Mannaho “Dawaro Qola” Hasiissannonkehu Hiittoonniiti?
“Mittu mittunku manchira dawaro qola hasiissannoꞌne gara affinanni gede, coyidhinanni coyi ayewoteno nyammo nooha . . . ikko.”—QOL. 4:6.
1, 2. (a) Dancha xaꞌmuwa xaꞌma afidhino horo leellishshanno temokkiro kuli. (Umi misile lai.) (b) Kabbaade coyibba daafira hasaawa waajja hasiissannonkekkihu mayiraati?
MITTE higge mitte rodoo Yihowa Farciꞌraasincho ikkinokki minaannise ledo Qullaawu Maxaafi hasaawa hasaabbanni no. Minaannise mulla beetekiristaanete miila ikkella heeꞌrannoho. Lamunku hasaabbanni heedheenna, minaannise Sillaase ammanannota coyiꞌri. Tini rodoo Sillaase yaa mayyaatero hakkeeshshi geeshsha buuxinokkita huwattino daafira togo yite hayyotenni xaꞌmitusi: “Annu Maganoho, Beettuno Maganoho, qullaawu ayyaanino Maganoho, kayinni sase Magano ikkitukki mitto Maganooti yite ammanatto yaate?” Minaannise xaꞌmitinosiri dhagge ikkeennasi, “Deeꞌni, ani hatto yee diammaneemmo!” yee qoli. Hakkiinnino Maganu addinta ayetiro dancha gede hasaawa dandiitino.
2 Tini temokkiro, dancha xaꞌmuwa hayyotenni xaꞌma afidhino horo leellishshannote. Qoleno, kabbaade coyi umo lawishshaho Sillaase daafira, sioolete daafira woy Kalaqaanchu heeꞌra daafira hasaawa waajja hasiissannonkekkita huwachishshannonke. Yihowanna isi aannonke qajeelsha addaxxineemmoha ikkiro, ammansiissannotanna hasaawinseemmo manchi wodana kassi assitanno dawaro qola dandiineemmo. (Qol. 4:6) Hanni fullakkino soqqamaano togoo coyibba daafira hasaabbanno wote ma assitannoro laꞌno. Konni birxichira, (1) manchu hedosi fushshe coyiꞌranno gede assitanno xaꞌmo xaꞌmineemmo gara, (2) xiqisete assaawe heeshshi gotti asse hedanno gede assineemmo garanna, (3) hedonke xabbe leeltanno gede assanno lawishsha horoonsiꞌneemmo gara laꞌneemmo.
HEDOSI FUSHSHE COYIꞌRANNO GEDE ASSITANNO XAꞌMO XAꞌME
3, 4. Hasaawinseemmo manchi mayyee ammanannoro huwatate xaꞌmo xaꞌma hasiissannonkehu mayiraati? Lawishsha kuli.
3 Xaꞌmo xaꞌmanke hasaawinseemmo manchi mayyee ammanannoro huwatate kaaꞌlitannonke. Tini hasiissannota ikkitinohu mayiraati? Lawishsha 18:13 togo yitanno: “Aye manchino coye macciishshikki dawaro qolannoha ikkiro, tini gowwimmatenna saalfachishshannote.” Ee, Qullaawu Maxaafi yaannore xawinsammora albaanni hasaawinsoommo manchi mayyee ammanannoro buuxate woꞌnaala hasiissannonke. Hakkuyi kaꞌa, manchu horonta ammaninokki coye soꞌro ikkinota buuxisate lowo yanna gundammora dandiineemmo!—1 Qor. 9:26.
4 Lawishshaho sioolete daafira hasaambanni heeꞌnoommo yine hendo. Sioole giirammanni bayichooti yee ammanannohu baalanka manna diꞌꞌikkino. Batinyu manni sioolete yaa Maganuwiinni xeertiꞌrate yee ammananno. Hakko daafira togo yine xaꞌma dandiineemmo: “Mannu sioolete daafira duuchare yaannona, ati sioole maati yaatto?” Yaannore macciishshinummo gedensaanni, Qullaawu Maxaafi tenne hajo daafira mayyaannoro huwatanno gede konne mancho kaaꞌla dandiineemmo.
