinni calla adha hasiissannosihu mayiraati?
• Yihowara iso baxannokkihu ledo adhammummoro mayi macciishshamannosiha lawannohe?
MAAJA 14-20
MAGANU QAALI GIDDO NOOTA MUXXE JIRO LAWISHSHA 22
Ooso Lossiꞌrate Kaaꞌlannoha Xintu Seera
Qaaqquulliꞌne Lophitanno Woyite Maganoho Soqqantanno?
7 Ooso ila hasidhinanni minaanninna minaama kineꞌneneeto togo yitine xaꞌme: ‘Yihowa qaaqquulle hadara aannonke gedee manna yaano umonke heeshshi assineemmorenna Yihowa banxeemmore ikkinoommo?’ (Far. 127:3, 4) Ooso iltinoonniri kayinni kiꞌneneeto togo yitine xaꞌme: ‘Oosonkera diinaggaawe loosa lowo geeshsha hasiissannota ikkitinota rosiinseemmo?’ (Ros. 3:12, 13) ‘Oosoꞌya tini busha Sheexaanu alame gawajjitannokki gede agarate danduummore baala asseemmo?’ (Law. 22:3) Oosoꞌnera tuncu yaannore baalankare hoola didandiitinanni. Hatto assa dandiinannikkireeti. Ikkirono iillannonsa qarra dandiite saꞌꞌate Maganu Qaali amaale addaxxitanno gara baxillunni rosiisa dandiitinanni. (Lawishsha 2:1-6 nabbawi.) Lawishshaho, fiixikki Yihowara soqqama aguriro, Maganoho ammaname heeꞌra lowo geeshsha hasiissannota ikkitinohu mayiraatiro oosoꞌne Qullaawu Maxaafinni affanno gede kaaꞌlensa. (Far. 31:23) Woy shiidhiniro, oosoꞌne Maganu Qaalinni sheshonna salaame afidhanno gara rosiissensa.—2 Qor. 1:3, 4; 2 Xim. 3:16.
Annuwanna Amuuwa—Qaaqquulliꞌne Yihowa Baxxanno Gede Qajeelse
17 Anjensanni kayissine qajeelsensa. Annuwunna amuuwu qaaqquullensa anjensanni kayisse rosiisa danchate. (Law. 22:6) Hanni yannate gedensaanni Phaawuloosira soqqanshote jaala ikkinohu Ximootewoosi lawishsha laꞌno. Amasi Ewuniqenna ahaahesi Loyidi Ximootewoosi ‘anjesinni kayisse’ rosiissinosi.—2 Xim. 1:5; 3:15.
18 Kotidivoori heeꞌrannori Zhaani-Kiloodinna Piisi yinanni minaanninna minaama leenti oosonsa Yihowa baxxannorenna isira soqqantannore ikkitanno gede asse lossiꞌrino. Kuri minaannanna minaama kaaꞌlinonsari maati? Insa Ewuniqenna Loyidi lawishsha harunsino. Togo yiino: “Maganu Qaali qaaqquullinke wodanira qaꞌmiꞌranno gede assa hananfoommohu insa marqootu heedheennaati.”—Mar. 6:6, 7.
19 Qaaqquullu wodanira Yihowa Qaale qaꞌmisate yaa mayyaate? Qaꞌmisa yine tirroonnihu Ibiraawootu Afii qaali, “marro marro hinge rosiisanna qaagiissa” yitanno tiro afiꞌrino. Hatto assate, annuwunna amuuwu qaaqquullinsa anje heedheenna insa ledo ganye yanna sayisa hasiissannonsa. Qaaqquulleho biddishsha marro marro kula mito woyite caacceessitara dandiitanno. Ikkollana annuwunna amuuwu, qaaqquullinsa Maganu Qaale wodanchitanno gedenna loosunni leellishshanno gede kaaꞌla dandiitannohu hatto assatenni ikkinota qaaga hasiissannonsa.
Qaaqquulleꞌne Yihowara Soqqantanno Gede Qajeelse
6 Oosoꞌne baxxinannita leellishate seejjensa. Mito wote, mittu coyi gara ikkinohu woy ikkinokkihu mayiraatiro xawise kula calla ikkitanno. Wole wote kayinni, qaaqqu yitinoonnisire assikki gatara dandaanno. (Law. 22:15) Hattoo wote, Yesuusi lawishsha harunse. Injiitanno yannanna base laꞌine qaaqqiꞌnera biddishsha uyitine, qajeelsitine, hattono hayi yitine baxillunninna shaqqillunni seejje. Wodiidi Afirikira heedhannoti Ilaani yinanni rodoo anje noo warire kultanni togo yitino: “Anniꞌyanna amaꞌya agurtukki seejjitannoe. Insa busha gede ikka gawajjitannoeta kulte kaꞌinoeha ikkiro, uyitinoe amaale harunsanni noommaronna teꞌee harunsite laꞌanno. Ikkirono, insa hanqunni woy mayira seejjitanni nooero kultuekki seejjite diegentinoe. Hakko daafira, beꞌe yuummakki lophoomma. Insa danniꞌya mageeshshi geeshshaatiro kulinoe; qoleno ma assa hasiissannoero afoomma.”
Maganu Qaalinni Ronseemmore
Nooꞌne Qoossonni Hagiidhe
11 Hatteente gede, Yihowara soqqammammora uyinanninke loosi ikkihano ikkiro, wolqanke assitu deerrinni diinaggaambe loonsummoro, hagiirrinke lexxanno. Sabbakate looso laalaatte loosi; hattono songoꞌne ledo gamba yite loosi. (Soq. 18:5; Ibi. 10:24, 25) Songote gambooshshiwa jawaachishshanno dawaro qola dandaatto gede, seekkite qixxaabbe haꞌri. Kiristaanu Heeshshonna Soqqansho gambooshshira uyinanniheta aye kifileno shiimuri gede assite laꞌooti. Songote giddo mito looso kaaꞌli yinihero, yannante marte kaaꞌli; hattono ammaꞌninanniha ikki. Uyinanniheha aye loosono loosatto woyite, mulla yannakki guxxitanni noottohu gede assite heddooti. Dandookki woyyeessiꞌrate sharrami. (Law. 22:29) Yihowa loosira diinaggaawitto deerrinni, ayyaanaamittetenni rakke lophatto, hattono hagiirrikki lexxanno. (Gal. 6:4) Qoleno, ati halchootto qoosso wolootu afidhanno woyite, insa ledo hagiidha qarra diꞌꞌikkitannohe.—Rom. 12:15; Gal. 5:26.
