Iyyoobi Maganoho Ammanaminoha Ikki

KUNI xiwamino manchi dimararsannohe? Suꞌmisi Iyyoobiiti; mulesi noo mancho galtesiiti. Ise Iyyoobi mayitanni nooro afootto? ‘Magano xonte reyi’ yitanni no. Togoo coye mayira coyidhuronna Iyyoobi togo buuto xiwaminohu mayiraatiro hanni laꞌno.

Iyyoobi Yihowara hajajamannohonna ammanamino manchooti. Isino Kanaꞌꞌaaninni lowo geeshsha faffinokki gobbara, Ootsira heeꞌrino. Yihowa Iyyoobi lowo geeshsha baxannosi; ikkollana mittu iso baxannokkihu no. Hakku ayeetiro afootto?

Sheexaane Daawuloosiiti. Sheexaanu Yihowa giwannoha busha sokkaancho ikkasi qaagi. Addaaminna Heewani Yihowara hajajantannokki gede assa daandiino; hattono manna baala maganoho hajajamannokki gede assa dandaannoha lawinosi. Ikkollana hatto assa dandiino? Didandiino. Xaa geeshsha nafa ronsoommore ammanantino labballonna meento qaagi. Ayeeoo qaagatto?

Gibitsete gobbara Yaaqoobinna Yooseefi reyitu gedensaanni, uullate aana heeꞌranno manninni roore ammanaminohu Iyyoobiiti. Yihowa Sheexaanu manna baalanka busha assa dandaannokkita afanno gede assa hasiꞌrinohura Sheexaane, ‘Iyyoobi lai. Anera mageeshsha ammanaminoro lai’ yiisi.

Sheexaanuno, ‘Ammanaminoha ikkinohu mulla ikkikki ati maassiꞌroottosihuranna danchuri woꞌminosihuraati. Ikkollana kuri haadhe hoolittoro xonannohe’ yee moromi.

Konni daafira Yihowa togo yii: ‘Hadhe noosire baala gudi. Iyyoobi aanano assattora hedootto bunshe baala assi. Hanni xonannoetanna teꞌee laꞌneemmona. Kayinnilla shaattosira dandaattokkita afi.’

Sheexaanu umo, mannu Iyyoobi saadanna gaallasi mooranno gedenna gereewisi reyaanno gede assi. Hakkiinnino hombobalattetenni tonne labballo oososinna seenne oososi shii. Qoleno Iyyoobi togo ikke buuto xiwamanno gede assi. Iyyoobi lowo geeshsha sheti. Iseraati galtesi, ‘Magano xonte reyi’ yitinosihu. Ikkollana Iyyoobi Magano dixonino. Qolteno sasu suꞌmu jaallasi marte Iyyoobi Maganoho hajajama hoogino daafira xiwamino gede kultusi. Ikkeennano Iyyoobi Maganoho ammanaminoha ikke heeꞌri.

Tini Yihowa hagiirsiissusi; qoleno koye misilete aana leellannonte gede, Yihowa gedenaanni hige Iyyoobi maassiꞌrisi. Xiwanisinnino hursisi. Qoleno Iyyoobi wole 10 xumuulle ooso ili; saadasi, gereewisinna gaallasi bashshonni lame ero ikkitu.

Atino Iyyoobi gede ayeewoteno Yihowara ammanamoottoha ikkatto? Ammanamoottoha ikkittoro Yihowa maassiꞌrannohe. Woꞌma uulla Edenete kaashshu base gede biifado ikkitanno wote, ise aana hegerera heeꞌratto.