5. Xaꞌmo xaꞌma mittu manchi ammanino coye mayira ammaninoro afate kaaꞌlitannonkehu hiittoonniiti?
5 Hayyotenni xaꞌmo xaꞌma mittu manchi ammanino coye mayira ammaninoro afateno kaaꞌlitannonke. Lawishshaho soqqanshote aana mittu manchi Maganu no yee ammanannokkita kulankera dandaanno. Kuni manchi heeshsho dagginohu suutu soorronniiti yee ammananno yine hendammora dandiineemmo. (Far. 10:4) Ikkollana, mitu manni iillinonsahu woy wolootaho iillanna lainohu buutote qarrinni kainohunni Magano ammana agurino. Togoo qarranna rakko hedanno wote shaqqadu Kalaqaanchi no yee ammana qarrissansara dandiitanno. Hakko daafira, qaete anni Maganu no yee ammanannokkita kulinkero, “Tini bashshonni noohe hedooti?” yine xaꞌma dandiineemmo. Deeꞌni yee qolinkero, Maganu noota huluullamanno gede assinosire kulannonke gede xaꞌma dandiineemmo. Qolanno dawaro iso ayyaanaamittetenni kaaꞌlate roore woyyitino doogo huwanteemmo gede kaaꞌlitankera dandiitanno.—Lawishsha 20:5 nabbawi.a
6. Xaꞌmo xaꞌminummo gedensaanni ma assa hasiissannonke?
6 Xaꞌmo xaꞌminummo gedensaanni, manchu qolanno dawaro seekkine macciishshanna hedosi ayirrinseemmota leellisha hasiissannonke. Lawishshaho, mittu manchi dano iillitanna laino daafira shaqqadu Kalaqaanchi no yee ammanannokkita coyiꞌrara dandaanno. Maganu noota tajetenni kullammosira albaanni, iso mararanna sheshifachisha, hattono qarru iillannonkehu mayiraati yine xaꞌma soꞌro ikkitinokkita kula hasiissannonke. (Imb. 1:2, 3) Cincankenna baxillunni hasaawisanke lede afa hasiꞌranno gede assitasira dandiitanno.b
XIQISETE ASSAAWE HEESHSHI GOTTI ASSE HEDANNO GEDE ASSE
Soqqanshonkenni guma afiꞌneemmohu ma assinummorooti? (Gufo 7 lai)
7. Roore wote soqqanshote guma afiꞌneemmohu ma assinummorooti?
7 Hanni qaete anni Qullaawa Borro yitannore heeshshi gotti asse hedanno gede assineemmo gara laꞌno. Soqqanshote horoonsiꞌneemmohu qaru massaari Qullaawa Maxaafaati. Kuni Maxaafi “danchu loosi baalunkura qodhinoommorenna woꞌmunni woꞌma fullankoommore ikkineemmo gede” kaaꞌlannonke. (2 Xim. 3:16, 17) Roore wote soqqanshote guma laala dandiineemmohu batinye xiqise horoonsiꞌnoommo daafira ikkikkinni, hasaawinseemmo manchi nabbamboommo xiqisubba yitannore heeshshi gotti asse hedanno gede assinummorootinna xiqisete tiro xawinsummorooti. (Hawaariyaatete Looso 17:2, 3 nabbawi.c) Tenne lawishshunni kulate, hanni aante noo ikkituwa laꞌno.
8, 9. (a) Yesuusi Maganu ledo taaloho yaanno manchi heeshshi gotti asse hedanno gede kaaꞌla dandiineemmoti mitte doogo hiitteeti? (b) Ati tenne hajo mannaho buuxisate horoonsidheenna dancha guma abbitinoti wole doogo no?
8 Ikkito 1: Soqqanshote aana Yesuusi Maganu ledo taaloho yaanno manchinni xaandummo. Tenne hajo daafira xawisate hiittee xiqisubba horoonsiꞌra dandiineemmo? Yohaannisi 6:38 fanne hasaawinseemmo manchi nabbawanno gede koyisa dandiineemmo; tenne xiqise aana Yesuusi togo yiino: “Ani iiminni dawoommohu umiꞌya fajjo assammora ikkikkinni soyinoehu fajjo assammoraati.” Hakkiinnino togo yaa dandiineemmo: “Yesuusi Magano ikkiro iso iiminni uullara soyinohu ayetiyya? Yesuusa soyinohu iso dirooranno? Qoleno, soyannohu soqqamannohura aliidiha ikkinoti egennantinote.”