Lallawo
ijwyp birxicho 6
Anniꞌyanna Amaꞌya Boohaareemmota Hoolannoehu Mayiraati?
Jaallakki lamalate jeefora minensa marte boohaarattora koyissinohe. Haꞌroni yite annakkinna amakki xaꞌmittota, insa “Dihaꞌratto” yee kaajjishe qolihe. Insa hatto yiita hakkeya dhagge diassiꞌrootto. Mayira yiniro, albano xaꞌmiteenna hatto yee qolinohe.
Konni birxichira
Anniꞌyanna amaꞌya yuummore baala deeꞌnilla yitannohu mayiraati?
Anniꞌyanna amaꞌya yuummorira maahoyye yaannoe gede maa asso?
Darawokki yitinore
Anniꞌyanna amaꞌya yuummore baala deeꞌnilla yitannohu mayiraati?
Annikkinna amakki duucha woyite deeꞌni yitannoheha ikkiro, insa boohaarattora horo hasidhannokkiha lawahera dandaanno.
Meeri yinanni wedellitte mobayile hirrise yannara hatto yite heddino. Ise togo yitino: “Anniꞌya hiittoo appilikeeshiine dirrisiꞌreemmaro, hiittoo manni ledo hasaaweemmaronna insa ledo meꞌꞌe saate geeshsha hasaaweemmaro kulannoha lowo seera fushshino. Hatte yannara, jaallaꞌya kayinni baxxu gede ikka dandiitanno!”
Hanni hedi: Meeri anni ise boohaartannota hoolate woꞌnaalanni nooha lawaahe? Iso yaachishinori maa ikkara dandaanno?
Togo assate woꞌnaali: Hanni ati oosote annaati yine hendo. Wedellichu beettikkira mulella mobayile hirte kaootto. Mayi mayi huluullahera dandaanno? Huluullinohe coyi kalaqamannota hoolate, hiittoo seera fushshatto? Wedellichu beettikki, ‘Ani boohaareemmota dibaxxinanni’ yiihero mayite qolatto?
“Anniꞌya duucha woyite, ‘Hanni ati ane ikkoottaro maa assattaro hedi’ yaannoe. Isi yii garinni hedaꞌya, fushshino seeri kaaꞌlannoe garanna hakkoye seera mayira fushshinoro huwateemma gede kaaꞌlitinoe. Ooso heedhoommeꞌꞌero, anino anniꞌya ane assi yaannoere asse yeemmansaha lawaae.”—Taaniya.
Anniꞌyanna amaꞌya yuummorira maahoyye yaannoe gede maa asso?
Togo assitooti: Muffi yaa, gururaꞌꞌa, nyerri yaa.
“Cance coyiꞌrama, ateno annakkinna amakkino daafursitannolla ikkiina tirtannori dino. Nyerri yaattoha ikkiro, annikkinna amakki ate qaaqqimma digudinona yite wolapho ledde aa gibbahera dandiitanno.”—Richaardi.
Hatteentenni togo assi: Hanqite bayichonko qolattokki gede ateneeto eemadhi. Hatteentenni, annikki woy amakki hatto yitinohu mayiraatiro hedate woꞌnaali. Annikkinna amakki addinta ate ammana hooggeetinso, haꞌratto bayicho woy xaadattora hedootto manna ammana hooggeeti? Insa deeꞌni yitinohu mayiraatiro leellannohe gede, mayira tenne hajo insa ledo wodanaaꞌmite dihasaawatto?
Kaaꞌlitanno hedo: Annikkinna amakki ledo hasaawatto woyite, huluullinonsa coyi kalaqamannota hoolate maa assattoro xawisse kulinsa. Hatto assiteennano insa deeꞌnilla yite gibburo nafa, hedoottori leellannonsa; aterano insa heddinori leellahera dandaanno.
“Anniꞌyanna amaꞌya mitto seera fushshitannohu danchare heddeetilla. Insa hatto assitannohu boohaareemmata hoolate ikkikkinni, roore woyyino garinni boohaareemma gede yaano qarru giddora eummakki boohaarammara yiteetilla.”—Ayiv.
Qullaawu Maxaafi biddishsha: “Gowwu manchi hanqosi gudise leellishanno; egennaamu kayinni aarasi cincatenni sayisanno.”—Lawishsha 29:11.
Togo assitooti: Annanna ama maaxamme, hoolloonnire assa.
“Silke horoonsiꞌreemma gara kulannoha anniꞌya fushshino seera isi afikkinni diigate woꞌnaaloomma. Hashshiishiꞌre jaallaꞌyara sokka borreessate woy anniꞌya fajjinoekki appilikeeshiine dirrisiꞌrate woꞌnaaleemma. Jeefote kayinni isi ani maaxame asseemmare afi; hakkiinni xaate ane ammanannokki daafira roore furro fuuqqo hoꞌlannoe seera fushshi. Hoolloonni coye maaxamme assate woꞌnaala gawajjitannolla.”—Maari.
Hatteentenni togo assi: Annikkinna amakki insa fushshino seera ayirrisattota affanno gede assite ammantannoheha ikki.
Kaaꞌlitanno hedo: Annikkinna amakki mitto coye badde xaꞌmitannohe woyite (“Boohaartinanniwa ayeoo dagganno?” “Minira meꞌꞌe saatenni higatto?”), noore fante coyiꞌri. Huluullammanni gede assitanno dawaro qolittoro insa diammantannohe!
“Cinci. Annikkinna amakki, fushshino seera bayichonko soorra hoogara dandaanno; kayi insa fushshino seera ayirrissanni noottota laꞌꞌanno woyite, hasiꞌroottore assatto gede albinni roore fajjahera dandaanno.”—Melinda.
Qullaawu Maxaafi biddishsha: “Kiꞌne ooso! . . . baalunku coyinni iltinoꞌnerira hajajammensa.”—Qolasiyaasi Sokka 3:20.
Togo assitooti: Annikkinna amakki mitto coye assatto gede fajjitahera qarrisa; lawishshaho, darawokkira fajjinoonninsare kulte anerano fajjinoe yee wotto wora.
“Mitto coye afiꞌrate gaagaale gaꞌna tirtannori dino; hasiꞌroottore afiꞌrateno dikaaꞌlitanno.”—Nataale.
Hatteentenni togo assi: Tenne hajo daafira annikkinna amakki ledo hasaawate, “Seera Heeshshi Gotti Asse Heda” yaanno rosiishsha horoonsiꞌri.
