AANIIDI QOOLIHA COYI UMO | MAGANU WAAGAHO KIIRANNOHEHA LAWANNOHE?
Maganu Seekke Egenninohe
“Yihowa, ati marammarte laittoe; qolteno afittoe.” —FAARSO 139:1.
“Illekki amaꞌya godowira noo mannimmaꞌya nafa laꞌino.”—FAARSO 139:16
MITU MANNI TENNE HULUULLAMANNOHU MAYIRAATI? Batinyu mannira, Maganu manna cubbaataammanna battaamma ikkino gede asse calla laꞌꞌannoha lawannonsa. Cinqate amaddinoseti Kendiira, Maganu wodho agadhate guuta hoogasenni kainohunni alba iseneeto lowo geeshsha bushiishshanno. Hakko daafira ise, “Huuccatto assiꞌra agurumma” yitino.
MAGANU QAALI MAYYAANNO? Yihowa guuntete xeꞌnekki calla laꞌꞌa agure addu ayimmakki huwatanno. Qullaawu Maxaafi togo yaanno: “Isi kalaqammoommo gara seekke afino; qoleno bushsha ikkinoommota qaaganno.” Hakkiinni saeno, isi “cubbinke garinni” diqolannonke; hatteentenni, maaro eꞌneemmo wote shaqqillunni gatona yaannonke.—Faarso 103:10, 14.
Hanni umi birxichira qummi assinihu Isiraeelete nugusi Daawiti lawishsha assine laꞌno. Isi Magano huucciꞌranni togo yiino: “Illekki amaꞌya godowira noo mannimmaꞌya nafa laꞌino; hatti mannimmaꞌya gudisante balaxxe maxaafikkira borreessantino . . . Magano, marammarie, wodaniꞌya garano afi.” (Faarso 139:16, 23) Daawiti soꞌrannoha mito wote isinni kabbaade cubbo loosinoha ikkirono, Yihowa wodanasi lae maaro easi huwatannota dihuluullamino.
Yihowa ate afinohe manni baalunkunni roore seekke egenninohe. Qullaawu Maxaafi, “Mannu illete leellannore laꞌꞌanno; Yihowa kayinni wodanaho noore laꞌꞌanno” yaanno. (1 Saamueeli 16:7) Maganu sirchunni ragiꞌroottori, lossinoonnihe gari, heeꞌratto qooxeessinna akatikki ayimmakki gara wossaninota afino. Soꞌrattoha ikkirono, hiittoo mancho ikkate sharrantanni noottoro isi laꞌꞌanno; qoleno sharrokki naadanno.
Addaho, Maganu ‘addu ayimmakki’ qonqolche egennino; ikkina, tenne egenno ate sheshifachishate horoonsiꞌrannohu hiittoonniiti?