Yihowa Dagasira Higgesi Uyi

ISIRAEELE Gibitsetenni fultuhunni lamu agani gedensaanni, Siina Ilaala woyi Korebi yinanni ilaala iillitu. Yihowa Muse buwanno citi giddonni coyishiishisihuno hakkooti. Mannuno hakkiichcho shiima yanna heeꞌri.

Mannu ilaalu woroonni agaranna Muse ilaala giddi. Ilaalaho guunxoteno, Yihowa Isiraeelete manni isira hajajantanno gedenna isira baxxitino daga ikkitara hasiꞌrannota Musera kulisi. Muse ilaalunni dirre Isiraeelete Yihowa yiinota kulinsa. Insano Yihowara dagasi ikka hasidhino daafira, isira hajajammeemmo yitu.

Hakkiinnino Yihowa mitto baxxino coye assi. Ilaalu guunxo wiliiltanno gedenna banqo beleqqanno gede assi. Mannahono, ‘Ani Yihowa Gibitsetenni fushshummoꞌne Maganoꞌneeti’ yii. Qoleno, ‘Ane agurranna wole maganna magansidhinoonte’ yee hajajinsa.

Maganu Isiraeelete wole honse hajajo woyi higge uyinsa. Mannuno lowo geeshsha waajje Muse togo yii: ‘Ati coyiꞌrinke; Maganu coyiꞌrinkero reyineemmo yine waajjinoommona.’

Gedensaannino Yihowa Muse, ‘Kawa anewa ilaala amo. Mannu ayirrisara hasiꞌreemmo higge borreessoommoha lame taalashsho kincho eemmohena’ yiisi. Konni daafira Muse xaano ilaala giddi. Ilaalu iima 40 barranna 40 hashsha keeshshi.

Maganu mannisira duuchcha higge uyinsa. Museno tenne higge borreessi. Qoleno Maganu Musera lame taaladda kinna uyisi. Tenne kinna aana mannisira coyiꞌrinota 10 higge Maganu umisi borreessino. Tenne higge Tonne Hajajooti yinanni.

Tini Tonne Hajajo lowo geeshsha dancha higgeeti. Ikkollana Maganu Isiraeelete uyinoti wole higgeno danchate. Tenne higge giddo mitte togo yitanno: ‘Yihowa Maganokki woꞌmu wodanikkinni, woꞌma hedokkinni, woꞌma lubbokkinninna woꞌma wolqakkinni baxi.’ Wole higge qolte, ‘Manna duuchchanka umikki gede assite baxi’ yitanno. Tini lamenti higge Yihowa mannisira Isiraeelete uyino higge giddo roortinota ikkitinota, Maganu Beetti Yesuusi Kiristoosi xawisino. Maganu Beettirenna isi rosiisinore haammatare albaange ronseemmo.