Yihowa Huuccattonkera Dawaro Qolannohu Hiittoonniiti?

1-2. Huuccatto lainohunni mayine huluullammammora dandiineemmo?

YIHOWA huuccattokkira dawaro qolannota huluullante egennootto? Hatto ikkiro, huluullamoottohu ate calla diꞌꞌikkootto. Batinyu roduuwi roorenkanni qarru amadannonsa woyite Yihowa huuccattonsara dawaro qolannota huluullantanno. Ninkeno qarru amadannonke woyite Yihowa huuccattonkera dawaro qolanni noohu hiittoonniitiro huwata qarra ikkitankera dandiitanno.

² Hanni Yihowa soqqamaanosi huuccidhanno huuccattora dawaro qolannota addaxxa dandiineemmohu mayiraatiro laꞌno. (1 Yoh. 5:15) Qoleno aante noo xaꞌmuwa hasaambeemmo: Mito woyite Yihowa huuccattonkera dawaro qolinonkekkiha lawannonkehu mayiraati? Xaa yannara Yihowa huuccattonkera dawaro qolannohu hiitte doogganniiti?

YIHOWA HUUCCATTONKERA DAWARO NINKE HENDOOMMO GARINNI QOLA HOOGARA DANDAANNO

3. Yihowa iso huucciꞌnammora hasiꞌrannohu mayiraati?

³ Qullaawa Borro Yihowa lowo geeshsha baxannonketanna ninke isi albaanni muxxe ikkinoommota buuxissannonke. (Hag. 2:7; 1 Yoh. 4:10) Isi kaaꞌlannonke gede huuccatto assiꞌnammora koyisinonkehu iseraati. (1 Phe. 5:6, 7) Yihowa isiwa shinqammoranna iillannonke qarra dandiine saꞌneemmo gede ninke kaaꞌla hasiꞌranno.

4. Yihowa soqqamaanosi huuccidhanno huuccattora dawaro qolannota mayinni anfeemmo? (Misileno lai.)

⁴ Qullaawu Maxaafi giddo Yihowa soqqamaanosi huuccattora dawaro qolinota kultanno xagge duucha hinge nabbambeemmo. Tenne daafira ati qaagatto lawishshi no? Hanni Moote Daawiti lawishsha laꞌno. Iso heeshshosi diro woꞌma lowo diinna waaddinosi; hakko daafira isi kaaꞌlannosi gede Yihowa duucha hige huucciꞌrino. Mitte yannara isi togo yee Yihowa eeggifate huucciꞌrino: “Kaaliiqaꞌya ballo, huuccattoꞌya macciishshie; halaalaanchimmakkinni huuccattoꞌya macciishshi; ammanamakkinni huuccattoꞌyara dawaro qolie.” (Far. 143:1) Yihowa, Daawiti gatisannosi gede huucciꞌrino huuccattora dawaro qolinosi. (1 Sam. 19:10, 18-20; 2 Sam. 5:17-25) Daawiti woꞌma giddonni “Kaaliiqi woshshidhannosirira . . . baalaho mule no” yiino. Ninkeno woꞌma giddonni hatto yaa dandiineemmo.—Far. 145:18.

5. Hundi yannara heedhinori Yihowa soqqamaano huuccattonsara dawaro woꞌmanka woyite insa heddino garinni afidhino? Lawishsha kuli. (Misileno lai.)

⁵ Yihowa huuccattonkera dawaro ninke hendoommo garinni qola hoogankera dandaanno. Soqqamaasinchu Phaawuloosi lawishshi tenne leellishanno. Isi, Maganu “utu gede qasanno qarra” hoolannosi gede huucciꞌrino. Phaawuloosi konni yaachishanno qarri daafira sase hige huucciꞌrino. Yihowa huuccattosira dawaro qoliyya? Ee qolino; kayinni dawaro qolinohu Phaawuloosi hedino garinni diꞌꞌikkino. Yihowa Phaawuloosira iillinosi qarra dihoolino; hatteentenni Isira ammaname soqqamanni heeꞌranno gede kaaꞌlitannosita hasiissanno wolqa uyinosi.—2 Qor. 12:7-10.

6. Mito woyite Yihowa huuccattonkera dawaro qolinokkiha lawannonkehu mayira ikkara dandaanno?

⁶ Ninkerano mito woyite Yihowa huuccattonkera dawaro ninke hendoommokki garinni qolara dandaanno. Yihowa ninke kaaꞌlannoti baalunkunni woyyitino doogo hiittenneetiro afinota dihuluullammeemmo. Wole agurina isi “hendeemmohunni aleenni quwa sayise assara dandaanno.” (Efe. 3:20) Hakko daafira isi huuccattonkera dawaro ninke hendoommokki yannara woy hendoommokki garinni qolara dandaanno.