Kaaꞌlitanno hedo: Annikkinna amakki loosuwiinni minira xaalla dagge heedheenna woy hedonsa wolu coyinni billaallite heedheenna hasaawisantenni deseꞌe yite noo yannara hasaawisinsa.
“Annunna ama, oosonsa coye heeshshi gotti assite heddannore ikkitara hasidhanno. Hakko daafira, annaꞌyanna amaꞌya hasaawiseemmo woyite, giddoꞌya giira fushshiꞌrantenni wodanaaꞌme ammansiisanno garinni coyiꞌrate woꞌnaaleemmo. Hatto asseemmo woyite, insa yeemmore roore macciishshannoe.”—Jooseefi.
Qullaawu Maxaafi biddishsha: “Annakkinna amakki ayirrisi!”—Efesooni Sokka 6:2.
MAAJA 21-27
MAGANU QAALI GIDDO NOOTA MUXXE JIRO LAWISHSHA 23
Ago Lainohunni Kaaꞌlannoha Xintu Seera
2. Qullaawu Maxaafi aga doodhanno manna mayyee amaalanno?
Yihowa quwa saꞌne angannitanna dimbinannita giwanno. (Galatiyu Sokka 5:21) Qaalisi “Agaasinete ledo hossooti” yaanno. (Lawishsha 23:20) Hakko daafira ago aga doodhinummoro, calla heeꞌnoommoha ikkiro nafa, batisiꞌra dihasiissannonke; ago quwa sayinse angeemmoha ikkiro, garunni heda, hattono coyiꞌneemmorenna assineemmore eemadha didandiineemmo; fayyimmankeno gawajjantanno. Quwa sayise aga qarra ikkitinonkeha ikkiro, horonta aga agura hasiissannonke.
Ago Agate Daafira Maganu Aanno Amaale Harunsi
Kiristaanaho kayinni baxillaanchu Kalaqaanchinsa kaajja amaale uyinonsa. Lawishshaho isi ago quwa sayise aga abbitanno gawajjo kule qorowisiisinonke. Lawishsha 23:29-35 kulloonnihu ago quwa sayise aganno manchi ikkannorenna iillinosi qarra nabbawoottoha ikkara dandaanno. Awuroppaho heeꞌrannohu Daanieeli yinannihu mittu songote cimeessi Kiristaancho ikkara albanni heeꞌrino heeshsho qaage togo yiino: “Ago quwa sayise agaꞌya gara ikkinokki doorsha doodheemmo gede assitinoe; hakko daafira xissiisiꞌreemmo gede assanno coyi tuncu yiinoe; tini gedensoonni lowo geeshsha dadilleemmo gede assitinoe.”
Maganu Qaalinni Ronseemmore
Umiꞌne Fajjonni Soqqantine Yihowa Guwisidhe
16 Yihowa aliidimmasi irkinseemmo faro fanenke, ayirrisannonketa leellishino. Daawuloosi mannu ooso Maganoho finqiltanno gede assi yannanni kayise, mannu isi faale haꞌrara hasiꞌranno; ikkollana, ninke Yihowa gashshoote irkinseemmoha ikkiro ayera haꞌlineemmoro leellinsheemmo. Ammananke, hattono Yihowara ammanamme soqqammeemmo soqqansho Iso hagiirsiissanno. (Law. 23:15, 16) Ninke Yihowara ammanamme assineemmori, xonannosihura Sheexaaneho dawaro qolate kaaꞌlannosi. (Law. 27:11) Konni daafira, Yihowara ammanammeemmoha ikkiro isi lowo geeshsha naadannore uyinanni heeꞌnoommo yaate; tini isi lowo geeshsha hagiidhanno gede assitanno.
MAAJA 28–WOXAWAAJJE 3
MAGANU QAALI GIDDO NOOTA MUXXE JIRO LAWISHSHA 24
Qarru Yannara Qixxaabbe
“Kaajjitine Uurre, Shashshafantinoonte”
15 Maganu Qaale xiinxalli hattono hiinci. Mitte haqqicho rumuddase baattote giddora lixxe eꞌuro kaajjite uurritannonte gede, ammanankeno Maganu Qaali aana dancha gede rumuxxitinota ikkituro ammanamme heeꞌra dandiineemmo. Haqqicho lophitanno woyite rumuddaseno lixxanninna halaꞌlitanni hadhanno. Ninkeno Maganu Qaale xiinxallineemmonna hiincineemmo woyite ammananke kaajjitanni hadhanno; hattono Maganu doogo baalunkurinni woyyitinota ikkitinota albinni roore ammanneemmo. (Qol. 2:6, 7) Yihowa biddishshi, amaalenna agarooshshi hunda heedhino soqqamaanosi kaaꞌlino gara hiinci. Lawishshaho sokkaasinchu, Hiziqeeli ajuujatenni lainoha qullaawu miniha mitto mittonka coye bikki woyite Hiziqeeli seekke laino. Tini ajuuja Hiziqeeli jawaachishshinosi; tenne xaggenni ninkeno Yihowa xalala magansiꞌra daafira fushshino biddishshira ammanamme heeꞌneemmo gede kaaꞌlanno roso ronseemmo. (Hiz. 40:1-4; 43:10-12) Maganu Qaali giddo nooha hawa gede huwantannikki coye xiinxallatenna hiincate yanna gaaꞌmineemmoha ikkiro ninkeno horo afiꞌneemmo.
Fonqolu Iillinkerono Hagiirrinke Baꞌꞌannokki Gede Assiꞌra Dandiineemmohu Hiittoonniiti?
17 Qarra ikkannore: Hexxo mudha. Maganu Qaali, “Qarru barra wolqiweelittoro, jawaatte diafatto” yaanno. (Law. 24:10) Hexxo mudhineemmoha ikkiro hagiirrinke mulenni baꞌꞌara dandaanno.
18 Mala: Cincite saꞌꞌate kaaꞌlitanno worbimma aannohe gede Yihowa addaxxi. Iillannonke fonqolo dandee saꞌꞌate woy cincate worbuulle ikka hasiissannonke. (Yai. 5:11) Yaiqoobi kowiicho ‘cinca’ yaanno qaale horoonsiꞌrinohu kaajje uurranno mancho kulateeti. Tini diinnasi qassasira dagganni noota afanni heeꞌrenni worbimmatenni milli miliqqi yiikkinni uurrino olamaancho hendeemmo gede assitankera dandiitanno.
