“Maganunniwa shiqqi yiiyye; isino kiꞌnewa shiqqi yaanno.”—Yaiqoobi 4:8.

Maganu Huuccattonke Macciishshanno?

Maganu huuccattoꞌya macciishsha ikka yite huluullante egennootto? Hatto ikkiro, huluullamattohu ate calla diꞌꞌikkootto. Batinyu manni qarrinsa daafira Magano huucciꞌrinoha ikkirono, qarrinsa kayinni dihoꞌlino. Hatto yaa kayinni Maganu huuccattonke dimacciishshanno yaateni? Deeꞌni! Qullaawu Maxaafi garunni huucciꞌnummoro Maganu huuccattonke macciishshannota kulanno. Hanni Qullaawu Maxaafi kulannore laꞌno.

MAGANU MACCIISHSHANNO.

“Mannu baalu . . . atewa daanno; atino huuccattonsa macciishshatto.”—Faarso 65:2, 3.

Mitu manni huuccatto macciishshannohu noota ammanannokkiha ikkirono, huuccatto assiꞌrannohu woyyimma afiꞌrate yee calla ikkinota coyiꞌranno. Huuccatto assiꞌra hasiissannonkehu kayinni qarrinkenni woyyimma afiꞌrate yine calla diꞌꞌikkino. Qullaawu Maxaafi togo yee jawaachishannonke: “Kaaliiqi woshshidhannosirira, . . . baalaho mule no. . . . raarensa macciishshe gatisannonsa.”—Faarso 145:18, 19.

Yihowaa soqqamaasinesi huuccidhanno huuccatto macciishshannota addaxxa dandiineemmo. Isi baxillunni togo yiino: “Hatte yannara woshshidhinannie; anewa higgine huuccidhinannie; anino macciishsheemmoꞌne.”—Ermiyaasi 29:12.

MAGANU ISO HUUCCIꞌNAMMORA HASIꞌRANNO.

Annu qaaqqosi ashangulliite godoꞌlitanna mulese ofolle no.

“Jaattine huuccidhe.”—Roomu Sokka 12:12.

Qullaawu Maxaafi, “Jaattine huuccidhe” hattono “Woꞌmanka woyite . . . huuccidhe” yee jawaachishannonke. Konni daafira, Yihowa iso huucciꞌnammora hasiꞌranno.—Maatewoosi 26:41; Efesooni Sokka 6:18.

Yihowa iso huucciꞌnammora hasiꞌrannohu mayiraati? Hanni mitto lawishsha laꞌno: Mittu shiimu qaaqqi annasi kaaꞌlasira xaꞌmiꞌriro annu lowo geeshsha hagiidhanno. Annu qaaqqisira mayi hasiisannosironna maa hedannoro afinoha ikkirono, qaaqqu kaaꞌlie yaanna macciishshasi qaaqqisi iso addaxxannotanna baxannosita afanno gede assitannosi. Hatteente gede, ninkeno Yihowa huucciꞌneemmoha ikkiro, iso addaxxineemmotanna isiwa albinni roore shiqa hasiꞌneemmota leellinsheemmo.—Lawishsha 15:8; Yaiqoobi 4:8.

MAGANU ATE DAAFIRA LOWO GEESHSHA HEDANNO.

Mittu hanqino daddalaanchi hintsu dirimira ofolle no. Biirote uduunnesi wodhino kaartoone mulesi no.

“Kiꞌnere malannohu isootina, qarrisannoꞌnere baala isi aana tuqqe.”—1 Pheexiroosi 5:7.

Maganu baxannonkehuranna ninke daafira hedannohura, iso huucciꞌnammora hasiꞌranno. Isi qarrankenna yaaddonke seekke afino; hattono kaaꞌlankera hasiꞌranno.

Moote Daawiti, Maganu kaaꞌlasira heeshshosi diro duucha hige huucciꞌrino; hattono giddosita isira hasaaphino. (Faarso 23:1-6) Maganu iso ma garinni laino? Maganu Daawiti baxannosi; qoleno duucha hige huucciꞌrino huuccatto macciishshinosi. (Soqqamaasinete Looso 13:22) Maganu ninkerano hedanno daafira huuccattonke macciishshanno.

“HUUCCATTOꞌYA MACCIISHSHINOE DAAFIRA, KAALIIQA BAXEEMMOSI”

Tenne coyiꞌrinohu Qullaawu Maxaafiha Faarsote maxaafa borreessituri giddo mittoho. Isi Maganu huuccattosi macciishshinota seekke afino; tenne afasi lowo geeshsha kaaꞌlitinosi. Isi albinni roore Maganunniwa shiqino; hattono iillinosi qarranna dadille dandee saꞌꞌate jawaante afiꞌrino.—Faarso 116:1-9.

Maganu huuccattonke macciishshannota addaxxinummoro, jaante huucciꞌneemmo. Hanni aliyye Ispeenera heeꞌrannohu Paatiro woꞌnaalsha laꞌno. Isi 19 diri beettosi makeenu danonni shiiꞌrino. Paatiro lowo geeshsha dadillino daafira giddosita Maganoho kuꞌlino; hattono kaaꞌlasiranna sheshifachishasira wirro wirro hige huucciꞌrino. Hakkiinni mayi ikkiyya? Isi togo yiino: “Yihowa ammanate roduuwiꞌya widoonni anenna minaamaꞌya kaaꞌlenna sheshifachishe huuccattoꞌyara dawaro qolinoe.”

Mittu shiire dadillino manchi foto laꞌꞌanni no; jaalasi iso sheshifachishshanni no. — Yihowa duucha woyite huuccattonkera dawaro qolannohu, baxxannonke jaallanke sheshifachishshannonkenna kaaꞌlitannonke gede asseeti

Huuccatto beettosi reyotenni kayissinokkiha ikkirono, Paatironna maatesi duucha doogganni kaaꞌlitinonsa. Minaamasi Maariya Karimeni togo yitino: “Huuccatto shesho afiꞌreemma gede kaaꞌlitinoe. Huuccatto assiꞌreemma woyite keerenna geꞌne afiꞌreemma daafira, Yihowa giddoꞌyata afinota huwatoomma.”

Qullaawu Maxaafinna addi addi woꞌnaalshuwa Maganu huuccatto macciishshannota leellishshanno. Kayinni Maganu baalanta huuccatto macciishshanno yaa diꞌꞌikkino. Ikkina Maganu mite huuccatto macciishshe mite macciishshannokkihu mayiraati?

a Yihowa (Yaahiwe) Maganu suꞌmaati.—Fulo 6:3, lekkaalliidi qaagiishsha.