7. Mayine huucciꞌneemmoro soorra hasiissannonkehu mayira ikkara dandaanno? Lawishsha kuli.

⁷ Yihowa fajjo maatiro roore huwantummoro iso mayine huucciꞌneemmoro soorra hasiissannonkeha ikkara dandaanno. Hanni Maartiini Potizingeri lawishsha laꞌno. Roduu Potizingeri seenne adhihu gedensaanni mulenni Naazite usuranyu kaampera usuramino. Isi umi qara minaamasi towaaxxanno gedenna sabbakate looso loosanno gede usuru mininni fushshasira Yihowa huucciꞌrino. Ikkirono isi Yihowa usuru mininni fushshannosita leellishanno malaate lame lamala geeshsha dilaino. Hakko daafira isi “Yihowa eeggatena maa assammora hasiꞌrattoro leellishie” yee huucciꞌra hanafi. Hakkiinni isi kaampete giddo wolootu roduuwi hiittoo qarri giddo nooro heda hanafi. Hakko noori batinyu roduuwi minaamuwinsanna oosonsa daafira baasa yaaddanno. Hakkiinni roduu Potizingeri “Yihowa, haaro looso oottoe daafira galaxxeemmohe. Roduuwaꞌya jawaachisheemmonna sheshifachisheemmo gede kaaꞌlie” yee huucciꞌri. Isi kaampete giddo hatte yannanni kayise 9 diro roduuwasi jawaachishanni keeshshino!

8. Huuccatto assiꞌneemmo woyite dea hasiissannonkekkiri maati?

⁸ Yihowa hedinore wonshannohu isi hirqino yannara ikkinota dea dihasiissannonke. Isi hedinori giddo gamu xaa yannara qarrisannonkere lawishshaho kalaqamu dano, dhibba hattono reyo woꞌmunni woꞌma hunate. Yihowa Gashshootisi widoonni hedinore wonshanno. (Dan. 2:44; Aju. 21:3, 4) Hakka geeshsha kayinni Yihowa Sheexaanu tenne alame gashshara fajjino.b (Yoh. 12:31; Aju. 12:9) Yihowa xaa yannara mannu oosora iillanni noo qarra hooliro, Sheexaanu gashshootira qiniinoha lawara dandaanno. Hakko daafira Yihowa eino qaale wonsha geeshsha agadha hasiissannonke; hatto yaa kayinni isi ninke horo dikaaꞌlannonke yaa diꞌꞌikkitino. Hanni Yihowa ninke kaaꞌlannota mite doogga laꞌno.

XAA YANNARA YIHOWA HUUCCATTONKERA DAWARO QOLANNO DOOGGA

9. Yihowa mitto doorsha doodha hasiissannonke woyite kaaꞌlannonkehu hiittoonniiti? Lawishsha kuli.

⁹ Yihowa hayyo aannonke. Yihowa dancha doorsha doodhineemmo gede kaaꞌlitanno hayyo aankera qaale eino. Heeshshonke soorrara dandaanno coye lawishshaho adhammikkinni heeꞌrate woy adhamate daafira doodhineemmo woyite roorenkanni Maganu aanno hayyo hasiissannonke. (Yai. 1:5) Hanni Maariya yinannite mitte mine assidhinokki rodoo woꞌnaalsha laꞌno.c Ise woꞌma yanna suwisaancho ikkite soqqantanni heedhe mittu rodii ledo egennantu. Ise togo yitino: “Jaaloominke lexxanni haꞌrita mimmitu ledo lowo geeshsha baxammummo. Mitte doodha hasiissannoeta afoomma. Tenne hajo daafira seeda yanna seekke huucciꞌrumma. Yihowa biddishshi hasiisinoe; kayinni Yihowa konne doodhi konne doodhitooti yaannoekkita afoomma.” Maariya, Yihowa hayyo aannose gede huuccidhino huuccattora dawaro qolinoseta huwattino. Hiittoonni? Ise borruwanke xiinxallite, xaꞌmuwasera dawaro afidhanno gede kaaꞌlitannose birxichuwa afidhino. Qoleno ise Yihowa Farciꞌraasincho ikkitino amase amaaltinose amaale macciishshite adhitino. Tini amaale Maariya seekkite heddanno gede kaaꞌlitinose. Hakko daafira ise jeefote dancha doorsha doodha dandiitino.