19 Soqqamaasinchu Phaawuloosi worbahonna cincaho. Isi wolqa baino woyiti nooha ikkirono, jawaante aannosi gede Yihowa addaxxino daafira cince saino. (2 Qor. 4:7; 12:8-10) Ninkeno umonke heeshshi assine Yihowa kaaꞌlo hasiissannonketa ammannummoro togoo worbimmanna jawaante afiꞌra dandiineemmo.—Yai. 4:10.
Nabbawaano Xaꞌmitanno Xaꞌmo
Lawishsha 24:16 “Keeraanchu lamala hige uwiro nafa kaꞌꞌanno” yitanno. Ikkina kuni qummeeshshi mittu manchi marro marro hige cubbo loosirono Maganu gatona yaannosita kulannoho?
Kuni qummeeshshi tenne daafira kulannoha diꞌꞌikkino. Hatteentenni kuni qummeeshshi mittu manchira lowo qarrinna yaaddo marro marro higge iillitusirono, cince saꞌꞌa dandaannota kulanno.
Lawishsha 24:16 noohu ‘uwa’ yaanno qaali cubbo loonse uwate daafira kulannoha ikkikkinni marro marro hige waadanno qarrinni umbannita kulannoho. Tenne busha alamera mitto keeraancho mancho fayyimmate qarri woy wolu qarri amadasira dandaanno. Ammanasinni kainohunni gashshootu nafa xiiwasira dandaanno. Ikkirono isi konne qarra dandee saꞌꞌanno gedenna qinaannosi gede Maganu kaaꞌlannositanna irkisannosita addaxxa dandaanno. Hanni Maganu soqqamaanora duucha woyite coyi qinaannansa laootto yanna hedi. Insara qinaannonsahu mayiraati? Yihowa “qarru giddo noore kaaꞌlannonsa; ubbinoreno kayisannonsa” daafiraati.—Far. 41:1-3; 145:14-19.
Maganu Qaalinni Ronseemmore
Adhanna Adhama Maganu Eltooti
13 Adhamate heddanni noottoha ikkiro, tennera qixxaawoottoronna teꞌee buuxi. Atera qixxaawoottoha lawahera dandaanno; ikkirono konninni aanchine ‘Adhamate qixxaawate yaa mayyaate?’ yitanno xaꞌmora dawaro afiꞌneemmo. Tenne xaꞌmo dawaro dhagge ikkitahera dandiitanno.
14 Qullaawu Maxaafi minaanninna minaamara mini giddo babbaxxino qeechi noonsata kulanno. Konni daafira labbaahunna meyati adhamate qixxaawanno gari addi addiiti yaa dandiinanni. Labbaahu seenne adhate hedannoha ikkiro, ‘Maatete umo ikkate qixxaawoommo?’ yee isonooto xaꞌma hasiissannosi. Yihowa, minaanni minaamasiranna oososira maalaamittete hasiisannore wonsharanna baxillunni towaatara hasiꞌranno. Roorenkanni, minaanni albisa ikke maatesita ayyaanaamittete hasatto wonsha hasiissannosi. Qullaawu Maxaafi, maatesi towaatannokki manchi “ammaninokki manninni roore bushaho” yaanno. (1 Ximootewoosi 5:8) Konni daafira, seenne adhate heddanni noottoha ikkiro, “Gobbayidire balaxxe biddi assiꞌri; gatikki loosono guxxi; hakkunni gedensaanni mine miꞌni” yaannoha Qullaawu Maxaafiha xintu seera hiinci. Wole yaattonni, seenne adhattora albaanni Yihowa yiino gedee minaanna ikka dandaattoronna teꞌee buuxi.—Lawishsha 24:27.
15 Mitte meyati mine assiꞌrate heddannoha ikkiro, minaamanna oosote ama ikkate qixxaabbinoronna teꞌee heda hasiissannose. Qullaawu Maxaafi minaama minaannasenna oosose towaaxxa dandiitannota batinye doogga kulanno. (Lawishsha 31:10-31) Xaa yannara batinyu minaanninna minaama galtensa insara assitannore calla hedanno. Yihowa kayinni ninke galtenkera maa assa dandiineemmoro hendammora hasiꞌranno.
Lallawo
lmd guwuursha A naxiwe 11
Maganu qaalesi kulinonke.—2 Xim. 3:16, 17; 2 Phe. 1:20, 21.
WOXAWAAJJE 4-10
MAGANU QAALI GIDDO NOOTA MUXXE JIRO LAWISHSHA 25
Danchu Garinni Coyiꞌneemmo Gede Kaaꞌlannonkeha Xintu Seera
Arrawiꞌne Wolqa Danchurira Horoonsidhe
6 Lawishsha 25:11, coyiꞌrate maltino yanna doodha hasiissannonketa lawishshunni kultanni togo yitanno: “Gara ikkitino yannara coyiꞌnoonni qaali, birrunni seekkinoonni uduunnichira worroonnite worqete poome gedeeti.” Worqete poome mullankanni biifadote. Birrunni seekkinoonni uduunnichira worranni wote isinni roore xuꞌmitanno. Hatteente gede, coyiꞌrate maltino yanna doodhanke coyiꞌneemmo coyi roore baxisannohanna dancha guma abbannoha ikkanno gede assitanno. Hiittoonni?
7 Coyiꞌrate hendoommo coyi coyishiinsheemmo manchira hasiisinoha ikkara dandaanno; ikkollana, coyiꞌrate maltino yanna doora hoongummoro, yinoommori kaaꞌla hoogasira dandaanno. (Lawishsha 15:23 nabbawi.) Lawishshaho, Badheessa 2011nni Jaappaanete gobbara soojjaati widoonni baattote huxano hattono hambabalatte katama gudisse uullate gantino. Hatte yannara 15,000 saꞌꞌanno manni goofino. Hakko noori Yihowa Farciꞌraasine wolu olliinsa manninte gede gawajjantinoha ikkirono, Qullaawa Maxaafa horoonsidhe shiirino manna sheshifachishate afidhu faro baala horoonsidhino. Ikkollana, qooxeessaho noohu batinyu manni Budiizimete ammaꞌno giddo keeshshinoha ikkino daafira Qullaawu Maxaafi daafira garire woy horonta diafino. Roduuwinke hambabalattete dano iillitu gedensaanni bayichonko shiirino mannira kaote hexxo daafira kula hayyo ikka hooggara dandiitannota huwattu. Hatteentenni, insa coyiꞌrate dandoonsa horoonsidhe xissiisiꞌrino manna jawaachishatenna beebbaataamu mannira togoo dano iillitannohu mayiraatiro Qullaawu Maxaafinni kulate higgino.
