Magano Hagiirsiisa Dandaannohu Baino

BUSHA HANAFO

Roobiaami anni Israeele 40 diro gashshinoho Selemooniiti. (1 Mot. 11:42) Selemooni 997 K.A. reyino. Hakkiinni Roobiaami silxaane adhate Yerusaalametenni Sekeemi haꞌrino. (2 Dud. 10:1) Roobiaami maalaꞌlinanni hayyo noosiha Selemooni riqiwe moohanno daafira waajjinoha dilawannohe? Roobiaamira qarra tira dandaanno hayyo noosironna teꞌee anfanni yanna mule no.

Roobiaami Israeelete manni lowo geeshsha yaadinota afino. Shiima yanna gedensaanni, daga sokkino manni Roobiaamiwa mare yaachishinonsa coye togo yee kulinosi: “Annikki Selemooni lowo duha duhisiise gadadisinonke. Xa ati kayinni konne duha aaninni shaashshittonkero atera soqqammeemmohe.”—2 Dud. 10:3, 4.

Roobiaamira assannori bainosiha ikkara dandaanno. Daga xaꞌmidhinore macciishshe duhansa shaashshiro isinna maatesi, hattono isi ledo gashshootu mine heeꞌranno manni afiꞌranno qawaaxxo gatte baꞌanno. Daga xaꞌmidhinore giwiro kayinni mannu finqilara dandaanno. Isi maa assiyya? Isi umo annisi Selemooni amaaꞌlannore jajjabba manna amaaꞌlino. Ikkollana, gedensaanni Roobiaami isi darawo ikkitino wedella amaaꞌlino. Isi darawosi yitinosire harunse togo yiino: “Ani kayinni hakkiinni saino duha duhisiiseemmoꞌne. Anniꞌya halangetenni ganinoꞌne. Ani kayinni haffarraame lichenni ganeemmoꞌne.”—2 Dud. 10:6-14.

Tenne xaggenni maa ronseemmo? Ee ayyaanaamittetenni jawaata ikkitino roduuwi kultannonkere macciishsha dancha doorsha doodhineemmo gede kaaꞌlitannonke. Insara lowo woꞌnaalshi noonsa daafira doodhineemmo doorshi abbanno guma hedde dancha amaale amaaltankera dandiitanno.—Iyo. 12:12.

‘INSA KAALIIQI YIINO COYE MACCIISHSHITU’

Roobiaami mannu finqilinotera hanqe olantosi gamba assiꞌre insa qasara kaino. Ikkollana Yihowa masaalaanchu Shemaiya widoonni togo yiino: “Roduuwiꞌne Israeelete aana bala tugginoonte; baalunku mini miniꞌnera higge; konne coye assoommohu aneeti.”—1 Mot. 12:21-24.a

Roobiaami olama aguraraati yaate? Kuni coyi Roobiaami mageeshshi geeshsha yaachishinosiro heda dandaatto. “Haffarraame lichenni ganeemmoꞌne” yee waajjishiishino moote xa kayinni tenne finqille uurrisate mittoreno assa aguranno woyite mannu mayyaanno? (2 Duduwo 13:7 te ledo heewisiisi.) Ikkollana mootenna olantosi Yihowa ‘yiino coye macciishshite mini mininsara higgino.’

Tenne xaggenni maa ronseemmo? Maganoho hajajama mannu mishannonke gede assitannoha ikkiro nafa, isi yaannore assa hayyoota ikkinoommota leellishshanno. Maganoho hajajama iso hagiirsiinseemmo gedenna atootesi afiꞌneemmo gede assitannonke.—Mar. 28:2.

Roobiaami Yihowara hajajamino daafira maa afiꞌrino? Isi Maganoho hajajame haaro xintamino gashshoote qasate hedino hedo agurino, hattono isi gashshooti giddo noohu Yihudunna Biiniyaami qooxeessira katamma mina hanafino. Qoleno katamma kaajjishino. (2 Dud. 11:5-12) Baalunkunni roore yannate geeshsha Yihowa seerira hajajamino. Tonne gaꞌre amadinohu Iyorbiaami moohinohu Israeelete gashshooti giddo noo manni kaphu maganna magansiꞌrita halaalu magansiꞌra irkisanno manni Yerusaalame haꞌre ‘Roobiaami kaaꞌlino.’ (2 Dud. 11:16, 17) Roobiaami Yihowara hajajamasi, gashshootisi kaajjanno gede assitino.

