Yofitahe Eino Qaale

Israeele xaano Yihowa agurte kaphu maganna magansiꞌrate higgu. Amooni daga Israeelete manna gawajjitunna qassunsa yannara kaphu maganna horo dikaaꞌlitinonsa. Israeelete daga lowo diro gadadinsoonninsa. Yannate gedensaanni insa Yihowa togo yitu: ‘Cubbo loonsoommo. Eeggatena baarigaarranke anganni gatisinke.’ Israeele kaphu magannansa hunte galagalte Yihowa magansidhu. Yihowa insa gadadaaꞌmite heedhara dihasiꞌrino.

Yihowa Israeele Amooni daga ledo olantara haaꞌre haꞌranno gede Yofitahe yinanni olamaancho doori. Yofitahe Yihowara togo yee qaale ei: ‘Amooni daga qeelleemmo gede kaaꞌlittonkero, miniꞌyara higeemmo woyite miniꞌyanni haaꞌraera fulannoha atera eemmo.’ Yihowa Yofitahe huuccatto macciishshe olame qeelanno gede kaaꞌlisi.

Yofitahe minisira higi woyite, iso haadhara balaxxe minisinni fultinoti beettosiiti; Yofitahera ise agurranna wole ooso dinosi. Ise kubbitanninna dibbe gantanni fultu. Yofitahe maa assinoro afootto? Isi Maganoho eino qaale qaage togo yii: ‘Baummo beettoꞌya! Shettote aana tugittae. Yihowara qaale eoommo. Eoommo qaale wonshate ati Seelo katama hadhe qullaawu dunkaanira soqqamatta.’ Beettosi kayinni togo yitu: ‘Yihowara qaale eoottoha ikkiro, eootto qaale wonshi. Kayinnilla seennu jaallaꞌya ledo ilaala haꞌre lame agana hakko keeshsheemma gede fajjie. Hakkuyi gedensaanni haꞌreemma.’ Yofitahe beetto lubbote noo geeshsha qullaawu dunkaanira Maganoho ammanante soqqantino. Diru dirunkunni jaallase Seelo katama hadhe laꞌannose.