Ammanama Magano Hagiirsiinsanni Gede Assitanno

1, 2. Yoftaheranna beettosira hiikku fonqoli tuncu yiinonsa?

MITTE yaadde baꞌinoti aja beetto annase galaalchitanni keeshshitino. Annise olu bayichinni hobbaate higanna laꞌuti baasa hagiidhitu; ise ola qeele dayino annase daae yitara doddanni fultu. Isi kayinni ise ledo hagiidha agure olu bayicho dana baꞌino uddanosi dare togo yaanni wiꞌli: “Ballo beettoꞌya! Wodanaꞌyawe hiiqqitta.” Hakkiinnino isi beettosi gedenso soorrannore coyiꞌri; kuni ise halchitinorenna hexxitinore baala agurtanno gede assannoho. Ise kayinni mittoreno xiixantukkinni annise Yihowara eino qaale wonshanno gede jawaachishshusi. Ise coyidhinori jawaata ammana nooseta leellishannoreeti. Yihowa ise assi yaannori baalu isera horoomannoha ikkinota ammantanno. (Mes. 11:34-37) Annise, beettosi isi assate hedinorira kaaꞌlate maahoyye yaase Yihowa tashshi assitannota afasi hagiirsiissinosi.

² Yoftahenna Magano waajjitanno beettosi Yihowa addaxxino, hattono isi gara ikkino coye assannota ammanannota leellishino; insara tenne assa shota ikka hooggurono Maganoho ammanamino. Insa Magano hagiirsiisate yine meessi horo agura hasiissannota seekke afino.

3. Yoftahenna beettosi lawishshi xaa yannara kaaꞌlannonkehu hiittoonniiti?

³ Yihowara ammanamme heeꞌra duuchanka wote shota ikkitanno yaa diꞌꞌikkino. Hakko daafira “ammanate gaarama” hasiissannonke. (Yih. 3) Yoftaheranna beettosira tuncu yeennansa dandee saino qarri daafira laꞌꞌanke tenne assate kaaꞌlitannonke. Insa Yihowara ammanaminohu hiittoonniiti?

ALAME XIXXIIBBUꞌNERONO AMMANANTINE HEEDHE

4, 5. (a) Yihowa Isiraeele Hexxote Gobba eꞌu yannara mayyee hajajinonsa? (b) Isiraeele hajajama giwansa Faarso 106 aana kulloonni garinni mayi qarra abbitinonsa?

⁴ Yoftahenna beettosi Yihowara ammanama hooga lowore daaffannota barru baala hedanno. Mitu 300 diri albaanni Isiraeele Hexxote Gobba eꞌanno yannara hakko heeꞌrannoha busha manna baala guddanno gede hajanjoonninsa. (Marro 7:1-4) Isiraeele tenne hajajora hajajama hoogansa insa giddo batinyu hatte gobbate kaphu maganna, hakko heeꞌrannohu bushu manninna amanyoote baino assootinsa ledo quraanyante Kanaani mannita cubbu doogo harunsitanno gede assitinonsa.—Faarso 106:34, 35, 39 nabbawi;^[1] Far. 106:36-38.

⁵ Insa hakko garinni finqiltinohura Yihowa hagiirsiissukki gattino; qoleno hatte yannanni kayise isi insara albi gede golama agurino. (Mes. 2:1-3, 11-15; Far. 106:40-43) Hakka waro heedhinote Magano waajjitanno maatera, Yihowara ammaname heeꞌra shota ikkitannonsakkiti egennantinote. Ikkollana, Qullaawu Maxaafi hakkawaro ammanaminohu Yoftahenna beettosi, Hilqaana, Haannanna Saamueeli gedeehu Magano hagiirsiisate sharramanno manni noota kulannonke.—1 Sam. 1:20-28; 2:26.

6. Xaa yannara alame maa assineemmo gede xixxiibbannonke? Ninke maa assa hasiissannonke?

⁶ Tini heeꞌnoommo alameno alba Kanaani gobbara heeꞌrino gedee manni heeꞌrannote; insa siimu xaadonna finqille kaffi asse laꞌꞌanno, hattono woxe baxanno. Yihowa alba Isiraeelete assinte gede ninkeno kuri coyibbawiinni umonke agadhineemmo gede xawe leellanno qorowishsha uyinonke. Isiraeele loossino soꞌronni ronseemmo rosi no? (1 Qor. 10:6-11) Heeshshonke giddo Kanaani mannira noonsa gedee lao heedhannonkekki gede sharrama hasiissannonke. (Rom. 12:2) Ikkina ammanammoommore ikkate dandiinummore baala assinanni heeꞌnoommo?

