Yannaꞌne Danchu Garinni Horoonsidhe

1. Yihowa ledo yanna sayisa dandiineemmohu hiittoonniiti?

BANXEEMMO manni ledo yanna sayisa hagiirsiissannonke. Minaannanna minaama mitteenni yanna sayisa lowo geeshsha hagiirsiissannonsa. Wedellu jaallansa ledo hosa lowo geeshsha baxxanno. Qoleno ninke baalunku ammanate roduuwinke ledo sayinseemmo yanna lowo geeshsha naandeemmo. Ikkirono wolu baalunkunni roore Maganinke ledo yanna sayisa lowo geeshsha banxeemmo. Huuccatto assiꞌne, Qaalesi nabbambe, isi mannu oosora hedinorenna baxissanno akattasi hiincine Maganinke ledo yanna sayisa dandiineemmo. Addanko Yihowa ledo sayinseemmo yanna ninkera muxxete!—Far. 139:17, NW.

2. Qarra ikkannonkehu tuncu yaannonke coyi maati?

² Yihowa ledo yanna sayisa hagiirsiissannonkeha ikkirono, qarra ikkannori tuncu yaannonke. Loosu batiꞌrannonke daafira ayyaanaamittete coyira yanna gaaꞌma qarra ikkitankera dandiitanno. Maalaamittete loosi, maatete hasiisannore wonsha hattono wolu hasiisanno coyi yannanke gudanno daafira huuccatto assiꞌrate, xiinxallate woy hiincate yanna hoongoommohu gede assine hendammora dandiineemmo.

3. Hendummokki yannanke gudannohu wolu coyi maati?

³ Qoleno hendummokki yannanke gudannohu wolu coyino no. Assineemmo coyi soꞌro ikka hoogiro nafa, qoropha hoongummoro albinni roore Yihowawa shiqate horoonsiꞌneemmo yanna gudankera dandaanno. Hanni lawishshaho boohaarsha hendo. Saꞌne saꞌne boohaara baalanka kaaꞌlitannonke. Ikkollana boohaarranni lowo yanna sayinseemmoha ikkiro, danchu boohaarshi nafa ayyaanaamittete coye assineemmo yanna gudankera dandaanno. Hakko daafira boohaarshaho quwa saꞌꞌa dihasiissannonke.—Law. 25:27; 1 Xim. 4:8.

4. Konni birxichira maa ronseemmo?

⁴ Konni birxichira, roore hasiisanno coye balaxisiisa hasiissannonkehu mayiraatiro ronseemmo. Qoleno Yihowa ledo sayinseemmo yanna danchu garinni horoonsiꞌra dandiineemmo garanna konni garinni yannanke hayyotenni horoonsiꞌra kaaꞌlitannonkehu hiittoonniitiro ronseemmo.

DANCHA DOORSHA DOODHE; BALAXISIISA HASIISSANNORE BALAXISIISSE

5. Efesooni Sokka 5:15-17 noo amaale mittu wedellichi wole baalantenni woyyitino heeshsho doodhanno gede kaaꞌlitannosihu hiittoonniiti?

⁵ Baalantenni woyyitino heeshsho doodhe. Wedellu duucha woyite, ‘Hiittoo heeshsho heeꞌnummoro woyyanno ikka?’ yite heddanno. Qoleno wedella rosu mini rosiisaanonna Yihowa Farciꞌraasine ikkitinokkiri maatensa miilla, lowo woxe baantanni looso afidhanno gede yuniversite eꞌara xixxiibbannonsa. Togoo rosi lowo yanna gudannoho. Annuwinsanna amuuwinsa hattono songote giddo noo jaallansa kayinni wedellu Yihowara soqqantanni heedhanno gede jawaachishshannonsaha ikkara dandaanno. Yihowa baxanno wedellichi dancha doorsha doodhanno gede kaaꞌlasira dandaannori maati? Efesooni Sokka 5:15-17 geeshsha nabbawe hiinca kaaꞌlitannosi. (Qummeeshsha nabbawi.) Mittu wedellichi konne qummeeshsha nabbawihu gedensaanni isonooto togo yee xaꞌmannoha ikkara dandaanno: ‘Yihowa “hedo maati?” Iso hagiirsiiseemmohu hiittoo doorsha doodhummorooti? Yannaꞌya danchu garinni horoonsiꞌreemmo gede kaaꞌlannoehu hiittoo doorshaati?’ ‘Diru busha’ ikkinotanna tini Sheexaanu gashshe noo alame mulenni baꞌannota qaagge. Heeshshonkenni Yihowa hagiirsiisannore assa hayyote.

