Qullaawu Maxaafi Xaꞌmonna Dawaro
Yesuusi albillitte maa assanno?
Yesuusi 33 M.D. reye reyotenni kae iimira haꞌrino. Hakkiinni lowo yanna saꞌu gedensaanni, Nugusa ikke gashshara mootumma uyinoonnisi. (Daanieeli 7:13, 14) Albillitte Yesuusi Nugusimmate silxaanesi horoonsiꞌre alame woꞌmate aana salaame abbanno, hattono buxima hunanno.—Faarso 72:7, 8, 13 nabbawi.
Yesuusi Nugusa ikkinohura, bunshe baala hune uulla keereensanno
Yesuusi mannu ooso gashshanno wote lowoha dhaggete coye assanno. Isi Annisi uyinosi wolqanni mannu ooso galagalte guuta ikkitanno gede assanno. Hatte yannara mannu uullate aana horonta geedhikkinna reyikki hagiidhanni heeꞌranno.—Yohaannisi 5:26-29; 1 Qorontoosi 15:25, 26 nabbawi.
Yesuusi xa ma assanni no?
Yesuusi xaa yannara halaalunni iso harunsitannori loossanni nooha sabbakate looso marraꞌꞌanni no. Isi harunsaano Qullaawu Maxaafi Maganu Mangiste daafira mayyaannoro mannaho noowa marte kultanno. Yesuusi Maganu Mangiste uullate gashshoote hunta geeshsha rosaanosi loossanno looso irkisannota coyiꞌrino.—Maatewoosi 24:14; 28:19, 20 nabbawi.
Yesuusi addu Kiristaani songo horoonsiꞌre, manna woyyitino heeshshowa qole marraꞌꞌanni no. Qoleno konne manna tini alame baꞌanno wote gate sae Maganu abbannota haaro alame eanno gede assanno.—2 Pheexiroosi 3:7, 13; Ajuuja 7:17 nabbawi.