Annasenna Yihowa Hagiirsiissino

Misilete aana qaaqqo leeltannohe?— Ise Yoftahe yinanni manchite. Qullaawu Maxaafi ise suꞌma dikulanno, ikkirono ise annasenna Yihowa hagiirsiissinota anfoommo. Hanni isetanna annise Yoftahe xagge ronso.

Yoftahe dancha manchooti; isi qaaqqosira Yihoware dancha gede rosiise lossiꞌrino. Qoleno isi worbahonna dancha sooreessaati. Konni daafira Isiraeele diinnansa ledo olamate kaaꞌlannonsa gede kuꞌlitu.

Yoftahe ola qeelate Magano huucciꞌri. Qoleno konne ola qeelummoro, qeele higeemmo wote miniꞌyanni balaxe fule haarannoeha Yihowara eemmo yee xano xaꞌnino. Kuni Maganoho uyinanni manchi hatte yannanni jammare xaadooshshu dunkaanira Maganoho calla soqqamanni heeꞌranno. Xaadooshshu dunkaani, hakkawaro mannu Magano magansiꞌrara haꞌranno bayichooti. Yoftahe olame qeele higi! Olu basenni qae higi wote haarasira minisinni balaxe fulinohu ayetiro afootto?—

Balaxxe fultinoti beettosiiti! Isira noosi qaaqqo ise callaati; ise xaate Yoftahewiinni baxxite heedharaati. Hakko daafira isi lowo geeshsha dadillino. Kayinni wonanni eemmo yee kaino. Beettosi hakkawontenni togo yitusi: ‘Anna, Yihowara wonanni coyidhe kaootto; hakko daafira yoottore wonshite aguri.’

Yoftahe beettono lowo geeshsha dadillitino. Ise xaadooshshu dunkaanira heedhe mine assiꞌranna ooso ila didandiitanno. Ikkirono annise xano wonshite Yihowa hagiirsiisa lowonta hasidhino. Ise mine assiꞌrantenni woy ooso ile lossiꞌrantenni tenne assa hasidhino. Konni daafira qaensanni agurte hadhe xaadooshshu dunkaanira heeꞌra jammartu.

Ise assitinori annasenna Yihowa hagiirsiisinoha lawannohe?— Ee, hagiirsiisino! Atino hajajamattohanna Yihowa baxattoha ikkiro, Yoftahe beetto gede ikkatto. Atino annakkino amakkino, Yihowano lowo geeshsha hagiirsiisatto.