Buwanno Cita

Muse Midiyaami gobbara 40 diro heeꞌrino. Isi seenne adhe ooso ili. Mitto barra Muse Siina yinanni ilaali mule geꞌreewo allaaꞌle heeꞌre dhagge ikkanno coye lai. Hakkiicho buwanno cita lai, citu kayinni digiiramino. Muse laꞌꞌara shiqqi yiita citu giddonni togo yitanno huuro macciishshi: ‘Muse! Kawa higge shiqqi yitooti. Uurrootto dargi qullaawa ikkino daafira caammakki fushshiꞌri.’ Hatte yannara Yihowa Muse sokkaasinchu widoonni coyishiishanni no.

Muse waajjino daafira alba diphi. Hakkiinni Muse togo yitanno huuro macciishshi: ‘Israeele Gibitsete gobbara qarrante noo gara laoommo. Gibitsete manni anganni gatise dancha gobba eesseemmonsa. Mannaꞌya Gibitsete gobbanni fushshattohu ateeti.’ Hatte yannara Muse masinoha dilawannohe?

Muse Magano, ‘Mannu ayi soyinohe yiiero mayyoo?’ yee xaꞌmi. Maganu togo yee qoli: ‘Abirihaami Magani, Yisihaaqi Magani, Yaiqoobi Magani Yihowa soyinoe yii.’ Hakkiinni Muse ‘Mannu kuleemmonsare macciishshalla giwi?’ yee xaꞌmi. Yihowa Muse kaaꞌleemmohe yiino. Yihowa Muse ‘Angakkira noo siqqicho uulla tugi’ yiisi. Hakkiinni Muse siqqicho uulla tugita hamashsho ikkitu! Muse hamashshoho farro amadita galagalte siqqicho ikkitu. Yihowa Muse togo yii: ‘Konne malaate leellishittonsaro soommohehu ane ikkoommota affanno.’

Hakkiinni Muse Magano ‘Ani babbichaho’ yii. Yihowa togo yee qolisi: ‘Coyiꞌrattore ani kuleemmohe; qoleno rodiikki Aaroonino kaaꞌlahera soyemmohe.’ Muse Yihowa kaaꞌlannosita afino daafira, galtesinna oososi adhe galagale Gibitsete gobba haꞌri.