Maganoho Qarrikki Leellannosi?

KALAQAMUNNI MAA RONSEEMMO?

Mannu ooso mereero heeꞌranno fiixoomi baalunkunni roorinohu mimmito lawanno lakkuwi mereero noo fiixoomaati. Insara baxxino xaadooshshi noonsa. Mitu lakkuwi isinni “kuꞌu coyiꞌrinore wolu rahe huwata dandaannota” Nansii Segaali yinanniti Lakkuwu Xiinxallo Uurrinsha sooreette xawissino; qoleno ise umise lakkittete. Mitte mancho isenna lakkitte rodoose mereero noo aantere coyidhanni “Mimmitu daafira gudinse anfoommo yaa dandiinanni” yitino.

Lakkuwu mimmitu hedo wodanchate dandoo afiꞌrinohu ma garinniiti? Xiinxallo leellishshanno garinni mittu gari lakkuwi mereero togoo mittimma heedhanno gede lophino qooxeessi, hattono anninsanna amansa kaaꞌlinoha ikkirono, hatto ikkanno gede assinohu qaru korkaati kayinni kuri lakkuwi kalaqamino garaati.

HANNI HEDI: Konne dhagge ikkanno looso loosino Kalaqaanchi, ninke mitti mittinke kalaqammoommo gara seekke afinoti dihuluullissannote. Konnira faarsaasinchu Daawiti togo yiino: “Amaꞌya godowi giddo xaadisse seekkoottoehu ateeti. . . . Miqqaꞌya seekkantanni heedheenna, amaꞌya godowi giddo sunuutunni xaaddanni heedheenna, hakkiicho goꞌle lophanni heeꞌreenna ati afoottoe. Ilamammora albaanni afoottoe.” (Faarso 139:13, 15, 16) Kalaqammoommo gara woꞌmunni woꞌma afinohu Magano callaho; qoleno isi akattanke seekkanno woy bushshanno gede assinoha heeshshonke giddo iillinonke coye seekke afino. Maganu kalaqammoommo gara seekke afasi, ninke daafira hiliri gatikki egenninota leellishshanno.

QULLAAWU MAXAAFI MAGANU EGENNO DAAFIRA MAYYAANNO?

Daawiti togo yee huucciꞌrino: “Kaaliiqaꞌya, fonqolte laoottoe. Haꞌreemmowanna fooliishshiꞌreemmowa laꞌꞌatto; loosoꞌya baala egennootto. Hedeemmore coyiꞌrummokkinni balaxxe afatto.” (Faarso 139:1, 2, 4) Qoleno Yihowa giddiidi hedonkenna wole agurina ‘halchonke’ nafa afino. (1 Duduwo 28:9; 1 Saamueeli 16:6, 7) Tini qummeeshshuwa Yihowa daafira maa rosiissannonke?

Huuccatto assiꞌneemmo woyite hendeemmorenna giddonketa coyiꞌne fushshira hoongummoro nafa, Kalaqaanchinke assineemmore calla ikkikkinni hakkonne coye mayira assineemmoro afanno. Qoleno wodaninke halchannore baala assate dhuku ikka hooginkero nafa, isi dancha coye assa hasiꞌneemmota wodanchanno. Wodaninke giddo baxille worinohu iso ikkino daafira, baxillunni kaꞌne hendeemmota giddiidi hedonke afa hasiꞌranno, isinni, hedonke wodanchate quqquxamanno.—1 Yohaannisi 4:7-10.

Qullaawu Maxaafi sheshifachishannonke

• “Mootichu ille keeraanote widira higge laꞌanno; maccasino huuccattonsa macciishshate faꞌnante no.”—1 PHEEXIROOSI 3:12.

• Maganu togo yee qaale eino: “Rosiiseemmohe; haꞌratto doogono kuleemmohe; amaaleemmohe; illeꞌya ate aana woreemmo.”—FAARSO 32:8.

MAGANU SHAQQADOHO

Maganu heeꞌnoommo garanna hedonke wodanchannota afanke qarra qeelate kaaꞌlitannonke? Hanni Nayijeeriyaho heedhannote Aana lawishsha laꞌno. Ise togo yitino: “Hexxo mudheemma gede assannori iillinoe daafira, heeshshotenni heeꞌra halchinannire ikkitinokkiha lawinoe. Qaaqqoꞌya hayidirosefalesi (surrete giddo wayi duꞌnama) yinanni dhibbi amadinose; hakkiinni ane unuunu kaansere amaddeennae dare gopha, hattono kemotirappiiyinna radiyotirappiiyi yinanni hikkiminna akkaꞌma hasiissannoeta kulloonnie; qoleno minaanniꞌya lubbote dino. Qaaqqoꞌya hospitaalete goxisire heeꞌre, ani umiꞌya hospitaalete akkaꞌma lowo geeshsha qarra ikkitinoe.”

Aana konne qarra dandiitanno gede kaaꞌlinoseri maati? Ise togo yitino: “‘Mannu hedora aleenni ikkinohu Maganu keeri, wodanaꞌnenna hedoꞌne agaranno’ yitannota Filiphisiyusi Sokka 4:6, 7 noo hedonna wole qummeeshshuwa hiinceemma. Konne qummeeshsha qaagumma kiiro, Yihowa ani aneneeto afoommahunni roore afinoeti leeltannoe daafira, Isi ledo muli jaaloomi nooeta hedeemma. Qoleno Kiristaanu songora noori ammanate roduuwiꞌya baasa jawaachishshinoe.

“Xaano fayyimmate qarri nooeha ikkirono, qaaqqoꞌya kayinni beya afidhino; anerano woyyinoe. Yihowa mulenke noo daafira, qarru iillannonke woyite hexxo dimudhineemmo. Yaiqoobi 5:11 togo yitanno: ‘Cincite uurritinore, “Baꞌraadhinoreeti” yineemmonsa. Iyyoobi cincino gara macciishshitinoonni. Mootichuno goofimarchoho assinosiha dancha coye affinoonni. Kunninni Mootichu sao agurannohanna mararannoha ikkinota buuxxinoonni.’” Yihowa Iyyoobi noo gara seekke afino; ninkeno Maganu iillannonke qarra baala afannota addaxxa dandiineemmo.