DADILLISANNORI HEEꞌRIRONO AMMANAMME HEEꞌRA

7. (a) Yoftahera fiixisi maa assinosi? (b) Yoftahe tennera maa assiyya?

⁷ Yoftahe waro, Isiraeele hajajama gibbinohura Filisxeemetenna Amooni mannira borojje ikkitino. (Mes. 10:7, 8) Yoftahera qarru iillinosihu diinnasi wido ikkino manniwiinni calla ikkikkinni isi umisi roduuwinna Isiraaeelete sooreeyyewiinniiti. Roduuwisi hinaassinohuranna iso gibbinohura bayira beetto ikkasinni afiꞌranno ragge hoꞌlite hatte gobbanni fule haꞌranno gede assitinosi. (Mes. 11:1-3) Yoftahe insahu bushu akati hedosi soorrasira diwodhino. Isinni isi hatte daga cimeeyye kaaꞌlo hasidhe woxarattu yannara afinokkihu gede ikke saꞌꞌa agure kaaꞌlinonsa. (Mes. 11:4-11) Yoftahe ammana noosita leellishannoha konne assoote assanno gede kakkayisinosiri maa ikkara dandaanno?

8, 9. (a) Yoftahe kaaꞌlitinoti Muse Higge giddo noote hiittenne seerubba ikkitara dandiitanno? (b) Yoftahe kaffi asse laꞌꞌanno coyi maati?

⁸ Yoftahe wolqaataamo olamaancho calla ikkikkinni Maganoho alba mannisi ledo noosi xaadooshshi daafirano afinoho. Yoftahe Isiraeelete xagge seekke afasi Yihowa albaanni gara ikkinohanna gara ikkinokki coye bade afanno gede kaaꞌlitinosi. (Mes. 11:12-27) Muse Higge giddo nooti Maganu fushshino seerubba Yoftahe hedosinna wodanasi qajeelsiꞌranno gede kaaꞌlitinosi. Isi Yihowa koma amaxxinannita baxannokkita afino; hatteentenni Maganu mannisi insa insanaawa baxamara hasiꞌranno. Qoleno Muse Higge ‘giwannonke’ mannira nafa hasiisannonsare hoꞌla gara ikkitinokkita kultanno.—Wolapho 23:5;^[2] Zel. 19:17; Zelewaawuyaani 19:18 nabbawi.^[3]

⁹ Yooseefinna wolu ammanamino manni lawishshino Yoftahera gara ikkitino hedo heedhannosi gede kaaꞌlinosiha ikkara dandaanno; Yooseefi roduuwisi ‘gibbinosiha’ ikkirono gatona yiinonsa. (Kal. 37:4; 45:4, 5) Yoftahe tenne xagge hiincasi Yihowa hagiirsiisannore assanno gede kaaꞌlitusikki digattino. Roduuwisi assinori koffi assinositi egennantinote; ikkirono tini Yihowaranna mannisira soqqamannokki gede ataawe ikkitasira diwodhino. (Mes. 11:9) Yoftahera mannu ledo kawa kaꞌaa higino coyi nooha ikkirono, isi baalunku coyinni roorse Yihowa suꞌmira gaaramino. Isi Yihowara ammanaminoha ikkate murciꞌre kaino; tini qolte isirano wolu mannirano kaaꞌlitino.—Ibi. 11:32, 33.

10. Xaa yannara Maganu seerubba harunsanke ayyaanaamittete lao heedhannonke gede kaaꞌlitannonkehu hiittoonniiti?

¹⁰ Ninke Yoftahe lawishshinni maa ronseemmo? Mittu rodii woy rodoo dadillisinonkeha ikkara dandaanno. Hatto ikkiro tini Kiristaanu gambooshshe haꞌra, Yihowara soqqamanna songonniwa gambo gimbeemmo gede assitankera wodha dihasiissannonke. Yoftahe lawishsha harunsine, dadillisanno coye qeele saꞌꞌate Maganu biddishsha harunsanna wolu mannira dancha lawishsha ikka dandiineemmo.—Rom. 12:20, 21; Qol. 3:13.