6. Maariyaami doodhitino doorshi maati? Konne doorsha doodhase hayyote yineemmohu mayiraati?

⁶ Balaxisiisa hasiissannore balaxisiisse. Yannanke danchu garinni horoonsiꞌrate, mito woyite soꞌro afiꞌrinokkihu lamu coyi giddonni mitto doodha hasiissannonke. Yesuusi Maariyaaminna Maarta minira haꞌrinota kultannoti lowo manni afino xagge tenne hedo luphi assite leellishshanno. Wosincho adha baxxannoti Maarta, Yesuusi minisera marita lowo geeshsha hagiidhitinoti dihuluullissannote; ise iso wosinsiꞌrate lowo sagale worate kaꞌino. Maariyaami kayinni Mootichise rosiisannore macciishshate mulesi ofoltu. Maarta assitino coyi soꞌro ikka hoogirono, Yesuusi Maariyaami “dancha coye doodhitino” yiino. (Luq. 10:38-42) Yannate gedensoonni Maariyaami hatte yannara shiqqino sagale habbinoha ikkara dandaanno; Yesuusi rosiisino roso kayinni horo habbinokkiti dihuluullissannote. Maariyaami hattee Yesuusi ledo sayissinota shiima yanna lowori gede assite laꞌinonte gede, ninkeno Yihowa ledo sayinseemmo yanna lowori gede assine laꞌneemmo. Yihowa ledo sayinseemmo yanna danchu garinni horoonsiꞌra dandiineemmohu hiittoonniiti?

YIHOWA LEDO SAYISSINANNI YANNA DANCHU GARINNI HOROONSIDHE

7. Huuccatto assiꞌra, xiinxallanna hiinca lowo geeshsha hasiissannota ikkitinohu mayiraati?

⁷ Huuccatto, xiinxallonna hiinca Yihowa magansiꞌrate wido ikkitinota qaagi. Huuccatto assiꞌneemmo woyite, lowo geeshsha baxannonkehu iimi Anninke ledo hasaambanni heeꞌnoommo. (Far. 5:7) Qullaawa Maxaafa xiinxallineemmo woyite, hayyote Buicho ikkino ‘Magani coye’ ronsanni heeꞌnoommo. (Law. 2:1-5) Yihowa daafira rosoommore hiincineemmo woyite, baxissannota isi akattanna albillitte ninkerano ikko mannu ooso baalate uyinota dhagge ikkitanno hexxo hendanni heeꞌnoommo. Yannanke danchu garinni horoonsiꞌneemmoti tenne roortino doogo dino. Yihowa ledo sayinseemmo yanna danchu garinni horoonsiꞌneemmo gede kaaꞌlannonkeri maati?

8. Yesuusi halallaho noo yannara yannasi horoonsiꞌrino doogonni maa ronseemmo?

⁸ Dandaamannoha ikkiro cancu nookki bayicho doodhe. Hanni Yesuusi lawishsha laꞌno. Isi uullate aana soqqanshosi hanafara albaanni, halallaho 40 barra keeshshino. (Luq. 4:1, 2) Isi hakkiicho cancu nookkiwa Yihowa huucciꞌranna Annisi isi daafira hedinori maatiro hiinca dandaanno. Hatto assasi Yesuusi muli yannara iillannosi fonqolira qixxaawanno gede kaaꞌlitinositi dihuluullissannote. Ati Yesuusi lawishshinni horo afiꞌra dandaattohu hiittoonniiti? Minikki manni lowoha ikkiro, mini giddo cancu nookki bayicho afiꞌra qarra ikkitahera dandiitanno. Hatto ikkiro mini gobbaanni cancu nookki bayicho hasiꞌra hasiissannoheha ikkara dandaanno. Juuliya yinanni rodoo huuccatto assidhanni Yihowa ledo yanna sayisa hasidhanno woyite hatto assitanno. Isenna minaannise Faransayete gobbara shiima kifilera heeꞌranno daafira hedose billaallisannori nookkiha callase heeꞌra qarra ikkitannose. Juuliya togo yitino: “Hakko daafira barru baala paarke noowa haꞌre milli yeemma.” “Hakkiicho callichoꞌya, hedoꞌya bebbeehannori nookkiha Yihowara giddoꞌyata fushshe hasaapha dandeemma.”

