Yihowa ‘Dadillunni Hiiqqantinore Gatisannonsa’

1-2. Konni birxichira maa ronseemmo?

MITO woyite, ‘mannu heeshsho haranchonna qarru woꞌminota’ ikkitinota hendammora dandiineemmo. (Iyo. 14:1) Tini mito woyite hexxo mudhineemmo gede assitannonke. Hundi yannara lowoti Yihowa soqqamaasine hexxo mudhitino woyiti no. Mitu isinni reyo nafa halchitino. (1 Mot. 19:2-4; Iyo. 3:1-3, 11; 7:15, 16) Ikkirono, addaxxitanno Magani Yihowa insa duucha hige sheshifachishinonsa hattono jawaachishinonsa. Insa xagge borreessinoonnihu ninke sheshonna roso afiꞌneemmo gedeeti.—Rom. 15:4.

² Konni birxichira hexxo mudhitanno gede assanno fonqoli iillinsarono cincite saꞌinoriha mite Yihowa soqqamaano xagge laꞌneemmo. Insano Yaiqoobi beetti Yooseefiiti, gunnitte Naoominna beettise beetto Ruutiiti, Faarso 73 borreessino Leewaawichaati, hattono soqqamaasincho Pheexiroosiiti. Yihowa insa jawaachishinonsahu hiittoonniiti? Insa xaggenni ninke maa ronseemmo? Insa lawishshinni ronseemmo rosi Yihowa ‘dadillunni hiiqqantinorira mule nootanna’ hexxo mudhitinore gatisannonsata addaxxineemmo gede assannonke.—Far. 34:18.

YOOSEEFI MIINCISIRONO CINCE SAINO

3-4. Yooseefi wedellichu noo yannara mayi iillinosi?

³ Yooseefi lamenta haaqee haaqiiꞌri woyite 17 diri balla ikkannosi; iso haaqee haaqiiꞌranno gede assinosihu Maganoho. Tini haaqee Yooseefi barrunni mitto barra maatesi ayirrissannosita leellishshannote. (Kal. 37:5-10) Kayinni Yooseefi haaqee haaqiiꞌrihunni shiima yanna gedensaanni hedeweelcho bushu coyi iillisi. Hakkawoyite roduuwisi iso diayirrissinosi; hatteentenni borojjimmate hirtinosi; hakkiinni isi Gibitsete gobbara Phoxifaari yinanni gashshaanchi mine borojjicho ikkino. (Kal. 37:21-28) Isi shiima yanna giddo baxannosi annisiwiinni baxxe Yihowa magansiꞌrannokki Gibitsaawichi mine borojjicho ikkino.—Kal. 39:1.

⁴ Gamete aana gami-tokke yinannihu gede Yooseefira qarru lexxanni haꞌri. Phoxifaari galte bushiishaera woꞌnaalino yite beebbate kassassinosi. Phoxifaarino coye buuxikkinni usuru minira eesinosi; iso sansalatete usurroonnisi. (Kal. 39:14-20; Far. 105:17, 18) Hanni wedellicha beetto Yooseefi beebbate bushiishino yine kassansisi woyite hiitto ikkinoro hedde. Qoleno tini Yihowa suꞌma mishiishshara dandiitannota hedde. Yooseefira hexxo mudhanno gede assanno coyi iillinosi.

5. Yooseefi hexxo mudhannokki gede kaaꞌlinosiri maati?

⁵ Yooseefi borojjicho ikke noo yannaranna usuru mine heeꞌre iillinosire hooꞌlate assa dandaannori gariri dino. Isi cincanno gede kaaꞌlinosiri maati? Yooseefi assa dandaannokkire illachisha agure loosara uyinoonnisi looso diinaggaawe loosino. Isi baalunkunni roore Yihowa balaxisiisino. Yihowano Yooseefi assannore baala maassiꞌrinosi.—Kal. 39:21-23.

6. Yooseefi haaqiiꞌrino haaqee sheshifachishshinosihu hiittoonniiti?

⁶ Yooseefi albillitte ikkannore kultannota haaqiiꞌrino haaqee hiinceno jawaatinoha ikkara dandaanno. Isi haaqiiꞌrino haaqee wirro maatesi ledo xaadannotanna iillinosi qarri saꞌꞌannota leellishshannote. Qoleno kuni coyi ikkino. Yooseefira mito 37 diro ikke heeꞌreennasi, tini albillitte ikkannore kultannoti haaqiiꞌrino haaqee dhagge ikkanno garinni woꞌma hanaffino.—Kal. 37:7, 9, 10; 42:6, 9.

