Yaaddo Amaddinonsare Jawaachishshe

1. Baxannonke Anninke Yihowa faale haꞌra dandiineemmohu hiittoonniiti?

YIHOWA lowo geeshsha baxannonke. (Yoh. 3:16) Ninkeno baxannonke Anninke faale haꞌra hasiꞌneemmo. Konni daafira, ‘wolu manni qarra uminkehu gede assine heda, rodiimmate baxillinni baxama, hattono shaqqaddanna jooguulle ikka’ hasiissannonke; qoleno baalunku mannira roorenkanni ‘ammanate’ roduuwinkera togoo akatta leellinsheemmo. (1 Phe. 3:8; Gal. 6:10) Ammanate roduuwinkera yaachishanno coyi iillannonsa woyite kaaꞌlineemmonsa.

2. Konni birxichira maa ronseemmo?

² Yihowa jaalla ikka hasidhannorira baalaho yaachishanno coyi iillannonsa. (Maq. 10:29, 30) Tini alame baꞌanno yanna gambissanno woyite albinni roore qarru iillankera dandaanno. Ikkina mimmitonke kaaꞌla dandiineemmohu hiittoonniiti? Hanni Looxi, Iyyoobinna Naaoomi daafira kultannote Qullaawu Maxaafi xaggenni maa ronseemmoro laꞌno. Qoleno xaa yannara mitu ammanate roduuwinkera iillannonsa qarranna insa qarransa dandiite heedhanno gede kaaꞌla dandiineemmo gara ronseemmo.

CINCITINANNIRE IKKE

3. Layinki Pheexiroosi 2:7, 8 kultanno garinni Looxi hiikkonne gara ikkinokki doorsha doodhino? Tini mayi qarra abbitino?

³ Looxi Soddoomu katamira heeꞌrannohu mancau manni ledo heeꞌrate doodhasi gara diꞌꞌikkitino. (2 Pheexiroosi 2:7, 8 nabbawi.) Hatti gobba dureette ikkiturono, Looxi hakka haꞌrasinni lowo qarri iillinosi. (Kal. 13:8-13; 14:12) Galtesi hakko katama baasa baxxinoha woy hakko heeꞌranno manniwa aante batissinoha ikkara dandaanno; tini Yihowara hajajama qarra ikkitannose gede assitinose. Maganu hakko qooxeessira giiranna ruqano xeenimma dirrisi yannara, ise heeshshose hooggino. Lamenti Looxi seennina? Insa adhate coyiꞌramino wedelli Soddoomu katamira reyino. Looxi qaesinna jajjasi hoogino; roore busha kayinni isi galtesi hoogasiiti. (Kal. 19:12-14, 17, 26) Tenne xissote yannara Yihowa Looxi tuge agurinoni? Diagurino.

4. Yihowa Looxi cince kaaꞌlinohu hiittoonniiti? (Aaniidi qoolira noo misile lai.)

⁴ Soddoomu katamira heeꞌrate doodhinohu Looxi ikkirono, Yihowa mararinosi daafira sokkaasine soye isonna maatesi gatisino. Sokkaasine, Looxi katamu giddonni rahe fulanno gede mudditusi yannara, isi kayinni fula ‘keeshshino.’ Hakko daafira, sokkaasine Looxinna maatesi anga amadde katamu giddonni fushshitinonsa. (Kal. 19:15, 16) Hakkiinni sokkaasine Looxi ilaala xooqanno gede kultinosi. Looxi kayinni Yihowa yiinore agure mule noo katama haꞌrara xaꞌmiꞌrino. (Kal. 19:17-20) Yihowa cince macciishshino, hattono Looxi xaꞌmiꞌrino katama haꞌranno gede fajjinosi. Looxi gedensaanni hakkiicho heeꞌra waajjino daafira, ilaala haꞌre heeꞌra hanafino; Yihowa umonni haꞌri yiinosihu hakkiraati. (Kal. 19:30) Yihowa cincino gari dhaggete! Ninke isi faale haꞌra dandiineemmohu hiittoonniiti?

5-6. Umi Teselonqe 5:14 noo amaale harunsine Maganu faale haꞌra dandiineemmohu hiittoonniiti?

⁵ Looxinte gede mitu ammanate roduuwinkeno gara ikkinokki doorsha doodhite buutote qarri giddo ubbara dandiitanno. Ikkina togoori kalaqamiro maa assineemmo? Gara ikkinokkire assino manchi wixiꞌrinoha mixxanni no yee heda rakkannonkeha ikkara dandaanno; qoleno mittu manchi wixiꞌrinoha mixxasi digattanno. (Gal. 6:7) Ikkollana Yihowa Looxi kaaꞌlihu gede ninkeno rodoonke kaaꞌlinummosiro woyyanno. Hatto assa dandiineemmohu hiittoonniiti?