UMINKE FAJJONNI MEESSI HOꞌRO AGURA AMMANANKE LEELLISHSHANNO

11, 12. Yoftahe mayyee xaꞌnino? Tini xano mayi tiro afidhino?

¹¹ Yoftahe Isiraeele Amooni manni anganni gatisate Yihowa kaaꞌlo hasiissannosita huwatino. Isi Yihowa qeelanno gede kaaꞌlisiro olu bayichinni higanno yannara minisinni balaxe fulannoha “shilqinshe shiqinshanni kakkalo” asse shiqishate qaale eino. (Mes. 11:30, 31) Tini xano mayi tiro afidhinote?

¹² Yihowa manna kakkallannita effire giwanno. Konnira, Yoftahe manna kakkalate hedinokkiti egennantinote. (Marro 18:9, 10) Muse Higge giddo shilqinshe shiqinshanni kakkalo woꞌmunni woꞌma Yihowara uyinanni gede hajanjoonni; hakko daafira Yoftahe beettosi Yihowara woꞌmunni woꞌma soqqantanno gede uyinoti dihuluullissannote. Yoftahe konne qaale einohu hakku kakkalo assine shiqinshanni manchi heeshshosi diro woꞌma xaadooshshu dunkaani giddo soqqamannota hedeeti. Yihowa Yoftahe eino qaale macciishshe diinnasi woꞌmunni woꞌma qeelanno gede asse maassiꞌrinosi. (Mes. 11:32, 33) Ikkina Yoftahe Maganoho “shilqinshe shiqinshanni kakkalo” asse aye shiqisharaatiyya?

13, 14. Mesaafinti 11:35 giddo borreessinoonniri Yoftahe ammana daafira maa kulannonke?

¹³ Hanni xa konni birxichi hanafora kulli xagge qaagi. Yoftahe olu bayichinni higi yannara iso haaꞌrate fultinoti baxanno beettosiiti; ise isira noosi toleeti! Xa isira fonqolanno coyi tuncu yiinosi. Isi eino qaale wonshe beettosi konni kaꞌa xaadooshshu dunkaani giddo soqqantanno gede Yihowara aa ikka?

¹⁴ Xaano Yoftahe gara ikkino doorsha doodhate Maganu seerubba harunsa hasiissinosi. Isi Wolapho 23:19 aana noota Maganu manni noonsari giddo umo afiꞌrinoha Yihowara aanno gede kultanno hajajo qaaginoha ikkara dandaanno. Qoleno Higge mittu manchi xano xaꞌniro hattenne xano wonsha hasiissannosita kultanni togo yitanno: “Mittu manchi Yihowara xano xaꞌniro . . . , eino qaale wonshikkinni gata dihasiissannosi. Isi xaꞌnino xano baalanta wonsha hasiissannosi.” (Zeh. 30:2) Yoftahe eino qaali isitano beettositano albillittete heeshsho soorrannoha ikkirono ammanantino mancho Haanna gede xaꞌnino xano wonshino; Haanna heedhinohu Yoftahe waro ikkara dandaanno. Isira wole ooso dinosi; hattono albillitte ooso ilte sircho sayissannoti, suꞌmisi woshshamanno gede assitannotinna ragge adhitannoti iseeti. (Mes. 11:34) Ikkirono, Mesaafinti 11:35 anna Yoftahe “ani mitte hige Yihowara qaale eoommo; konnira eoommo qaale soorra didandeemmo” yee coyiꞌrino. Yoftahe umisi horo aguranno gede assannori tuncu yiisirono konni garinni ammanaminoha ikke Magano hagiirsiisino; konnira Maganu maassiꞌrinosi. Ate ikkoottoro hatto assatto?

15. Ninke mayine qaale eꞌnoommo? Ammanammoommore ikkinoommota leellisha dandiineemmohu hiittoonniiti?

¹⁵ Ninkeneeto Yihowara sayinse uyinummo yannara qooffantummokkinni isi fajjo assineemmo yine qaale eꞌnoommo. Konne qaale agadhe heeꞌrate meessi horo agura hasiissannoti egennantinote. Ikkollana, hakko iso mitto assa banxeemmokki coye assineemmo gede kullanninke yannara tenne assa shota diꞌꞌikkitanno. Uminke horo agurre Maganoho soqqamate yine ninkera injaannonkere agurremmoha ikkiro ammanammoommore ikkinoommota leellinsheemmo. Tenne assa shota ikka hooggurono togo assanke duuchanka wote lowo atoote afiꞌneemmo gede assitannonke. (Mil. 3:10) Yoftahe beetto maa assituyya?