Arrawiꞌne Wolqa Danchurira Horoonsidhe
15 Coyiꞌneemmo gara hedanke coyiꞌneemmo coye doodhate geeshsha hasiissannote. Yesuusi ilamino katamira Naazireetete heeꞌre mukuraabete rosiisi yannara, mannu “afiisinni fulannoha shaqqado qaale dhagge assiꞌrino.” (Luq. 4:22) Shaqqinshe woy awu afiinni coyiꞌra, mannu wodana kakkayissanno ikkinnina coyiꞌnoommo coye lashshi assine laꞌnanni gede diassitanno. Isinni awu afiinni coyiꞌra coyiꞌneemmore mannu adhanno gede assitara dandiitanno. (Law. 25:15) Coyiꞌneemmo wote shaqqillunni, ayirrinyunni hattono manna xissiisannokki garinni coyiꞌne Yesuusi faale haꞌra dandiineemmo. Yesuusi lowo manni isi coyiꞌranna macciishshate sharramanno gara lae lowo geeshsha mararinonsa; hakkiinni insara “lowo coye rosiisa hanafi.” (Maq. 6:34) Isi xonnisi yannara nafa kaajjado qaale dicoyiꞌrino.—1 Phe. 2:23.
16 Coyishiinsheemmo manchi lowo geeshsha anfoommoha ikkiro, shaqqillunni woy seekkine hende coyiꞌra raha hooggankera dandiitanno. Hendoommore mittoreno gatinsummokki coyiꞌra dandiineemmoha lawankera dandaanno. Mininke manna woy songote giddo noo jaalanke hakko garinni coyishiinsheemmoha ikkara dandaanno. Ikkina, Yesuusi rosaanosi ledo muli jaaloomi noosi daafira insara kai gede coyiꞌrinoni? Dicoyiꞌrino! Insa giddo mitootu ninke giddo roorannohu ayeti yite heewisantu yannara, Yesuusi awu afiinni hattono shiima qaaqqo lawishsha asse horoonsiꞌre amaalinonsa. (Marq. 9:33-37) Cimeeyye roduuwa ‘shaqqillunni’ amaalte Yesuusi lawishsha harunsa dandiitanno.—Gal. 6:1.
Mimmitonke “Albinni Roorsine” Jawaachinsho
10 Woloota jawaachisha hasiissannonsari cimeeyye calla diꞌꞌikkitino. Phaawuloosi baalunku Kiristaani ‘Wole manna hasiisinonsa garinni dhaawannohanna macciishshitannorira qiniite ikkanno gede dancha coye’ coyiꞌranno gede kulino. (Efe. 4:29) Mitti mittinke woloota “hasiisinonsa garinni” jawaachisha dandiineemmo gara heda hasiissannonke. Isayaasi togo yee borreessino: “Daafurtino anguwa jawaachishshe! Leqe leqe yitino gulubba kaajjishshe!” (Isa. 35:3; Ibi. 12:12, 13) Wedelluno ikko ninke baalunku woloota jawaachishannore coyiꞌne mimmito dhaawa dandiineemmo.
Maganu Qaalinni Ronseemmore
Yannaꞌne Danchu Garinni Horoonsidhe
3 Qoleno hendummokki yannanke gudannohu wolu coyino no. Assineemmo coyi soꞌro ikka hoogiro nafa, qoropha hoongummoro albinni roore Yihowawa shiqate horoonsiꞌneemmo yanna gudankera dandaanno. Hanni lawishshaho boohaarsha hendo. Saꞌne saꞌne boohaara baalanka kaaꞌlitannonke. Ikkollana boohaarranni lowo yanna sayinseemmoha ikkiro, danchu boohaarshi nafa ayyaanaamittete coye assineemmo yanna gudankera dandaanno. Hakko daafira boohaarshaho quwa saꞌꞌa dihasiissannonke.—Law. 25:27; 1 Xim. 4:8.
Lallawo
Miincanninke Woyite Kaajjine Uurra Dandiineemmohu Hiittoonniiti?
9 Yesuusi miincoonnisita dandee sae guuta lawishsha ikkinonke. Hanni iso maatesino wolu mannino beebba assiꞌrinosi gara laꞌno. Ammaninokki fiixisi iso wodana difayyino yiinosi, ammaꞌnote massagaano loosannohu agaanintete wolqanniiti yitinosi, Roomu olanto qacifattinosi, gantinosi, hattono jeefote shitinosi. (Maq. 3:21, 22; 14: 55; 15:16-20, 35-37) Ikkirono Yesuusi konne baalanna wole coye rabbisiꞌrikkinni dandee saino. Isi lawishshinni maa ronseemmo?
10 Umi Pheexiroosi 2:21-23 nabbawi. Miincanninke woyite maa assa hasiissannonkero anfeemmo gede, Yesuusi guuta lawishsha ikkinonke. Isi sammi yaa hasiissannosihunna coyiꞌra hasiissannosihu mamooteetiro afino. (Mat. 26:62-64) Yesuusi isi daafira coyiꞌnanni kaphira baalaho dawaro diqolino. (Mat. 11:19) Isi coyiꞌri woyite beebba assidhinosire dixonino woy diwaajjishiishino. Yesuusi heeshshosi “halaale coyiꞌranno Maganira eeggo uyino” daafira, isonooto eemadhannota leellishino. Isi beebba assiꞌnanni heeꞌnoonnisita Yihowa laꞌꞌanni noota afino. Yesuusi, Yihowa yannasira baalanka coye taashshannota addaxxino.
11 Miincanninke woyite coyiꞌneemmore eemadhine Yesuusi lawishsha harunsa dandiineemmo. Mitu coyi hakkeya xissiisa hooginkero sammi yine agura dandiineemmo. Woy coyi roore bushanno gede assineemmokki gede sammi yaa doodhineemmoha ikkara dandaanno. (Ros. 3:7; Yai. 1:19, 20) Mito woyite kayinni gara ikkinokkire laꞌneemmo woyite woy halaaleho gaarama hasiissannonke woyite coyiꞌra hasiissannonkeha ikkara dandaanno. (Soq. 6:1, 2) Coyiꞌneemmoha ikkiro, wodanaaꞌminenna ayirrinyunni coyiꞌrate sharrama hasiissannonke.—1 Phe. 3:15.