10. Layinki Qorontoosi 4:7 kultanno garinni Yihowa soqqamaanosi kaaꞌlate maa assanno? Lawishsha kuli. (Misileno lai.)

¹⁰ Yihowa iillannonke qarra dandiine saꞌneemmo gede wolqa aannonke. Yihowa soqqamaasinchu Phaawuloosira assinte gede iillannonke qarra dandiine saꞌneemmo gede wolqa aannonke. (2 Qorontoosi 4:7 nabbawi.) Hanni Yihowa Benjaamiini yinanni rodii qarra ikkannosi coye dandee saꞌꞌanno gede kaaꞌlinosihu hiittoonniitiro laꞌno. Benjaamiini shiimu noo yannara isinna maatesi roore yanna heedhinohu Afirikaho darame marino manni heeꞌranno kaamperaati. Benjaamiini togo yiino: “Yihowa isi albaanni gara ikkinore asseemmo gede wolqa aaera duucha hige huucciꞌreemmo. Yihowa giddoyidi keere uyinoe, sabbaka agureemmokki gede worba assinoe hattono ayyaanaamittetenni kaajje heeꞌreemmo gede kaaꞌlitanno borruwa afiꞌreemmo gede asse huuccattoꞌyara dawaro qolino.” Isi lede togo yiino: “Ammanate roduuwiꞌya woꞌnaalsha nabbawaꞌyanna Yihowa insa iillinonsa qarra dandiite saꞌanno gede kaaꞌlinonsa gara afaꞌya anino isira ammaname heeꞌrate roore murciꞌreemmo gede kaaꞌlitinoe.”

11-12. Yihowa huuccattonkera dawaro qolate ayyaanaamittete maatenke horoonsiꞌrannohu hiittoonniiti? (Misileno lai.)

¹¹ Yihowa ninke kaaꞌlate ayyaanaamittete maatenke horoonsiꞌranno. Yesuusi heeshshosi kakkalo asse aara albanni noo hashsha Yihowa eeggifate huucciꞌrino. Isi mannu Magano xonino yee mishannosikki gede kaaꞌlasira Yihowa huucciꞌrino. Yihowa Yesuusi xaꞌmiꞌrinore assantenni jawaachishannosi gede roduuwasi ikkitino sokkaano giddonni mitto soye kaaꞌlinosi. (Luq. 22:42, 43) Yihowa ammanate roduuwinke giddo mittu silke dowwole woy daye xaꞌme jawaachishannonke gede asse ninkeno kaaꞌlankera dandaanno. Ninke baalunku ‘danchare hasaambe’ woy coyiꞌne ammanate roduuwanke jawaachinsheemmo faro hasiꞌra dandiineemmo.—Law. 12:25.

¹² Hanni Miiriyaami yinanni rodoo woꞌnaalsha laꞌno. Ise minaannise reyihunni shiima lamala gedensaanni hexxo mudhitinotinna dadillitinoti mite mine callase ofolte no. Ise wiꞌla agura didandiitino; hattono hasaaphitanno manni hasiisinose. Miiriyaami togo yitino: “Mittu manchirano dowwoꞌlate jawaante diafiꞌroomma; hakko daafira Yihowa huucciꞌroomma. Hakkiinni wiꞌlanni huucciꞌranni heeꞌreenna silke dowwollie. Dowwolinoehu songote cimeessaati.” Kuni cimeessinna minaamasi Miiriyaami sheshifachishshinose. Ise kuni rodii dowwolannose gede kakkayisinohu Yihowa ikkinota ammantino.

13. Yihowa huuccattonkera dawaro qolate iso magansiꞌrannokki manna horoonsiꞌrara dandaannota leellishanno lawishsha kuli.

¹³ Yihowa ninke kaaꞌlate iso magansiꞌrannokki manna horoonsiꞌrara dandaanno. (Law. 21:1) Mito woyite Yihowa iso magansiꞌrannokki manni soqqamaanosi kaaꞌlanno gede asse huuccattonsara dawaro qolanno. Lawishshaho isi Nehimiya Yerusaalame haꞌre katama galagale minanno gede xaꞌmiꞌreenna Moote Arxekisisi fajjannosi gede assino. (Neh. 2:3-6) Xaa yannarano Yihowa kaaꞌlo hasiissannonke woyite iso magansiꞌrannokki manni nafa kaaꞌlannonke gede kakkayisara dandaanno.

