Gashshootu Beehami

KUNI manchi uddanosi mayira daddaranni nooro afootto? Yihowa daddari yeennasi daddaranni no. Manchu suꞌmi Akiyaati; isi Maganu masaalaanchooti. Masaalaanchoho yaa mayyaatero afootto? Maganu albillitte ikkannore balaxe kulannosi manchooti.

Akiya Iyyoorbaami coyishiishanni no. Iyyoorbaami, Salamooni gimbete loosira roorrichcha asse moohisino manchooti. Akiya doogote Iyyoorbaaminni xaaditi, xagge ikkannore assi. Uddire noota haaro uddano fushshe, tonaalamewa daddari. Hakkiinnino, ‘Tonne hocco ateneera adhi’ yee Iyyoorbaamira uyisi. Akiya 10 hocco Iyyoorbaamira uyinohu mayiraatiro afootto?

Akiya Yihowa gashshoote Salamooniwiinni haare hoolara kainota kulisi. Qoleno Yihowa 10 gaꞌre Iyyoorbaamira aara kainotano coyiꞌri. Hatto ikkiro Salamooni beetti Roobiaami gashshannoti lame gaꞌre calla gattanno yaate.

Salamooni, Akiya Iyyoorbaamira kulinore macciishshiti, lowo geeshsha hanqi. Isino Iyyoorbaami shaara hasiꞌri. Iyyoorbaami kayinni Gibitse xooqi. Hakkunni gedensaanni Salamooni reyi. Salamooni 40 diro moohino; isi reyita kayinni beettisi Roobiaami nugusa ikki. Iyyoorbaami Gibitsete heeꞌre Salamooni reyinota macciishshe, Isiraeelete gobba higi.

Roobiaami dancha nugusa diꞌꞌikkino. Annisi Salamooninni roore mannaho kaajjado ikki. Iyyoorbaaminna wolu ayirradu manni Roobiaamiwa marte, mannaho shaqqado ikkanno gede xaꞌmitusi. Roobiaami kayinni insa yitinore macciishsha giwi. Isinni bashshonni roore kaajjado ikki. Konni daafira, mannu Iyyoorbaami 10 gaꞌrera nugusa assi; lame gaꞌre kayinni yaano Biiniyaamitinna Yihudati Roobiaami nugusa assidhu.

Iyyoorbaami, mannisi Yihowa mine mare magansiꞌrate Yerusaalame haꞌrannota dibaxino. Konni daafira, lame worqete siitta seekke 10 gare gashshooti giddo noo manni hattee siitta magansiꞌranno gede assi. Mulenni Isiraeelete gobbara jaddonna finqille woꞌmitu.

Lame gaꞌre gashshooti giddono qarru no. Roobiaami nugusa ikkihunni onte diro woꞌmikki, Gibitsete nugusi Yerusaalame qasi. Kuni nugusi Yihowa mininni lowo jajja adhino. Konni daafira Maganu mini, minni wari gede ikke shiima yannalla keeshshino.