12 ‘Heeshshonke halaale coyiꞌranno Maganira eeggo uyiꞌneno’ Yesuusi lawishsha harunsa dandiineemmo. Wolootu miiccannonke woyite woy beebba assidhannonke woyite iillannonkere Yihowa afannota addaxxineemmo. Yihowa jeefote baalanka coye taashshannota afanke miincanninketa dandiine saꞌneemmo gede kaaꞌlitannonke. Yihowa addaxxineemmohanna isi baalanka coye taashshanno yanna agadhineemmoha ikkiro, hanqinenna koma amaxxine dikeeshshineemmo. Hanqineemmohanna koma amaxxineemmoha ikkiro, hagiirrinkenna Yihowa ledo noonke jaaloomi baꞌꞌanno.—Far. 37:8.
WOXAWAAJJE 11-17
MAGANU QAALI GIDDO NOOTA MUXXE JIRO LAWISHSHA 26
‘Gowwootuwiinni’ xeertidhe
it-2 729 guf. 6
Xeena
Wogga. Hexxote Gobbara lame qara wogga yaano arrunna hawadu no; kuri wogga moollete wogganna xeenu wogga gede assine kiirrara dandiinanni. (Fa 32:4; Farf 2:11 ledo heewisiisi.) Dotteessu agani mereerinni kayise Birru agani mereeri geeshsha xeena hakkeya digananno. Tenne gide gamba assiꞌnanni yannara xeenu horo diheeꞌranno yaa dandiinanni. Lawishsha 26:1 gide gamba assiꞌnanni yannara gananno xeena gawajjannohunna hasiisannokkihu gede assine hendannita leellishshanno. (1Sa 12:17-19 ledo heewisiisi.) Xeenu woggara xeena ganannohu woꞌmanka woyite diꞌꞌikkino; mito woyite arrishshe hosanno. Tenne yannara qiidu heeꞌranno daafira mitto mancho xeenu ganiro lowo geya qiidiꞌranno. (Iz 10:9, 13) Konnira injaanno mine miꞌna hasiissannosi.— Is 4:6; 25:4; 32:2; Iyo 24:8.
w87 10/1 19 guf. 12
Seejjo Keeru Guma Abbitanno
12 Lawishsha 26:3 yitannonte gede mito manna kaajjinshe seejja hasiissannota ikkitara dandiitanno; qummeeshshu togo yaanno: “Liche faradoho, bixaalu gaangootaho hasiisannonte gede, gowwu badherano siqqo maltino.” Yihowa, Israeelete manni uminsa anganni abbiꞌrino qarri xaxxawe amadannonsa gede fajjino woyiti no. “Kuni duuchu qarri iillinonsahu, Woꞌmunkura Aliidi Maganira hajajama gibbinohuraatinna, seejjosi adhitinokkihuraati. Kunnira loosu batinyinni kainohunni daafurtu; ubbu woyiteno kayisannonsaha diafidhino. Qarrinsa yannara Kaaliiqiwa higge raartu; isino shettotenni gatisinsa.” (Faarso 107:11-13) Ikkirono mitu gowwu manni seejjinoonninsa seejjo mokkookke adha giwanno. “Batinye hinge seejjineenna, mokkookke higa giwannohu, hurannokki gede ikke hedeweelcho hiiqqamanno.”—Lawishsha 29:1.
it-2 191 guf. 4
Kottimma
Lawishshu yaattonni horoonsiꞌnoonni gara. Hayyichu Moote Salamooni, “Gowwaho sokka soqqa, meessi lekka mudhate [wole yaattonni kottate], woy shaannore agate ledo mittete” yiino. Addanko, gowwa mancho loosiisiꞌranno manchi lawishshu yaattonni lekka kottate geeshsha gawajjamanno. Hedino loosi qinaa hoogara dandaanno daafira tini gawajjitannosi.—La 26:6.
Maganu Qaalinni Ronseemmore
Wedella, Ammanaꞌne Jawaachishidhe
16 Tenne baala assattohu heewisante qeelate ikkikkinni, hasaawissanni nootto manchi kulattosire huwatanno gede assateeti. Konnira coyiꞌranno wote seekkite macciishshi. Mite xaꞌmuwa xaꞌma dandaatto; hedokki xawisatto yannara shaqqillunninna ayirrinyunni coyiꞌri; hakko iso jajjabba manna hasaawissanni noottoha ikkiro tenne assa hasiissannohe. Hatto ikkiro, isi coyiꞌrattore macciishshe adhara dandaanno. Qoleno ammanatto coye seekkite hedde ammanoottota huwatanno. Batinyu wedelli kayinni tenne diassanno. Togo yaa kayinni affanni heedhe adha gibbannorira woy ammanatto coyinni kainohunni haariintannoherira dawaro qola hasiissannohe yaa ikkitinokkita deꞌooti.—Law. 26:4.
‘Gato Afidhinanni Gede Assitannoꞌne Hayyo’ Afiꞌrate Hojju Xiinxallo Assidhe
Hayyoota Ikkitinanni Gede Seejjo Adhe
6 Ninkeneeto seejjiꞌrate giddonkenni huuccatto assiꞌra, Qullaawa Maxaafa xiinxallanna hiinca hasiissanno. Maganu Qaale xiinxalla qarra ikkitinohehalla ikki? Qullaawa Maxaafa xiinxalla baxisannohekkiha ikkara dandaanno. Ikkollana, maahoyye yiittoro Yihowa kaaꞌlannoheta deꞌooti. Isi ‘Qaalesi halchatto’ gede kaaꞌlahera dandaanno. (1 Phe. 2:2) Umihunni, ateneeto qeeꞌlite Qaalesi xiinxallatto gede kaaꞌlahera Yihowa huucciꞌri. Hakkiinni huuccattokki ledo sumuu yaannore assi; shiima yanna xiinxalla dandaatto. Sunu sununni Qullaawa Maxaafa xiinxalla shota ikkitannohe, hattono baxissannohe! Qoleno muxxe ikkitinota Yihowa hedo hiincitanni sayisatto yanna hagiirsiissannohe.—1 Xim. 4:15.
