Iyyaasunna Gebaooni Manna

Kanaani gobbara heeꞌrannohu wolu manni Iyyaarkote katami diigaminota macciishshi. Kanaani mootoolla Israeelete manni ledo olamate kaꞌu. Gebaooni manni kayinni wolere hedino. Insa tattaꞌꞌaame uddano uddidhe Iyyaasuwa marte togo yitu: ‘Ninke dangoommohu xeerto gobbanniiti. Yihowa daafiranna Isi Gibitsetenna Moaabi gobbara assinoꞌnere macciishshinoommo. Shitinanninkekki gede xaarrenke; hakkiinni ninke soqqamaanoꞌne ikkineemmo.’

Iyyaasu insa yitinore ammane, dishineemmoꞌne yee xaari. Sasu barri gedensaanni kayinni, Iyyaasu insa dagginohu xeerto gobbanni ikkinokkita afi. Insa dagginohu Kanaani gobbaanniiti. Iyyaasu Gebaooni manna, “Mayira doggininke?” yee xaꞌminsa. Insa togo yite qoltu: ‘Maganiꞌne Yihowa kiꞌnera olamanni noota anfoommo daafira waajjineetina ballo shitinoontenke.’ Iyyaasu xaarino xaaro garinni insa ledonsa heedhanno gede fajjinsa.

Shiima yanna gedensaanni, onte Kanaani mootoollenna olantonsa Gebaooni manna shineemmoꞌne yite waajjishiishshu. Iyyaasunna olantosi Gebaooni manna gatisate hashsha woꞌma hadhanni galtu. Layinki barra soodo guto olu kai. Kanaani manni addi addi raga hige xooqi. Insa martuwa baalawa Yihowa lowiddaanna kaade dirrise shiino. Hakkiinni Iyyaasu Yihowa arrishsho noowa uurritanno gede assara huucci. Bashsho arrishsho noowa uurrite diegentino; ikkina Iyyaasu arrishsho noowa uurritanno gede huucciꞌrinohu mayiraati? Isi Yihowa ammanino daafiraati. Israeele Kanaani mootoollanna olantonsa ledo olante qeelta geeshsha arrishsho dieꞌino.