Gashshootu Beehami

Selemooni Yihowa magansiꞌranni noo yannara, Israeelete daga salaametenni heedhino. Ikkollana Selemooni wole gobbanni kaphu maganna magansiꞌrannoha duucha meento adhi. Kuni meenti, Selemooni yannate gedensaanni kaphu maganna magansiꞌranno gede assino. Tennera Yihowa lowo geeshsha hanqino. Isi Selemoonira togo yii: ‘Israeelete gashshoote atewiinni haaꞌre lamewa beeheemmo. Rooriidi gashshoote soqqamaanokki giddo mittoho eemmo; ate gaꞌrera shiimiidi gashshoote calla eemmo.’

Yihowa hedinore wolu garinnino xawisino. Mitto barra Iyorbiaami yinannihu Selemooni soqqamaanchi doogote haꞌranni heeꞌre, Akiya yinanni masaalaanchinni xaadi. Akiya uddiꞌrino uddano tonaalamewa daddare Iyorbiaamira togo yii: ‘Yihowa Israeelete gashshoote Selemooni mininni haaꞌre lamewa beehino. Tonne gaꞌre gashshattohu ate ikkootto daafira, konne tonne hocco adhi.’ Moote Selemooni tenne macciishshiti Iyorbiaami shaara hasi! Konni daafira Iyorbiaami Gibitsete gobba xooqi. Yannate gedensaanni, Selemooni reyita beettisi Roobiaami moote ikkino. Selemooni reyino daafira Iyorbiaami Israeelete gobba higi.

Israeelete geerri Roobiaami, ‘Konni mannira danchare assittoro, insano hajajantannohe’ yitusi. Darawosi kayinni togo yite amaaltusi: ‘Manna gadadisi. Annikkinni roore lowo duha duhisiisi!’ Roobiaami darawosi yitinosire macciishshi. Isi manna lowo geeshsha gadadisino; mannuno isira hajajama giwi. Hakkiinni mannu Iyorbiaami tonne gaꞌre moote assi; tonnenti gaꞌre Israeelete gashshoote yinannita ikkitu. Wole lame gaꞌre kayinni Yihudu gashshoote ikkitino; insa Roobiaamira haꞌlitino. Konni garinni Israeelenniti 12 gaꞌre beehantino.

Iyorbiaami mannisi Magano magansiꞌrate Yerusaalame haꞌrara dihasiꞌrino; Yerusaalame noohu Roobiaami gashshooti giddooti. Isi mannu hakka haꞌrara hasiꞌrinokkihu mayiraatiro afootto? Iyorbiaami mannu hakka haꞌriro anera agure Roobiaamira haꞌlanno yee hedino. Konni daafira isi lame siittu misile culkunni seekke manna togo yii: ‘Yerusaalame lowo geeshsha xeertote. Konni daafira kowiicho magansidhe.’ Hakkiinni mannu culkunni seekkinoonni siitta magansiꞌranni Yihowa hawi.