Hayyoota Gebaooni Manna

KANAꞌꞌAANI gobbara heedhanno katammara noo manni gudisire Isiraeele qasate kaino. Insa duuchchunku Isiraeelete manna qeeltannoha lawinonsa. Qooxeessaho heeꞌrannohu Gebaooni katami manni kayinni hatto yee dihedino. Kuni manni Maganu Isiraeele kaaꞌlanni noota ammanino; konni daafira Maganu ledo qasama dihasiꞌrino. Konnira Gebaooni manni ma assiro afitto?

Insa xeerto gobbanni dagginore labbe leellate heddu. Konni daafira, insa giddonni gamu mannooti tattaꞌino uddano uddidhu; tattaꞌꞌino caammano wodhitu. Qolteno tattaꞌino dooniyyuwa harrete hogobbu; hattono keeshshinoha moolino tima sinqisidhu. Hakkiinnino Iyyaasuwa marte, ‘Bayiru Maganiꞌne Yihoware macciishshine xeerto gobbanni dangoommo. Maganiꞌne Gibitsete gobbara assinoꞌnere baala macciishshinoommo. Konni daafira massaggannonke mannooti, doogora shiima sinqe adhine dange kiꞌne togo yineemmo gede sokkinonke: “Ninke soqqamaanoꞌneeti. Kiꞌne ledo diqasammeemmo yitine qaale eꞌenke.” Haꞌne dangoommo doogo seeda ikkitino daafira, kuneeti uddanonke tattaꞌino garanna timinke keeshshe moolino gara laꞌe’ yitu.

Iyyaasunna wolootu massagaano Gebaooni mannooti yitinore ammantu. Konni daafira diqanseemmoꞌne yite qaale eꞌu. Ikkollana sasu barri gedensaanni Gebaooni manni qooxeessinsara heeꞌrannoha ikkinota affu.

Iyyaasuno, ‘Xeerto gobbanni dangoommo mayira yitini?’ yee xaꞌminsa.

Gebaooni mannino, ‘Hatto yinoommohu, Maganiꞌne Yihowa tenne Kanaꞌꞌaani gobba woꞌma aaꞌnera qaale einota macciishshineeti. Konni daafira shitinanninke yine waajjinummo’ yitu. Ikkollana Isiraeele eꞌino qaale agadhitu; Gebaooni manna shaa agurte, soqqamaanonsa assidhu.

Yerusaalamete nugusi, Gebaooni manni Isiraeelete ledo jaalooma kalaqirino daafira hanqi. Konni daafira, wole shoole nugussa, ‘Daggine Gebaooni manna qasa kaaꞌleꞌꞌe’ yii. Hakkiinnino ontunku nugusi Gebaooni manna qassu. Tini nugussa qassannonsa gede assitino Isiraeele ledo, Gebaooni manni jaalooꞌmansa hayyimmate? Tenne hajore albaange ronseemmo.