Yesuusi Iimira Haꞌri

BARRU lexxanni haꞌri kiiro, Yesuusi rosaanosira duuchcha hige leelli. Mitte yannara 500 saꞌanno rosaanora leellino. Insara leelli wote, marichcho kulinonsaro afootto? Maganu mangistere kulinonsa. Yihowa Yesuusa uullara soyinohu Mangistesire farciꞌranno gedeeti. Yesuusi konne looso reyotenni kai gedensaanni nafa loosino.

Maganu mangiste maatiro qaagatto? Eewa, iima nooho umosi dandiino Maganu gashshooteeti. Maganu mangistesira nugusa asse doorinohu Yesuusaati. Albaanni ronsummonte gede, Yesuusi hudidhinore itise, xiwantinore hursenna reyitinore nafa kayise konni albira dancha nugusa ikkannota leellishino!

Yesuusi iima nugusa ikke kume diro moohanno wote, uullate aana mayi ikkanno? Woꞌma uulla biifado gannate ikkitanno. Olu, jaddonna xibbu diheeꞌranno; woluri gateenna reyo nafa diheedhanno. Kuni ikkannota anfoommo; korkaatuno Maganu uulla kalaqinohu mannu hagiidhanni heeꞌranno gannate ikkitaraati. Hunda Edenete kaashshu base kalaqinohuno iseraati. Konni daafira Yesuusi baalanka coye Maganu ikkara hasiꞌrino gede assanno.

Yesuusi iimira higanno yanna iillitu. Isi rosaanosira leellanni 40 barra keeshshino. Konni daafira rosaanosi isi reyotenni kainota dihuluullantino. Yesuusi rosaanosi agure iimira haꞌrara albaanni togo yiinsa: ‘Qullaawa ayyaana adhitina geeshsha Yerusaalamete keeshshe.’ Qullaawu ayyaani Maganu loososi loosanno wolqaati; qoleno bubbissanno bubbe gedeeho. Kuni ayyaani Yesuusi rosaano Maganu fajjo assitanno gede kaaꞌlannonsa. Gedensaannino Yesuusi togo yiinsa: ‘Uullate qacce geeshsha anere farcidhinanni.’

Yesuusi hatto yee kaihu gedensaanni, mittu xagge ikkannori kalaqami. Koye misilete aana laꞌꞌattonte gede, Yesuusi iima hige haꞌri. Hakkiinnino gomichchu diwisita rosaanosi layinkita iso dilaꞌino. Yesuusi iimira haꞌre, uullate aana iso harunsitannore hakko heeꞌre gashsha hanafi.