Israeele Yihowara Qaale Eꞌu

Israeelete manni Gibitsete gobbanni fulihunni mitu lamu agani gedensaanni, Siina yinanni ilaala iilli; hakkiicho dunkaana qasiꞌre heeꞌrino. Yihowa Muse ilaalunniwa woshshe togo yii: ‘Israeelete manna gatisoommonsa. Insa anera hajajanturonna seeraꞌya agadhituro, baatto baalate noo manniwiinni baxxite ane manna ikkitanno.’ Muse Israeelete manniwa mare Yihowa yiinore kulinsa. Isi Yihowa yiinore kulinsata insa mayitinoro afootto? ‘Yihowa asse yaannonkere baalare assineemmo’ yitino.

Muse xaano ilaala haꞌri. Hakkiicho Yihowa togo yiisi: ‘Eembarra ate ledo hasaaweemmona, mannu Siina Ilaala giddannokki gede kuli.’ Muse ilaalu aaninni dirre Israeelete mannira ‘Yihowa kulannoꞌnere macciishshate qixxaabbe’ yiinsa.

Sayikki barra Israeelete manni ilaalu aana beleqonna tunsino gomicho lai. Qoleno insa banqotenna xurumbu luulo macciishshi. Hakkiinni Yihowa ilaalu aanira giiratenni dirri. Israeelete manni waajje huxiri. Siina Ilaalino huxiri, hattono ilaala wiliile dibbu. Xurumbu luulino lexxanni haꞌri. Hakkiinni Maganu togo yii: ‘Ani Yihowaati. Ane agurranna wole maganna magansidhinoonte.’

Muse galagale ilaala haꞌreenna hakko Yihowa seera kulisi; kuni seeri mannu Iso magansiꞌranno gara, hattono assa hasiissannonsarenna assa hasiissannonsakkire kulannoho. Muse Yihowa kulinosi seera borreesse Israeelete mannira nabbawinsa. Hakkiinni insa ‘Yihowa yaannonkere baala assineemmo’ yitu. Ee, Israeelete manni Yihowara qaale eino. Kayinni insa eino qaale wonshiyya?