⁶ Yihowa sokkaasine soyinohu Looxi qorowisiissanno gede calla ikkikkinni, Soddoomu katamira abbanno baonni gatanno gede kaaꞌlitasiraati. Ninkeno ammanate rodiinke gara ikkitinokki doogo haꞌranni nooti leeltunkero qorowisiisa hasiissannonkeha ikkara dandaanno. Ikkollana hakkiinni sainore assa hasiissannonke. Uyinoonnisita Qullaawu Maxaafi amaale harunsa keeshshiro nafa cinca hasiissannonke. Looxinna maatesi kaaꞌlitute lame sokkaasine lawishsha harunsino. Hexxo mudhine rodiinkewiinni xeertiꞌrantenni, iso kaaꞌla dandiineemmo doogga hasiꞌra hasiissannonke. (1 Yoh. 3:18) Lawishshu yaattonni angasi amande kaaꞌla yaano uyinoonnisita dancha amaale harunsanno gede jawaachisha hasiissannonke.—1 Teselonqe 5:14 nabbawi.

7. Manna Yihowa Looxi kaaꞌlino garinni kaaꞌla dandiineemmohu hiittoonniiti?

⁷ Yihowa Looxi laanfe diꞌꞌillachishino. Hatteentenni, Isi yannate gedensaanni soqqamaasinchu Pheexiroosi qullaawu ayyaaninni Looxi keeraanchoho yee borreessanno gede assino. Yihowa soꞌronke xinqisiisiꞌranno Magano ikkinokkita afanke tashshi assitannonke! (Far. 130:3) Ikkina ninkeno manna Yihowa Looxi kaaꞌlino garinni kaaꞌla dandiineemmohu hiittoonniiti? Roduuwinkera noonsata dancha akatta illachinsheemmoha ikkiro, insa cincine kaaꞌla dandiineemmo. Hatto assinummoro, insano kaaꞌlineemmonsa kaaꞌlo adhitara dandiitanno.

MARARTINANNIRE IKKE

8. Mararro maa assineemmo gede kakkayissannonke?

⁸ Iyyoobira qarru iillinosihu, Looxi gede gara ikkinokkire asseenna diꞌꞌikkino. Iyyoobira buutote qarri iillinosi; isi jirosi, dagoomu mereero noosi ayirrinye, hattono ordu fayyimmasi hoogino. Kawiinni saꞌino busha kayinni isinna minaamasira oosonsa reyo xoqoltino. Qoleno sase suꞌmira jaallasi Iyyoobi boroortinosi. Iyyoobiti sase jaalla iso marara hoogginohu mayiraati? Mittu korkaati, insa Iyyoobira iillinosi qarra huwatate diwoꞌnaaltino. Konninni kainohunni insa Iyyoobi bushiishate muddantino, hattono boroorshunni aalle haadhinosi. Ninke togoo soꞌro loonseemmokki gede mayi kaaꞌlannonke? Mittu manchira iillinosi qarra woꞌmunni woꞌma huwata dandaannohu Yihowa calla ikkinota deꞌnoonke. Qarramino manchi hasaaphannore seekkine macciishshino. Isi coyiꞌrannore calla ikkikkinni, xissosino huwatate woꞌnaallo. Roduuwinke qarra uminkehu gede assine laꞌꞌa dandiineemmohu hatto assinummoro callaati.

9. Manna mararreemmoha ikkiro maa diassineemmo? Mayira?

⁹ Manna mararreemmoha ikkiro, insara iillinonsa qarra kayinse diheꞌmineemmo. Heme songote mittimma huntanno ikkinnina dikaajjishshanno. (Law. 20:19; Rom. 14:19) Heꞌmanno manchi shaqqillenna mararro leellisha didandaanno; qoleno coyiꞌranno coyi wonanni xissiisiꞌre noo mancho madiissara dandaanno. (Law. 12:18; Efe. 4:31, 32) Mannu soꞌro xinqisiisiꞌrantenni dancha akattansa illachishanna insa kaaꞌla dandiineemmo gara heda woyyitanno!

