Arrishsho Noowa Uurritu

KUNEETI Iyyaasu lai. Isi togo yaanni no: ‘Arrishsho, noottawa uurri!’ Arrishshono noowa uurritu. Mitto barra woꞌma gordu mereero uurrite hossu. Hatto ikkitanno gede assinohu Yihowaati! Kayinni Iyyaasu arrishsho xabbanni hossara hasiꞌrinohu mayiraatiro hanni laꞌno.

Kanaꞌꞌaani gobbara heedhannori ontu nugussa Gebaooni manna qasa hanaffuta, Gebaooni manni Iyyaasuwa kaaꞌlote mitto mancho soqqitu. Manchuno mare, ‘Rakkine iillenke! Gatissenke! Ilaalaame gobbara heedhanno nugussa baalanti ninke soqqamaanoꞌne qassara dagginona’ yee kulisi.

Hakkawotenni Iyyaasunna wottaaddarisi hadhu. Hashsha woꞌma hadhanni galtu. Marte Gebaooni iillituta onte nugussa wottaaddari waajje xooqa hanafi. Hakkiinnino Yihowa iiminni duꞌmuulle kaade dirrisi; Iyyaasu wottaaddari shiinonkunni, kaade gante roore wottaaddara shitu.

Hakko mereero Iyyaasu arrishsho eꞌara kaꞌinota lai. Tunseenna onte nugussa wottaaddari xooqe baꞌꞌaraati. Iyyaasu Yihowa huucciꞌri gedensaanni, ‘Arrishsho, noottawa uurri!’ yiinohu iseraati. Hakkiinnino arrishsho xabbanni keeshshituta, Isiraeele ola qasante qeeltu.

Kanaꞌꞌaani gobbara Maganu manna gibbannori wolootuno haammata nugussa no. Iyyaasunna wottaaddarisi hatte gobbara noore 31 nugussa lewu diri giddo qasse qeeltu. Hakkunni gedensaanni Iyyaasu Kanaꞌꞌaani gobba, baatto afidhinokki Isiraeelete gaꞌrera beenkanni gede assi.

Lowo diri sai gedensaanni, Iyyaasu 110 dirisinni reyi. Isinna jaallasi lubbote noo diro woꞌmanka Isiraeelete manni Yihowara hajajamino. Kuni danchu manni reyi gedensaanni kayinni, mannootu busha coye assite qarru aana ubbu. Maganu kaaꞌlannonsa gede hasidhinohu tenne yannaraati.