16. Yoftahe beettora annise eino qaali daafira mayi macciishshaminose? (Hanafote noo misile lai.)

¹⁶ Yoftahe beettora, annise xaꞌnino xano adha shota diꞌꞌikkitinose. Yoftahe xaꞌnino xano Haanna xaꞌnitino xanonni baxxitinote; Haanna Saamueeli Naaziraawicha ikke xaadooshshu dunkaani giddo soqqamanno gede Maganoho uyitino. (1 Sam. 1:11) Naaziraawichu seenne adhe maate kalaqira dandaanno. Yoftahe beetto kayinni “shilqinshe shiqinshanni kakkalo” gede ikkitannohura mine assiꞌranna ooso ila didandiitanno. (Mes. 11:37-40) Yoftahe beetto annise ola qeelinohanna Isiraaeelete sooreessa ikkinohura ise hatte gobbara maccaha ikkino manchira assidhannoha ikkara dandaanno. Ikkollana ise xaate xaadooshshu dunkaani giddo umose heeshshi assite Maganoho soqqantaraati. Tini aja beetto maa assituyya? Ise Yihowara soqqama balaxisiissino; hakko daafira togo yitino: “Anna; Yihowara qaale eoottoha ikkiro, eootto qaale wonshi.” (Mes. 11:36) Ise kalaqamu hasattose yaano mine assiꞌranna ooso ila agurte addu magansiꞌra halashsha doodhitino. Ninke ise faale haꞌra dandiineemmohu hiittoonniiti?

17. (a) Yoftahenna beettosi ammana faale haꞌra dandiineemmohu hiittoonniiti? (b) Ibiraawuyaani 6:10-12 aana noo hedo umikki horo aguratto gede jawaachishshannohehu hiittoonniiti?

¹⁷ Lowo kume ikkannohu Kiristaanu wedelli, Yihowara woꞌmunni woꞌma soqqamate yee uminsa fajjonni yannate geeshsha mine kalaqira woy ooso ila hooga doodhino. Jajjabbu roduuwino oosonsanna oosonsa ooso ledo yanna sayisa baxisannonsaha ikkirono, insa kayinni yannansa Maganu mine minate, Maganu Mangiste Sawaakooti Rosi Minira eate, hattono sabbakkannori roore hasiissannowa haꞌre farciꞌrate horoonsiꞌranno. Wolootu qolte uminsa dilgo agurte, Qaagooshshu Ayyaani woggara zamachunni soqqantanno. Konni garinni Yihowara woꞌmu wodaninni soqqama iso hagiirsiissanno; isi qole insa loossanno loosonna iso baxxannota leellishate assitannore dihawanno. (Ibiraawuyaani 6:10-12 nabbawi.^[4]) Yihowara woꞌmunni woꞌma soqqamate albinni roore umikki horo agura dandaatto?

MAA RONSOOMMO?

18, 19. Yoftahenna beettosi daafira kultannote Qullaawu Maxaafi xaggenni maa ronsoommo? Ninke insa faale haꞌra dandiineemmohu hiittoonniiti?

¹⁸ Yoftahera lowo qarri tuncu yiinosiha ikkirono; heeshshosi Yihowa massagannosi gede assiꞌrino. Isi mannu xixxiiwasira diwodhino. Mannu dadillisannore assinosiha ikkirono tini Yihowara ammaname heeꞌrannokki gede diassitinosi. Isinna beettosi fajjonsanni uminsa horo aguransa atoote abbitinonsa; korkaatuno Yihowa lamenka addu magansiꞌra halashshate horoonsiꞌrino. Hakkawaro wolu manni Maganu biddishshuwa lashshi assino; Yoftahenna beettosi kayinni Yihowa biddishshuwa seekke harunsino.

¹⁹ Qullaawu Maxaafi ‘Maganu qaale eino coye ammanatenninna cincatenni ragidhannore lambeemmo’ gede jawaachishannonke. (Ibi. 6:12) Konnira ninkeno ammanama Yihowa maassiꞌrannonke gede assitannota anfe Yoftahenna beettosi faale haꞌno.