9 Hawaariya Phaawuloosi Yesuusi reyotenni kai gedensaanni Maganu assinosire kulanni Filiphisiyusi 2:9 aana yiinoreno nabbawa dandiineemmo. Phaawuloosi togo yiino: “Maganu lowo silxaane oye gotti gotti assisi; wolu baalunku suꞌmira aleenni ikkino suꞌmano shaqqillunni uyisi.” Hasaawinseemmo manchi tini xiqise yitannore assaawanno gede kaaꞌlate togo yine xaꞌma dandiineemmo: “Yesuusi reyara albaanni Maganu ledo taalo ikkiro, Maganu gedenaanni qole roore silxaane uyisi wote Magano diroori yaateyya? Kayinni Magano roorannohu nooni?” Kuni manchi Maganu Qaale ayirrisannohanna suwashshu wodani noosiha ikkiro, konni garinni hasaawisanke lede afate kaꞌꞌanno gede assitasira dandiitanno.—Looso 17:11.
10. (a) Cubbaataammu giirantanno yee ammananno mancho kaaꞌla dandiineemmohu hiittoonniiti? (b) Sioolete giira no yaanno manna hasaawisse dancha guma afiꞌroottoti wole doogo no?
10 Ikkito 2: Mittu qaete anni bushu manni hegere geeshsha giirate giddo giiramannokkita ammana qarrissusi. Kuni manchi giirammanni base no yee ammanannohu bushuullu assitanno bunshera qaxxaꞌꞌama hasiissannonsa yee hedanno daafira ikkara dandaanno. Togoo hedo noosi manchi heeshshi gotti asse hedanno gede kaaꞌla dandiineemmohu ma garinniiti? Umihunni, bushuullu qaxxaꞌꞌamansa gattannokkita huwachisha dandiineemmo. (2 Tes. 1:9) Hakkiinnino, cubbaataammu adhitanno qorichi reyo ikkinota kultannota Kalaqo 2:16, 17 nabbawanno gede assa dandiineemmo. Addaami cubbo loosasi mannu baalunku cubbaataamma ikke ilamanno gede assitinota xawinsammora dandiineemmo. (Rom. 5:12) Ikkollana, Maganu giirate qorichi daafira coyiꞌrinori nookkita xawinse kulleemmosi. Hakkiinnino togo yine xaꞌma dandiineemmo: “Addaaminna Heewani cubbo loossuro hegerera giirantannoha ikkoommero, Maganu tenne balaxe dikulannonsa?” Aanchine Kalaqo 3:19 nabbambeemmo; tini xiqise, Addaaminna Heewani cubbinsara adhitanno qoricha kultannoha ikkirono giiramate daafira yitannori dino. Addaami bushsha higatto yinoonnisi. Togo yine xaꞌma dandiineemmo: “Addaami giirammanni bayicho haꞌrara nooha ikkiro, iso bushsha higatto yaa gara ikkitanno?” Hasaawinseemmo manchi halashshe assaawannoha ikkiro, togoo xaꞌmo tenne hajo daafira roore hedanno gede assitasira dandiitanno.
11. (a) Danchu manni baalunku iimira haꞌranno yaanno manna kaaꞌla dandiineemmoti mitte doogo hiitteeti? (b) Iimira haꞌrate daafira manna hasaawisse dancha guma afiꞌroottoti wole doogo no?
