Cuuama Maganunniwa Roore Shinqeemmo Gede Kaaꞌlitannonke

1. Silxaane noosihu mittu Itiyophphiyu manchi cuuamara xaꞌmiꞌrinohu mayiraati?

“KUNEETI kowiichcho wayi noona cuuama hoolannoeri mayi no?” Tini xaꞌmo umi sanira silxaane noosihu mittu Itiyophphiyu manchi xaꞌminote. Filiphphoosi yinanni Kiristaanchi konni manchira Yesuusi daanno yine qaale eꞌnoonni Mesihichcha ikkinota xawise kulino. Kuni Itiyophphiyu manchi Qullaawa Borronni rosinori hagiirsiisinosi daafira rosinore loosu aana hosiisate kaino. Isi cuuama hasiꞌrinota kulino!—Soqqamaanote Looso 8:26-36.

2. Cuuamate hajo hixamanynyite assaawa hasiissannohehu mayiraati?

² Yihowa Farciꞌraasine giddo mittu ledo konni maxaafita saꞌu fooliishshuwa seekkite xiinxalloottoha ikkiro, ‘Cuuama hoolannoeri isi mayi no?’ yite xaꞌmate qixxaawoottoha ikkara dandaanno. Qullaawu Maxaafi giddo noota gannatete hegere heeshsho heeꞌrate hexxo xa seekkite afootto. (Luqaasi 23:43; Ajuu[j]a 21:3, 4) Qoleno reyitinori noo garanna kaote hexxo rosootto. (Mekibibi 9:5; Yohaannisi 5:28, 29) Miteekkite Yihowa Farciꞌraasine gamba yitanno songowa hadhe halaalaancho ammaꞌna giddo noo manni ikkito illekkinni laoottoha ikkara dandaanno. (Yohaannisi 13:35) Hakkiinni saeno, Maganu Yihowa ledo gilletenni fiixooma jammaroottoha ikkara dandaanno.

3. (a) Yesuusi rosaanosira mayitanno hajajo uyino? (b) Kiristaanu cuuamannohu hiittoonniiti?

³ Maganoho soqqama hasiꞌrattota leellisha dandaattohu hiittoonniiti? Yesuusi rosaanosi togo yiino: ‘Hadhine manna duuchcha cuuꞌinanni rosaano asse.’ (Maatewoosi 28:19) Yesuusi umisi wayi giddo cuuame lawishsha ikkino. Isi cuuaminohu bisoho waa winxeenna diꞌꞌikkino; woyi umoonni qolle waa dunneenna diꞌꞌikkino. (Maatewoosi 3:16) “Cuua” yine tirroonnihu Girikete qaali “lixisa” yitanno tiro afiꞌrino. Konni daafira Kiristaanu cuuamannohu woꞌmunni woꞌma wayi giddo lixeeti.

4. Wayinni cuuama maa leellishshanno?

⁴ Wayinni cuuama Yihowa ledo fiixooma hasiꞌrannohura baalaho hasiissannote. Cuuama Maganoho soqqamate hasatto nooheta mannaho leellishshanno. Cuuamakki Yihowa fajjo assa hagiirsiissannoheta leellishshanno. (Faarso 40:7, 8) Ikkollana cuuama dandaatto gede assa hasiissannoheri no.

EGENNONNA AMMANA HASIISSANNO

5. (a) Cuuamate umo adha hasiissannohe qaafo hiitteeti? (b) Kiristaanu gambooshshi maaho kaaꞌlanno?

⁵ Umi qaafo adha jammarte nootto. Hiittoonni? Qullaawa Maxaafa ganynyite xiinxallakkinni Magano Yihowanna Yesuusi Kiristoosi lainohunni egenno afiꞌrootto. (Yohaannisi 17:3) Ikkollana rosattori gana lowori no. Kiristaanu “[Maganu] fajjotenni gara ikkitino egennonni woꞌma” hasiissannonsa. (Qolasiyaasi 1:9, NW) Togoo egennonni woꞌmate Yihowa Farciꞌraasineha songote gambooshshe beeqqa lowo geeshsha kaaꞌlitannohe. Togoo gambooshshe beeqqa lowo geeshsha hasiissannote. (Ibiraawuyaani 10:24, 25) Ganynyite gambooshshe beeqqakki Maganunnire ledde afatto gede kaaꞌlitannohe.

