Yooseefi Roduuwasi Fonqoli

YOOSEEFI tonnunku bayiruuddu roduuwisi wodani xaa geeshsha kaajjado ikkanna hoonge afara hasiꞌri. Konni daafira togo yiinsa: ‘Kiꞌne qotaanote. Dagginoonnihuno gobbanke laanfe laꞌꞌateeti.’

Roduuwisino, ‘Deeꞌni, ninke diqotaanote,’ yitu. Qolteno, ‘Ninke ammanammoommo mannaati. Baalinke roduuwaho. Ninke 12 roduuwaati. Mittu rodiinke dino; maaꞌnu rodiinke qaete anninkewa no’ yitu.

Yooseefi ammaninonsakkihu gede ikki. Rodoonsa Simiooni usuramanno gede asse, woloota kayinni gide haadhe qae higganno gede assi. Ikkollana kayinni, ‘Galagaltine higginanni wote maaꞌniidi rodooꞌne haadhinikki dagginoonte’ yiinsa.

Insano qaensa Kanaꞌꞌaani higguti ikkinore baala anninsa Yaaqoobira kultu. Yaaqoobino lowo geeshsha dadilli. ‘Yooseefi dino, xa kayinni Simioonino dino,’ yee lowo geeshsha wiꞌli. ‘Hattono ikke maaꞌniidi beettoꞌya Biiniyaami kiꞌne ledo disoyeemmo’ yii. Ikkollana sagalensa gooffara kaꞌuta Yaaqoobi Biiniyaami insa ledo Gibitse haꞌranno gedenna sagale ledde abbitanno gede soyi.

Yooseefi roduuwasi dagganna lai. Maaꞌniidi rodoosi Biiniyaami laiti lowo geeshsha hagiidhi. Nugusa ikkinohu Yooseefi rodoonsa ikkinota insa giddonni mittuno diafino. Yooseefi amatenni xaaddannokkire tonnenka roduuwasi fonqolaraati.

Soqqamaanosi, duuchchunku dooniyyira gide wonshitanno gede assi. Ikkollana Yooseefi roduuwisi giddonni mittuno afikki addi xaasasi Biniyaami dooniyyi giddo worranni gede assi. Baalunku hadhe boodewa iillitu gedensaani, Yooseefi soqqaamaanosi hordoffanno gede soyi. Soqqamaanosi iillite, Yooseefi roduuwa, ‘Mootichchinke xaasa mayira moortini?’ yitu.

Yooseefi roduuwi, ‘Xaasasi dimoorroommo. Ninke giddo mittu manchi dooniyyira xaasa affiniro, hakko manchi reyoona’ yite qoltu.

Konni daafira soqqamaano, baalunku dooniyyi giddo xaasa hasse Biiniyaami dooniyyi giddo affu; kuneeti misilete aana lai. Soqqamaano Yooseefi roduuwa togo yitu: ‘Biiniyaami agurranna baalunku haꞌra dandiitinanni; isi kayinni ninke ledo higanno.’ Biiniyaami ledo amatenni xaaddannokkiri kuri 10 roduuwi xa ma assitannokka?

Baalunku Biiniyaami ledo agurte Yooseefi qae higgu. Yooseefino, ‘Kiꞌne qae haꞌra dandiitinanni; Biiniyaami kayinni kowiichcho borojjichchoꞌya ikkanno’ yiinsa.

Yihudano qoonqosi gotti asse, ‘Konne beetto agure qae higummoro, anniꞌya iso lowo geeshsha baxanno daafira reyaanno. Konni daafira eeggatena, ani borojjichchokki ikkeenna beettu qae higona’ yii.

Yooseefi xa roduuwisi bashshonni woyyitinota afi. Roduuwisi xa kaajjaddanna bushuulle diꞌꞌikkitino. Hakkunni gedensaanni Yooseefi assinore hanni laꞌno.