2 | ‘Qullaawa Borro Widoonni Afiꞌneemmo Jawaante’

QULLAAWU MAXAAFI TOGO YAANNO: “Umo assine Qullaawa Maxaaffa giddo borreessinoonnire baala rosiisankera borreessinoonni. Qullaawa Maxaaffa widoonni afiꞌneemmo cincanna jawaante hexxo uyitannonke.”—ROOMU SOKKA 15:4.

Hatto Yaa Mayyaate?

Qullaawu Maxaafi gara ikkitinokki hedo gargadhate kaaꞌlannonkeha sheshifachishanno qaale amadino. Qoleno Qullaawu Maxaafi xissiisiꞌneemmo gede assannonke coyi muli yanna giddo baꞌꞌannota kulanno.

Tini Kaaꞌlitannonkehu Hiittoonniiti?

Ninke baalunku dadillineemmo woyiti nooti egennantinote; quwa saꞌino yaaddo amaddinonsa manni kayinni woꞌmanka woyite xissiisiꞌrara dandaanno. Togoo manna Qullaawu Maxaafi kaaꞌlannohu hiittoonniiti?

Qullaawu Maxaafi heda dandiineemmota dancha dancha hedo kulanno. (Filiphisiyusi Sokka 4:8) Qoleno sheshifachishannorenna wodananke diggi assannore hendeemmo gede kaaꞌlannonke; tini qolte wodanaaꞌmineemmo gede assitannonke.—Faarso 94:18, 19.
Ditidhoommoho yine hendeemmoha ikkiro, Qullaawu Maxaafi togoo hedo qeeꞌlate kaaꞌlannonke.—Luqaasi 12:6, 7.
Qullaawu Maxaafi duucha bayicho, calloota ikkinoommokkitanna Kalaqaanchinkera Maganoho qarrinke woꞌmunni woꞌma leellannosita kulanno.—Faarso 34:18; 1 Yohaannisi 3:19, 20.
Qullaawu Maxaafi, Maganu xissiisiꞌneemmo gede assinonkeha heeshshonke giddo tuncu yiinonke coye hambeemmo gede assannota kulanno. (Isayaasi 65:17; Yohaannisi Ajuuja 21:4) Qarrissanno hedo waaddannonke woyite dandiine saꞌneemmo gede tini hexxo jawaante ikkitannonke.

Qullaawu Maxaafi Kaaꞌlanno Gara Jeesika

Quwa Saꞌino Yaaddo Waaddannoe Gara

“Lemiina onte diro ikkieta, akime surrete dhibbinna quwa saꞌino yaaddo amaddinoeta kultue. Hedeweelcho konni albaanni sainohu xissiisanno coyi qulli yaanni waadannoe. Akimootu quwa saꞌino yaaddo amaddinoehu konni albaanni iillinoeha xissiisanno coye qaageemma daafira ikkinota kultinoe. Xagicho adheemmatano agurranna, gara ikkitinokki hedo bade afe gargadhate akimoota amaaꞌla hasiissinoe.”

Qullaawu Maxaafi Kaaꞌlinoe Gara

“Yaaddoꞌya quwa saꞌanno woyite, mulla kae masisannoe, lowo geeshsha yaadeemma, hattono goxicho hoogeemma. Duucha woyite hashsha hashsha, yaaddo wolqaꞌyara aleenni ikkitannoe. Faarso 94:19 kultannonte gede, Maganu yaaddo qarrissannonke woyite sheshifachishannonke hattono wodanaaꞌmineemmo gede kaaꞌlannonke. Hakko daafira, daallasiꞌya mule Qullaawa Maxaafanna jawaachishshanno qummeeshshuwa borreessiꞌroomma qaagiishsha wodheemma. Goxichu giwannoe woyite, mite Qullaawu Maxaafi qummeeshshuwa nabbaweemma; tini sheshifateemma gede kaaꞌlitannoe.

“Qullaawu Maxaafi Maganu daafira ronsoommo rosi ledo sumuu yitannokki hedo gimbeemmo gede jawaachishannonke. Bashsho, ani ditidhoommate, banxannie gedeeta diꞌꞌikkoomma hattono waagu dinooete yee hedeemma. Ikkollana togoo hedo Qullaawu Maxaafi ledo sumuu yitannota ikkitinokkita rosoomma; Qullaawu Maxaafi Maganu ninke mittu mittunku daafira hedannoha baxillaanchonna shaqqado Anna ikkinota rosiisanno. Gara ikkitinokki hedo qeeltaera wodhantenni, sunu sununni togoo hedo qeeꞌla dandoomma. Aneneeto Maganu laꞌꞌannoe garinni laꞌꞌa hasiissannoeta rosoomma. Tini umiꞌya daafira nooeta gara ikkitinokki lao qeeꞌleemma gede lowo geeshsha kaaꞌlitinoe.

“Xissiisiꞌneemmo gede assannonke coye qaangeemmokkitanna gara ikkitinokki hedo waaddannonkekki yanna quqquxame agadheemma. Surrete xisso heedhannokki yanna daggannota afaꞌya, xa iillannoe qarra cinceemma gede jawaante ikkitannoe; qoleno quwa saꞌino yaaddo gargadhanni qarrameemmakki yanna quqquxame agadheemma gede assitannoe.”