9. Yesuusira loosu batiꞌrannosiha ikkirono, Yihowa ledo noosi jaalooma lowo geeshsha naadannota leellishinohu hiittoonniiti?

⁹ Yesuusira woꞌmanka woyite loosu batiꞌrannosi. Yesuusi uullate aana soqqami yannara isi mari base baalate lowo manni hoodesi haꞌrino; kuni manni baalunku isi yannasi gaaꞌme kaaꞌlansara hasiꞌrannoho. Mitte yannara, Yesuusa laꞌꞌara “katamu manni baalu nafara gamba [yiino].” Ikkirono Yesuusi woꞌmanka woyite Yihowa huucciꞌrate yanna gaaꞌmino. Isi soodo guto arrishsho fultukki, “kashshi yaannori nookkiwa” haꞌrino; isi hakkiicho callichisi Annisi ledo yanna sayisa dandaanno.—Maq. 1:32-35.

10-11. Maatewoosi 26:40, 41 kultanno garinni Yesuusi Geetesemaane yinanniwa kaashshu basewa rosaanosira hiittenne hasiisse noonsa amaale amaalinonsa? Kayinni mayi ikkino?

¹⁰ Yesuusi uullate aana heeꞌrinohu jeefote hashsha yaano soqqanshosi jeefisara kae heeꞌre, hiincatenna huuccatto assiꞌrate wirro kashshi yaannori nookki bayicho hasiꞌrino. Isi Geetesemaane yinanniwa togoo bayicho afiꞌrino. (Mat. 26:36) Yesuusi hatte yannara rosaanosira huuccattote daafira lowo geeshsha hasiisse noonsa amaale amaalinonsa.

¹¹ Hanni hakkiinni aane mayi ikkinoro laꞌno. Insa Geetesemaane yinanniwa kaashshu base iillitu yannara, yanna hashshu taaloote ikkitukki digattino. Yesuusi soqqamaasinesi, “goxxinikkinni konniicho agarre!” yee isi huuccatto assiꞌrara haꞌri. (Mat. 26:37-39) Isi huuccatto assiꞌranni heeꞌreenna insa kayinni goxxino. Insa goxxe noota afiti Yesuusi galagale “jaattine huuccidhe!” yee jawaachishinonsa. (Maatewoosi 26:40, 41 nabbawi.) Isi insa lowo geeshsha dadillitinotanna daafurtinota wodanchino. Yesuusi shaqqillunni, “maalu . . . daafuraamoho” yiino. Hakkiinni Yesuusi huucciꞌrara lame hige haꞌrino; isi higanno woyite insa huucciꞌra agurte goxxe no.—Mat. 26:42-45.

12. Mito woyite lowo geeshsha yaande woy daafurre huuccatto assiꞌra dandaa hoongummoro maa assa dandiineemmo?

¹² Maltino yanna doodhe. Mito woyite lowo geeshsha yaandeemmo woy daafurreemmo daafira huuccatto assiꞌra qarra ikkitankera dandiitanno. Togoori iillinoheha ikkiro togoo coyi iillinohehu ate calla ikkoottokkita qaagi. Hatto ikkiro maa assa dandaatto? Hawarro hawarro huucciꞌrate rosichi noonsari mitu roduuwi yanna hashshitukki hakkeeshsha daafurtinokki yannara huucciꞌra kaaꞌlitinonsata huwattino. Wolootu kayinni ikkite huuccidhanno garino hedonsa billaallitannokki gede kaaꞌlannonsata huwattino. Atino lowo geeshsha yaadde woy hexxo mudhite huucciꞌra dandaattokkihalla ikki? Macciishshamannohere Yihowara hasaaphi. Maarote Anninke giddokkita afannota addaxxi.—Far. 139:4.

