Gibitsete Borojjimmanni Fulatenni Kayise Umi Isiraeelete Nugusi Geeshsha

Muse Isiraeelete gosa Gibitsete borojjimmanni fultuta massage Siina Ilaala massinsa; hakkiichchono Maganu seerasi uyinsa. Gedensaannino, Muse Kanaꞌꞌaani gobba qottanno gede 12 manna soyi. Ikkollana soyinori giddo 10 busha duduwo haadhe higgu. Gosa wirri yite Gibitse higa halchitanno gede assitu. Isiraeelete gosa ammana xeꞌinonsa daafira, 40 diro halallaho raataabbanno gede asse Maganu qorichchishinsa.

Gedensaannino, Isiraeele massage Kanaꞌꞌaani gobba eessanno gede Iyyaasu doorami. Dagasi hatte gobba ragidhanno gede kaaꞌlate Yihowa maalale assi. Yordaanoosi Lagi daada agure uurranno gede, Iyyaarkote gimbe ubbanno gedenna arrishsho barra woꞌma mitto bayichcho uurritanno gede assino. Hakkiinnino lewu diri gedensaanni Isiraeele Kanaꞌꞌaani gobba adhitu.

Iyyaasunni kayise 356 diri geeshsha, Isiraeele mesaafinte gashshitino. Mesaafintete giddonni mitootu Baarqi, Geediyooni, Yoftahe, Saamsooninna Saamueeli yinanniri no; insarenna wolootu mesaafintere albaange ronseemmo. Reaabi, Diboora, Iyyaeeli, Ruuti, Naaoominna Daliila yinanni meentireno albaange ronseemmo. Xaphphoomunni SAYIKKI Gafi 396 diri xagge amadino.