WOXAWAAJJE 18-24
MAGANU QAALI GIDDO NOOTA MUXXE JIRO LAWISHSHA 27
Addu Jaalla Kaaꞌlitannonke Gara
Yihowa Umo Heeshshi Assitanno Soqqamaasinesi Baxanno
12 Umo heeshshi assano manchi amaalloonnisi daafira galatanno. Lawishshaho, hanni gambooshshunniwa nootto yine hendo. Lowo roduuwi ledo hasaabbe kaittohu gedensaanni, insa giddonni mittu rodii qacce fushshehe hinkote sagale ittanna qamiꞌrinori nooheta kulihe. Tini salsiissahera dandiitannoti egennantinote. Ikkirono kulihe rodoo tennera digalatatto? Adda coyiꞌniro ‘Wolu manchi balaxe kuloommeꞌꞌero ma dancha baꞌu!’ yite hedattoha ikkara dandaanno. Hatteente gede, mittu ammanate rodiinke waajja agure amaale hasiisse noonke yannara amaalinkero, galata hasiissannonke. Hakko mancho jaalinke gede assine ikkinnina diininke gede assine laꞌꞌa dihasiissannonke.—Lawishsha 27:5, 6 nabbawi; Gal. 4:16.
it-2 491 guf. 3
Ollaa
Ikkirono, muli jaalla ammananna addaxxa hattono qarru yannara kaaꞌlote woshshiꞌra hasiissannota kulanni Lawishshu maxaafi togo yaanno: “Jaalakkinna annikki jaala agurtooti; xeertote noo rodiinni, mule noo olliichi [shakiheni] woyyatena, qarramatto barra rodiikki minira hadhooti.” (La 27:10) Kawiicho borreessaanchu xeertote heeꞌranno rodiinni roore muli jaali lowore kaaꞌlannotanna iso kaaꞌlo xaꞌmira hasiissannota kulanni no; mayira yiniro xeertote heeꞌranno rodii muli jaali gede ninke kaaꞌlate qixxaawa hoogara woy coyi injaa hoogasira dandaanno.
Wedella—Albillitte Hiittoo Heeshsho Heeꞌra Hasidhinanni?
7 Iyoaasi doodhinohu bushu doorshinni, Yihowa baxxannorenna iso hagiirsiisa hasidhanno jaalla doodha hasiissannonketa ronseemmo. Darawonke calla jaalla assiꞌra dihasiissannonke. Yoodahe Iyoaasi diro lowo geeshsha roorannota qaango. Jaalla doodhate daafira ateneeto togo yite xaꞌmi: ‘Doodheemmo jaalla ammanaꞌya kaajjitanno gede kaaꞌlitannoereeti? Maganu seeri garinni heeꞌreemmo gede jawaachishshannoe? Yihowanna halaalisi daafira hasaabbannoreeti? Insa Maganu biddishsha ayirrissannota leellishshanno? Ani macciishsha hasiꞌreemmore kultannoereetinso soꞌreemmo woyite worbimmatenni seejjitannoereeti?’ (Law. 27:5, 6, 17) Jaallakki Yihowa baxxannokkire ikkituro insa ledo jaalooma agura hasiissannohe. Yihowa baxxannore ikkituro kayinni insawa aana agurtooti; insa kaaꞌlitannohe!—Law. 13:20.
Maganu Qaalinni Ronseemmore
Cimeeyye—Gedewooni Lawishshinni Rosse
8 Ayirrinye Yihowara uyiyye. Gedewooni Midiyaamoota qeeleenna wolootu galattusita ayirrinye Yihowara uyino. (Eje. 8:22, 23) Shoomantino labballi Gedewooni lawishsha harunsa dandiitannohu hiittoonniiti? Insa loossino loosira Yihowa galantanni gede assa hasiissannonsa. (1 Qor. 4:6, 7) Lawishshaho mittu cimeessi dancha rosiisate dandoo noosi daafira galantannisi woyite, biddishsha afiꞌneemmohu Maganu Qaalinni ikkinota woy ninke baalanka dancha gede qajeelsitannonketi Yihowa dirijjite ikkitinota kulara dandaanno. Songote cimeeyye mito woyite mannu insa illachishanno gede assitanni nooronna teꞌee layiꞌra hasiissannonsa. Hanni Timooti yinannihu mittu cimeessi woꞌnaalsha laꞌno. Isi cimeessa ikke soqqama hanafi woyite lallawo shiqisha lowo geeshsha baxanno. Isi togo yiino: “Seeda hattono huwatate qarrisanno bitimanna lawishshuwa horoonsiꞌreemmo. Hakko daafira duucha woyite mannu naadannoe. Ikkollana tini mannu Qullaawa Maxaafa woy Yihowa illachisha agure ane illachishanno gede assitino.” Gedensoonni Timooti mannu iso illachishannokki gede rosiisanno gara biddi assiꞌra hasiissannosita huwatino. (Law. 27:21) Tini mayi guma abbituyya? Isi togo yiino: “Xa kayinni roduuwu shiqishoommo lallawo iillinonsa qarra dandiite saꞌanno gede woy Yihowawa shiqqanno gede kaaꞌlitinonsa gara kultannoe. Tenne hedo macciishshe afiꞌroommo hagiirri lowo diri albaanni mannu naadie woyite afiꞌroommo hagiirre lowo geeshsha rooranno.”
Lallawo
Yihowa Gede Maarreemmore Ikka Dandiineemmohu Hiittoonniiti?
5 Roorenkanni muli jaalinke woy maatenke miili coyiꞌrannori woy assannori lowo geeshsha xissiisankera dandaanno. (Far. 55:12-14) Mito woyite, lowo geeshsha hanqinsinkero woy xissiinsinkero siwiilunni qansoonninkeha lawankera dandaanno. (Lawishsha 12:18 nabbawi.) Xissonke hawate woy lashshi assate woꞌnaalleemmoha ikkara dandaanno. Kayinni hatto assa billawunni qansinkehu gedensaanni billawa hakko madate giddonni fushshinikki agurate gedeeti. Hatteente gede xissonke lashshi assine agurrummoro woyyimma afiꞌneemmo yine heda didandiineemmo.
6 Mittu manchi koffi assannonke woyite hanqa rakkankera dandiitanno. Qullaawu Maxaafi mito woyite hanqinammora dandiineemmota kulanno. Ikkirono hanqine higa giwa woy keeshsha hasiissannonkekkita kuleno qorowisiisannonke. (Far. 4:4; Efe. 4:26) Mayira? Korkaatuno hanqine keeshsha qaafo adhineemmo gede assitannonke. Hanqu mito woyite dancha guma abbara dandaanno. (Yai. 1:20) Mittu coyira hanqa nooreeti; hanqine higa giwa woy keeshsha kayi ninke doorshaati.