13. Elekitiroonikisete uduunnichi Yihowa ledo yanna sayinseemmo woyite hedonke bebbeehantanno gede assara dandaannohu hiittoonniiti?

¹³ Xiinxallitinanni woyite hedoꞌne billaallisannore hooꞌle. Yihowa ledo noonke jaalooma kaajjishiꞌneemmo gede kaaꞌlitannonketi huuccatto calla diꞌꞌikkitino. Maganu Qaale xiinxallanna songote gambooshshe haꞌrano albinni roore Maganunniwa shinqeemmo gede kaaꞌlitannonke. Xiinxallatto yannaranna songote gambooshshiwa nootto yannara, yannakki danchu garinni horoonsiꞌrate maa assa dandaatto? Ateneeto togo yite xaꞌmi: ‘Songote gambooshshiwa woy xiinxalleemmo woyite hedoꞌya bebbeehantanno gede assara dandaannori maati?’ Silketenni woy wolu elektiroonikisete uduunnichinni mannu dowwolannohe woyite, iimeele soyannohe woyite woy borrote sokka soyannohe woyite tini hedokki bebbeehantanno gede assitanno? Yannankera lowo biliyoone ikkanno mannira togoohu kaaꞌlanno uduunnichi noonsa. Mite xiinxallaano hedonke bebbeehantannokki gede assiꞌrate woꞌnaalleemmo woyite, silke mulenke noo daafira calla hedonke bebbeehantara dandiitannota coyidhino. Mittu fullahaanchi, “Loossanni nootto looso illachisha didandaatto. Wodanikki wolewa haꞌranno” yiino. Duucha woyite woradunna qoqqowu gambooshshi hanafara albaanni, elekitiroonikisete uduunnichonke wolootu macciishshitannota hoolannokki gede assine wodhineemmo gede kullanninke. Ninkeno callootinke Yihowa ledo yanna sayinseemmo woyite elekitiroonikisete uduunnichonke hedonke bebbeehannokki gede assine wodha dandiineemmo?

14. Filiphisiyusi Sokka 4:6, 7 kultanno garinni Yihowa hedonke bebbeehantannokki gede kaaꞌlannonkehu hiittoonniiti?

¹⁴ Hedokki bebbeehantannokki gede kaaꞌlahera Yihowa huucciꞌri. Xiinxallatto yannara woy gambooshshunniwa nootto yannara wodanikki wolewa haꞌrannoha ikkiro kaaꞌlannohe gede Yihowa huucciꞌri. Yaadoottoha woy dadilloottoha ikkiro, yaaddokki agurte ayyaanaamittete coye illachisha shota ikka hooggahera dandiitanno; ikkirono hatto assa lowo geeshsha hasiissannote. Maganu keeri wodanakki calla ikkikkinni ‘hedokkino’ agarannohe gede huuccatto assiꞌri.—Filiphisiyusi Sokka 4:6, 7 nabbawi.

YIHOWA LEDO YANNA SAYISA BAꞌRAASSANNOTE

15. Yihowa ledo yanna sayinsiro afiꞌnanniti mitte horo maati?

¹⁵ Yihowa ledo hasaawate, isi yaannore macciishshatenna isi daafira hedate yanna gaaꞌmittoro lowo horo afiꞌratto. Hiittoonni? Umihunni, dancha doorsha doodhatto. Qullaawu Maxaafi, “Egennaamu ledo hosannohu egennaamo ikkanno” yaanno. (Law. 13:20) Hayyote Buicho ikkinohu Yihowa ledo yanna sayisittoro atino albinni roore hayyicha ikkatto. Qoleno iso hagiirsiisa dandaattohu hiittoonniitiro albinni roore huwatatto; hattono iso dadillisanno doorsha giwa dandaatto gara wodanchatto.