7. Umi Pheexiroosi 5:10 kultanno garinni iillannonke fonqolo cince saꞌꞌate mayi kaaꞌlannonke?

⁷ Maa ronseemmo? Yooseefi xagge tini alame xagaraame ikkitinotanna mannu miicankera dandaannota qaangeemmo gede assitannonke. Ammanate roduuwinke nafa xissiisiꞌneemmo gede assitankera dandiitanno. Yihowa golonkenna qiishonke assiꞌneemmoha ikkiro kayinni hexxo dimudhineemmo woy isira soqqama diagurreemmo. (Far. 62:6, 7; 1 Pheexiroosi 5:10 nabbawi.) Yihowa Yooseefi haaqee haaqiiꞌranno gede assisi woyite isira mito 17 diro ikkannosita qaango. Tini Yihowa wedella soqqamaasinesi ammanannota leellishshanno. Xaa yannara noohu batinyu wedellu roduuwi Yooseefi gedeeho. Insano Yooseefi gede Yihowa addaxxitanno. Isinni insa giddo mito Yihowara ammanantinore ikkitino daafira beebbate usurroonninsa.—Far. 110:3.

MANCHITINORE LAME MEENTO

8. Ruutiranna Naoomira mayi iillinonsa?

⁸ Yihudu gobbara buutote hude ubbeenna Naoominna maatese manni gobba Moaabi haꞌre hakko heeꞌrino. Hakkiicho Naoomi gashshaanni Elimeleeki reyita, ise lame labballi oosose ledo gattino. Gedensaanni lamenti oosose Ruutinna Orfa yinannire Moaabi gobba seenne adhitino. Mitu tonnu diri gedensaanni oosose, ooso iltukkinni reyitino. (Rut. 1:1-5) Kuri sasenti meenti mageeshshi geeshsha manchitinoro hanni hedde! Hige gedensaanni Ruutinna Orfa mine assiꞌra dandaanno. Kayinni geedhitinota Naoomi ayi towaatanno? Naoomi hexxo mudhitino daafira togo yitino: “Woꞌmanka Dandaanno Magani heeshshoꞌya qaraartannota assinona, Maara yiiyyeꞌꞌe ikkinnina, Naoomi yitine woshshitinoonteꞌꞌe.” Buuto yaaddinoti Naoomi Beeteliheme higate murcidhino; Ruutino ise ledo hadhino.—Rut. 1:7, 18-20.

9. Ruuti 1:16, 17, 22 kultanno garinni Ruuti Naoomi jawaachishshinohu hiittoonniiti?

⁹ Naoomi kaaꞌlinoseri maati? Bagamannokki baxilleeti. Lawishshaho, Ruuti Naoomiwiinni baxxitukkinni heedhe isera bagamannokki baxille leellishshinose. (Ruuti 1:16, 17, 22 nabbawi.) Ruuti Beetelihemete umiseranna Naoomira ikkitanno sagale afiꞌrate mindanna giggilino hayixe diinaggaabbe xinqidhino. Tini aja beetto hatto assasenni mulenni dancha suꞌma afidhino.—Rut. 3:11; 4:15.

10. Yihowa Naoominna Ruuti gedee buxanera baxille leellishinohu hiittoonniiti?

¹⁰ Yihowa Israeelete uyino seeri isi Naoominna Ruuti gedee buxane mararannota leellishanno. Yihowa mannisi gide mixxanno woyite jajjinsara qaccuwate nooha buxane xinqidhara agurtanno gede kulinonsa. (Lew. 19:9, 10) Hakko daafira, Naoominna Ruuti sagale afiꞌrate doogo fule dihuucciꞌrino. Insa huucciꞌrikkinni sagale afiꞌra dandiino.

11-12. Booeezi Naoominna Ruuti hagiidhanno gede assinohu hiittoonniiti?

¹¹ Ruuti gide xinqidhanno gati anni Booeezi dureessa manchooti. Isi Ruuti Naoomira ammanantino garanna baxille leellishshinose gara lae dhagge assiꞌrino; konnira isi maatensa ragge adhino; hattono Ruuti galtesi assiꞌrino. (Rut. 4:9-13) Kuri minaanninna minaama Iyoobeedi yinanni qaaqqo ilino. Isi gedensaanni Moote Daawitira ahaaho ikkino.—Rut. 4:17.