6. Cuuamate mageeshshiti Qullaawu Maxaafi egenno hasiissanno?

⁶ Ikkeennano cuuamate Qullaawu Maxaafi giddo noore baala afa dihasiissannohe. Silxaane noosihu Itiyophphiyu manchi gama egenno afiꞌrinoho; ikkollana Qullaawa Borrota mite mite kifile huwatate kaaꞌlo hasiissinosi. (Soqqamaanote Looso 8:30, 31) Hatteente gede, atino rosattori lowori no. Isinni, Maganunnire rosatto rosi digoofanno. (Mekibibi 3:11) Ikkeennano, cuuamattora albaanni Qullaawu Maxaafiha xinta ikkino roso huwatanna ammana hasiissannohe. (Ibiraawuyaani 5:12) Lawishshaho, reyitinori noo gara, Maganu suꞌminna Mangistesi hasiissannohu mayiraatiro afanna ammana hasiissannohe.

7. Qullaawa Maxaafa xiinxallakki ma assitahera hasiisanno?

⁷ Ikkollana ‘ammana nookkiha Magano hagiirsiisa dandiinannikkihura’ egenno calla baqe diꞌꞌikkitino. (Ibiraawuyaani 11:6) Biꞌre Qorontoosi katamira heeꞌrinohu mitu mitu manni Kiristaanu sabbakino sibikate macciishshihu gedensaanni, ‘ammane cuuaminota’ Qullaawu Maxaafi kulannonke. (Soqqamaanote Looso 18:8) Insante gede, Qullaawa Maxaafa xiinxallakki Qullaawu Maxaafi ayyaanunni borreessaminoha Maganu Qaale ikkinota ammanatto gede assitahera hasiisanno. Qullaawa Maxaafa xiinxallakki, Maganu uyino hexxo ammanatto gedenna Yesuusiti wodote kakkalo manna gatisate wolqa afidhinota ammanatto gede assitahera hasiisanno.—Iyyaasu 23:14; Soqqamaanote Looso 4:12; 2 Ximootewosi 3:16, 17.

QULLAAWU MAXAAFI HALAALE WOLEHO KULI

8. Rosoottore woleho kulate kakkayisannoheri maati?

⁸ Ammanakki lexxitanni hadhuro, afoottore mannaho kulittokki sammi yite diafatto. (Ermiyaasi 20:9) Maganunnirenna alaamasi woleho kulate lowo geeshsha quqquxamatto.—2 Qorontoosi 4:13.

9, 10. (a) Qullaawu Maxaafi halaale ayeoora kulte jammara dandaatto? (b) Yihowa Farciꞌraasine ledo darajjaino garinni sabbaka hasiꞌrittoro ma assa hasiissannohe?

⁹ Qullaawu Maxaafi halaale fiixikkira, jaallakkira, olliikkiranna ledokki loosanno mannira kulatenni jammara dandaatto; tenne assatto woyite hayyotenni assi. Yannate gedensaanni darajjaino garinni Yihowa Farciꞌraasine ledo sabbaka dandaatto. Tenne hajo lainohunni Qullaawa Maxaafa rosiisihe Farciꞌraasinchi ledo hasaawa waajjitooti. Faajjete sabbakate deerra iillittoro, atinna rosiisihe Farciꞌraasinchi, lame songote cimeeyye ledo hasaabbinanni gede qixxaawo assinanni.

¹⁰ Tini qixxaawo Maganu geꞌreewi allaalaasine ledo yaano Kiristaanu songo cimeeyye ledo seekkite egennamatto gede kaaꞌlitannohe. (Soqqamaanote Looso 20:28; 1 Pheexiroosi 5:2, 3) Tini cimeeyye Qullaawu Maxaafiha xinta ikkino roso huwatoottotanna ammanattota, Maganu qaali garinni heeꞌrakki, qoleno addinta Yihowa Farciꞌraasincho ikka hasiꞌrattotanna teꞌee buuxxanno. Hakkiinnino cuuamoottokki halashshaancho ikkite faajjete sabbaka dandaattota kultannohe.

11. Mitu mitu manni faajjete sabbaka dandaanno gede maa agura hasiissannonsa?

¹¹ Wole ragaanni kayinni faajjete sabbaka dandaatto gede, heeshshokki giddo mite mite soorro assanna mito mito amale agura hasiissannoheha ikkara dandaanno. Agura hasiissannohe coyi giddo gamu, wolu mannira maaxxe keeshshoottore ikkara dandaanno. Konni daafira, cuuamoottokki halashshaancho ikkate xaꞌmiꞌrakkira albaanni kabbaade ikkino cubbiwiinni, yaano soorro, dimba, hashiishe aganna caate ita lawinore xooqa hasiissannohe.—1 Qorontoosi 6:9, 10; Galatiya 5:19-21.

