Looxi Galte Badheegge Laꞌu

LOOXINNA maatesi wosiilisi Abirahaami ledo mitteenni Kanaꞌꞌaani gobbara heedhu. Mitto barra Abirahaami Looxi, ‘Kowiichcho saadankera ikkitanno base dino. Eeggatena baxxino. Ati mitto raga haꞌrittoro, ani wole raga haꞌreemmo’ yii.

Looxino gobba baala lai. Hakkiinnino, saadasira ikkitanno hayissonna wayi noota dancha base afiꞌri. Tini base Yordaanoosi Awuraajjaati. Looxi maatesinna saadasi ledo hakkiira haꞌri. Yannate gedensaanni, Soddoomu katamira mine miꞌne maatesi ledo heeꞌri.

Soddoomu manni lowo geeshsha bushuulleho. Looxi dancha mancho ikkinohura, tini bunshensa dadillissusi. Maganuno Looxinte gede dadillino. Yannate gedensaanni Maganu, Soddoomanna qooxeessaho nooha Gomooru katama bunshensa daafira hunara kainota Looxira kultara lame sokkaano soyi.

Sokkaano Looxi, ‘Rahi! Galtekkinna lamente meya oosokki ledo kawiinni fuli!’ yitusi. Looxina maatesi dunkituta, sokkaano anga amadde katamunni fushshitunsa. Lamanku sokkaanchi giddo mittu, ‘Lubboꞌnera xooqqe! Badheeggine laꞌinoonte. Reyitinannikki gede ilaalla xooqqe’ yiinsa.

Looxinna meyaa oososi hajajante Soddoomunni fultu. Taxxi nafa diyitino; badheeggeno dilaꞌino. Looxi galte kayinni dihajajantino. Looxinna maatesi Soddoomunni fulte shiima geeshsha hadhu gedensaanni, ise agurte badheegge laꞌu. Hakkunni gedensaanni Looxi galte maxinete kincho ikkitu. Kuneeti ise misilete aana laitto?

Tenne xaggenni dancha roso ronseemmo. Maganu isira hajajantannore gatisanno; isira hajajantannokkiri kayinni heeshshonsa hoogganno.