16. Yihowa ledo yanna sayisanke rosiisate dandoonke woyyeessiꞌneemmo gede kaaꞌlitannonkehu hiittoonniiti?

¹⁶ Layinkihunni, worba rosiisaancho ikkatto. Mitto mancho Qullaawa Maxaafa xiinxallinseemmo woyite qara mixonke isi Yihowawa shiqanno gede kaaꞌlate. Iimi Anninke ledo hasaambummo kiiro, iso albinni roore banxeemmo hattono xiinxallinseemmo manchi Yihowa baxanno gede albinni roore kaaꞌla dandiineemmo. Hanni Yesuusi lawishsha hendo. Isi Annisi daafira iibbado giddonninna baxillunni kulino daafira ammanantino soqqamaasinesino Yihowa baxxino.—Yoh. 17:25, 26.

17. Huuccattonna xiinxallo ammananke kaajjishiꞌrate kaaꞌlitannonkehu hiittoonniiti?

¹⁷ Sayikkihunni, ammanakki kaajjitanno. Hanni Maganu biddishsha aahera, sheshifachishahera woy kaaꞌlahera huucciꞌrittoro mayi ikkannoro hedi. Yihowa huuccattokkira dawaro qoli kiiro, isira noohe ammana kaajjitanno. (1 Yoh. 5:15) Ammanakki kaajjishiꞌrate kaaꞌlannoheri woluri maati? Hojju xiinxallooti. “Ammaꞌna macciishshatenni [daggannota]” qaagi. (Rom. 10:17) Ikkirono, ammana kaajjishiꞌrate egenno afiꞌratenni sainore assa hasiissannonke. Wolere maa assa hasiissannonke?

18. Hiinca hasiissannonkehu mayiraati leellishanno lawishsha kuli.

¹⁸ Ronsanni heeꞌnoommore hiinca hasiissannonke. Hanni Faarso 77te borreessaanchi xagge laꞌno. Kuni borreessaanchi isinna wolu Israeelete manni Yihowa dadillisinohu gede asse hedino daafira lowo geeshsha yaadino. Isi lowo geeshsha yaadino daafira hashsha goxicho hoogino. (Kiiro 2-8) Isi ma assiyya? Yihowara togo yiino: “Loosoottore baala hedeemmo; dhaggenniha loosokki baala heeshshi gotti asse laeemmo.” (Kiiro 12) Faarsaasinchu Yihowa konni albaanni mannisira assinore afinoti dihuluullissannote; ikkirono kuni yaadino manchi togo yee hedino: “Maganu marara hawinoni? Maarosi hanqoho soorrinoni?” (Kiiro 9) Faarsaasinchu Yihowa loosonna isi konni albaanni mannisira leellishino maaronna shaqqille hiincino. (Kiiro 11) Tini mayi guma abbituyya? Faarsaasinchu Yihowa mannasi agurannokkita ammanino. (Kiiro 15) Hatteente gede, atino Yihowa alba mannisira assinorenna ate umikkira assinohere hiincittoro ammanakki kaajjitanno.

19. Yihowa ledo yanna sayinsummoro afiꞌneemmoti wole horo maati?

¹⁹ Shoolkihunni, wolu baalunkunni roore Yihowara noohe baxilli lexxanno. Wolu baalunku akatinni roore baxillu Yihowara hajajamatto gede, iso hagiirsiisate yite umikki horo aguratto gedenna qarra dandiite saꞌꞌatto gede kaaꞌlannohe. (Mat. 22:37-39; 1 Qor. 13:4, 7; 1 Yoh. 5:3) Yihowa ledo noonkeha lubbote jaalooma roorannonkeri woluri dino!—Far. 63:1-8.

20. Yihowa ledo sayisatto yanna danchu garinni horoonsiꞌrate maa assate hedootto?

²⁰ Huuccatto, xiinxallonna hiinca Yihowa magansiꞌra ikkitinota qaagi. Yihowa ledo yanna sayisate Yesuusi gede cancu nookki bayicho hasiꞌri. Hedokki bebbeehanno coye hooꞌli. Ayyaanaamittete coye assatto woyite hedokki bebbeehantannokki gede kaaꞌlahera Yihowa huucciꞌri. Xaa yannara, yannakki danchu garinni horoonsiꞌrattoha ikkiro, Yihowa haaro alamera hegere heeshsho oye baꞌraasannohe.—Maq. 4:24.