10. Iyyoobi 6:2, 3 noo hedonni maa ronseemmo?

¹⁰ Iyyoobi 6:2, 3 nabbawi. Iyyoobi gara garimmo laikki coyiꞌrino woyiti no. Ikkollana isi yannate gedensaanni coyiꞌrinorira gaabbino. (Iyo. 42:6) Iyyoobinte gede xaa yannarano mittu qarru giddo noo manchi gara garimmo laikki ganaanni gaabbisannosi coye coyiꞌrara dandaanno. Togoo yannara ninke maa assa hasiissannonke? Soꞌrosi xinqisiisiranteni, iso marara hasiissannonke. Yihowa kalaqinonkehu, xaa gede qarrunna yaaddo woꞌmitino heeshsho heeꞌnammora diꞌꞌikkino. Konni daafira, mittu ammanaminohu Yihowa soqqamaasinchi buutote qarri iillannosi woyite gura qiniite laikki coyiꞌrara dandaanno. Kuni manchi Yihowa daafira woy ninke daafira gara ikkinokkire coyiꞌriro nafa, hanqoho muddama woy iso bushiisha dihasiissannonke.—Law. 19:11.

11. Cimeeyye amaaltanno woyite Eelihu lawishsha harunsa dandiitannohu hiittoonniiti?

¹¹ Yaachishanno coyi iillinosi manchira amaale woy seejjo hasiissannosi woyiti heeꞌrara dandaanno. (Gal. 6:1) Cimeeyye togoo roduuwa kaaꞌla dandiitannohu hiittoonniiti? Insa Eelihu lawishsha harunsa hasidhanno; isi Iyyoobi hasaaphanna cince macciishshino. (Iyo. 33:6, 7) Eelihu Iyyoobi amaalinohu, xissosi huwatihu gedensaanniiti. Eelihu lawishsha harunsitanno cimeeyye, amaaltanno manchi hasaaphanno woyite seekkite macciishshitanno, hattono iillinosire huwatate woꞌnaaltanno. Hatto assitu gedensaanni amaaltannoha ikkiro, konni manchira amaale adha diqarrissannosi.

SHESHIFACHISHANNORE COYIDHE

12. Naaoomi minaannasenna lame oosose shiiꞌrasenni mayi macciishshaminose?

¹² Naaoomi Yihowa baxxannote ammanantino manchooti. Ikkollana ise minaannasenna lame labballi oosose shiidhu gedensaanni suꞌmase Naaoomi yaa agurre “Maara” (“Maara” yaa “Qaraaro” yaate) yinara hasidhino. (Rut. 1:3, 5, 20) Naaoomira qarru iillise yanna baalantera beettise minaama Ruuti isewiinni dibaxxitino. Ruuti Naaoomira hasiisannosere assite kaaꞌlitinose, hattono sheshifachishshinose. Ruuti, Naaoomi baxxannosetanna kaaꞌlitannoseta shaqqillunni xawisse kultinose.—Rut. 1:16, 17.

13. Galte shiiꞌrino manchira kaaꞌlo hasiissannosihu mayiraati?

¹³ Ammanate roduuwinke galte shiidhanno woyite kaaꞌlo hasiissannonsa. Minaanninna minaama mule mule kayinsoonnite lame haqqicho gedeeti. Yanna saꞌanni hadhanno woyite lamente haqqicho rumudda tiꞌi teꞌee ledo sarraaqantanno. Mitte haqqicho ubbanno woyite, gattinoti baasa gawajjantanno. Hatteente gede, mittu manchi galtesi shiiꞌranno woyite, lowo yanna manchitara dandaanno. Paawulab yinanniti minaannase hedeweelcho shiidhino mancho togo yitino: “Boosaallu boono ikkie; hattono kade amadeemmari bainoe. Lubbote jaalaꞌya hooge aguroomma. Minaanniꞌya noo yannara isi ledo baalanka coye hasaambeemmo. Hagiidheemma woyite ledoꞌya hagiidhannohu hattono qarru yannara kaaꞌlannoehu isooti. Dhiwinoere hasaapheemma woyite, cince macciishshannoe. Iso shiiꞌrummata kayinni gama wido reyoommaha lawinoe.”

14-15. Galte shiidhinore sheshifachisha dandiineemmohu hiittoonniiti?

¹⁴ Galte shiidhinore sheshifachisha dandiineemmohu hiittoonniiti? Shiiꞌrino mancho ma garinni hasaawinseemmoro afa hoongummoro nafa, hasaawisate woꞌnaala hasiissannonke. Aleenni kulliti Paawula togo yitino: “Shiiꞌrino mancho hasaawisa shota ikkitinokkita afoomma. Mannu shiiꞌrinoha koffi assannore coyiꞌneemmo yee waajjanno. Ikkollana roore busha sammi yee giwa labbannoe.” Shiiꞌrino manchira shiimare nafa coyiꞌra sheshifachishshasira dandiitanno. Paawula “Jaallaꞌya ‘Xisso anera!’ yaansa calla baasa jawaachishshinoe” yitino.

