Qullaawu Maxaafi Darga Assiꞌrino Dhibbi Waadannonsare Kaaꞌlanno?

Qullaawu Maxaafi mayyaanno?

Ee kaaꞌlanno. Maganu, dhiwantino soqqamaasinesi daafira hedanno. Qullaawu Maxaafi mittu ammanamino manchire kulanni togo yaanno: “Kaaliiqi dhiwame goxinowa heeꞌreenna kaaꞌlannosi; fayyimmano qolannosi.” (Faarso 41:3) Darga assiꞌrino dhibbi waadannoheha ikkiro, aante nooti sase hedo cincite heeꞌratto gede kaaꞌlitahera dandiitanno:

1. Jawaante afiꞌrate huuccatto assiꞌri. Huuccatto assiꞌrittoro, ‘mannu hedora aleenni ikkinoha Maganu keere’ afiꞌratto; kuni keeri quwa saꞌe yaadattokki gedenna dandiite heeꞌratto gede kaaꞌlannohe.—Filiphisiyusi Sokka 4:6, 7.

2. Dancha danchare hedi. Qullaawu Maxaafi togo yaanno: “Hagiirraamu wodani mannimmate fayyimma aanno; dadillaamu wodani kayinni mannimma maniissanno.” (Lawishsha 17:22) Haariintenna osoꞌlite saꞌꞌate woꞌnaali; hatto assakki yaaddotenni beya afiꞌratto gede calla ikkikkinni fayyimmateno kaaꞌlitannohe.

3. Albillittete hexxora noohe ammana kaajjishiꞌri. Addu hexxo dhiwanu waadannoheha ikkirono, hagiirraamo ikkatto gede kaaꞌlitannohe. (Roomu Sokka 12:12) Qullaawu Maxaafi ‘“Dhiwamoommo” yaannoha anfannikki’ yanna daggannota kulanno. (Isayaasi 33:24) Hatte yannara, Maganu yannanke sayinse mala afa dandiitinokkiha darga assiꞌrino dhibba baalanka hursanno. Lawishshaho, Qullaawu Maxaafi geedhino manni wirro wedella ikkannota kulanni togo yaanno: “Manninaatisi bashshowa higanno; anje wolqasi galagalte daggannosi.”—Iyyoobi 33:25.

Qaagiishsha: Yihowa Farciꞌraasine Maganu kaaꞌlannonsata ammantannoha ikkirono, darga assiꞌrino dhibbi amadannonsa woyite xagisiꞌrate woꞌnaaltanno. (Marq 2:17) Ikkollana, mitte xaginsanni ogimma bande kulle tini woyyitanno diyineemmo; togoo hajo lainohunni mittu mittunku manchi woyyannosire umisi doodha hasiissannosita ammanneemmo.