ROSO 02

Qullaawu Maxaafi Kaajja Hexxo Noonketa Kulanno

Attammoonnita

Xaa yannara batinyu manni qarru amadeennansa dadillanni, yaadanninna shettote giddo no. Ateno togoo qarri amade egenninohe? Miteekkite dhiwante woy shiidhe xissiisidhanni noottoha ikkara dandaanno. Hakko daafira, ‘Woyyitino heeshsho heeꞌnanni yanna dagga ikka?’ yite hedattoha ikkara dandaanno. Qullaawu Maxaafi tenne xaꞌmora qolanno dawaro jawaachishshannote.

1. Qullaawu Maxaafi konni kaꞌira hiittoo hexxo noonketa kulanno?

Qullaawu Maxaafi xaa yannara qarru batiꞌrinohu mayiraatiro kulanno. Ikkollana, kuni qarri baalunku muli yannara baꞌꞌannotano kulanno; kuni dancha duduwooti. Qullaawu Maxaafi “albillittete” yanna daafira kulannori “hexxo” heedhannohe gede kaaꞌlannohe. (Ermiyaasi 29:11, 12 nabbawi.) Qullaawu Maxaafi kulanno hexxo qarranke cincine heeꞌneemmo gede, xa nafa hagiirraamma ikkineemmo gedenna hegerera hagiidhinanni heeꞌneemmota huwanteemmo gede kaaꞌlitannonke.

2. Qullaawu Maxaafi albillitte hiittoo heeshsho heeꞌneemmota kulanno?

Qullaawu Maxaafi “reyo woy dadillu woy wiꞌla woy shetto kunni kaꞌa [heedhannokki]” yanna daggannota kulanno. (Yohaannisi Ajuuja 21:4 nabbawi.) Xaa yannara heeshsho qarra ikkitanno gede assinori lawishshaho, buxima, miico, dhibbunna reyo baꞌanno. Qullaawu Maxaafi mannu ooso albillitte uullate aana Gannatete hegerera hagiidhitanni heedhannota kulanno.

3. Qullaawu Maxaafi kulanno hexxo ammanatto gede kaaꞌlannoheri maati?

Batinyu manni dancha yanna dagganno yee hexxanno; kayinni hexxonsa woꞌmitannota addaxxa didandaanno. Qullaawu Maxaafi kulanno hexxo kayinni woꞌmase huluullammannire diafidhino. ‘Qullaawa Borro seekkine laꞌꞌanke [woy xiinxallanke],’ tenne hexxo addaxxate kaaꞌlitannonke. (Soqqamaasinete Looso 17:11) Qullaawa Maxaafa xiinxallittoro, Qullaawa Borro albillittete yanna daafira kultannori halaalehoronna teꞌee umikki buuxa dandaatto.

LEDDE XIINXALLI

Qullaawu Maxaafi albillitte ikkanno yee kulannohu danchu coyi giddo mito xiinxalli. Qoleno Qullaawu Maxaafi kulanno hexxo xaa yannara manna kaaꞌlitanni noo gara wodanchi.

Misilla: Xaa yannara mannu heeˈranno heeshsho, Qullaawu Maxaafi kulanno hexxo woˈmitanno woyite heeˈnanni heeshsho ledo heewisiisate kaaˈlitanno misilla. Tenne misilla woroonni lende leellinshoonni.

4. Qullaawu Maxaafi albillitte mittu qarrino nookkiha hegerera heeꞌneemmota kulanno

Konni woroonni noota Qullaawu Maxaafi kulanno hexxo lai. Tenne hexxo giddo ati roore baxoottori hiikkuriiti? Mayira?

Ati roore baxootto hexxo mule worroonni qummeeshshuwa nabbabbe; hakkiinni aante noo xaꞌmuwa hasaabbe:

Tini qummeeshshuwa kultannori kaaꞌlannoheha lawannohe? Maatekkinna jaallakkino tenne qummeeshshuwa affuro kaaꞌlitannonsaha lawannohe?

Hanni aantete kulloonnite gedee alamera heeꞌnanni heeshsho hedi:

MITTU MANCHINO . . .	MANNU BAALUNKU . . .
didadillanno, digeedhanno, woy direyanno.—Isayaasi 25:8.	reyino fiixinsa koye uullate aana reyotenni kaeenna hagiidhanno.—Yohaannisi 5:28, 29.
dixiwamanno, woy bisu xeꞌne nooha diꞌꞌikkanno.—Isayaasi 33:24; 35:5, 6.	dancha ordu fayyimmanna wedellimmate wolqa afiꞌranno.—Iyyoobi 33:25.
taashsho dihooganno.—Isayaasi 32:16, 17.	sagale duuwanno, injiino minira heeꞌranno, hattono hagiirsiisanno looso loosanno.—Faarso 72:16; Isayaasi 65:21, 22.
olunni digawajjamanno.—Faarso 46:9.	keere afiꞌre teese heeꞌranno.—Faarso 37:11.
alba iillinosiha busha coye qaage dixissiisiꞌranno.—Isayaasi 65:17.	hegerera dancha heeshsho heeꞌranno.—Faarso 37:29.

Dhiwamino qaaqqi fayyo ikke amasi goowira marmarame no.

Geedhino manchi wedellicha ikke gaaretenni akaakilte xiiwanni no.

5. Qullaawu Maxaafi kulanno hexxo xaa heeshshonkera nafa kaaꞌlitannote

Batinyu manni xaa yannara noo qarra laꞌꞌanno woyite hexxo mudhanno, woy hanqanno. Mitu manni woyyimma abbate gaaramanno. Qullaawu Maxaafi dancha yanna dagganno yee kulanno hexxo manna kaaꞌlitanni noo gara wodanchi. VIIDIYO laꞌe; hakkiinni, aante noo xaꞌmuwa hasaabbe.

VIIDIYO: Taashshote Xeꞌne Huneemma Yee Gaaramoomma (4:07)

Misilla: ‘Taashshote Xeˈne Huneemma Yee Gaaramoomma’ yitanno viidiyo misilla. 1. Raafika qaaqqo heedhe isehu gedee budi noonsa manni ledo qarme xinqidhanni no. 2. Raafika mite yite Yihowa Farciˈraasineha qoqqowu gambooshshe hadhu woyite, addi addi gaˈrenni dayino manni mitteenni gamba yee nooha laˈe lowo geeshsha hagiidhitino.

Laꞌnummo viidiyora, Raafikara dhiwinori maati?
Taashshote xeꞌne baꞌinokkiha ikkirono, ise Qullaawu Maxaafi kaaꞌlinosehu hiittoonniiti?

Qullaawu Maxaafi albillittete yanna daafira kulanno hexxo, hexxo mudhineemmokki gedenna qarranke cincineemmo gede kaaꞌlitannonke. Lawishsha 17:22 nna Roomu Sokka 12:12 nabbabbe; hakkiinni, aante noo xaꞌmuwa hasaabbe:

Qullaawu Maxaafi kulanno hexxo xaa heeshshokkira kaaꞌlitannoheha lawannohe? Hiittoonni?

MITU MANNI TOGO YAANNO: “Qullaawu Maxaafi albillittete yanna daafira kulannori haaqeete halchooti.”

Qullaawu Maxaafi yaannori halaale ikkinota meessa buuxiꞌra hasiissannohu mayira lawannohe?

XAPHISHSHA

Qullaawu Maxaafi albillitte hagiirsiissanno yanna daggannota kulanno; tenne afanke, hexxo heedhannonke gedenna xaa yannara qarranke cincineemmo gede kaaꞌlitannonke.