Mannu Huuccattote Daafira Mayyaanno?
“Huuccatto assiꞌreemma woyite, Maganu muleꞌya noohanna callateemma woyite angaꞌya amade massaganni nooeha lawannoe.”—MAARIYA.
“Minaamaꞌya 13 diro kaanserete dhibbi waadisehu gedensaanni reyitino. Barru baala Magano huucciꞌroommota qaageemmo; isira xissoꞌya leeltinosita afoommo. Tini giddiidi keere afiꞌreemmo gede assitinoe.”—RAWULI.
“Huuccatto Maganu mannaho uyinote dhagge ikkitanno eltooti.”—AARINE.
Maariya, Rawuli, Aarinenna wolootu huuccatto baxxitino elto ikkitinota ammantanno. Insa huuccattote widoonni Maganu ledo hasaabbanno, iso galattanno hattono kaaꞌlansara xaꞌmidhanno. Qullaawu Maxaafi Magano huucciꞌrate daafira togo yaanno: “Isiwa noonkehu hawaqiꞌneemmo coyi konneeti; isi hedino garinni huucciꞌneemmore baala macciishshannonke.” (1 Yohaannisi 5:14) Insa tenne hedo woꞌmu wodaninsanni ammantanno.
Batinyu mannira kayinni, Qullaawu Maxaafi huuccattote daafira kulannore ammana qarrissannonsa. Istiivi yinannihu huuccattote daafira togo yee coyiꞌrino: “Tonaa lamalu dirihu noommo waro sase jaallaꞌya lame addi addi danonni reyitino. Mittu makeenu danonni reyino; lame kayinni wayi itinonsa.” Istiivi maa assiyya? Isi togo yiino: “‘Kuni baalu coyi ikkinohu mayiraati?’ yee Magano huucciꞌroommoha ikkirono, dawaro diafiꞌroommo. Konnira, ‘Huucciꞌra hasiissannoehu mayiraati?’ yee hedoommo.” Batinyu manni ‘huuccattonkera Huuccattonkera dawaro diafiꞌnoommo’ yee hedanno daafira, ‘Huuccatto assiꞌra hasiissannonkehu mayiraati?’ yee huluullamanno.
Mitu manni huuccatto kaaꞌlitannori dino yee hedanno gede assannonsahu wolu korkaatino no. Mitootu, ‘Maganu baalankare afino daafira, hasiisannonkere woy qarranke seekke huwatanno; konnira huuccatto assiꞌra hakkeeshsha dihasiissanno’ yitanno.
Wolootu kayinni ‘Alba soꞌro loonsoommo daafira Maganu huuccattonke dimacciishshanno’ yite heddanno. Jeeni togo yitino: “Horonta waagu dinoe yee hedeemma. Gaabbeemma gede assannoere lowo coye assoomma daafira, Maganu ane gedee manni huuccatto dimacciishshanno yee hedoomma.”
Ati huuccattote daafira mayyaatto? Atino huuccattote daafira hatto yite hedattoha woy huluullamattoha ikkiro, Qullaawu Maxaafi huuccattote daafira kulannori jawaachishahera dandaanno. Qullaawu Maxaafi huuccattote daafira kulannore addaxxa dandiineemmo.a Qoleno Qullaawu Maxaafi, aante noo xaꞌmuwara dawaro afiꞌrate kaaꞌlannohe:
Maganu huuccattonke macciishshanno?
Maganu mite huuccatto macciishshannokkihu mayiraati?
Maganu huuccattokki macciishshanno gede ma garinni huucciꞌra hasiissannohe?
Huuccatto kaaꞌlitannonkehu hiittoonniiti?
a Qullaawu Maxaafi giddo batinye Maganu soqqamaano huuccidhino huuccatto borreessinoonni; Yesuusi Kiristoosi huucciꞌrino huuccattono borreessinoonni. Mannu Akkala Gondooro yaannote Ibiraawootunnite Qullaawa Borro giddo 150 saꞌanno huuccatto borreessinoonni.