AANIIDI QOOLIHA COYI UMO | MAGANU WAAGAHO KIIRANNOHEHA LAWANNOHE?
Maganu Sheshifachishannohe
“Dadillitinore sheshifachishanno Magani, Tito daanni sheshifanteemmo gede assinonke.” —2 QORONTOOSI 7:6.
‘Maganu Beetti baxinoe hattono ane daafira yee isonooto sayise uyino.’—GALAATIYA 2:20
MITU MANNI TENNE HULUULLAMANNOHU MAYIRAATI? Mitu manni shesho lowo geeshsha hasiisse noonsa wote nafa, Magano qarranke tirinke yee huucciꞌra meessira roorsiꞌra ikkitanno yee hedanno. Raakeeli yinanni mancho togo yitino: “Alamete aana nooha kiirre gundannikki mannanna iillannonsaha buutote qarra laeemma wote, ane mitiimma garita diꞌꞌikkitino yee hedeemma daafira Magano kaaꞌlo xaꞌmiꞌrate hobbi ruxxi yeemma.”
MAGANU QAALI MAYYAANNO? Maganu wonanni mannu ooso dhagge ikkanno garinni kaaꞌlanna sheshifachisha jammare no. Uullate aana noo manni baalunku cubbo ragiꞌrino; yaano Maganu wodho agadhate guuta hoogino. Ikkirono, Maganu “baxinonke [daafira] cubbinke diwamanno gede Beettosi [Yesuusi Kiristoosi] soyino.” (1 Yohaannisi 4:10) Maganu, Yesuusi wodote kakkalo ikke reyanno gede asse cubbinkera maaro afiꞌneemmo gede, keeraanchu tiiꞌꞌi heeꞌrannonke gedenna salaame woꞌmitinote haaro alamera heeꞌrate hexxo heedhannonke gede assino.a Ikkina tini kakkalo mannu ooso baalate jimilunni shiqqinotenso, Maganu atera addinni assaawannota leellishshannote?
Hanni hawaariya Phaawuloosi lawishsha assine laꞌno. Yesuusiti wodote kakkalo wodanasi kakkayissino daafira isi togo yee borreessino: “Heeꞌreemmohu, baxinoehunna ane daafira yee isonooto sayise uyinohura Maganu Beettira nooe ammananniiti.” (Galaatiya 2:20) Hige Yesuusi reyinohu Phaawuloosi Kiristaancho ikkara albaanniiti. Ikkirono, Phaawuloosi tenne kakkalo isira gilletenni uyinoonni elto gede asse laino.
Yesuusiti wodote kakkalo Maganu aterano gilletenni uyino eltooti. Tini elto Maganu albaanni lowo waagi nooheta leellishshanno. Qolteno, “danchu loosinna qaali baalunkura jawaata ikkatto gede hegere sheshonna dancha hexxo” heedhannohe gede assitannohe.—2 Teselonqe 2:16, 17.
Kayinni Yesuusi heeshshosi wodo asse uyinohu 2,000 diro meddi yitanno yanna albaanniiti. Ikkina xaa yannara Maganu ate ledo fiixooma hasiꞌrannota leellishannori maati?
a Yesuusite wodote kakkalore ledde afate, Yihowa Farciꞌraasine qixxeessitinoha Qullaawu Maxaafi Addinta Mayyee Rosiisanno? yaanno maxaafa fooliishsho 5 lai.