8 Wolu manni coyiꞌrannonkere woy assannonkere hoola didandiineemmo; kayinni ninkeneeto eemadha dandiineemmo. Duucha woyite qole woyyanno coyi gatona yaate. Mayira? Korkaatuno Yihowa banxeemmo hattono isi gatona yinammora hasiꞌranno. Hanqine keeshshineemmohanna gatona yineemmokkiha ikkiro, gowwimmate looso loonsammoranna mannimmanke gawajjannore assinammora dandiineemmo. (Law. 14:17, 29, 30) Hanni Kiristiini yinanni rodoo woꞌnaalsha laꞌno. Ise togo yitino: “Xissiisinoe coye calla hedeemma woyite hakkeya hagiirraame diꞌꞌikkeemma. Kaaꞌlitannokki sagale iteemma. Gari goxicho digoxeemma; hattono hanqo hooꞌla qarra ikkitannoe; tini qolte minaanniꞌyanna wolootu ledo nooe aante gawajjitanno.”
9 Xissiisinonke manchi maaro xaꞌmiꞌra hoogiro nafa, xissonke ajisha dandiineemmo. Hiittoonni? Aleenni kulliti Joorjeeti togo yitino: “Mito geeshsha keeshshoommaha ikkirono, albi minaanniꞌyara koma amaxxanna hanqa aguroomma. Tini lowo keere afiꞌreemma gede assitinoe.” Koma amandeemmokkiha ikkiro xissiisiꞌne woloota digawajjineemmo. Qoleno umonke kaaꞌlannoha dancha coye assineemmo yaano xissonke heda agurre bashshonte gede hagiirsiisannonke coye assa hananfeemmo. (Law. 11:17) Kayinni gatona yaate qixxaawoottokkiha ikkiro maa assa hasiissannohe?
WOXAWAAJJE 25-31
MAGANU QAALI GIDDO NOOTA MUXXE JIRO LAWISHSHA 28
Bushunna Keeraanchu Manchi Mereero Noo Badooshshe
w93 5/15 26 guf. 2
Woꞌmunni Woꞌma Yihowa Haꞌrunsatto?
“KEERAANCHU . . . doobbiichu gede bashshi assikkinni heeꞌranno.” (Lawishsha 28:1) Togoo manni ammana noosita loosunni leellishanno, Maganu Qaale addaxxanno hattono waajjishannori tuncu yiisirono Yihowara soqqamate badhera dihiganno.
it-2 1139 guf. 3
Wodancha
Heeshshote Buichora badhe wodhitinore. Cubbo loosate widira higino manchi mitto coye doodhanno woyitenna assate kaꞌꞌanno woyite Magano dihedanno. (Iyo 34:27) Togoo manchi, wodanisi gara ikkinokki assootesi huwatannokki gede assasiranna wodancha hooganno gede assasira wodhanno. (Fa 36:1-4) Magano magansiꞌrannota coyiꞌrirono mannu hayyo Maganunni roorse laꞌꞌanno; Maganu biddishshinni roore mannu hayyo haꞌrunsanno. (Is 29:13, 14) Busha assootesi “godoꞌlete” gede asse hedanno; (La 10:23) mancaꞌꞌanna gowwa ikkinohura hattono wodancha noosikki daafira illete leellannokki Magani bunshesi laꞌꞌannokkihu gede asse hedanno. (Fa 94:4-10; Is 29:15, 16; Er 10:21) Kuni manchi assootisinni “Maganu dino” yiinohu gedeeti; (Fa 14:1-3) iso heda facci asse agurino. Maganu biddishsha haꞌrunsannokkihura mitto coye heeshshi gotti asse heda, seekke buuxanna dancha doorsha doodha didandaanno.—La 28:5.
it-1 1211 guf. 4
Minshe Nookkire Ikka
Mittu manchi konni garinni minshe noosikkiha ikke heeꞌra dandaannohu umisi jawaantenni ikkikkinni Yihowanna Isira noosita gatisate wolqa ammanenna addaxxeeti. (Fa 25:21) Maganu minshannire afidhinokkirira ‘wonqo ikkannotanna agarannonsata’ coyiꞌrino. (La 2:6-8; 10:29; Fa 41:12) Insa woꞌmanka woyite Yihowa hagiirsiisate sharrantanno daafira beꞌe yitukkinni heedhanno; hattono suwashsho doogo hadhe mixonsawa iilla dandiitanno. (Fa 26:1-3; La 11:5; 28:18) Iyyoobi gurchaawe heeꞌre yiinonte gede, keeraano bushu gashshaanchinni kainohunni qarrantannohanna bushuullu ledo reyitannoha ikkirono, Yihowa kayi suwashshu manchi heeshsho seekke afino hattono togoo manchi ragge baꞌannokkita, albillitte heeshshosi keeru woꞌminota ikkitanotanna danchare ragiꞌrannota coyiꞌrino. (Iyo 9:20-22; Fa 37:18, 19, 37; 84:11; La 28:10) Iyyoobi xagge leellishshannonte gede, mittu manchi ayirrannohu jirosinni ikkikkinni minshe noosikkiha ikkasinniiti. (La 19:1; 28:6) Togoo anninna ama noonsa ooso hagiirraammaho; (La 20:7) anninsa lawishshi raggensa ikkanno; afiꞌrino ayirrinyinninna suꞌnaadu suꞌmisinni lowo horo afidhanno.
Maganu Qaalinni Ronseemmore
Halaale Seekkite Buuxootto?
14 Mitu coyi togooti yine afoo wonshine coyiꞌneemmokki gede assannonke korkaati giddo mittu, gara ikkitino mashalaqqe afiꞌra hooga ikkitinota ronsoommo. Wolu korkaati kayinni ninke uminke guuntete xeꞌne noonkere ikkankeeti. Yihowara lowo diro soqqammanni keeshshinoommoha ikkiro, lowo woꞌnaalshanna wodancha afiꞌnoommoha ikkara dandaanno. Konni daafira, wolootu ayirrissannonkeha ikkara dandaanno. Ikkollana, qoropha hoongummoro tinino woshshaado ikkitankera dandiitannohu hiittoonniiti?
15 Quwa saꞌne uminke wodancha addaxxa hananfammora dandiineemmo. Mitto coye assineemmo woyite uminke hedonna laonni calla massagammeemmoha ikkara dandaanno. Qoleno seekkine buunxoommokkiha ikkiro nafa, hakko coye gunde anfoommoha lawankera dandaanno. Tini kayinni lowo qarra abbitanno! Qullaawu Maxaafi uminke wodancha addaxxineemmokki gede qorowisiisannonke.—Law. 3:5, 6; 28:26.