14. Suu Hingi woꞌnaalshi jawaachishinohehu hiittoonniiti? (Misileno lai.)

¹⁴ Suu Hingi yinanni rodoo Yihowa akimichu widoonni kaaꞌlinose. Qaaqqose addi addihu surrete dhibbi waadannosi. Isira buutote dano iillituta isenna minaannise iso towaaxxate yee loosonsa agurino. Hakko daafira insa angate anje amaddinonsa. Suu Hingi kadde amaddannori bainoseta coyidhino. Ise kaaꞌlannose gede giddoseta fushshite Yihowara hasaaphitino. Hakkiinni akimichu isenna maatese kaaꞌlate hedi. Hakko daafira insa gashshootu kaaꞌlonna danchu waaginni karaayyaꞌnanni mine afidhino. Hakkunni gedensaanni Suu Hingi togo yitino: “Yihowa kaaꞌlinonketa huwantoommo. Addanko isi ‘Huuccatto macciishshanno’ Maganooti.”—Far. 65:2.

YIHOWA HUUCCATTONKERA QOLANNO DAWARO MAAHOYYE YINE ADHATENNA HUWATATE AMMANA HASIISSANNO

15. Mitte rodoo Yihowa huuccattosera dawaro qolinota huwattanno gede kaaꞌlinoseri maati?

¹⁵ Duucha woyite huucciꞌneemmo huuccattora dawaro afiꞌneemmohu dhagge ikkanno garinni diꞌꞌikkino. Kayinni huuccattonkera afiꞌneemmo dawaro iimi Anninkera ammanamme heeꞌneemmo gede kaaꞌlitannonkete. Hakko daafira Yihowa huuccattokkira dawaro qolanno gara huwatate woꞌnaali. Yooko yinanni rodoo Yihowa huuccattosera dawaro qolannosekkihu gede assite heddino; kayinni ise gedensoonni Yihowa huuccidhino coye borreessite amaxxa hanaffu. Boode yanna gedensaanni ise borreessidhino coye wirro laꞌe Yihowa roore huuccattosera dawaro qolinota huwattino; isinni ise Yihowa dawaro qolinoseha mito coye huuccidhinonta habbino. Yihowa huuccattonkera dawaro qolanni noo gara yannate kiiro heda hasiissannonke.—Far. 66:19, 20.

16. Huuccatto lainohunni ammana noonketa leellisha dandiineemmohu hiittoonniiti? (Ibiraawoota 11:6)

¹⁶ Ammana noonketa leellinsheemmohu Yihowa huucciꞌne calla ikkikkinni isi huuccattonkera qolanno dawaro ikkitutano ikkituro maahoyye yine adhineeti. (Ibiraawoota 11:6 nabbawi.) Hanni Mayikinna minaamasi Kiriise lawishsha laꞌno. Insa Beeteele eꞌꞌe soqqama hasiꞌranno. Mayiki togo yiino: “Adhammummo gedensaanni Beeteelete soqqamate lowo diro forme wonshinanni keeshshinoommo; tenne mixonke daafira Yihowa duucha hinge huucciꞌnoommo; ikkollana Beeteelete soqqammeemmo gede dikoyinsoonninke.” Mayikinna Kiriise Yihowa isira soqqantanno gede insa woyyino garinni horoonsiꞌrannohu hiittoonniitiro afinota horo dihuluullantino. Insa woꞌma yanna suwisaano ikkite sabbakkannori roore hasiissannowa soqqantanni hattono gimbaatu looso kaaꞌlitanni dandiiture baala assa diagurtino. Xaa yannara insa woradu looso loosanni no. Mayiki togo yiino: “Yihowa huuccattonkera dawaro ninke hendoommo garinni qolinonkekki woyiti no; kayinni huuccattonkera dawaro qolinonke, isinni hendoommohunni woyyino garinni qolinonke.”

17-18. Faarso 86:6, 7 kultannonte gede huluullammeemmokki coyi maati?

¹⁷ Faarso 86:6, 7 nabbawi. Faarsaasinchu Daawiti Yihowa huuccattosi macciishshinotanna dawaro qolinosita dihuluullamino. Atino Yihowa huuccattokkira dawaro qolannota addaxxa dandaatto. Konni birxichira laꞌnummo lawishshuwa Yihowa qarru amadannonke woyite dandiine saꞌneemmo gede hayyonna wolqa aannonketa buuxissannonke. Isi ninke kaaꞌlate ayyaanaamittete maatenke wole agurina iso magansiꞌrannokki manna nafa horoonsiꞌrara dandaanno.

¹⁸ Yihowa huuccattonkera dawaro woꞌmanka woyite ninke hendoommo garinni qolannonkekkiha ikkirono, huuccattonkera dawaro qolannota kayinni anfoommo. Isi hasiisannonke coye hasiisse noo yannara aannonke. Hakko daafira Yihowa xaa yannara towaatannohetanna daggannote haaro alamera “woꞌmunku halcho wonshannota” addaxxite ammanatenni iso huucciꞌra agurtooti.—Far. 145:16.