¹² Naoomi Iyoobeedi hanqafidhe mageeshshi geeshsha hagiidhitinoronna Yihowa huuccattotenni mageeshsha galaxxitinoro hedde. Naoominna Ruuti reyotenni kae, Iyoobeedi qaale eꞌnoonni Mesihichi Yesuusi Kiristoosira ahaaho ikkinota afanno woyite roore hagiidhanno.

13. Naoominna Ruuti xaggenni hiikkonne kaajja roso ronseemmo?

¹³ Maa ronseemmo? Fonqolu iillannonke woyite hexxo mudhinammoranna wolqa baꞌnammora dandiineemmo. Qarru qalxe amadinonke yine hendeemmoha ikkara dandaanno. Togoo woyite woꞌmunni woꞌma iimi Annanke addaxxanna ammanate roduuwinkewa gamba yaa hasiissannonke. Yihowa qarranke haaꞌre hoolannoha ikka hoogara dandaanno. Lawishshaho, isi Naoomi minaannanna oosose reyotenni dikayisino. Ikkirono isi qarranke dandiine saꞌneemmo gede kaaꞌlannonke; Yihowa hatto assannohu ammanate roduuwinke leellishshannohu ammanamino baxilli widoonni ikkara dandaanno.—Law. 17:17.

GUFIꞌRE HOOGINO LEEWAAWICHA

14. Mittu Leewaawichi hexxo mudhinohu mayiraati?

¹⁴ Faarso 73 borreessinohu mitto Leewaawichaati. Isira Yihowa mine soqqamate lowo qoosso noosiho. Ikkirono isi hexxo mudhino woyiti no. Mayira? Isi bushuullehonna booꞌnaleeyyete qiniinonsata lae hinaasino. (Far. 73:2-9, 11-14) Insara baalunku coyi qiniinonsaha lawanno; jironna dancha heeshsho noonsaha hattono yaachishannori mitturi noonsakkiha ikkara dandaanno. Leewaawichu tenne lae hexxo mudhe togo yiino: “Anino wodanaꞌya beebba qarrisoommo; beebballa cubbo qorophoommo.” Tini ayyaanaamittesi gawajjite hooggino.

15. Faarso 73:16-19, 22-25 kultanno garinni, tenne faarso borreessi Leewaawichi jawaatinohu hiittoonniiti?

¹⁵ Faarso 73:16-19, 22-25 nabbawi. Leewaawichu ‘Maganunniha qullaawa mine eꞌꞌanno.’ Isi hakkiicho Yihowa magansiꞌrannohu wolootu ledo ikkara dandaanno; isi hakko wodanaaꞌma, garunni hedanna heeshshosi daafira huuccatto assiꞌra dandaanno. Isi hakkunni gedensaanni hedosi gara ikkitinokkita hattono haꞌranni noo doogo gawajjitannotanna Yihowawiinni xeertissannosita huwatino. Qoleno isi bushuullu ‘lixu giddo nootanna higgannokki gede ikkite baꞌannota’ wodanchino. Leewaawichu hinaasanna hexxo mudha agurate mitto coye Yihowa laꞌꞌanno garinni laꞌꞌa hasiissinosi. Hatto asse wirro keere afiꞌrino; hattono hagiirraamo ikkino. Isi, “Baattote aanano [Yihowa] afiꞌrummohu kaꞌa wolu maꞌꞌassannoe?” yiino.

16. Leewaawichu lawishshinni maa ronseemmo?

¹⁶ Maa ronseemmo? Qiniinonsaha lawannoha busha manna hinaasa dihasiissannonke. Insa hagiirri yannate geeshshihonna geedannokkiho. (Ros. 8:12, 13) Insa hinaasa hexxo mudhineemmo gede assitanno hattono ayyaanaamittenke gawajjitanno. Atino qiniinonsaha lawannoha busha manna hinaassanni noottota afittoro, Leewaawichu assinore assi. Maganu amaale macciishshi hattono isi fajjo assitannoriwa aani. Baalunkunni roore Yihowa baxattoha ikkiro addu hagiirre afiꞌratto. Hattono ‘halaalaancho heeshshowa’ massitanno doogonni fulittokkinni heeꞌratto.—1 Xim. 6:19.