¹⁵ Boodu diri albaanni minaamasi shiiꞌrinohu Wiliyaami togo yiino: “Wolootu galteꞌya assitinoha dancha coye coyidhanno woyite tashshi yaannoe; tini insa ise baxxannosetanna ayirrissannoseta wodancheemmo gede assitannoe. Hatto assansa baasa kaaꞌlitinoe. Minaamaꞌya lowo geeshsha baxeemmo daafira, mannu ise daafira coyiꞌranno woyite baasa sheshifateemmo.” Biyanka yinanniti minaannase shiidhino mancho togo yitino: “Wolootu ledoꞌya heedhe huuccatto assitannonna qummeeshshuwa nabbabbannoe woyite lowo geeshsha sheshifateemma. Minaanniꞌya daafira hasaawansa hattono ani isi daafira coyiꞌranna macciishshansa baasa kaaꞌlitinoe.”

16. (a) Shiidhinore sheshifachishate maa assa hasiissannonke? (b) Yaiqoobi 1:27 kultanno garinni maa assate qoosso noonke?

¹⁶ Ruuti Naaoomiwiinni baxxa gibbunte gede, ninkeno shiidhinore agurrummokkinni kaaꞌla hasiissannonke. Paawula togo yitino: “Minaanniꞌya reyi taaera, lowo manni sheshifachishinoe. Yanna saꞌanni hadhuta kayinni baalunku agure raga raga higino. Anera kayinni ragu baalu tunsinoe. Lowo aganna woy dirra gedensaanni nafa shiiꞌrino manchira kaaꞌlo hasiissannosita huwata danchate.” Mannu mannu gari babbaxxara dandaannoti egennantinote. Mitootu mulenni xissonsanni shesho afidhara dandiitanno. Wolootu kayinni alba shiidhino manchi ledo assitinore qaaggu kiiro xissiisidhanno. Qoleno mannu xissonsa xawisanno gari babbaxxinoho. Yihowa shiidhinore kaaꞌlate qoossonna qeecha uyinonketa qaaga hasiissannonke.—Yaiqoobi 1:27 nabbawi.

17. Minaanninsa woy minaamansa hunte hadhinonsarira kaaꞌlo hasiissannonsahu mayiraati?

¹⁷ Mitu manni, minaanninsa woy minaamansa hunte hadhannonsa woyite baasa yaadanno. Wole galte adhate yee minaannise hune haꞌrinoseti Joyisi togo yitino: “Adhamanke diigaꞌya xissiissinoe gara hedeemma woyite, minaanniꞌya shiiꞌroommaro hatto xissiisiꞌreemmaha dilawannoe. Isi danotenni woy dhiwame reyinoha ikkoommero, assine anfanniri dino. Hune harinoehu kayinni baxeeti. Konni daafira isi mishinoe, hattono shollishinoe yee hedoomma.”

18. Galtensa hoogginore kaaꞌlate maa assa dandiineemmo?

¹⁸ Babbaxxino korkaatinni galtensa hoogginore shiimaadda coye assine kaaꞌlineemmonsaha ikkiro banxeemmonsata huwattanno. Togoo mannira albinni roore danchu jaali hasiisannonsa. (Law. 17:17) Ikkina insara jaala ikka dandiineemmohu hiittoonniiti? Sagale koyinsammonsara dandiineemmo. Qoleno ledonke boohaartanno gede woy soqqantanno gede koyinsammonsara dandiineemmo. Mito woyite maatete magansiꞌra ledonke assidhanno gede koyisano danchate. Hatto assineemmoha ikkiro, ‘dadillunni hiiqqaqqantinorira mule noohunna’ ‘gunnootaho malanno’ Magani hagiidhanno.—Far. 34:18; 68:5.

19. Umi Pheexiroosi 3:8 kultanno garinni maa assate murciꞌra hasiissannonke?

¹⁹ Maganu Mangiste muli yannara uulla gashsha hanaffanno woyite “saino qarri baalu hawamanno” hattono “sainore baala hambanni; horonta diqaanganni”; tenne yanna quqquxamme agadhineemmo. (Isa. 65:16, 17) Hakka geeshsha kayinni mimmito irkisanna ammanate roduuwanke banxeemmota coyiꞌneemmorinnino ikko assineemmorinni leellishanke agurroonke.—1 Pheexiroosi 3:8 nabbawi.