3 | Qullaawu Maxaafi Giddo Kulloonni Manni Lawishshi Kaaꞌlannonke Gara

QULLAAWU MAXAAFI . . . Ammanamino labballinna meenti daafira kulanno; insano ‘ninke gedee mannaati.’—YAIQOOBI 5:17.

Hatto Yaa Mayyaate?

Qullaawu Maxaafi giddo kulloonniri batinyu labballinna meenti addi addi hedo macciishshantinonsareeti. Insa xagge nabbambeemmo woyite, ninkera macciishshantinonke hedo macciishshantinosi manchi noota huwantammora dandiineemmo.

Tini Kaaꞌlitannonkehu Hiittoonniiti?

Ninke baalunkura, wolootu qarranke huwatturo tashshi yaannonke. Hakko iso surrete xisso waaddannonke woyite, wolootu qarranke affara hasiꞌneemmo. Qullaawu Maxaafi giddo kulloonni mannita addu xagge nabbambeemmo woyite, insano ninke gedeere ikkitinota huwanteemmo. Tini qolte, yaachishanno coyinna gara ikkitinokki hedo waaddannonkeri ninke calla ikkinoommokkita anfeemmo gede kaaꞌlitannonke.

Qullaawu Maxaafi giddo, hexxo mudhinohunna ditidhinoommoho yee hedannohu batinyu manni xagge no. ‘Togo ikke heeꞌra didandeemmo. Xaate heeshsho giwissinoe’ yite egennootto? Muse, Eeliyaasinna Daawitino hatto yite heddino woyiti no.—Kiiro 11:14; 1 Mootoolla 19:4; Faarso 55:4.
Qullaawu Maxaafi Haanna yinanni mancho ila hoogginohuranna konninni kainohunni ginase qussitanni waaddinose daafira ‘lowo geeshsha caaccaabbinota’ kulanno.—1 Saamueeli 1:6, 10.
Qullaawu Maxaafi Iyyoobi yinanni manchi daafirano kulanno. Isi kaajjado ammana noosi mancho ikkirono, lowo geeshsha xissiisiꞌrino daafira mitte hige togo yiino: “Heeshshoꞌya mishoommo; heeꞌrammora horontanni dihasiꞌreemmo.”—Iyyoobi 7:16.

Qullaawu Maxaafi giddo kulloonnihu kuni manni gara ikkitinokki hedo qeele sainohu hiittoonniitiro xiinxallanke, ninkeno qarranke qeele saꞌꞌate jawaante afiꞌneemmo gede kaaꞌlitannonke.

Qullaawu Maxaafi Kaaꞌlanno Gara Keeveni

Bayipoori Diisorder Yinanniti Surrete Xisso Waaddannoe Gara

“Ontawu diri balla ikkieta, bayipoori diisorder yinanniti surrete xisso nooeta akime kultue. Mito woyite iillannoe qarra baala qeela dandeemmo yee hedeemmo. Wole yannara kayinni, ‘Heeꞌraꞌya waaga diafidhino’ yee hedeemmo.”

Qullaawu Maxaafi Kaaꞌlinoe Gara

“Qullaawu Maxaafi giddo kulloonnihu soqqamaasinchu Pheexiroosino ane gede ikke saino. Isi loosino soꞌronni kainohunni ditidhoommoho yee hedino. Ikkollana isi soꞌrosi calla hedantenni, isi daafira heddanno jaallasiwa gamba yiino. Aneno bayipoolari diisorder yinanni xisso waaddannoe woyite, laanfeꞌya hexxo mudheemmo gedenna ditidhoommoho yee hedeemmo gede assitannoe. Anino Pheexiroosi gede, hexxo mudheemmokki gede kaaꞌlitannoe jaallawa gamba yaa hasiissannoeta rosoommo.

“Moote Daawiti xaggeno lowo geeshsha sheshifachishshinoe. Isi iillinosi qarrinni kainohunni duucha hige hexxo mudhino; hattono alba loosino soꞌrora dadillino. Anino gedensoonni gaabbeemmo coye coyiꞌreemmo woy asseemmo woyiti noo daafira isi qarri leellannoe. Daawiti Faarso 51 coyiꞌrinori sheshifachishinoe. Isi kiiro 3te togo yiino: ‘Ani saoꞌya egennoommo; cubboꞌyano woꞌmanka woyite qaageemmo.’ Yaaddo quwa saꞌeennae ragu tunsannoe woyite, anino isi yii gede ikkeemmo; hattoo woyite umiꞌya daafira dancha danchare heda qarra ikkitannoe. Ikkirono Daawiti kiiro 10 coyiꞌrinorino kaaꞌlinoe; isi togo yiino: ‘Magano ballo! Keeraancho wodana kalaqie; haaronna suwashsho wodana giddoꞌya worie.’ Anino umiꞌya daafira gara ikkinore hedeemmo gede kaaꞌlaera Magano hatto yee huucciꞌreemmo. Kiiro 17 noo hedono jawaachishshannoe. Qummeeshshu, ‘Magano ati . . . heeshshi yiinohanna atewa higino wodana dimishatto’ yaanno. Kuni qummeeshshi Maganu baxannoeta huwateemmo gede assinoe.

“Qullaawu Maxaafi giddo kulloonni manni lawishshanna xa Maganu uyinoe atoote hiincaꞌya, hexxoꞌya kaajjitanno gede kaaꞌlitinoe. Qullaawu Maxaafi kulanno hexxo xabbe leeltinoe; tini qolte hexxo mudheemmokki gede kaaꞌlitinoe.”