PHEEXIROOSI LAANFESI HEXXO MUDHANNO GEDE ASSITINOSI

17. Pheexiroosi hexxo mudhanno gede assinosiri maati?

¹⁷ Soqqamaasinchu Pheexiroosi worba manchooti; ikkirono isi mudamaancho ikkino daafira, mito woyite giddosita muddame coyiꞌranno. Konnira, isi gedensaanni gaabbannore coyiꞌrino woy assino woyiti no. Lawishshaho, Yesuusi soqqamaasinesira qarrinse shinannisita kulinsa woyite, Pheexiroosi iso “Kuni coyi atera iilloonkehe” yee hayi yaate woꞌnaalino. (Mat. 16:21-23) Hakkiinni Yesuusi Pheexiroosi seejjinosi. Mannu Yesuusa amadasira dayita Pheexiroosi muddame kakkalaanote roorrichi borojjichira macca murino. (Yoh. 18:10, 11) Xaano Yesuusi Pheexiroosi lede seejjino. Qoleno Pheexiroosi Kiristoosa wolootu soqqamaasine kaaddusiro nafa isi horo kaadannosikkita coyiꞌrino. (Mat. 26:33) Ikkirono Pheexiroosi coyiꞌrino gede diꞌꞌikkino; isi manna waajjino daafira Mootichasi sase hige kaadino. Pheexiroosi hexxo mudhino daafira “gobbara fule hururame wiꞌli.” (Mat. 26:69-75) Isi Yesuusi horonta gatona diyaannoe yee hedikkinni digatino.

18. Yesuusi Pheexiroosi jawaachishinohu hiittoonniiti?

¹⁸ Ikkirono Pheexiroosi hexxo mudhe badhera dihigino. Pheexiroosi soꞌro loosirono Yihowara soqqama diagurino. (Yoh. 21:1-3; Soq. 1:15, 16) Isi hatto assanno gede kaaꞌlinosiri maati? Hakkuyira albaanni Yesuusi Pheexiroosi ammana baꞌannokki gede huuccino; hattono hige roduuwasi jawaachishanno gede amaalinosi. Yihowa tenne huuccattora dawaro qolino. Gedensaanni Yesuusi Pheexiroosira leelle jawaachishinositi dihuluullissannote. (Luq. 22:32; 24:33, 34; 1 Qor. 15:5) Soqqamaasine hashsha qulxuꞌme woshshaaxxite amaxxa hooggino daafira yaadde heedheenna Yesuusi leellinonsa. Tenne yannara Yesuusi, Pheexiroosi iso baxannosironna teꞌee xaꞌmino. Yesuusi lubbote jaalasi gatona yiinosi; hattono lowo looso uyinosi.—Yoh. 21:15-17.

19. Faarso 103:13, 14 Yihowa cubbo loonsummoro gatona yaannonketa afate kaaꞌlitannonkehu hiittoonni?

¹⁹ Maa ronseemmo? Yesuusi Pheexiroosira assinori isi maarannohanna Annisi lawishsha guutu garinni harunsannoha ikkinota leellishanno. Konnira, soꞌro loonsummoro Yihowa horo gatona diyaannonke yine hexxo mudha dihasiissannonke. Sheexaanu hatto yine hendammora hasiꞌrannota qaango. Hatteentenni Yihowa baxannonketa, laanfenke afinotanna gatona yaankera hasiꞌrannota dea dihasiissannonke; ninkeno isi lawishsha harunsine koffi assitinonkere hakko garinni laꞌꞌa hasiissannonke.—Faarso 103:13, 14 nabbawi.

20. Aananno birxichira maa ronseemmo?

²⁰ Yooseefi, Naoominna Ruuti, Leewaawichunna Pheexiroosi lawishshi Yihowa “dadillunni hiiqqantinorira mule” noota addaxxineemmo gede assannonke. (Far. 34:18) Yihowa mito woyite fonqolu iillannonketanna hexxo mudhineemmota dihoolannonke. Ikkirono isi kaaꞌlonni iillinonke fonqolo cincine saꞌnummoro ammananke kaajjado ikkitanno. (1 Phe. 1:6, 7) Aananno birxichira, Yihowa guuntete xeꞌnenni woy iillinonsa qarrinni hexxo mudhitinore ammanantino saqqamaanosi kaaꞌlino gara laꞌneemmo.