MAARO EANNA SOORRAMA

12. Maaro ea hasiissannohu mayiraati?

¹² Cuuama dandaatto gede assa hasiissannoheri wolurino no. Hawaariya Pheexiroosi, ‘Cubbiꞌne hayishshamanno gede [maaro eꞌe, hattono soorramme]’ yiino. (Soqqamaanote Looso 3:19) Maaro ea yaa assootto cubbira giddokkinni gaabbate yaate. Maaeela heeshsho heeꞌranno manchi maaro ea hasiissannositi dihuluullammannite. Ikkollana maaeela heeshsho heeꞌrannokki manchi nafa maaro ea hasiissannosi. Mayira? Korkaatuno mannu ooso baala cubbaataamma ikkitinohura Maganu maaro hasiissannonsa. (Roomu Sokka 3:23; 5:12) Qullaawa Maxaafa xiinxallakkira albaanni Maganu fajjo maatiro diafootto. Maganu fajjo maatiro afittokki fajjosi garinni heeꞌra didandaatto. Konni daafira maaro ea hasiissannote.

13. Soorrama yaa mayyaate?

¹³ Maaro eino manchi ‘soorrama’ woyi albi doogosinni higa hasiissannosi. Maaro ea gaabba calla diꞌꞌikkitino. Konni albaanni heeꞌratto heeshsho aguratenna dancha ikkino coye assate qodhite kaꞌꞌa hasiissannohe. Cuuamakkira albaanni maaro eanna soorrama hasiissannohe.

ATENEETO MAGANOHO SAYISSE AA

14. Cuuamakkira albaanni assa hasiissannohehu qaru coyi maati?

¹⁴ Cuuamakkira albaanni assa hasiissannohehu wolu qaru coyi no. Hakkuno ateneeto Yihowara sayisse aate.

15, 16. Meessaneeto Maganoho aa yaa mayyaate? Mitto mancho hatto assate kakkayisannosihu maati?

¹⁵ Woꞌmu wodani huuccattonni ateneeto Yihowara sayisse aatto wote, hegerera isiha calla ikkate qaale eatto. (Marro 6:15) Mittu manchi togoo qaale eannohu mayiraati? Lawishshaho, mittu beetti mitte beetto adhara coyiꞌramino yine hendo. Ise roore afanni haꞌranno wotenna danchu akati nooseta buuxiro tini beetto roore baxissanni hadhannosi. Yannate gedensaanni tenne beetto adhara huucciꞌranno. Seenne adha halaafinate leddannoti dikaandannite. Ikkollana tenne beettora noosi baxilli ise adhanno gede assannosi.

¹⁶ Atino Yihowa affanninna baxxanni haꞌrittoro ateneeto qooffatittokki isira soqqamate kakkaꞌꞌatto. Maganu Beetto Yesuusi Kiristoosi harunsa hasiꞌrannohu ayiino “umosi [kaada]” hasiissannosi. (Maarqoosi 8:34) Gillenke hasattonna iqqidenke Maganoho woꞌmunni woꞌma hajajammeemmota hooltannonkekki gede umonke kaada hasiissannonke. Konni daafira, cuuamakkira albaanni Yihowa fajjo assa heeshshokki giddo qara coye ikka hasiissannose.—1 Pheexiroosi 4:2.

GUFIRUMMORONA YITANNO WAAJJA QEELA

17. Mitu manni insaneeto Maganoho sayise aate hobbi ruxxi yaannohu mayiraati?

¹⁷ Mitu manni gufirummorona yee waajjanno daafira, insaneeto Yihowara sayise aate hobbi ruxxi yaanno. Aneneeto Maganoho sayise uummoro Maganu albaanni xaꞌmameemmo yee waajjara dandaanno. Soꞌro loose Yihowa dadilliseemmo yee waajjanno daafira, insaneeto Yihowara sayise aa hooga woyyitannoha lawannonsa.

18. Ateneeto Yihowara sayisse aatto gede kakkayisannoheri maati?

¹⁸ Yihowara noohe baxilli lexxanni haꞌriro, ateneeto isira sayisse aatenna eootto qaale agadhate kakkaꞌꞌatto. (Mekibibi 5:4) Ateneeto Maganoho sayisse uyitto gedensaanni, “Yihowa woꞌmunni woꞌma hagiirsiisanna isi hasiꞌranno garinni heeꞌra” hasiꞌrakki digattanno. (Qolasiyaasi 1:10, NW) Maganoho noohe baxilli fajjosi assa gooddo ikkite leeltannohekki gede assanno. Konni daafira hawaariya Yohaannisi yiinori ledo sumuu yaattoti dihuluullissanno. Isi togo yee borreessino: “Magano baxa hajajosi agadhate, hajajosino diqarrissannote.”—1 Yohaannisi 5:3.