11 Ikkito 3: Soqqanshote aana heeꞌne, danchu manni baalunku iimira haꞌranno yee ammananno manchinni xaandummo. Tini ammanasi Qullaawa Maxaafa umisi doogonni tidhanno gede assitinosiha ikkara dandaanno. Lawishshaho, konni manchira Ajuuja 21:4 nabbambammora kaꞌnoommo yine hendo. (Xiqise nabbawi.d) Kuni manchi tenne xiqisera kulloonni atooti iimira haꞌne afiꞌnanniho yee hedara dandaanno. Heeshshi gotti asse hedanno gede kaaꞌlate ma assa dandiineemmo? Taje ikkitannota wole xiqisubba horoonsiꞌrantenni, hattee xiqisenkura noo assaawe aana illachisha dandiineemmo. Tini xiqise “reyo layinkita diheedhanno” yitanno. ‘Mittu coyi layinkita diheeꞌranno yinannihu umo dinooha ikkirooti?’ yine xaꞌminammora dandiineemmo. Ee yee qolara dandaanno. Hakkiinnino, reyo iima horonta heedhe egentinokkitanna mannu reyannohu koye uullate aana ikkinota qummi assinammosira dandiineemmo. Hakko garinni, Ajuuja 21:4 coyidhanni noohu albillitte uullate aana heeꞌranno atooti daafiraati.—Far. 37:29.
HEDO XABBE LEELTANNO GEDE ASSANNO LAWISHSHA HOROONSIDHE
12. Yesuusi lawishsha horoonsiꞌrinohu mayiraati?
12 Yesuusi soqqanshosi yannara xaꞌmuwa calla ikkikkinni, lawishshuwano horoonsiꞌrino. (Maatewoosi 13:34 nabbawi.e) Yesuusi horoonsiꞌrino lawishshuwa macciishshannosi manniti giddiidi hedo xawo fultanno gede assitino. (Mat. 13:10-15) Qolteno, Yesuusi rosiisino rosi baxisannohanna hawamannokkiha ikkanno gede assitino. Ninkeno rosiinseemmo wote lawishsha horoonsiꞌra dandiineemmohu hiittoonniiti?
13. Maganu Yesuusa roorannota lawishshunni rosiisa dandiineemmohu ma garinniiti?
13 Shota lawishsha horoonsiꞌra roore woyyate. Lawishshaho, Maganu Yesuusa roorannota kulate aane noo lawishsha horoonsiꞌra dandiineemmo. Maganuno Yesuusino mereeronsa noo fiixooma kulate maatete mereero heeꞌranno fiixooma horoonsidhinota kula dandiineemmo. Maganu Yesuusa Beettoꞌyaati yiino, Yesuusi qole Magano Annaꞌyaati yiino. (Luq. 3:21, 22; Yoh. 14:28) Hakkiinnino qaete anna togo yaa dandiineemmo: “Lamu manchi mimmitu ledo taalo ikkitinota kulattoera hasiꞌrittoro, mittu mini manni giddo ayenna aye lawishsha assite kulattoe?” Manchu lame roduuwa roorenkanni lakkuwa yee qolara dandaanno. Hatto yee qoliro, kuni tennera malino lawishshaati yaa dandiineemmo. Hakkiinnino togo yine xaꞌma dandiineemmo: “Ninke nafa konne lawishsha horoonsiꞌra dandiinummona, Bayiru Rosiisaanchi Yesuusi wonaatiro konne lawishsha dihoroonsiꞌranno? Isi kayinni Maganu Annasi ikkinota coyiꞌrino. Yesuusi konni garinni Maganu dirunnino silxaanetennino iso roorannota qummi assino.”
14. Maganu manna giiratenni qaxxaasara Daawuloosira silxaane aanno yee heda ikkannokkire ikkitinota hiikkunni lawishshinni rosiisa dandiineemmo?