ROOBIAAMI LOOSINO CUBBONNA MAARO EINO GARA

Roobiaami, gashshootisi kaajjita mitto hendoonnikki coye assino. Yihowa seera agure kaphu maganna magansiꞌra hanafino! Togo assinohu mayiraati? Amoonitte amasi togoore assanno gede xixxiibbinosi ikka? (1 Mot. 14:21) Korkaatu ikkihano ikkiro, daga isi lawishsha harunsitino. Konni daafira, Roobiaami Yihudu katamma kaajjishinoha ikkirono Yihowa Gibitsete Moote Shishaaqi haammata Yihudu katamma adhanno gede assino.—1 Mot. 14:22-24; 2 Dud. 12:1-4.

Shishaaqi Roobiaami gashshooti noowa Yerusaalame gamba yee dayita coyi lowo geeshsha qarra ikkino. Hatte yannara, masaalaanchu Shemaiya Yihowa sokka Roobiaamiranna olantosi roorrootira kulinosa. Togo yiino: “Ane agurtinoonni daafira anino Shishaaqi angara sayise oommoꞌne.” Roobiaami kulloonnisi sokka macciishshino? Ee macciishshino! Qullaawu Maxaafi togo yaanno: “Roobiaaminna Yihudu roorrooti umonsa shollishshe, ‘Kaaliiqi assino coyi garaho’ yitino.” Konni daafira Yihowa Roobiaaminna Yerusaalame baotenni gatisino.—2 Dud. 12:5-7, 12.

Hakkuyi gedensaanni Roobiaami Yihuda gashshanni keeshshino. Isi reyara albaanni oososira duuchare uyinonsa; hatto assinohu oososi rodiinsa Abiya isi gedensaanni moote ikkannota hooltannosikki gede hede ikkara dandaanno. (2 Dud. 11:21-23) Roobiaami togo assatenni, wedellichu heeꞌre loosinokkiha hayyicha ikkinota leellishanno looso loosino.

ROOBIAAMI DANCHANSO BUSHA MOOTEETI?

Roobiaami mito dancha looso loosinoha ikkirono Magano hagiirsiisikki gatino. Qullaawu Maxaafi tenne kulanni togo yaanno: “Roobiaami Kaaliiqa woꞌmu wodaninni hasiꞌrinokki daafira busha coye assino.”—2 Dud. 12:14.

Ninke Roobiaami xaggenni ronseemmo rosi maati? Isi mite yanna geeshsha Maganoho hajajamino, hattono Yihowa dagara mito dancha coye assino. Ikkollana Yihowa ledo muli jaaloomi woy Iso hagiirsiisate hasatto dinosi. Konni daafira gara ikkinokkire assino, hattono kaphu maganna magansiꞌrino. ‘Roobiaami Maganu seejjinosi seejjo adhinohu Yihowa hagiirsiisa hasiꞌreetinso mannu kakkayisinosi daafiraati?’ yite hedattora dandaatto. (2 Dud. 11:3, 4; 12:6) Isi hakkuyi gedensaannino busha coye assino. Roobiaami, ahaahisi Moote Daawitiwiinni lowo geeshsha baxxinoho. Daawiti cubbo loosinoha ikkirono giddosinni maaro xaꞌmirino, hattono Yihowanna halaalu magansiꞌra baxanno.—1 Mot. 14:8; Far. 51:1, 17; 63: 1.

Roobiaami xaggenni lowore rosa dandiineemmo. Maatenkera hasiisannonsare assanna Yihowara soqqamate sharrama danchate. Ikkollana Magano hagiirsiisanno garinni heeꞌrate, halaalu magansiꞌra irkisanna Yihowa ledo muli jaalooma kalaqiꞌra hasiissannonke.

Yihowara noonke baxilli lexxanno gede assiꞌrate sharrama hasiissannonke. Giira xoꞌannokki gede haqqe wora hasiissannonkete gede, Maganoho noonke baxilli baꞌꞌannokki gedeno Qaalesi ganyine xiinxalla, hiincanna jawaante huuccatto assiꞌra hasiissannonke. (Far. 1:2; Rom. 12:12) Yihowara noonke baxilli lexxiro, assineemmori baalu iso hagiirsiisannoha ikkanno. Isira noonke baxilli cubbo loonseemmo woyite giddonkenni maaro xaꞌmineemmo gede kakkayisannonke. Hatto ikkiro Roobiaami gede ikkikkinni ammanamme halaalu magansiꞌra giddo heeꞌra dandiineemmo.—Yih. 20, 21.