19. Ateneeto Maganoho sayisse aa waajja hasiissannohekkihu mayiraati?

¹⁹ Ateneeto Maganoho sayise aate guuta ikka dihasiissannohe. Yihowa wolqakki deerra afino; qoleno wolqakkira alee ikkinore assattora dihasiꞌranno. (Faarso 103:14) Isi qinaahera hasiꞌranno daafira kaaꞌlannohe; qoleno irkisannohe. (Isayyaasi 41:10) Woꞌmu wodanikkinni Yihowa addaxxattoha ikkiro, “doogokki suwashsho assannota” huluullantooti.—Lawishsha 3:5, 6.

ATENEETO MAGANOHO SAYISSE OOTTOTA CUUAMATENNI LEELLISHA

20. Meessaneeto Yihowara sayise aa mannu afikki gattannota ikkitinokkihu mayiraati?

²⁰ Aleenni xawinsoonnire seekkite huwatakki gillekkinni ateneeto huuccattotenni Yihowara sayisse aate kaaꞌlitahera dandiitanno. Qoleno Yihowara addu baxilli noosihu ayee manchino ‘gato afiꞌrate ammanasi faajjete xawisa’ hasiissannosi. (Roomu Sokka 10:10, NW) Ammanakki faajjete xawisa dandaattohu hiittoonniiti?

21, 22. Ammanakki “faajjete xawisa” dandaattohu hiittoonniiti?

²¹ Cuuama hasiꞌrattota songoꞌne cimeeyye bisi qineessaanchira kuli. Isi gama cimeeyye ledo Qullaawu Maxaafiha xinta ikkino roso addi addi xaꞌmonni ledde hasaawatto gede qixxaawo assanno. Tini cimeeyye cuuama dandaatto yite wossanturo, aane noohura jawu gambooshshira cuuama dandaattota kultannohe.a Duuchcha wote togoo gambooshshira, cuuama yaa mayyaatero Maganu qaalinni xawinsanni. Cuuamate yannara qaale kulannohu, cuuantannori qoltanno gede lame xaꞌmo xaꞌmannonsa; tini xaꞌmo cuuantannori ammanansa “faajjete xawisate” kaaꞌlitannonsa.

²² Cuuama ateneeto Maganoho sayisse oottotanna hakkiinni jammarte Yihowa Farciꞌraasincho ikkoottota faajjete leellishshanno. Cuuantannori mannimmansa gudisse wayi giddora eessite insaneeto Yihowara sayisse uyitinota mannaho leellishshanno.

CUUAMAKKI MAYI TIRO AFIDHINO?

23. “Annunni, Beettunninna Qullaawu Ayyaani suꞌminni” cuuama yaa mayyaate?

²³ Yesuusi rosaanosi “Annunni Beettunninna Qullaawu Ayyaani suꞌminni” cuuantannota xawisino. (Maatewoosi 28:19) Togo yaa cuuamanno manchi Yihowatanna Yesuusi Kiristoosi silxaane huwatanna ammana hasiissannosi yaate. (Faarso 83:18; Maatewoosi 28:18) Qoleno Maganunnihu qullaawu ayyaani yaano Maganunniti loosu aana noo wolqa maa assitannoro huwata hasiissannosi.—Galatiya 5:22, 23; 2 Pheexiroosi 1:21.

24, 25. (a) Cuuama maa leellishshanno? (b) Dawaro afiꞌra hasiissannonke xaꞌmo hiitteeti?

²⁴ Ikkollana cuuama wayi giddora eꞌꞌe fula calla ikkitukkinni, mittu hasiisanno coyira malaateho. Wayi giddora gudisante eakki albi heeshshora reyottota leellishshanno. Wayi giddonni fulakki kayinni xaate Maganu fajjo assitanni heeꞌrattota leellishshannote. Qoleno ateneeto sayisse oottohu mittu loosira, mittu alaamira, mannaho woyi mitte dirijjitera ikkikkinni Yihowara ikkinota qaagi. Ateneeto Yihowara sayisse aakkinna cuuamakki Maganu ledo muli jaalooma kalaqiꞌrate hanafote.—Faarso 25:14.

²⁵ Cuuama calla digatissanno. Hawaariya Phaawuloosi togo yee borreessino: “Waajjatenninna [huxiꞌratenni] umiꞌne gato kaajjishidhe.” (Filiphphisiyusi 2:12) Cuuama gato afiꞌrate hanafotella. Xa kayinni, Maganu baxillinni fulittokki heeꞌra dandaattohu hiittoonniiti? yitannotera hasiissanno xaꞌmora dawaro afiꞌra hasiissannonke. Goofimarchu fooliishsho tenne xaꞌmora dawaro qoltanno.