14 Hanni wole lawishsha laꞌno. Mitu manni cubbaataamma giiratenni qaxxaasanno gede “silxaane” Sheexaaneho uyinoonni yee ammananno. Mittu oosote anni, Maganu bushuulle giiratenni qaxxaasara Sheexaane woranno yee heda ikkannokkire ikkitinota huwatanno gede kaaꞌlate lawishsha horoonsiꞌra dandiineemmo. Togo yaa dandiineemmo: “Lawishshaho, beettikki lowo geeshsha finqile bushare calla assannoha ikkino yine hendo. Hatto ikkiro, ma assatto?” Manchu qole beettosi seejjannota kulara dandaanno. Beettisi bushare assa aguranno gede duucha hige seejjara dandaanno. (Law. 22:15) Hakkiinnino, beettu tenne baala seejjo adha giwannoha ikkiro ma assannoro anna xaꞌma dandiineemmo. Togoo wote duucha annuwa beettonsa qaxxaassannota kultanno. Aanchine togo yaa dandiineemmo: “Beettokki togo finqilanno gede assinohu mittu bushu manchi noota afittoro ma assattoyya?” Annu konni manchira lowo geeshsha hanqannoti dihuluullissannote. Hedonke xabbe leeltannosi gede assate togo yaa dandiineemmo: “Beettokki finqilanno gede assinota affanni heedhenni, beettokki qaxxaasara hakko manchinkura uyiꞌrattoni?” Manchu deeꞌni yee qolannoti egennantinote. Hatteente gede Maganu, Daawuloosi soꞌrisiiseenna bunshe assino manna qorichishate Sheexaane dihoroonsiꞌranno!
QUWA SAꞌINOKKI HEDO HEEDHOꞌNE
15, 16. (a) Sabbankeemmo manni baalunku dancha duduwo maahoyye adhanno yine heda hasiissannonkekkihu mayiraati? (b) Soqqanshote dancha guma afiꞌrate baxxitino dandoo noonkere ikka hasiissannonke? Xawisi. (“Dawaro Qolate Kaaꞌlannonke Birxicho” yitanno saaxineno lai.)
15 Sabbankeemmo manni baalunku Maganu Mangiste sokka maahoyye adhannokkita anfoommo. (Mat. 10:11-14) Dancha xaꞌmo horoonsiꞌneennano, xiqise yitannore dancha gede xawinseennano, hattono kaajja lawishsha horoonsiꞌneennano adhannokki manni heeꞌranno. Yesuusi uullate aana taalle noosikki Rosiisaancho ikkirono, isi rosiisino roso maahoyye yee adhino manni shiimaholla!—Yoh. 6:66; 7:45-48.
16 Rosiisate baxxitino dandoo noonkekkihu gede ikke macciishshaminkero nafa, soqqanshonkenni dancha guma afiꞌra dandiineemmo. (Looso 4:13) Maganu Qaali “hegere heeshsho afiꞌrate . . . gara ikkitinoti wodanu dooꞌꞌo noonsari baalunku” dancha duduwo macciishshite adhitannota kulannonke. (Looso 13:48) Konni daafira, uminkerano ikko Maganu Mangisteha dancha duduwo kulleemmonsa mannira quwa saꞌinokki hedo heedhonke. Yihowa aannonke qajeelshi ninkerano macciishshannonke mannirano kaaꞌlannota anfe seekkine horoonsiꞌno. (1 Xim. 4:16) Yihowa “mittu mittunku manchira dawaro” qola dandiineemmo gara huwanteemmo gede kaaꞌlannonke. Aanchine laꞌneemmonte gede, soqqanshote dancha guma afiꞌneemmoti mitte doogo manna danchummatenni amadate.
a Lawishsha 20:5: “Manchu wodani hedo qilete wayi gedeeti; wodancha noosi manchi kayinni hinkiile fushshanno.”
b Birra 1, 2009 Agarooshshu Shaera (Amaaru Afoo) fulinoha, “Kalaqaanchu Noota Ammana Dandiinanni?” yaanno birxicho lai.
c Hawaariyaatete Looso 17:2, 3: “Phaawuloosi rosisi gede insawa ei; Qullaawa Borro giddonni qummi assanni sase sambata insa ledo hasaawi. Kiristoosi qarramanna reyotenni kaꞌꞌa hasiissannosita xawisanninna taje shiqishanni, ‘Ani kulanni noommoꞌnehu kuni Yesuusi isi Kiristoosiiti’ yiinsa.”
d Ajuuja 21:4: “Hindiiddo baalanta illensa aaninni feyanno, reyono layinkita diheedhanno, wiꞌla woy raare woy xisso higgeno diheedhanno. Konni albaanni noo coyibba saꞌino.”
e Maatewoosi 13:34: “Yesuusi gamba yiino mannira konne baalanka coye lawishshunni kulinsa. Isinni lawishshu nookkiha kulinonsari dino.”